Génesis 48
48
Jacóbo ohovasa Efrain ha Manaséspe
1Ha ojehu rire ko’ã mba’e oñemombe’u Josépe itúva hasyha. Upéi Jose oho ita’ýra mokõi Manases ha Efrain ndive itúva rendápe.
2Ha omomaranduka Jacóbope, ha he’i hikuái ichupe: Péina ápe nde ra’y Jose ou ne rendápe. Upéramo Israel oñeha’ãmbaite oguapy hag̃ua hupápe.
3Ha he’i Josépe: Ñanderuete, pe Ipu’akapáva, ojehechauka chéve Lúzpe, Canaan retãme, ha cherovasa,
4ha he’i chéve: Péina ápe, che rombohetáta ha romoñemoña heta hetavéta, romoĩ hag̃ua tetãnguéra ñemoñaha ramo; ha ame’ẽta ko yvy ne ñemoñarenguérape imba’etee ramo opaite árape g̃uarã.
5Ha ko’ág̃a nde ra’y mokõivéva Efrain ha Manases, onaceva’ekue Egípto retãme, aju mboyve ne rendápe, topyta avei che ra’ytee ramo, ku Ruben ha Simeon che ra’yteéicha.
6Nde ra’ykuéra upe riregua katu ne mba’erã; Efrain ha Manaséspe toñeme’ẽ katu ijyvyrã ambue che ra’ykuéra pa’ũme.
7Che aju ramoguare Padan-arámgui, Raquel omano chehegui, Canaan retãme, ag̃uahẽ mboyve Efrátape, tapére voi omano ha’e, ha upépe che añotỹ ichupe; Efráta, ko’ág̃a oñembohéra Belen.
8Ha Israel ohechávo Jose ra’ykuérape oporandu: Máva piko ko’ãva.
9Ha Jose he’i itúvape: Che ra’ykuéra, Ñanderuete ome’ẽva’ekue chéve ko tetãme. Ha Jakóbo he’i: Toñemoag̃ui cherehe ahovasa hag̃ua ichupekuéra.
10Ha Israel resakuéra iñypytũma itujágui, upévare ndohecha porãvéima. Ha’ekuéra oñembojávo hendápe ha’e ohetũ ha oñañu’ã ichupekuéra.
11Ha Israel he’i Josépe: Ndaroviaveimava’ekue ahecha jevytaha nde rova, ha péina ápe Ñanderuete ohechauka chéve avei nde ra’ykuérape.
12Upéramo Jose oguenohẽ ichupekuéra itúva renypy’ãgui ha ha’e oñakãity yvy peve.
13Ha Jose omohenda mokõivévape, Efraínpe ijakatúa gotýo opyta hag̃ua Israel asu gotýo, ha Manases ijasu gotýo opyta hag̃ua Israel akatúa gotýo; péicha ha’ekuéra oñemoag̃ui Jacóbo renondépe.
14Ha Israel oipyso ipo akatúa, ha omoĩ Efrain akã ári, péva pe imitãvéva, ha ipo asu omoĩ Manases akã ári; ha’e ombojuasa ipokuéra, Manases ha’e ramojepe Jose ra’y ypykue.
15Ha ohovasa Josépe, he’ívo: Ñanderuete renondépe oikova’ekue che rukuéra Abraham ha Isaac, Ha’e oñangareko porã cherehe aikove guive ko ára peve.
16Ijyvága rembiguái cheguenohẽmava’ekue opaite mba’e vaígui, ha’e tohovasa ko’ã mitãrusúpe; ha ha’ekuéra rupi toikove che ru Abraham, Isaac ha che réra, ha toñembohetaite hikuái ko yvy apére.
17Ha Jose ohechávo itúva omoĩha ipo akatúa Efrain akã ári, oñembopochymi ha ojapyhy itúva po akatúa, oguerova hag̃ua Efrain akã árigui Manases akã ári.
18Ha Jose he’i itúvape: Ndaupeichaiva’erã, che ru, kóa ningo pe ra’y ypykue; emoĩna nde po akatúa iñakã ári.
19Itúva katu ndoipotái, ha he’i: Aikuaa voi ningo, che ra’y, ichugui oikóta avei peteĩ tríbu, ha’e oñembotuicháta avei; ityvýra katu ituichavéta ichugui, ha iñemoñarégui oikóta peteĩ tríbu ndetuichaitéva.
20Ha ohovasa ichupekuéra pe árape, he’ívo: Israelguakuéra oporohovasa ramo he’íta: Ñanderuete tande’apo Efrain ha Manaséicha. Upéicha Jacóbo omotenondeve Efraínpe ityke’ýra Manasésgui.
21Ha Israel he’i Josépe: Péina che amanótama; Ñanderuete katu opytáta penendive, ha pendereraha jevýta pende rukuéra retãme.
22Ha che ame’ẽ ndéve hetave yvy nde ryke’ykuéragui, che aipe’ava’ekue Amorguakuéra pógui che kyse puku ha che guyrapa rupi.
Currently Selected:
Génesis 48: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
