Génesis 25
25
Abraham ha Cetúra ñemoñare
1Ha Abraham omenda jevy, hembireko réra Cetúra,
2ha’e imemby ichugui: Zimram, Jocsan, Medan, Madian, Isbac ha Súa.
3Ha Jocsan ra’ykuéra Seba ha Dedan; ha Dedan ra’ykuéragui oiko umi Asurgua, Letusgua ha Leumguakuéra.
4Ha Madian ra’ykuéra: Efa, Efer, Hanoc, Abida ha Elda. Ko’ãva Cetúra ñemoñare meme.
5Ha Abraham ome’ẽ opaite mba’e oguerekóva guive Isaácpe.
6Ha Cetúra membykuérape Abraham ome’ẽnte jopói, ha omondo ichupekuéra ita’ýra Isaácgui, peteĩ tetã kuarahyresẽ gotyoguápe.
Abraham ñemano ha iñeñotĩ
7Ha Abraham oikove 175 áño.
8Abraham omano itujaiterei riréma ha hi’ára heta reheve, ha oike hetãyguakuéra omanomava’ekue apytépe.
9Ita’yrakuéra Isaac ha Ismael oñotỹ ichupe Macpéla pegua itakuaguasúpe, Efron yvykuépe, Zohar ra’yre, peteĩ Hetgua, Mámre rovái opytávape,
10pe yvy Abraham ojoguava’ekue Het ra’ykuéragui, ha oñeñotỹ haguépe Sárape, upépe oñeñotỹ avei Abrahámpe.
11Ha ojehu Abraham omano rire, Ñanderuete ohovasa Isaácpe; ha Isaac oiko pe Oikovéva cherecháva ykua ypýpe.
Ismael ñemoñarenguéra
12Ko’ãva Ismael, Abraham ra’y, ñemoñarenguéra, Agar, pe Egiptoygua, Sára rembiguái membykue.
13Ko’ãva Ismael ra’y rerakuéra, ijypykue héra Nebaiot, upéi Cedar, Adbeel, Mibsam,
14Misma, Duma, Massa,
15Hadar, Tema, Jetur, Nafis ha Cedema.
16Ko’ãva Ismael ra’ykuéra, herakuéra rupi oñembohéra avei itava’ikuéra ha hekohakuéra. Ko’ã 12 Ismael ra’ýgui oiko 12 tríbu ruvicha.
17Ha Ismael oikove 137 áño; ha omanóvo ha’e oñembyaty hetãyguakuéra omanomava’ekue ndive.
18Ha oiko hikuái Habila guive Shur peve, opytáva Egípto rovái jajúvo, Asíriaguio. Ismael ha iñemoñarenguéra oñorãirõ opaite ipehẽnguekuéra ndive.
Jacóbo ha Esau onace
19Ko’ãva Isaac, Abraham ra’y, ñemoñarenguéra: Abraham ra’ y Isaac,
20ha Isaac oguereko ramo 40 áño omenda Rebéca, Betuel rajy rehe; Betuel peteĩ Aramgua, oikóva Padánpe; ha’e ombohéra ita’ýrape Laban, heindy ningo Rebéca.
21Ha Isaac oñembo’e Ñanderuetépe hembireko rehe, ikatu hag̃ua imemby; ha Ñanderuete ohendu ichupe ha hembireko Rebéca hyeguasu.
22Imembykuéra oñorãirõma hyepýpe voi; upéramo Rebéca he’i: Upéichataramo, mba’upépa che aikovéta. Ha oho oporandu Ñanderuetépe;
23ha Ñanderuete he’i ichupe: Mokõi tetã oĩhína nde rete ryepýpe, ha mokõi tetã oñemboja’óta nde ryepy guive; peteĩ tetã imbaretevéta ambue tetãgui, ha pe tenondegua oikóta pe imitãvéva rembiguái ramo.
24Ha og̃uahẽvo pe ára imemby hag̃ua, péina hyépe oĩra’e mokõi mitãkuimba’e.
25Ha osẽvo pe tenondevegua ipire pytã ha haguepaite ku ao ravijúicha; ha ombohéra ichupe Esau.
26Upéi osẽ ityvýra, ojejapyhýva Esau pyta rehe; ha ombohéra ichupe Jacóbo. Ha Isaac oguerekóma 60 áño Rebéca imemby ramoguare.
Esau ovende heko ypykue
27Ha okakuaávo umi mitãkuimba’e, Esaúgui oiko mymba japiha ikatupyrýva, ha’e peteĩ kuimba’e ñu meguáva; Jacóbo katu kuimba’e heko pytu’úva, óga mymba pirekueguigua rupi oikóva.
28Ha Isaac ohayhuve Esaúpe, ho’useitereígui umi mymba saite ro’o ha’e oguerúva (ka’aguýgui), Rebéca katu ohayhuve Jacóbope.
29Peteĩ ára Jacóbo ombojy jave hi’upyrã, Esau ojevývo ñúgui ikane’õ ha iñembyahyietereígui,
30he’i Jacóbope: Ajerure ndéve eme’ẽmi chéve ne rembi’u pytã, cheñembyahýi eterei ningo. Upévare oñembohéra avei ichupe Edom.
31Ha Jacóbo he’i ichupe: Evendéna chéve ko árape nde ra’y ypykue reko (ko tembi’u kóvare).
32Upéramo Esau he’i: Péina ápe, che ningo amanombotáma ñembyahýigui; ha mba’épe piko chepytyvõta ko ta’ýra ypykue reko.
33Ha Jacóbo he’i: Ẽ́me’ẽna chéve ko’ág̃a ne ñe’ẽ, ha ha’e ome’ẽ ichupe iñe’ẽ Ñanderuete rérape ha ombohasa Jacóbope ita’ýra ypykue reko.
34Upéramo Jacóbo ome’ẽ Esaúpe pan ha lentéja (ojoguáva kumanda’ípe), okaru ha hoy’u rire Esau opu’ã ha oho. Péicha ha’e nomomba’éi ita’ýra ypykue reko.
Currently Selected:
Génesis 25: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
