Juan 11
11
Lázaro omano ramoguare
1Peteĩ kuimba’e hérava Lázaro hasyete. María ha itykéra Márta oiko avei hendive, táva Betániape.
2Ko María ningo, Lázaro reindy, oñohẽva’ekue Hesu akã rehe mba’e ryakuã porã, omyakỹ hesay reheve Hesu pykuéra ha omokãva’ekue iñakã raguépe.
3Ha Lázaro reindykuéra he’iuka Hesúpe: Ore Jára, nderayhúva ningo hasyetehína.
4Ha Hesu ohendúvo péva, he’i: Ko mba’asy kóva ndoguerahamo’ãi ichupe ñemanóme, Ñanderuete reko jajaipa ojehechauka hag̃uánte, ha kóva rupi oñembotuicha hag̃ua avei Ñanderuete Ra’ýpe.
5Hesu ohayhuete Márta, María ha Lázarope.
6Hesu ohendu ramo jepe Lázaro hasyha opytave gueteri mokõi ára oĩháme.
7Kóva rire katu, he’i hemimbo’ekuérape: Jaha jevy Juda retãme.
8Hemimbo’ekuéra katu he’i ichupe: Mbo’ehára umi Judaygua ndejukamo’ãva’ekue, ha rehose jevy piko upépe.
9Hesu katu he’i ichupekuéra. Ndoguerekói piko pe ára 12 hóra. Ha oguatáva kuarahy rendýpe noñepysãngamo’ãi ohecha porãmbágui.
10Upe oguatáva pyhare pukukuépe katu, oñepysãngáta ndaipórigui tesape.
11He’i rire ko’ã mba’e, he’i ichupekuéra: Lázaro, che ahayhúva okehína, aháta amombáy hag̃ua ichupe.
12Upérõ hemimbo’ekuéra he’i: Ore Jára, oke ramo okuerátama.
13Hesu katu oñe’ẽ Lázaro omanóma hague, ha’ekuéra katu oimo’ã okentehahína.
14Upévagui Hesu he’i porã ichupekuéra: Lázaro omanóma.
15Ha avy’a penderehehápe naiméi hague upépe, péicha iporãvégui peẽme g̃uarã peguerovia hag̃ua, ko’ág̃a katu jaha hendápe.
16Upémaramo Tomas, ojehérova Kõingue, he’i iñirũnguérape: Jaha ñamano hag̃ua avei hendive.
17Hesu og̃uahẽvo Lázaro oñeñotỹ haguépe, ojohu ichupe omano hague irundy árama.
18Betánia opyta Jerusaléngui haimete irundy kilómetro.
19Heta Judayguakuéra oúma oñandu hag̃ua Márta ha Maríape, omoangapyhy hag̃ua ichupekuéra ikyvy ñemanongue rehe.
20Márta ohendúvo Hesu og̃uahẽha, osẽ ohug̃uaitĩvo hendive, María katu opyta guapyhápe hógape.
21Upérõ Márta he’i Hesúpe: Ore Jára, reime rire ko’ápe che kyvy nomanoiva’erãmo’ã.
22Opáichavo ag̃aite voi aikuaa opaite mba’e rejeruréva guive Ñanderuetépe, Ha’e ome’ẽtaha ndéve.
23Upérõ Hesu he’i ichupe: Nde kyvy oikove jevýta.
24Ha Márta ombohovái ichupe: Aikuaa ha’e oikove jevytaha, Ñanderuete oporomoingove jevypávo pe ára pahápe.
25Upérõ Hesu he’i ichupe: Che ningo pe jeikove jevy ha pe tekovete. Oimeraẽ ojeroviáva guive cherehe, omano ramojepe, oikove jevyva’erã.
26Ha opaite oikovéva ha ojeroviáva cherehe, nomanomo’ãi tapia g̃uarã. Regueroviápa ko’ã mba’e.
27Ha Márta he’i Hesúpe: Che Jára, che aguerovia Nde ha’eha Ñanderuete Ra’y, pe Crísto ouva’erãva ko yvy ári.
28He’i rire ko’ã mba’e, oho ohenói hag̃ua ñemiháme ikypy’y Maríape, ha he’i ichupe: Pe mbo’ehára oúma ha nerenoiuka.
29Ha María ohendúvo péva, pya’e opu’ã ha oho Hesu rendápe.
30Hesu ningo ne’ĩra oike Betániape, opyta gueteri Márta ojohu haguépe ichupe.
31Umi Judaygua ouva’ekue Márta ha María rógape omoangapyhy hag̃ua ichupekuéra, ohechávo María opu’ã pya’e ha osẽma hague, oho hikuái hapykuéri, oimo’ãvo ohoseha ikyvy oñeñotỹ haguépe ojahe’o hag̃ua upépe.
32Ha María og̃uahẽvo Hesu rendápe, ohechávo ichupe ojeity oñesũ ipy renondépe, ha he’i Hesúpe: Ore Jára, reime rire ko’ápe nomanoiva’erãmo’ã che kyvy.
33Hesu ohechávo ichupe ojahe’oha, ha umi Judaygua omoirũva ichupe avei, Ha’e ipyahẽ ha iñangekõi Ipytu Porãme.
34Ha oporandu: Moõpa peñotỹra’e ichupe. He’i hikuái ichupe: Karai, eju ehecha.
35Ha Hesu ojahe’o.
36Ha umi Judaygua he’i: Ma’ẽmína, mba’eichaitépa Ha’e ohayhúra’e ichupe.
37Ijapytépe katu oĩ umi he’íva: Ko omonguerava’ekue hesatũvape, ndaikatúira’e piko ojoko ichupe ani hag̃ua omano.
38Hesu ipyahẽ ha iñangekõi jevy Ipytu Porãme ha oho Lázaro oñeñotỹ haguépe. Oñotỹ hikuái Lázarope peteĩ itakuaguasúpe, ha omboty hikuái pe itakuaguasujuru.
39Upérõ Hesu he’i: Peipe’a pe ita. Márta, pe omanova’ekue reindy, he’i Hesúpe: Ore Jára, oiméne inéma ningo, irundy árama omano hague.
40Hesu katu ombohovái ichupe: Nda’éi piko ra’e ndéve: Reguerovia ramo rehechataha Ñanderuete reko jajaipa ha ipu’aka.
41Upémaramo oipe’a hikuái pe itaguasu, ha Hesu ojesaupi ha he’i: Che Ruete, Che agradece ndéve cherendu haguére.
42Che ningo aikuaa voi tapiaite Nde cherenduha, ko tetãygua aty kóva rehehápente ajerure, oguerovia hag̃ua hikuái Nde chembou hague.
43Ha he’ipávo ko’ã ñe’ẽ, Hesu osapukái: Lázaro, esẽ okápe.
44Ha pe omanova’ekue osẽ, ipo ha ipy ojejokuapa ha hova ojejaho’i páñope. Hesu he’i: Pejora ichupe ha peheja toho.
45Heta umi ouva’ekue María ndive, ohechávo umi mba’e Hesu ojapova’ekue ojerovia hese.
46Ambuekuéra katu oho fariseokuéra rendápe ha omombe’u hikuái ichupekuéra opaite mba’e Hesu ojapova’ekue.
47Upérõ umi pa’iguasu ha umi fariséo ruvicha ohenói opaite 71 karai ancianokuérape ha he’i hikuái: Mba’e piko jajapotañaína pe kuimba’e péva ningo ojapo heta milágro.
48Jahejánte ramo péicha, opavavete ojeroviáta hese, ha Romayguakuéra oúta oipe’a hag̃ua ñandehegui Ñanderuete rogaguasu renda ha opaite ñane retã avei.
49Peteĩva ijapytépe, hérava Caifas, upe áñope oikovahína pa’iguasu ramo, he’i ichupekuéra: Peẽ ningo ndapeikuaái mba’eve.
50Ndapehechakuaái iporãveha omano peteĩ kuimba’énte, oñehundipaite rãngue peteĩ tetã.
51Ko ñe’ẽ kóva Caifas nde’íri ijehegui rei, ha’e he’i ko’ã ñe’ẽ oikoháre pa’iguasu ramo pe áñope, ha oprofetiza Hesu omanova’erãha pe tetã rehe,
52ha ndaha’éi Israelguakuéra rehénte, ombyaty hag̃ua avei Ñanderuete ra’y ha rajykuéra oikóva guive ko yvy apére opaite tetãnguéra apytégui.
53Ha upe ára guive Israel ruvichakuéra opyta peteĩ ñe’ẽme ojuka hag̃ua Hesúpe.
54Upévare Hesu ndojechaukavéima opavave Judayguakuéra apytépe, oho uvei upégui desiérto ypýpe, peteĩ tava’ípe, hérava Efrain, ha opyta upépe hemimbo’ekuéra ndive.
55Upéramo Judayguakuéra páscua areteguasu hi’ag̃uíma ha heta Israelgua oho Jerusalénpe opaite Israel retãgui oñemopotĩ hag̃ua, Moises rembiapoukapy he’iuka háicha.
56Oheka joa hikuái Hesúpe ha umi og̃uahẽva Ñanderuete rogaguasúpe oporandu ojupe: Mba’épa hi’ã peẽme, ndouichénepa Hesu ko arete kóvape.
57Umi pa’iguasu ha fariseokuéra he’iukára’e, oime ramo oikuaáva moõpa Hesu oĩ, tomombe’u ichupekuéra, oapresauka hag̃ua hikuái ichupe.
Currently Selected:
Juan 11: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
