Génesis 29
29
Jacóbo oiko Laban rembiguái ramo Raquel ha Léa rehehápe
1Ha Jacóbo oipykúi hapére ha oho kuarahyresẽ gotyogua tetãme.
2Ha oma’ẽ ha ohecha peteĩ ykua pe ñúme; ha péina mbohapy ovecha aty oñeno joa ijypýpe, omboy’u hag̃ua hymbakuéra pe ykuágui; ha ykua juru ári oĩ peteĩ ita ndetuicháva.
3Ha ombyatypa rire hikuái upépe hymba atykuéra; ombyapajeréi oñondive pe ita ykua juru árigui omboy’u hag̃ua ijovecha ha ikavarakuéra, upéi omoĩ jevy hikuái pe ita pe ykua juru ári.
4Ha Jacóbo he’i ichupekuéra: Che ryke’ykuéra, mamogua piko peẽ, ha he’i ichupe hikuái: Harangua hína ore.
5Ha ha’e oporandu ichupekuéra: Peikuaápa Laban, Nacor ra’ýpe. Ha he’i hikuái: Roikuaa ichupe.
6Ha oporandu jevy ichupekuéra: Oiko porã piko ha’e. Ha he’i hikuái: Oiko porãnte, ha péina itajýra Raquel ouhína ijovechakuéra reheve.
7Ha Jacóbo he’i ichupekuéra: Voieterei gueteri pembyaty hag̃ua pene rymbakuéra; pemboy’úna pende ovechakuéra, ha tapeho pemongaru jevy.
8Ha he’i hikuái ichupe: Ndaikatúi, ijatypa rirémante ore rymbakuéra roipe’akuaa pe ita ykua jurúgui, romboy’u hag̃ua ore ovecha ha kavarakuérape.
9Ha oñe’ẽ jave hendivekuéra og̃uahẽ Raquel, itúva ovecha aty reheve, ha’e ningo ovecha rerekua.
10Ha Jacóbo ohechávo Raquélpe, Laban rajy, hymbakuéra reheve, oñemboja ha oipe’a pe ita ykua jurúgui, ha omboy’u Laban, isy kyvy rymbakuérape.
11Ha Jacóbo ohetũ Raquélpe ha sapukaipópe ojahe’o,
12ha he’i Raquélpe, ha’eha itúva Laban reindy memby, Rebéca membyha; ha Raquel oñani ha omombe’upa itúvape.
13Ha Laban ohendúvo Jacóbo, heindy memby ouha, oñani hendápe, oñañu’ã ha ohetũ ichupe, upéi ogueru hógape; ha Jacóbo omombe’upa Labánpe.
14Ha Laban he’i ichupe: Añetehápe nde che kangue ha che ro’o; ha opyta rire peteĩ jasy pukukue hógape,
15Laban he’i Jacóbope: Nde che reindy memby ramojepe neremba’apo reimo’ãi chéve g̃uarã. Eréna chéve mboyrehépa remba’apóta chéve g̃uarã.
16Ha Laban itajýra mokõi: Pe tenondeveguáva héra Léa, ha pe imitãvéva Raquel.
17Ha Léa resa ikangyeterei, ha Raquel hova ha hete porãiterei.
18Jacóbo ohayhuvégui Raquélpe, he’i Labánpe: Che amba’apóta ndéve g̃uarã 7 áño pukukue nde rajy imitãvéva Raquel rehe.
19Ha Laban he’i ichupe: Iporãve ame’ẽ ndéve, ame’ẽ rãngue kuimba’e ambuépe; epyta katu chendive.
20Ha péicha Jacóbo omba’apo Raquel rehe 7 áño pukukue, ha mbykyetereívaicha ichupe g̃uarã umi ára umíva, ohayhuetégui ichupe.
21Ha 7 áño rire Jacóbo he’i Labánpe: Eme’ẽna chéve che rembirekorã, og̃uahẽmagui pe ára aiko hag̃ua hendive.
22Upéramo Laban ombyatypa uperupiguávape, ha ojapo peteĩ karuguasu.
23Ha ojehu katu pe pyharépe Laban ogueraha itajýra Léape Jacóbo rendápe; ha Jacóbo oiko hendive.
24Laban ome’ẽ itajýra Léape Zilpápe, hembiguaiteéva ramo.
25Ha ko’ẽmba rire, Jacóbo ohechakuaa oñeme’ẽ hague ichupe Léa, upévare he’i Labánpe: Mba’éiko rejapo cherehe. Namba’apói piko ra’e ndéve Raquel rehe. Mba’érehe piko chembotavy.
26Laban katu he’i ichupe: Ko ore retãme noñeme’ẽi pe tajýra imitãvéva pe tenondeyguaréva mboyve.
27Epyta raẽna Léa ndive ko semána ha upéi ame’ẽta avei ndéve ikypy’y, remba’apove ramo chéve ambue 7 áño.
28Jacóbo ojapo péicha, ha’e opyta rire Léa ndive pe semána péva, Laban ome’ẽ avei ichupe itajýra Raquel hembirekorã ramo.
29Ha Laban ome’ẽ avei itajýra Raquélpe, Bílha, hembiguaiteéva ramo.
30Ha Jacóbo oiko avei Raquel ndive, ohayhueteve katu ichupe Léagui; omba’apo ramo jepe hese ambue 7 añove.
Jacóbo ra’ykuéra
31Ñanderuete ohechávo ndojehayhuiha Léape, ome’ẽ ichupe imemby hag̃ua ha Raquel ndaikatúi imemby.
32Léa hyeguasu, ha imemby peteĩ mitãkuimba’e, ha isy ombohéra ichupe Ruben, he’ígui péicha: Ñanderuete ohechágui che py’a ñembyasy; ha péicharupi ko’ág̃a che ména, cherayhu manteva’erã.
33Hyeguasu jevy ha imemby peteĩ mitãkuimba’e, ha he’i: Ñanderuete ohendúgui ndajehayhuiha, ome’ẽ avei chéve kóva. Ha ombohéra ichupe Simeon.
34Ha hyeguasu jevy ha imemby peteĩ mitãkuimba’e, ha he’i: Ko’ág̃a ae katu che ména opytáta chendive, ame’ẽmagui ichupe mbohapy kuimba’e; ha ombohéra ichupe Levi.
35Hyeguasu jevy, ha imemby ambue mitãkuimba’e, ha he’i: Ko’ág̃a katu amomba’eguasu Ñanderuetépe; ha ombohéra ichupe Juda; uperire katu naimembyvéi.
Currently Selected:
Génesis 29: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
