Éxodo 28
28
Pa’ikuéra aorã
1Remog̃uahẽta ne rendápe nde ryke’y Aaron ha ita’yrakuérape: Nadab, Abiu, Eleazar ha Itamar. Ha’ekuéra oiko hag̃ua che pa’ikuéra ramo Israel ñemoñarenguéra apytépe.
2Rejapóta Aaron, nde ryke’ýpe g̃uarã, ao ojeporúva óga jojohuha rembiapópe g̃uarãnte, emboete ha embojegua hag̃ua ijao.
3Ha nde reñe’ẽta mayma iñakã porã ha iñarandúvape, Che amyenyhẽva’ekue pytu arandúgui, ojapo hag̃ua Aaron aorã, oñemboyke hag̃ua ichupe che pa’i ramo.
4Ko’ã ao rejapóta: Peteĩ vosa’i ipyti’áre g̃uarã, peteĩ póncho mbyky, peteĩ póncho puku, camisa pukuetéva, iñakã rehegua ha ku’a jokuaha ipéva, nde ryke’y Aaron ha ita’yrakuérape g̃uarã, oiko hag̃ua che pa’ikuéra ramo, ejapouka ao ojeporuva’erãva pe óga jojohuha rembiapópente.
5Ojapyhy hikuái óro, aorã hovýva, pytãva, pytãũva ha líno inimbo jepokapyréva,
6ojapo hag̃ua pe póncho mbyky (efod) órogui, aorã hovýgui, pytãgui, pytãũgui ha líno inimbo jepokapyrévagui, tembiapo iporãitembyreva’erãva.
7Pe póncho mbyky ojejapóta mokõi ao pehẽngue jojágui oñembojoaju hag̃ua umi mokõi apýra yvate ha mokõi apýra iguy pegua rehe.
8Pe ku’a jokuaha ojejapova’erã avei óro, inimbo hovýgui, pytãgui, pytãũgui ha líno inimbo jepokapyrégui.
9Ha rejapyhyva’erã mokõi ita vera pytã, ha rehaíta hesekuéra Israel ra’y rerakuéra.
10 Seis téra ehai peteĩ ita rehe, ha 6 téra ambue ita rehe, onace haguéicha hikuái.
11Itáre omoha’ãngata umi Israel ra’y réra; embojeguávo umi mokõi ita órope.
12Ha remoĩta pe póncho mbyky rehe, remboguapýta Aaron ati’y ári oñemomandu’a hag̃ua Israel ñemoñarenguéra rehe; ha Aaron ogueraháta herakuéra pende Ruete renondépe ijati’y ári mandu’arã ramo.
13Umi ita vera emboguapy órope,
14ha mokõi cadéna oroitégui, ha umíva emoĩ pe guapyha jeguaka jerekuévo.
15Rejapóta avei pe vosa’i (voko) pyti’a rehegua órogui, inimbo pytãgui, pytãũgui ha líno inimbo ojepokapyrégui; rejapo haguéicha avei pe póncho mbyky.
16Ijyke irundyve peteĩchava’erã, ipuku ha ipeva’erã 22 centímetro.
17Ha pe voko rehe remoĩta irundy ita vera rysýi: Hysýi peteĩháre remoĩta peteĩ ita vera pytãũ, peteĩ ita vera sa’yju ha peteĩ ita vera hovy;
18Hysýi mokõiháre remoĩta peteĩ ita vera hovy kangy, peteĩ ita vera hovyũ ha peteĩ ita vera omimbietéva.
19Hysýi mbohapyháre remoĩta peteĩ ita vera sayjuvy, peteĩ ita vera sakã para ha peteĩ ita vera sakã pytãũ.
20Hysýi irundyháre remoĩta: Peteĩ ita vera hovy, peteĩ ita vera hũ ha morotĩ, ha peteĩ ita vera sakã hovy kangy. Opaite ita vera oñemboguapyva’erã oroitépe.
21Oĩva’erã 12 ita vera, oĩgui avei 12 Israel tríbu; umi ita oguerahava’erã umi 12 tríbu réra, peteĩ itáre ojehaiva’erã peteĩ térante.
22Pe pyti’a rehegua voko oguerekova’erã mokõi sã’i oroguiguáva ojepokapyréva.
23Ha pe pyti’a rehegua voko apýra rehe emoĩ mokõi kuãirũ oroguiguáva;
24upéi eñapytĩ umi mokõi sã’i oroguiguáva mokõive argólla rehe oĩva pe pyti’a rehegua voko apýra yvateguápe;
25ha umi ambue sã’i apýra reñapytĩta umi mokõi ita vera pytã jeguaka rehe, oĩva Aaron ati’y ári pe póncho mbyky rehe.
26Rejapóta avei mokõi argólla órogui ha remoĩta ipyti’a voko rembe’y rehe; hembe’y opyta hag̃ua pe póncho mbyky ykére, hyepy gotýo.
27Rejapóta mokõive argólla órogui ha rembojáta umíva pe póncho mbyky ati’ýre ita vera pytãre. Pe voko pyti’a rehegua osãingóta henonderãgotýo iku’a jokuaha ári.
28Ha oñembojoajúta pe pyti’a rehegua voko argólla pe póncho mbykyargólla mokõive rehe peteĩ sã’i hovýpe, opyta hag̃ua pe póncho mbyky tenonde gotýo, pe ku’a jokuaha ári, ani hag̃ua ojei pe pyti’a rehegua voko pe póncho mbykýgui.
29Péicha Aaron ogueraháta umi Israel ra’y réra ipyti’a voko rehe, iñe’ã ári, ombojovake porã hag̃ua ha oikévo pe kotyguasúpe, oñemboykéva Ñanderuete ha pa’iguasúpe g̃uarãnte toñemomandu’a tapia hag̃ua hesekuéra.
30Ha remoĩta pe pyti’a vokope Urim ha Tumim (mokõi ita ohechauka hag̃ua pe tesape ha pe añetegua), oĩ hag̃ua Aaron ñe’ã ári oike jave Ñanderuete kotyguasúpe, oñemboykéva Ñanderuete ha pa’iguasúpe g̃uarã ha ogueraha hag̃ua tapia Israel ñemoñarenguéra iñe’ã ári, Israel Jára rendápe.
31Rejapóta pe póncho puku aorã hovývagui;
32ha imbytépe yvate gotýo oñembojuruva’erã Aaron ombohasa hag̃ua iñakã ha reipyahava’erã ijuru rembe’y ani hag̃ua osorótei.
33Pe póncho puku ruguái rembe’y jerekue rehe remoĩta granada’a (yva) ra’ãnga inimbo hovýva, pytãva ha pytãũva, ha ipa’ũmekuéra, ijerekue rehe remoĩta campana’i oroguiguáva.
34Peteĩ campana’i oroguiguáva ha peteĩ granada’a ra’ãnga, ha ambue campana’i ha ambue granada’a, ha upéicha emoĩmba pe póncho puku ruguái rembe’y jerekuévo.
35Ha péva Aaron tomonde oñehendu hag̃ua hyapu ha’e oike ha osẽ jave pe kotyguasúpe, oñemboykéva pa’ikuérape g̃uarã, ani hag̃uátei ha’e omano.
36Rejapóta avei peteĩ víncha isyváre g̃uarã órogui ha rehaíta hi’ári: Oñemboykéva Ñanderuetépe g̃uarã.
37Ha remoĩta peteĩ sã’i hovýva rehe ha reñapytĩta henondépe, iñakã rehegua rehe;
38péva oĩta Aaron syva rehe, péicha Aaron ogueraháta Israel ñemoñarenguéra angaipa ojapova’ekue Ñanderuete renondépe, Aaron ojerure hag̃ua perdon ikuave’ẽmby rupi Israelguakuéra rehehápe; tapiaite oĩva’erã isyva rehe ohupity hag̃ua perdon pende Ruetégui.
39Upéi eipyaha peteĩ camisa ipukúva líno inimbógui ha ejapo ipype ta’ãngakuéra; eipyaha avei líno inimbógui iñakã reheguápe g̃uarã ha iku’a jokuaha reipyaháta inimbo hovýva, pytãva, pytãũvagui ha línogui.
40Ha Aaron ra’ykuérape g̃uarã rejapóta: Póncho puku, ku’a jokuaha ha iñakã rehegua omomba’ete ha ombojegua hag̃ua ichupekuéra.
41Péicha remondéta umi ao nde ryke’y Aaron ha ita’yrakuérape; remonáta hesekuéra acéite ha emboheko potĩ oiko hag̃ua che pa’ikuéra ramo.
42Ha rejapóta ichupekuéra calzonzíllo (chulu) líno inimbógui, omo’ã hag̃ua hete opívo, ohupityva’erã iku’a guive henypy’ã arimi meve.
43Upéicha Aaron ha ita’yrakuéra oñemondeva’erã oike jave pende Ruete róga jojohuhápe, térã oñembojávo kuave’ẽmby rendápe omba’apo hag̃ua, ani hag̃ua ojapo mba’eve hekope’ỹ ha upévare omano hikuái. Ko’ãva opyta tembiapoukapy ramo peẽme ha pene ñemoñarenguérape g̃uarã opaite árape.
Currently Selected:
Éxodo 28: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
