Juan 17

Hesu oñembo’e hemimbo’ekuéra rehe

1Ko’ã mba’e ko’ãva Hesu oñe’ẽvo ojesaupi yvága rehe ha he’i: Che Ruete og̃uahẽma pe hóra rembotuicha hag̃ua nde Ra’ýpe, ha nde Ra’y nembotuicha hag̃ua avei ndéve.

2Nde reme’ẽ ichupe pu’aka opavave yvyariguakuéra rehe, Ha’e ome’ẽ hag̃ua ndérupi ichupekuéra pe tekove tapia g̃uarãva.

3Ha pe tekove tapia g̃uarãva ningo kóva: Tandekuaa hikuái ndéve, Ndémante Ñanderuete añeteguáva, ha toikuaa avei pe Nde rembouva’ekue, Hesu Crísto.

4Che ningo rombotuicha ko yvy ári ha ajapopa pe tembiapo reme’ẽva’ekue chéve Che ajapo hag̃ua.

5Ha ko’ág̃a che Ruete chembotuicha nendive pe teko jajaipápe, Che aguereko ypyva’ekue nendive aju mboyve guive ko yvy ári, ko múndo oiko mboyve.

6Che aikuaaukáma nde réra umi ne retãyguakuérape, Nde reme’ẽmava’ekue chéve, ha’ekuéra ojapo hag̃ua ne ñe’ẽ ha ne rembipota.

7Ko’ág̃a oikuaa hikuái opaite mba’e Nde reme’ẽva’ekue chéve, ne mba’eha voi.

8Opaite ñe’ẽ ambohasámava ichupekuéra, ha’ekuéra ojapyhy porãma, ohechakuaa porãgui Che añetehápe aju hague ndehegui, ha ogueroviáma hikuái Nde chembou hague.

9Che ajerure’aína ndéve hesekuéra, ndajeruréi ambuekuéra rehe, umi reme’ẽva rehénte chéve, ha’ekuéra ningo ne mba’e voi.

10Opaite che mba’éva ningo ne mba’e voi, ha opaite ne mba’éva che mba’e avei, ha Che añembotuichaite ipypekuéra.

11Che ningo ndapytamo’ãvéi ko yvy ári, ko’ãva katu opytatahína gueteri, Che katu aháta ne rendápe. Che Ruete nde reko potĩete rasa ha hekoitépe reñangareko umi Nde reme’ẽmava’ekue chéve rehe nde réra rehehápe, oiko hag̃ua peteĩ ñe’ẽme, ñande jaiko háicha.

12Che aĩ aja ko yvy ári, Che voi añangareko hesekuéra nde rérape, umi Nde reme’ẽva’ekue chéve rehe, ha ijapytégui avave noñehundíri, peteĩmínte oñehundiva’erãva voi, pe ñehundi ra’y, oikopa hag̃ua ojehaimava’ekue Ñanderuete kuatiañe’ẽme.

13Ko’ág̃a ningo aháta ne rendápe ha añe’ẽmbáma ko’ã mba’e ne retãyguakuérape, ha’ekuéra oguereko hag̃ua avei opaite vy’a oĩva che py’apýpe.

14Che ningo ame’ẽma ichupekuéra ne ñe’ẽ, hapichakuéra katu ndaija’éi hesekuéra, ndoikosevéigui ambue yvyariguakuéra oiko háicha, ha upévare ha’ekuéra ndacherayhúi avei chéve.

15Ndajeruréi Nde reipe’a hag̃ua ichupekuéra ko yvy árigui, ajerure uvei Nde reñangareko hag̃ua hesekuéra mba’evaígui (Añagui).

16Ha’ekuéra ningo ndoikovéima kuimba’e térã kuña reko vaípe, oiko uvei teko potĩ ha hekópe Che aiko háicha.

17Ehekombo’e porã ichupekuéra pe añetegua, ne ñe’ẽ ningo pe añetegua.

18Nde chembou haguéicha ko yvy ári, péicha avei Che amondo ichupekuéra ko yvy tuichakuépe.

19Hesehapekuéra Che añemboheko porã, ha’ekuéra oñemopotĩ porã hag̃ua pe teko hekoitépe ha añeteguápe.

20Ndajeruréi katu hesekuéra añónte, ajerure avei umi ojeroviátava nderehe iñe’ẽnguéra rupi.

21Opavavete oiko hag̃ua oñondive peteĩ py’ápe, Nde reiko háicha chepype, ha Che aiko háicha ndepype, upéicha ha’ekuéra oiko hag̃ua avei ñandepype, yvyariguakuéra oguerovia hag̃ua Nde chembou hague.

22Ha Che ambohasa hag̃ua ichupekuéra pe teko jajaipáva Nde reme’ẽmava’ekue chéve, oiko porã hag̃ua oñondive, Ñande jaiko porã háicha oñondive.

23Che ipypekuéra ha Nde chepype, upéichamante oiko porã hag̃ua hikuái oñondive, ha yvyariguakuéra oikuaa hag̃ua Nde chembou hague, ha Nde rehayhuha ichupekuéra, Nde cherayhu háicha chéve.

24Che Ruete, umi Nde reme’ẽva’ekue chéve aipota oĩ hag̃ua hikuái avei Che aĩháme, ohecha hag̃ua hikuái che reko jajaipa Nde reme’ẽmava’ekue chéve, ha Nde cherayhu voiva’ekue ojejapo mboyve ko múndo ha yvagakuéra.

25Che Ruete, nde reko ningo iporãite, tetãyguakuéra apytépe heta ningo nandekuaáiva, oĩ katu umi ndekuaáva, Che roikuaa háicha ndéve ha ha’ekuéra oikuaáma Nde voi chembou hague ko yvy ári.

26Ha Che aikuaauka ichupekuéra mávapa Nde ha ahechauka ichupekuéra ne mborayhu nde reiporúva chendive ha pe mborayhu toĩ avei ipypekuéra, ha che aiko avei ipypekuéra.

Currently Selected:

Juan 17: ÑÑP2015

Highlight

Copy