Génesis 49
49
Jacóbo ohovasa ita’yrakuérape ha he’i umi mba’e oikova’erãva
1Ha Jacóbo ohenoiuka ita’yrakuérape ha he’i: Peñembyatypa, ha che ha’éta peẽme ojehútava umi ára ouva’erãme.
2Peñembyaty joa ha pehendu, peẽ Jacóbo ra’ykuéra, ha pejapysaka porãke pende ru Israel ñe’ẽ rehe.
3Ruben, nde ningo che ra’y ypykue, che mbaretekue, ha che pu’aka tenondegua, nde raẽ renace reiko hag̃ua mburuvicharã.
4Nde nderejejokóigui ku ysyry atã ojejokokuaa’ỹvaicha ha rejupi haguére che kuña rupápe ha péicha reñemongy’águi rehundíma pe ta’ýra reko ypykue.
5Simeon ha Levi oñopehẽnguéma peẽ peiporu vai pende kyse puku peporombopoguy rei hag̃ua,
6che ánga ndoikomo’ãi heko vaíva ndive ha namoirũmo’ãi ichupekuéra hembiapo vaípe. Ipochy rendy ojuka rei kuimba’ekuérape, ha ipy’aguasuetereígui oikytĩ rei torokuéra pytasã,
7 amaldeci ipochy rendy, iñarõ iñañaitégui. Che amboykéta ichupekuéra Jacóbo retãme ha Israel retãme amosarambipáta ichupekuéra.
8Juda, nde ryvykuéra nemomba’eguasuva’erã; nde rembopoguýta nderayhu’ỹvape ha nde ryvykuéra oñakãityva’erã ne renondépe.
9Juda, nde ningo che ra’y leõ ra’yrusu voi, mymba ojejapyhyva’ekue rupi rekakuaa. Oñemokarapã ha’e, ojeity hag̃ua ku leõicha hembi’urã ári; máva piko ikatúta omombáy ichupe.
10Avave ndoipe’amo’ãi huvicha reko ha avave ndoitymo’ãi ichupe imburuvichaguasu guapyhágui, ou peve Siloh oñeme’ẽva’erãvape ha Ha’e oguapýta imburuvichaguasu guapyhápe ha henondépe oñembyatypava’erã tetãnguérape.
11Ojokua parral máta rehe ibúrro, ha hakã rehe ibúrro memby, ijao ojohéi vínope, ha parral’a rykuerépe ijahoja.
12Hesa hũve vínogui, ha hãinguéra morotĩve kambýgui.
13Zabulon oikova’erã yguasu rembe’ýpe, oĩháme barcoguasu rupa (puérto) ha Sidon peve itríbu yvy rembe’y ojepysóta.
14Isacar, peteĩ búrro imbaretéva oñenóva tymba rekoha pa’ũme;
15ha ohechávo pe jepytu’u iporãha, ha pe yvy omoheñói porãitereiha; omboguejýta ijati’y ogueraha hag̃ua mba’e pohýi (cárga) ha omba’apóta pirapire rekávo.
16Dan oikova’erã mbojovakehára ramo hetãme, ku Israel tríbu peteĩvaicha.
17Dan oikóta mbóicha, oha’ãrõva tape ykére oisu’u hag̃ua kavaju pytápe, oity hag̃ua kavaju ariguápe ovayvávo.
18Che Ruete, che aha’ãrõ Nde cheguenohẽ hag̃ua che jejopy vaígui.
19 Soldádo atykuéra oñemoĩva’erã Gad rehe, ha’e katu ipahápe omuñava’erã ichupekuéra.
20Aser ningo pan heitereiva’erãva, ha ha’e ombohoryva’erã tetã ruvichaguasúpe.
21Neftali oiko ku guasu kuñáicha, oikóva sã’ỹ rehe, ha he’íva ñe’ẽ iporãva.
22Jose ojogua yvyra rakã hi’a hetávape yvu ypýpe, hakã pyahukuéra iñasãi tápia ári.
23Hu’y mombohára ojopy ichupe ha guyrapa jára omyangekõi ichupe;
24Jose guyrapa ojepyso tapiaite ha Jacóbo Jára oipytyvõ omombarete hag̃ua ipy’apykuéra, Israel Jára ijesperánza voi.
25Nde ru Jára nepytyvõta, Ñanderuete, pe Ipu’akapáva, nderovasáta yvagakuéra jehovasa reheve, pe yvykua pypuku jehovasa reheve, káma ha memby ryru jehovasa reheve.
26Nde ru jehovasa ituichave che ypykuéra jehovaságui ha ijyvateve umi cérro ymaguarégui, ko’ãva oĩmbáta Jose akã ha isyva ári, ichupénte ojeporavo ityke’yrakuéra apytégui.
27Benjamin peteĩ aguaraguasu omondyryrýva pyhareve ho’u hag̃ua hembi’urã ojapyhyva’ekue ha ka’aru omboja’óta imondapyre.
Jacóbo omano
28Ko’ã ñe’ẽ Jacóbo he’i 12 ita’yrakuérape, ohovasávo peteĩteĩme.
29Ha upéi he’i ichupekuéra: Che añembyatýtama che retãyguakuérakue ndive. Peẽ cheñotỹta che ru ndive ijitakuápe, Efron, pe Hetgua ñúme,
30pe itakua opyta Macpéla ñúme, Mámregui kuarahyresẽ gotýo, Canaan retãme. Abraham ojoguava’ekue Efron, pe Hetguágui iñu reheve, oñeñoty hag̃ua hogayguakuéra.
31Upépe oñeñotỹva’ekue Abraham ha hembireko Sárape; upépe oñeñotỹ Isaac ha hembireko Rebécape; upépe che añotỹma Léape.
32Pe ñu ha pe itakuaguasu oĩva ipype ojejoguava’ekue Het ra’ykuéragui.
33Ha Jacóbo he’ipávo he’iva’erãva ita’yrakuérape, omocha’ĩ ipykuéra hupápe ha omano, ha oñembyaty ituvakuéra ndive.
Currently Selected:
Génesis 49: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
