Juan 10
10
Hesu pe ovecha rerekua añeteguáva
1Añetehápe, añetehápe ha’e peẽme: Upe oike’ỹva ovecha kora rokẽ rupi ha upe ohasáva ikorajere árinte, upéva ningo mondaha.
2Upe oikéva hokẽ rupi, upéva ningo hína pe ovecha rerekua añeteguáva.
3Ha pe oñangarekóva pe kora rokẽ rehe, oipe’áta ichupe g̃uarã pe okẽ, upérõ pe ovecha rerekua ohenóita ijovechakuérape, peteĩteĩme heratee rupi, ha ohendu ramo hikuái iñe’ẽ, Ha’e oguenohẽta ichupekuéra okápe.
4Ha oguenohẽmbávo pe korágui, Ha’e ohóta henonderãnguéra, ha ijovechakuéra ohóta hapykuéri oikuaágui iñe’ẽ.
5Oikuaa’ỹva rapykuéri ndohomo’ãi, okañyva’erã uvei ichugui, ndoikuaáigui iñe’ẽ.
6Ko ñe’ẽ mbojoja kóva rupi Hesu ombo’ese ichupekuéra, ha’ekuéra katu ndohechakuaái mba’épa Ha’e he’ise ichupekuéra.
7Upérõ Hesu he’i jevy ichupekuéra: Añetehápe, añetehápe, ha’e peẽme: Che ningo pe okẽ ovechakuéra ohasa hag̃ua.
8Opavave che mboyve ouva’ekue ningo mondaha ha mba’evai apoha, ha ovechakuéra nohendúi ichupekuéra.
9Che ningo pe okẽ, oimeraẽva chérupi oikéva pe okẽ rupi ojesalváta ha hekove pukukue javeve ojehúta umi mba’e oikotevẽva oikove hag̃ua.
10Umi mondaha ningo ou omonda ha oporohundi hag̃uánte, Che katu aju ame’ẽ hag̃ua pe tekove añeteguáva ha hemby hag̃ua gueteri.
11Che ningo pe ovecha rerekua añetéva. Pe terekua añeteguáva ome’ẽ hekoveteéva ijovecha rehehápe.
12Ha peteĩ tembiguái katu ndaha’éiva terekua porãva ha umi ovecha naimba’éigui avei, ohechávo ou pe aguaraguasu, oheja rei umi ovecha ha okañy, ha pe aguaraguasu ogueraha ha omosarambipa umi ovecha.
13Upéicha ojapo pe tembiguái omba’apóva pirapire rehe, ndojepy’apýigui umi ovecha rehe.
14Che katu pe ovecha rerekua añeteguáva, aikuaa porã che ovechakuéra, pe chemba’epágui.
15Che Ruete chekuaa háicha, Che aikuaa avei che Ruetépe. Che ame’ẽ che rekove che ovechakuéra rehe.
16Ha Che areko avei ambue korápe che ovecharãnguéra. Che aruva’erã avei umívape, umíva ohendúta che ñe’ẽ, ambyatypáta peteĩ korapýpente, oiko hag̃ua peteĩ ovecha atyguasu ramo peteĩ ovecha rerekua poguýpente.
17Upévare che Ruete cherayhu, Che ame’ẽ rehe che rekove, ajapyhy jevy hag̃ua.
18Avave ndoipe’amo’ãi chehegui che rekove, che chejehegui voínte ame’ẽ. Che ningo areko pe pu’aka ame’ẽ hag̃ua che rekove, ha ajapyhy jevy hag̃ua.
19Judayguakuéra apytépe ko ñe’ẽ kóva rupi oiko jevýma juavy.
20Ijapytépe oĩ umi he’íva: Kóva oguereko mba’epochy ha itarováma. Mba’érehe piko pejapysaka hese.
21Ambuekuéra katu he’i: Imba’epochýva ndaikatúi oñe’ẽ péicha, ni imba’epochýva nomongueramo’ãi peteĩ hesatũvape.
22Umi ára umívape og̃uahẽma pe araro’y ha Jerusalénpe oiko peteĩ areteguasu, imandu’a hag̃ua oñemboyke jevymaha Ñanderuete rogaguasu ichupe g̃uarãnte.
23Ha Hesu oguata Ñanderuete rogaguasúpe, Salomon rogaguyguasúpe.
24Upépe Judayguakuéra oñemboja Hesu rendápe ha he’i ichupe: Araka’e peve piko Nde reha’ãrõta remombe’u porã hag̃ua, Ndépa pe Crísto térã nahániri. Emombe’u porãna oréve, ha anive remyangekõi ore angakuéra.
25Hesu ombohovái ichupekuéra: Che ha’éma peẽme ha ndapegueroviái, umi tembiapo ajapova’aína che Ruete rérape ohechauka porã mávapa Che.
26Peẽ katu ndapegueroviái, peẽ ndaha’éigui che ovechakuéra.
27Che ovechakuéra ohendu katuete che ñe’ẽ ha che aikuaa porã ichupekuéra, ha ha’ekuéra oñemboja che rendápe oho hag̃ua che rapykuéri Che ahasehápe.
28Ha Che ame’ẽ ichupekuéra tekove tapia g̃uarãva, ha noñehundimo’ãi máramo, ha avavete ndoipe’amo’ãi ichupekuéra che pógui.
29Che Ruete ipu’akapa ha Ha’e voi ome’ẽma chéve umi ovechakuéra, ha avavete ndoipe’amo’ãi ichupekuéra che Ruete pógui.
30Che ha che Ruete peteĩchánte voi.
31Ko ñe’ẽ kóva rehe Judayguakuéra ohupi jevy itakuéra ojuka hag̃uáicha ichupe.
32Ha Hesu he’i ichupekuéra: Heta tembiapo porã ningo ahechaukáma peẽme che Ruetéguio, mba’eichagua tembiapo rehe piko peẽ chejukase.
33Nanerembiapo porãi rehe rojukase, reñe’ẽvai haguére Ñanderuetére ha nde peteĩ kuimba’enteha, rejejapo Ñanderuete ramoguáicha.
34Hesu ombohovái ichupekuéra: Ndojehaíri piko pene rembiapoukapykuérape: Che ha’éma, peẽ ningo yvága jarakuéra.
35Oñehenói ramo umi ohenduva’ekuépe yvága jára ramo, ha Ñanderuete kuatiañe’ẽ ndaikatúi opyta rei.
36Pe Ñanderuete oiporavóma ha omboumava’ekuépe ko yvy ape ári piko peẽ pejéta ichupe: Nde reñe’ẽvai, ere haguére: Che ningo Ñanderuete Ra’y.
37Ndajapói ramo che Ruete rembiapo, ani chegueroviátei.
38Ajapo ramo katu pecheguerovia umi mba’e ajapóva rehehápe, peikuaa ha peguerovia hag̃ua che Ruete oĩha chepype, ha Che aĩha ipype.
39Upévare oñeha’ã jevy hikuái oapresa hag̃ua Hesúpe, Ha’e katu ojei ijapyteguikuéra.
40Ko’ã mba’e rire Hesu oho jevy ysyry Jordan mboypýri, Juan Bautísta obautiza haguépe, ha upépe opyta.
41Heta oúva hendápe he’i: Añetehápe, Juan ndojapoiva’ekue mba’eveichagua milágro, opaite mba’e Juan he’iva’ekue katu ko kuimba’e kóva rehe hi’añete.
42Ha heta upepegua ojerovia hese.
Currently Selected:
Juan 10: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
