Éxodo 22
22
Tembiapoukapy ñemonda rehegua
1Oimeraẽ omondáva guéi térã ovecha ojuka hag̃ua térã ovende hag̃ua, upe guéi rehe opagava’erã 5 guéi, ha pe ovecha rehe irundy ovecha.
2Pe mondahápe ojejohu ramo omondahápe peteĩ ógape, ha ojekutu ramo ichupe ha omano, pe ikutuharépe ndojehaviraiva’erã omano haguére pe mondaha.
3Ha arakuépe ramo katu, pe oporojukava’ekuépe ojehavirava’erã oporojuka haguére. Pe mondaha katu omyengoviapaite jevyva’erã imondapyre; ha ndoguerekói ramo mba’eve omyengovia hag̃ua, oñevendeva’erã ichupe pe mba’e omondava’ekue rehe.
4Ha ojejohu ramo ipoguýpe peteĩ tymba omondava’ekue, ha oikove gueteri, taha’e guéi, térã búrro, térã ovecha, omyengoviava’erã mokõime.
5Oimeraẽva omongaru ramo hymba ñúme térã parraltýpe ha hymba oike ramo hapicha kokuépe, upéva omyengoviava’erã ikokue térã iparralty járape umi kóga’a ombyai térã ohundiva’ekue ikóga’a iporãvévagui.
6Peteĩ ohapy ramo ikokue, ha pe tata ohupity pe ñuatĩndy oĩva ikokue rembe’ýpe ha ohasa hapicha kokuépe, ha’e omyengoviapava’erã pe tata ohundiva’ekue hapicha kokuére, taha’e trígo térã ambue ñemitỹngue.
7Oimeraẽva ome’ẽ ramo hapichápe pláta térã imba’erepy oñongatu hag̃ua, ha oñemonda ramo hógagui, pe mondaha omyengovia jo’ava’erã ojejohu ramo ichupe.
8Ha ndojejohúi ramo avavépe, pe mba’e jára ogueraháta pe oñongatúvape mbojovakehára rendápe, ojehecha hag̃ua ha’e voi oñemomba’e hapicha mba’erepy rehe.
9Opaichagua ñemondapyre, guéi, térã búrro, térã ovecha, térã ao ha opaichagua mba’e kañyngue rehe, oĩ ramo he’íva: Kóa che mba’e, mokõivéva ojegueruva’erã mbojovakehára rendápe; ha ha’e he’íta mávapa oñemohembiapo vaíra’e, ha upéva ohepyme’ẽ jo’ava’erã hapichápe.
10Oimeraẽva ome’ẽ ramo hapichápe ibúrro térã iguéi, ijovecha térã oime haichagua hymba oñangareko hag̃ua, ha ou ramo omano térã ikarẽmba ramo, térã oñemonda ramo avave ohecha’ỹ rehe;
11mokõivéva toñe’ẽme’ẽ Ñanderuete renondépe, ndopokói hague hapicha mba’erepy rehe; ha pe tymba jára ogueroviaiteva’erã ha ambue ndohepyme’ẽiva’erã hese mba’eve.
12Ha oñemonda ramo ichugui, omyengoviava’erã hymba repy ijárape.
13Ha oime ramo mymba ñarõ saite ogueraha ichugui togueru hembyre ohechauka hag̃ua peichaha, ha ndohepyme’ẽmo’ãi pe mymba ñarõ oguerahava’ekue rehe.
14Ha oimeraẽva oiporu ramo hapicha rymba, ha ikarẽ vaipa térã omano ha noĩri upépe ijára, ohepyme’ẽva’erã hese ijárape.
15Ha ijára oĩ ramo upépe, ndohepyme’ẽiva’erã hese, ha ojeporuka ramo pirapire rehe, ijárape oñeme’ẽva’erã pe jeporuka repykuénte.
Tembiapoukapy poriahuvereko reheguáva
16Oimeraẽ ombotavýva peteĩ kuñataĩ imarã’ỹvape ha oiko ramo hendive, ome’ẽva’erã hese pe menda repy ha omendava’erã hese katuete.
17Ha itúva nome’ẽséi ramo, ha’e ome’ẽva’erã hese pirapire kuñataĩ imarã’ỹva menda repy ovale háicha.
18Kuña paje apoha nderehejaiva’erã oikove tetãpýpe.
19Oimeraẽ oikóva tymba ndive kuimba’e ha kuña ramoguáicha, omanova’erã.
20Oikuave’ẽva kuave’ẽmby ambue jarakuérape, ndaha’éiva ramo Ñanderuetépe, ojejukava’erã.
21Nerembotavyiva’erã ni ndereipy’apyiva’erã tetã ambueyguápe, peẽ voi peikova’ekue avei tetãme ambuépe.
22Ani pejopy imenave’ỹvape (viúda) ni ityre’ỹvape.
23Nde reipy’apy ramo ichupekuéra, ha ha’ekuéra omba’ejerure ramo chéve, añetehápe Che ahendúta imba’ejerure;
24ha che pochy hendýta ha pojukáta kysepukúpe ha pene rembirekokuéra naimenamo’ãvéima ha pende ra’ykuéra ityre’ỹmbáta avei pendehegui.
25Reiporuka ramo pirapire che retãygua mboriahúpe nendive oikóvape, ndereikomo’ãi hendive mba’e pe’a reiha ramo, ndereiporukaiva’erã ichupe hepy rehe (interes reheve).
26Reraha ramo nde rapicha ahoja reiporuka haguére ichupe peteĩ mba’e, kuarahy oikévo reme’ẽ jevyva’erã ichupe imba’éva.
27Péva añoitégui ijahoja oñu’ã hag̃ua hete, mba’e rehevépa okéta. Ha ha’e omba’ejerure asy ramo chéve, Che ahendúta, Che aiporiahuverekógui ichupe.
28Nereñe’ẽ vairiva’erã mbojovakehára rehe, ni neremaldeciriva’erã ne retã ruvichápe.
29Ndereguerekoiva’erã are ne ñemitỹ’a ypykue ha nde parral rykue ypykue (nde rógape) ha reme’ẽva’erã avei chéve nde ra’y ypykue.
30Upeichaite rejapova’erã avei nde tóro ha nde ovechara’y ypykue reheve, 7 ára oĩva’erã isy ndive ha pe ára 8-hápe reme’ẽva’erã chéve.
31Peẽ peikova’erã chéve g̃uarã kuimba’e heko potĩva ramo. Ndape’uiva’erã so’o mymba ñarõ oñemondyryryva’ekue ñúme; peme’ẽva’erã jaguakuérape.
Currently Selected:
Éxodo 22: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
