Éxodo 30
30
Mba’e ryakuã porã ojehapy hag̃ua kuave’ẽmby renda ári
1Rejapóta ambue kuave’ẽmby renda acácia yvyrágui ojehapy hag̃ua hi’ári mba’e ryakuã porã.
2Ipukuva’erã 44 centímetro ha ipeva’erã avei 44 centímetro ha irundyve ijyke peteĩchava’erã, ijyvateva’erã 88 centímetro; pe kuave’ẽmby renda irundy hatĩ ojejapova’erã peteĩ yvyra pehẽnguégui.
3Ha ijape reñu’ãva’erã oroitépe, irundyve ijyke ha hatĩnguéra; ha rejapóta ijerekue rehe peteĩ jeguaka opakuevogua oroitégui.
4Ha rejapóta avei mokõi argólla órogui pe jeguaka opakuevogua guýpe, mokõive hakuahápe (esquínape), mokõive ijyke gotýo, oñemoinge hag̃ua ipype hi’ýva ojereraha hag̃ua pe kuave’ẽmby renda.
5Hi’ýva rejapóta acácia yvyrágui ha reñu’ãta órope.
6Pe kuave’ẽmby renda remoĩta pe aosãingo renondépe, pe kotyguasúpe oñemboykéva pa’ikuérape, ha ikupépe, pe kotyguasu oñemboykéva Ñanderuetépe ha pa’iguasúpe g̃uarãnte, oĩháme pe karameg̃ua iñembotyha (tápa) reheve, ijypýpe oñenongatuhápe che rembiapoukapykuéra, upeguive Che añe’ẽta nendive.
7Ha hi’ári Aaron ohapyva’erã opaite árape pyharevekue mba’e ryakuã porãva ombosako’i jave pe tataindyenda.
8Aaron ha iñemoñarenguéra omyendývo pe tataindyenda ka’arupytũme, ohapyva’erã avei mba’e ryakuã porãva pende Ruete renondépe g̃uarã.
9Hi’ári ndapeikuave’ẽiva’erã ambue kuave’ẽmby, ni kuave’ẽmby ojehapypáva ni víno kuave’ẽmby ramo.
10Meme áño peteĩ jevýnte, Aaron omonava’erã pe kuave’ẽmby angaipa reheguáva ruguy umi kuave’ẽmby ratĩ rehe pehupity hag̃ua pende Ruete perdon pende reko vaígui ko tembiapo kóva pejapova’erã opaite añokuéra, ko kuave’ẽmby renda kóva oñemboyketégui pende Ruetépe g̃uarã.
Pirapire oñeme’ẽta hekovére
11Ñanderuete oñe’ẽ avei Moiséspe, ha he’i:
12Eipapa Israel ñemoñarenguérape reikuaa hag̃ua mboýpa oĩ hikuái; peteĩteĩ ome’ẽva’erã pende Ruetépe hekove rehe pirapire, anítei oiko ñemano ijapytepekuéra reipapakuévo ichupekuéra.
13Umi ojepapáva ome’ẽva’erã 5,6 grámo pláta (óro morotĩ) pende Ruetépe g̃uarã.
14Opavave ojepapáva ha ombotýmava guive 20áño, ome’ẽva’erã ko me’ẽmby kóva pende Ruetépe g̃uarã.
15Upe ipirapire hetáva nome’ẽ hetaveiva’erã ha pe imboriahúva nome’ẽ mbovyveiva’erã; opavavete oikuave’ẽva’erã 5,6 grámo pende Ruetépe g̃uarã, ko pláta kóva oñeme’ẽva’erã hekovekuéra rehe.
16 Erecivi ko pláta kóva Israelguakuéra oma’ẽva’erãvagui hekove hekove rehe ha pe pláta reiporúta oñemopu’ã hag̃ua pe óga jojohuha ha Israel ñemoñarenguéra imandu’a hag̃ua oiko hague ko perdon pende Ruete renondépe.
17Ñanderuete oñe’ẽve Moiséspe, he’ívo:
18Rejapóta avei peteĩ yrendag̃ua ipykuéra bróncegui, pa’ikuéra oñemopotĩ hag̃ua; ha remoĩta pe óga jojohuha ha pe kuave’ẽmby renda pa’ũme, ha remyenyhẽta ýgui.
19Ha ipype Aaron ha ita’yrakuéra ojepohéi ha ojepyheiva’erã.
20Oike mboyve hikuái pe óga jojohuhápe, oñemopotĩva’erã ýpe, ani hag̃ua omano hikuái; ha oñembojávo kuave’ẽmby renda rehe, ohapy hag̃ua kuave’ẽmby hendýva pende Ruetépe g̃uarã oñemopotĩva’erã avei ýpe;
21kóva ningo peteĩ tembiapoukapy peẽme ha pene ñemoñarenguérape g̃uarã opaite árape g̃uarã.
Pe acéite ojeporúva omona hag̃ua
22Ñanderuete oñe’ẽve Moiséspe, ha he’i:
23Ejapyhy mba’e ryakuã porãva: Mírra (yvyra aysy iporãva) 5,58 kílo; canéla hyakuã porãva, 2,79 kílo; cálamo hyakuã porãva, 2,79 kílo;
24 cásiagui avei 5,58 kílo ha olívo acéite 3,65 lítro.
25Ha ko’ã mba’égui rejapova’erã acéite oñemona hag̃uánte, ha hyakuã porãva, pe tyakuã apoha ikatupyrýva ojapokuaa háicha.
26Ko acéite kóva reiporúta remona hag̃ua pe óga jojohuha ha opaite mba’e ipype oĩva rehe: Pe karameg̃ua,
27pe mesa, opaite hembiporukuéra reheve, pe tataindyenda, opaite hembiporukuéra reheve, pe kuave’ẽmby renda ojehapy hag̃uáme mba’e ryakuã porã,
28kuave’ẽmby renda ojehapyhápe pe kuave’ẽmby, opaite hembiporukuéra reheve, pe yrenda ipykuéra reheve.
29Péichamante emboyke opaite mba’e pende Ruetépe g̃uarã; ha opaite mba’e ojáva guive ko acéite kóva rehe oñemboykéma pende Ruetépe g̃uarã imba’etee ramo.
30Emona avei Aaron ha ita’yrakuérare, oiko hag̃ua che mba’e ha che pa’ikuéra ramo.
31Eñe’ẽ Israel ñemoñarenguérape, erévo: Ko acéite kóva che mba’eteéva.
32Kuimba’e ha kuña rete rehe noñeñohẽiva’erã ha ndojejapoiva’erã ambue ijoguaha, péva Ñanderuete mba’énte ha perespetava’erã Ñanderuete mba’eteéva ramo.
33Oimeraẽ ojapóva ko acéite kóva ha omona hapicha rehe, ojejukava’erã hetãyguakuéra apytégui.
34Ñanderuete he’i avei Moiséspe: Ejapyhy mba’e ryakuã porãva: Yvyra kamby hyakuã porãva, jatyta pireku’ikue hyakuã porãva, gálbano rapo rykue hyakuã porãva, ko’ã irundy mba’e hyakuã porãva ha ipohyikue peteĩchava’erã.
35Ko’ã mba’égui ejapo mba’e ryakuã porã ku mba’e ryakuã apoha ikatupyrýva ojapokuaa háicha, embojehe’a porã jukymimi reheve, taipotĩ asy.
36Emongu’i porã rire erahamimi ichugui ha remoĩta pe karameg̃ua renondépe pe óga jojohuha ryepýpe, Che ajehechauka hag̃uáme ndéve. Ko mba’e ryakuã porã kóva pende Ruete mba’e añónte.
37Ani pejapo ko’ã mba’e ryakuã porãva pendejupe g̃uarã, ojejapo háicha chéve g̃uarã, ko’ã mba’e oñemboykémagui pende Ruetépe g̃uarã añónte.
38Upe ohapýva ko’ã mba’e, ohetũ hag̃ua hyakuã porãngue ojejukava’erã hetãyguakuéra apytégui.
Currently Selected:
Éxodo 30: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
