Éxodo 29
29
Aaron ha ita’yrakuéra oñemboheko potĩ
1Ko’ã mba’e rejapova’erã emboheko potĩ hag̃ua ichupekuéra oikokuaa hag̃ua che pa’ikuéra ramo: Eiporavo peteĩ tóro ra’yrusu ha mokõi ovecha ra’yrusu iporãitéva;
2ha pan oñembovu’ỹva, pan he’ẽ oñembovu’ỹva, oñembojehe’ava’ekue acéite reheve, ha mbeju oñemonambyréva acéite rehe, ojejapova’ekue trígo ku’i iporãitévagui,
3ha emoĩmba peteĩ ajaka’ípe, ha eikuave’ẽmba ajaka’i reheve, ha avei pe tóro ra’yrusu ha mokõive ovecha ra’yrusu reheve.
4Ha egueraha Aaron ha ita’yrakuéra pe óga jojohuha rokẽme, ha ýpe remopotĩta ichupekuéra.
5Remondéta Aarónre ipa’i aorã: Pe camisa puku, pe póncho puku, pe póncho mbyky, pyti’a voko ha pe ku’a jokuaha;
6ha remoĩta pe iñakã rehegua ha iguýpe remoĩta pe víncha.
7Upéi eñohẽ pe acéite iñakã rehe, ha péicha remonáta hese.
8Ha ita’yrakuéra toñemboja avei ne renondépe remonde hag̃ua avei hesekuéra ipóncho puku.
9Reiku’akuáta Aaron ha ita’yrakuérape ijokuahápe ha remoĩta ichupekuéra iñakã rehegua ha’ekuéra oiko hag̃ua che pa’ikuéra ramo opaite ára peve. Péicha emboykéta Aaron ha ita’yrakuérape chéve g̃uarã.
10Upéi regueraháta pe tóro ra’yrusu pe óga jojohuha renondépe ha Aaron ha ita’yrakuéra omoĩ mbaretéta ipokuéra pe tóro ra’yrusu akã ári.
11Ha ejuka pe tóro ra’yrusu pende Ruete renondépe, pe óga jojohuha rokẽme.
12Ha embyaty pe tóro ra’yrusu ruguykue remona hag̃ua ne kuãme pe kuave’ẽmby renda ratĩ rehe ha pe tuguy hembýva reñohẽmbáta pe kuave’ẽmby rendáre.
13Upéi eipe’a hyekue kyrakue, ipy’akue kyrakue, mokõi ipitikiri’ĩngue (iriñon) kyrakue, ha ehapypa kuave’ẽmby renda ári.
14Pe tóro ra’yrusu ro’okue, ipirekue ha hepotikue katu ehapypa tatápe pende rekoha oka gotýo; péva ningo kuave’ẽmby angaipa reheguáva.
15Upéi reguerúta peteĩ umi mokõi ovecha ra’yrusúgui ha Aaron ita’yrakuéra ndive omoĩ mbarete ipokuéra pe ovecha ra’yrusu akã ári,
16ha rejukáta pe ovecha ra’yrusu ha huguykuépe rehypýita pe kuave’ẽmby renda jerekue rehe.
17Emboja’o pe ovecha ra’yrusu ha ejohéi hyekue ha ipykuéra, ha embyaty ho’o ñemboja’opyre iñakãngue reheve,
18rehapypa hag̃ua pe ovecha ra’yrusu pe kuave’ẽmby renda ári; péva kuave’ẽmby ojehapypáva hyakuã porã hag̃ua pende Ruetépe g̃uarã; ha ko kuave’ẽmby ojehapypáva omboguéta pende Ruete pochy.
19Upéi egueru ambue ovecha ra’yrusu, Aaron ha ita’yrakuéra tomoĩ mbarete ipokuéra pe ovecha ra’yrusu akã ári,
20ha ejuka avei kóvape, emona pe ovecha ra’yrusu ruguykue Aaron ha ita’yrakuéra nambi akatúa rehe, ikuã poguasu akatúa rehe, ipysãguasu akatúa rehe, ha pe huguykue hembýva ehypýi pe kuave’ẽmby renda jerekue rehe.
21Ha eiporu pe tuguy oĩtava pe kuave’ẽmby renda ári ha pe acéite Ñanderuete ojapoukava’ekue ehypýi hag̃ua Aaron rehe, Aaron aokuéra rehe, ita’yrakuéra rehe ha ita’yrakuéra ao rehe.
22Upéi eipe’a pe ovecha ra’yrusu kyrakue, huguaikue kyrakue, hyekue kyrakue, ipy’a kyrakue, mokõi ipitikiri’ĩngue kyrakue ha ipaletakue akatuaguare, ko ovecha ra’yrusu oñemboykemava’ekue Ñanderuetépe,
23upéi emoĩ peteĩ pan, peteĩ pan he’ẽ, peteĩ mbeju pe ajaka’ígui, oĩháme pan oñembovu’ỹva oñemboykemava’ekue pende Ruete renondépe,
24ha emoĩmba Aaron ha ita’yrakuéra pópe embokacha hag̃ua kuave’ẽmby myatymoimbyre ramo pende Ruete renondépe.
25Upéi erecivi ipoguikuéra ha ehapy pe kuave’ẽmby rendápe, pe kuave’ẽmby ojehapypáva ári, mba’e ryakuã porãva pende Ruetépe g̃uarã. Péva ningo kuave’ẽmby ojehapypáva Israel Járape g̃uarã.
26Ha erecivi pe ovecha ra’yrusu pyti’akue, oñemboykemava’ekue pende Ruetépe Aaron omytymoiva’ekue kuave’ẽmby myatymoimbyréva ramo Israel Jára renondépe ha pe pehẽngue péva ne mba’erã.
27Emboyke pe kuave’ẽmby myatymoimbyre pyti’akue ha ipaletakue, pe ovecha ra’yrusúgui ojeporuva’ekue oñemboyke hag̃ua pende Ruetépe g̃uarã,
28ha eme’ẽ Aaron ha ita’yrakuérape imba’erã ramo. Kóva peteĩ tembiapoukapy opaite árape Israel ñemoñarenguérape g̃uarã. Tapia Israelguakuéra tome’ẽ Aaron ha pa’ikuérape pe pyti’a ha pe paléta ikuave’ẽmby oñemyatymoimbyrégui Ñanderuete renondépe; péva imba’erã pe kuave’ẽmby oñemyatymóigui.
29Ha umi ao ojeporúva pe óga jojohuhápe, Aaron mba’éva, opytava’erã ita’ýrape g̃uarã, ha heseve oñepyrũ hag̃ua hembiapo.
30Ita’ýra opytáva hendaguépe pa’i ramo, omondeva’erã pe ao 7 ára pukukue oike ha omba’apo aja Ñanderuete róga jojohuhápe.
31Ha eru peteĩ ovecha ra’yrusu kuave’ẽmby ramo, pe pa’i oñepyrũvo hembiapo ha embojy ho’okue pe yvy pehẽngue oñemboykéva pende Ruetépe.
32Ha Aaron ha ita’yrakuéra ho’úta pe ovecha ra’yrusu ro’okue ha pe pan oĩtava pe ajaka’ípe pe óga jojohuha rokẽme.
33Ha’ekuéra ho’úta ho’o ohupitýgui perdon hembiapo vaikuére ha oñepyrũ haguére hembiapo Ñanderuetépe g̃uarã, tetã ambueygua katu ndo’uiva’erã pe so’o pévagui, pende Ruete mba’égui.
34Ha hemby ramo pe so’o ha pan oñemboykémava pende Ruetépe ambue ko’ẽ meve, ehapypa hembýva guive; ndoje’uiva’erã, pende Ruete mba’égui.
35Péicha rejapóta Aaron ha ita’yrakuérape, ha’e hagueichaite ndéve rejapo hag̃ua; 7 ára javeve emboheko potĩ ichupekuéra oñepyrũ mboyve hembiapo.
36Opaite árape eikuave’ẽ peteĩ tóro ra’yrusu, oñeperdona hag̃ua pene angaipa. Emopotĩ pe kuave’ẽmby renda pene kuave’ẽmby rupi ha emona hese acéite oñemboykemava’ekue pende Ruetépe.
37 Siéte ára javeve remopotĩta kuave’ẽmby renda oiko hag̃ua kuave’ẽmby renda pende Ruete mba’e ramo; oimeraẽva ojáva guive kuave’ẽmby renda rehe oñemboykéta Ñanderuetépe guarã.
Kuave’ẽmby ojejapova’erãva opaite árape
38Meme ára reikuave’ẽva’erã kuave’ẽmby renda ári mokõi ovecha ra’yrusu oguerekóva peteĩ áño.
39Reikuave’ẽva’erã peteĩ ovecha ra’yrusu pyharevekue ha ambue ovecha ra’yrusu ka’arupytũme.
40Ha umi ovecha ra’yrusu reheve reikuave’ẽva’erã 2,2 kílo trígo ku’i iporãitéva oñembojehe’a porãva 0,9 lítro acéite olivo’a reheve, ojejosopyréva ha hi’ári reñohẽ 0,9 lítro víno kuave’ẽmby ojey’upyréva ramo pe ovecha ra’yrusu peteĩha ári.
41Ha pe ambue ovecha ra’yrusu reikuave’ẽtava ka’arupytũme, pe kuave’ẽmby pyhareveguaréicha, tahyakuã porã pe kuave’ẽmby hendýva pende Ruetépe g̃uarã.
42Péicha pejapova’erã kuave’ẽmby ojehapýva tapiaite peẽ ha pene ñemoñarenguéra, pe óga jojohuha rokẽme, pende Ruete renondépe, ha upépe Che aĩta pende apytépe añe’ẽ hag̃ua nendive.
43Upépe Che aĩta Israel ra’ykuéra apytépe; pe tenda oñemboykeva’erã che reko jajaipa rupi.
44Amboykéta pe óga jojohuha ha pe kuave’ẽmby renda che mba’erã ramo, ha Aaron, ita’yrakuéra ndive, oikóta che pa’ikuéra ramo.
45Ha aikóta Israel ra’ykuéra apytépe Ijára ramo.
46Ha oikuaáta hikuái Che ha’eha Jahve, Ijára, aguenohẽva’ekue Israelguakuéra Egípto retãgui, aiko hag̃ua ijapytepekuéra; Che ningo Jahve, pende Ruete.
Currently Selected:
Éxodo 29: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
