Génesis 43
43
Jose ryke’ykuéra oho Egíptope Benjamin ndive
1Ha ivaive ohóvo pe ñembyahýi Canaan retãme;
2ha ho’upáma ramo hikuái pe trígo ogueruva’ekue Egíptogui, itúva he’i ichupekuéra: Tapeho jevy, ha pejogua ñane rembi’urã.
3Ha Juda ombohovái ichupe, he’ívo: Pe kuimba’e ningo oreavisa porãva’ekue, he’ívo: Ndapehechamo’ãi che rova ndapeguerúi ramo penendive pende ryvýpe.
4Nde remondo ramo orendive ore ryvýpe, rohóta ha rojoguáta ñane rembi’urã.
5Ha neremondói ramo katu, ndorohomo’ãi; pe kuimba’e he’i porãgui oréve: Ndapehechamo’ãi che rova ndapeguerúi ramo penendive pende ryvýpe.
6Upémarõ Israel he’i: Ma’erã piko pejapóra’e cherehe mba’evaiete, pejévo upe kuimba’épe peguerekoha ambue pende ryvy.
7Ha he’i hikuái ichupe: Upe karai oporandu porandu oréve, ore ha ore rogaygua rehe, he’ívo: Oikovépa gueteri pende ru. Peguereko piko ambue pende ryvy, ha romombe’u ichupe oĩ haichaite, mamo piko roikuaáta he’itaha oréve: Peguerúke pende ryvýpe.
8Upémarõ Juda he’i itúva Israélpe: Emondo chendive pe mitãrusu ha ropu’ãta roho, ikatu hag̃uáicha jaikovepa ha ani ñamanombátei, ore, nde, ha ore mitãkuéra avei.
9Che añangarekóta hese; chéve remba’ejeruréta hese. Che ndagueruvéi ramo ichupe ne rendápe, ha namoĩri ramo ichupe ne renondépe, apytáta tekove vai ramo opaite árape g̃uarã ne renondépe, che ru.
10Ha ndoropytái rire, roju jevymava’erãmo’ã mokõi jevyháma.
11Upéi itúva Israel he’i ichupe: Upéicharamo pejapyhy umi mba’e iporãvéva ko tetãpýgui ha pemoĩ pende vosápe, ha pegueraha upe karaípe jopói ramo: Mba’e aysy ryakuã mimi, eírami, mba’e ryakuã porã, umi mba’e omohe’ẽ porãva tembi’u, nuéces (ojogua mbokaja’ápe) ha alméndra (ojogua manduvípe).
12Ha pejapyhy pende pópe pirapire mokõi jevyve ha pegueraha pende pópe pe pirapire ou jevyva’ekue pende vosa jurúpe; ikatúnte ra’e oiko jejavy.
13Pegueraha avei pende ryvýpe, pepu’ã ha tapeho jevy upe karai rendápe.
14Ha Ñanderuete, pe Ipu’akapáva, tome’ẽ pe karai py’ápe poriahuvereko, ha topoi jevy pende ryke’y Simeóngui ha avei ko Benjamíngui. Ha apytáta ramo ta’yra’ỹre, taupéicha avei.
15Upémarõ ita’yrakuéra ogueraha umi jopói ha pirapire mokõi jevyve, ha ogueraha avei Benjamínpe; ha opu’ã hikuái oho jevy hag̃ua Egíptope ha oñemboja hikuái Jose rendápe.
16Ha Jose ohechávo Benjamínpe hendivekuéra, he’i hóga ñangarekohárape: Egueraha umi kuimba’e che rógape ha ejukauka peteĩ che rymba ha embosako’i ore rembi’urã, ko’ã kuimba’e okarúta chendive ko asajépe.
17Ha upe kuimba’e ojapo Jose he’i haguéicha, ha ogueraha ichupekuéra Jose rógape.
18Ha okyhyje joa hikuái ojeguerahámagui Jose rógape, ha he’i hikuái ojupe: Pe pirapire oñemoĩ jevyva’ekue ñande vosakuérape pe tenondeve guarére ñandegueru ko’ápe, ñanemoñuhã oñemoĩ hag̃ua ñanderehe, japyta hag̃ua hembiguaikuéra ramo, ha ñande burrokuéra imba’erã ramo avei.
19Ha oñemboja hikuái hóga ñangarekohára rendápe, ha oñe’ẽ ichupe hikuái pe óga rokẽme.
20Ha he’i ichupe hikuái: Nde, ore jára, ore añetehápe rojúnte tembi’urã rekávo ñepyrũ guive.
21Ha ojehu ningo rog̃uahẽvo mbohupa rógape rombojurupe’a ore vosakuéra, ha péina peteĩteĩva pirapire oĩ ore vosa jurúpe, ore pirapire ipohyikue oĩmbaite; ha rogueru jevy orendive ko’ág̃a (rome’ẽ hag̃ua ndéve).
22Ha rogueru avei ore pópe ambue pirapire rojoguave hag̃ua ore rembi’urã; ore ndoroikuaái mávapa omoĩra’e ore vosakuérape ore pirapirekue.
23Ha ha’e he’i ichupekuéra: Tapendepy’aguapy, ani pekyhyjétei; pende Jára ha pende ru Jára omoĩ ñemiháme pende pirapire pende vosakuérape; ha che voi arecebíkuri pende pirapire. Upéi oguenohẽ Simeónpe hendapekuéra.
24Ha upe kuimba’e omoinge ichupekuéra Jose rógape; ha ome’ẽ ichupekuéra y, ojepyhéi hag̃ua hikuái, ha omongaru iburrokuérape avei.
25Ha ombosako’i hikuái ijopoikuéra ou ramog̃uarã Jose pe asajépe, ohendúgui upépe okarutaha hikuái.
26Ha Jose ou rire hógape, ome’ẽ hikuái ichupe ijopoikuéra, ha oñakãity hikuái henondépe.
27Upéramo Jose oporandu ichupekuéra mba’éichapa oiko hikuái, ha he’i: Pende ru, itujaitéva, ohasa porãntepa, oikove piko gueteri ha’e.
28Ha ombohovái ichupe hikuái: Ore ru, ne rembiguái, oiko porã gueteri. Ha oñakãity joa hikuái henondépe.
29Ha Jose ojesaupívo ohecha ityvýra Benjamin, isy membýpe, ha he’i: Kóa piko pende ryvy imitãvéva pejeva’ekue chéve. Ha he’i: Ñanderuete tandeporiahuvereko, che ra’y.
30Upévo Jose pya’e ipy’apy guive iñangekõi ityvýra rehe, ha oheka mamópa ohóta ojahe’o hag̃ua; ha oike ikotýpe, ha ojahe’o upépe.
31Upéi ojovahéi osẽ hag̃ua, ha ojejokóvo he’i: Pemoĩmba mesápe jakaru hag̃ua.
32Ha omoĩmba hikuái Jose okaru hag̃ua peteĩ mesa ha’eñoháme, ha ityke’yrakuéra okaru ambue mesápe, Egiptoyguakuéra ndo’uiva’erãgui tembi’u hebreoyguakuéra ndive, tembiapo ky’a ningo Egiptoyguakuérape g̃uarã.
33Ha Jose omboguapyuka henondépe peteĩteĩ pe itujavéva raẽ ha upéi onace haguéicha pe imitãvéva peve ha ha’ekuéra kyhyjepópe oma’ẽ joa ojuehe.
34Ha Jose omoĩuka hembi’urã henondepekuéra; ha Benjamin rembi’urã 5 jevy hetave ityke’yrakuéra rembi’úgui. Ha hoy’u hikuái, ha ovy’a joa hendive hikuái.
Currently Selected:
Génesis 43: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
