Éxodo 6
6
1Ñanderuete he’i jevy Moiséspe: Ko’ág̃a rehecháta Che ajapótava faraon rehe; pu’aka mbaretépemante opoíta Israelguakuéragui, pu’aka mbaretépemante omosẽta ichupekuéra ijyvýgui.
2Ha Ñanderuete oñe’ẽve Moiséspe, ha he’i ichupe: Che ningo pende Jára Ipu’akapáva,
3ajehechaukava’ekue Abraham, Isaac ha Jacóbope, Ijára Ipu’akapáva ramo. Ha che réra Jahve rupi, ndajekuaaukaiva’ekue gueteri ichupekuéra.
4Ha ame’ẽma avei ichupekuéra che ñe’ẽ ame’ẽtaha Canaan yvy imba’erã ramo, pe yvy oikómi haguépe hikuái tetã ambueyguakuéra ramo,
5upéicha avei Che ahendu Israel ñemoñarenguéra pyahẽ asy Egiptoyguakuéra poguýpe ha chemandu’a che ñe’ẽ ame’ẽva’ekue rehe ichupekuéra.
6Upévagui eréta Israel ñemoñarenguérape: Che ha’e pende Jára; ha che poguenohẽta Egíptogui tembiguái reko pohýigui, ha Che poipe’áta pu’aka mbaretépe ha jehaviraguasu rupi Egípto retã poguýgui.
7Ha peikóta che retã ramo ha Che pende Jára ramo; ha peikuaáta Cheha pende Ruete, poguenohẽtava tembiapo pohyiete poguýgui Egípto retãgui.
8Che pomoingéta pene retãrãme upévare ahupimava’ekue che po ha’évo Abraham, Isaac ha Jacóbope, che ame’ẽtaha peẽme pene mba’erã, Che, pende Ruete ha’e ko’ã mba’e ko’ãva.
9Upéicha Moises oñe’ẽ Israel ñemoñarenguérape, ha’ekuéra katu nohendusevéima ichupe ojepy’apyetereígui, ha pe tembiguái reko ipohyietevégui.
10Ha Ñanderuete oñe’ẽ Moiséspe ha he’i:
11Eike ha eñe’ẽ faraon ndive, Egípto ruvichápe, ha’e topoi Israel ñemoñarenguéragui osẽ hag̃ua Egípto retãgui.
12Ha Moises he’i Ñanderuetépe: Ema’ẽ porãke, Israel ñemoñarenguéra nacherendúi, mba’eicharupípa faraon cherendúta, che ningo nañe’ẽkuaái voi.
13Upéramo Ñanderuete oñe’ẽ Moises ha Aarónpe ha ome’ẽ tembiapoukapy ichupekuéra Israel ñemoñarenguérape g̃uarã, ha faraon, pe Egípto retã ruvichápe g̃uarã, oguenohẽ hag̃ua Israel ñemoñarenguérape Egípto retãgui.
14Ko’ãva hína Jacóbo ñemoñare ruvichakuéra: Ruben, Israel ra’y ypykue ha iñemoñarenguéra apytépe oĩ: Hanoc, Falu, Hesron ha Carmi, ko’ãva Ruben tríbu rogaguasu ruvicha.
15Simeon ra’ykuéra apytépe oĩ: Jemuel, Jamin, Ohad, Jaquin, Sohar ha Saul, peteĩ Canaangua memby. Ko’ãva Simeon tríbu rogaguasu ruvicha.
16Ko’ãva Levi ra’y réra: Gerson, Coat ha Merari. Ha Levi oikove 137 áño.
17Gerson ra’ykuéra: Libni ha Simei, ko’ãva Gerson rogaguasu ruvicha.
18Ha Coat ra’ykuéra: Amram, Izhar, Hebron ha Uziel. Ha Coat oikove 133áño pukukue.
19Ha Merari ra’ykuéra: Mahli ha Musi. Ko’ãva Levi ra’y rogaguasu ruvicha.
20Ha Amram oñemohembireko itia Joquebed rehe, ha imemby Aaron ha Moises. Ha Amram oikove 137áño.
21Izhar ra’ykuéra: Core, Néfeg ha Zicri.
22Uziel ñemoñarenguéra: Misael, Elzafan ha Sitri.
23Ha Aaron oñemohembireko Elisabet, Aminadab rajy, Nahson reindy rehe; ha ko’ãva imemby; Nadab, Abiu, Eleazar ha Itamar.
24Core ra’ykuéra: Asir, Elcana ha Abiasaf. Ko’ãva Core rogaguasu ruvicha.
25Ha Eleazar, Aaron ra’y oiporavo hembirekorã Putiel rajykuéra apytégui, ha ha’e imemby ichupe g̃uarã Pinhas. Ko’ãva Levi tríbu rogaguasu ruvichakuéra.
26Ñanderuete he’iva’ekue Aaron ha Moiséspe: Peguenohẽ Egípto retãgui Israel ñemoñarenguérape, ijatyguasukuéra reheve.
27Moises ha Aaron oñe’ẽ tapia faraónpe, Egípto retã ruvichaguasúpe, opoi hag̃ua Israel ñemoñarenguéragui Egípto retãgui,
28Ñanderuete oñe’ẽ ramoguare Moiséspe Egípto retãme.
29Upéramo Ñanderuete oñe’ẽ Moiséspe, he’ívo: Che ha’e pende Ruete; ere faraónpe, Egípto retã ruvichaguasúpe, opaite mba’e Che ha’étava guive ndéve.
30Ha Moises he’i Ñanderuetépe: Péina ápe che nañe’ẽ porãkuaái: Mba’éicha piko faraon cherendúta.
Currently Selected:
Éxodo 6: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
