Juan 6
6
Hesu omongaru 5.000 kuimba’ekuérape
1Ko’ã mba’e rire, Hesu ohasa Galiléa yguasu mboypýri, hérava avei Tibérias yguasu.
2Hetaiterei hetãyguakuéra oho Hesu rapykuéri, ohechágui umi techaukaha ha milágro Ha’e ojapova’ekue, omonguerávo umi hasývape.
3Hesu ojupi peteĩ cérro ári, ha oguapy upépe hemimbo’ekuéra ndive.
4Hi’ag̃uíma upérõ pe páscua, Judayguakuéra areteguasu.
5Hesu ojesaupívo ohecha oumaha hendápe hetaiterei hetãygua, upémarõ he’i Felípepe: Moõguipa ikatu jajogua pan ñamongaru hag̃ua ko’ã tapichaitápe.
6Péicha ningo he’i oha’ã (oprova) hag̃uánte ichupe, Ha’e ningo oikuaa voi upe ojapótava.
7Ha Felípe ombohovái ichupe: 200 ára tembiapo repy ndohupitymo’ãi jajogua hag̃ua peteĩteĩme michĩmínte jepe ho’u hag̃ua, hetaitereígui hikuái.
8Ambue Hesu remimbo’e, Andres, Simon Pédro ryvy, he’i ichupe:
9Oĩ ningo peteĩ mitãkuimba’e oguerekóva 5 pan ha mokõi pira. Mba’e piko jajapóta pévagui ko’ã tetãyguaitápe g̃uarã.
10Upérõ Hesu he’i ichupekuéra: Pemboguapyukapa umívape kapi’ipépe, ha omboguapy hikuái 5.000 kuimba’e rupi.
11Hesu ojapyhy umi pan, oagradece Ñanderuetépe, ha ome’ẽuka umi oguapývape, péicha ojapo avei umi pira rehe, ha ome’ẽ ichupekuéra ho’use háicha.
12Hyg̃uatãmbáma ramo, Hesu he’i hemimbo’ekuérape: Pembyaty umi tembi’u pehẽngue hembýva guive, anítei oñehundi mba’evete.
13Ombyatypa rirehikuáiomyenyhẽ 12 ajaka pe pan ha pira rembyrégui.
14Umi kuimba’e ohechávo Hesu ojapoha milágro he’i hikuái: Añetehápe, kóva ningo pe proféta ouva’erãva ko yvy ape ári.
15Hesu katu ohechakuaávo hetãyguakuéra omoĩseha ichupe Israel retã ruvicha ramo, ojei ijapytégui ha Ha’e ha’eñomi oho cérro ári (oñembo’e hag̃ua).
Hesu oguata y apére
16Ka’aru pytũvo, hemimbo’ekuéra oguejy yguasúpe,
17ha oike peteĩ canóape ohasa hag̃ua pe yguasu mboypýri, oho hag̃ua Capernaúmpe. Pyharéma ha Hesu nog̃uahẽi gueteri hendapekuéra,
18ha pe yguasu ipochyve ohóvo, pe yvytu oipeju hatãgui.
19Ha oho rire hikuái peteĩlégua rupi, ohecha hikuái Hesu oguataha y apére, ha oñemoag̃uive oúvo icanoakuéragui, oñemondyipa joa hikuái.
20Hesu katu he’i ichupekuéra: Chénteko, ani pekyhyje.
21Ha ohejasévo hikuái Hesu oike icanóape, upetevove pe canóa ojáma pe yguasu rembe’ýpe, ha péicha pya’ete og̃uahẽ hikuái ohotahápe.
Israelguakuera oheka Hesúpe
22Upe ára ambuépe, umi tetãyguakuéra opytava’ekue pe yguasu mboypýri, oikuaáma oĩ hague peteĩ canoamínte, ha Hesu ndojupíri hague pe canóape, hemimbo’ekuérante oho hague upe canóape.
23Upeaja og̃uahẽ ambue canoakuéra pe táva Tibériasgui, hi’ag̃ui Hesu Crísto ho’uka haguépe pe pan umi 5.000-pe, oagradece rire Itúvape.
24Ha Israelgua aty ndohecháivo Hesúpe, ni hemimbo’ekuérape, ojupi jevy hikuái icanoakuérape ha oho Capernaúmpe oheka hag̃ua Hesúpe.
Opavave oheka Hesúpe
25Ha ojohúvo ichupe pe yguasu mboypýri, oporandu ichupe: Mbo’ehára, araka’e piko reg̃uahẽra’e ko’ápe.
26Hesu ombohovái ichupekuéra ha he’i: Añetehápe, añetehápe ha’e peẽme, peẽ ningo chereka ndaha’éi pehecha haguére umi milágro, pe’u haguére uvei pe pan ha peneryg̃uatã haguérente uvei.
27Ani peñeha’ã pehupity hag̃uánte pe tembi’u opa reíva, peñeha’ã katu pehupity hag̃ua pe tembi’u tekove tapia g̃uarãva uvei, ha kóva ningo pe yvyarigua Ra’y ome’ẽtava peẽme, ha Ñanderuete, pe Jaraitéva omoañete voi ichupe.
28He’i hikuái ichupe: Mba’e piko rojapóta, rojapo hag̃ua Ñanderuete rembipota.
29Hesu ombohovái ichupekuéra ha he’i: Kóva ningo Ñanderuete rembipota: Peẽ pejerovia hag̃ua Ha’e ombouva’ekue rehe.
30He’i hikuái ichupe: Ikatúpa rehechauka oréve peteĩ milágro rojerovia hag̃ua nderehe.
31Ore rukuéra ho’uraka’e pemana desiértope, ojehai háicha Ñanderuete kuatiañe’ẽme: Ñanderuete ome’ẽ ichupekuéra pan yvagaguiguáva ho’u hag̃ua, (Éxodo 16,4; 16,14; Salmokuéra 78, 24).
Hesu ningo pe pan oporomoingovéva
32Upémaramo Hesu he’i ichupekuéra: Añetehápe, añetehápe, Che ha’e peẽme: Moises ningo nome’ẽiva’ekue peẽme pe pan yvagaguiguáva, che Ruete katu ome’ẽhína peẽme pe pan añetegua yvagaguiguáva.
33Ñanderuete pan ningo oguejyva’ekue yvágagui ha ome’ẽ pe tekove añetéva tetãyguakuérape.
34Upérõ he’i hikuái: Karai, eme’ẽ tapiána oréve upe pan.
35Upémaramo Hesu he’i ichupekuéra: Che voi ningo pe pan oikovéva, oimeraẽva oúva guive che rendápe naiñembyahyimo’ãi araka’eve, ha ojeroviáva guive cherehe, máramo ndaijy’uheimo’ãvéi.
36Chéma voi ha’e peẽme, peẽ cherecha ramojepe ndapejeroviái cherehe.
37Opaite umi che Ruete ome’ẽva chéve oúta che rendápe, ha upe oúva che rendápe mba’evéicharamo namosẽmo’ãi okápe.
38Che ningo aju yvágagui, ajapo hag̃ua hekópe chembouva’ekue rembipota.
39Ha kóva ningo chembouva’ekue rembipota, ani hag̃ua Che ahundi avavépe, Ha’e ome’ẽmava guive chéve, amoingove jevy hag̃ua uvei ichupe pe ára pahápe.
40Kóva ningo che Ruete rembipota, opavave ohecháva guive Ita’ýrape ha ojeroviáva guive hese oguerekóma pe tekove añeteguáva ko ára atyguasúpe ha Che amoingove hag̃ua ichupekuéra pe ára pahápe.
41Israelguakuéra oñe’ẽngururu ha oñe’ẽ vai Hesu rehe Ha’e he’i haguére: Che ningo pe pan oguejyva’ekue yvágagui.
42Ha he’i hikuái: Kóvapa ndaha’éi Jose ra’y. Jaikuaa ningo itúva ha isýpe, mba’éicha rupi piko Ha’e ikatu he’i: Che aguejy yvágagui.
43Hesu katu ombohovái ichupekuéra: Anítei peñe’ẽngururupa oñondivekuéra, ni peñe’ẽvai cherehe.
44Avave ningo ndaikatúi ou che rendápe ogueru’ỹ ramo ichupe che Ru chembouhare, ha Che amoingovéta ichupe pe ára pahápe.
45Pe proféta Isaías he’i voi: Ñanderuete ohekombo’epáta ichupekuéra. Ha opavave ohendúva guive Ñanderuetépe ha oñehekombo’éva Ha’érupi, katuete oúta che rendápe, (Isaías 54,13).
46Avave ndohechái Ñanderuetépe, pe ouva’ekue Ñanderuetégui añónte ohecha ichupe.
47Añetehápe, añetehápe, ha’e peẽme: Pe ojeroviáva cherehe oguerekóma pe tekove tapia g̃uarãva.
48Che ningo pe pan oporomoingovéva.
49Pende rukuéra ho’uva’ekue desiértope ningo pe mana ha upeichavérõ jepe omanomba hikuái.
50Kóva ningo pe pan oguejýva yvágagui, ha upe ho’úva kóva nomanomo’ãi.
51Che ningo pe pan oporomoingovéva ha oguejyva’ekue yvágagui, upe ho’úva ko pan oikovéta tapiaite, ko pan che ame’ẽtava yvyariguakuéra rekoverã rehehápe, che ro’oite voi ningo.
52Ko Hesu ñe’ẽ rehe Judayguakuéra oñoñe’ẽjoapi oñondive ha he’i: Mba’éicha piko kóva ikatúta ho’uka ñandéve ho’okue.
53Upéramo Hesu he’i ichupekuéra: Añetehápe, añetehápe, ha’e peẽme: Pe’u’ỹ ramo pe yvyarigua Ra’y ro’o, ha pemboy’u’ỹ ramo huguy ndapeguerekomo’ãi tekove añeteguáva pendepype.
54Pe ho’úva che ro’o ha omboy’úva che ruguy oguerekóma tekove tapia g̃uarãva; ha Che amoingove jevýta ichupe pe ára pahápe.
55Che ro’o ningo pe tembi’u añeteguáva, ha che ruguy pe ñemboy’u añeteguáva.
56Pe ho’úva che ro’o ha omboy’úva che ruguy, opyta chepype ha Che ipype.
57Chembou haguéicha che Ruete oikovéva, ha Che aikove háicha che Ruete rupi, upéicha avei pe che retégui ho’uva, oikovéta avei chérupi.
58Kóva ningo pe pan oguejyva’ekue yvágagui, upe ho’úva ko pan kóvagui nomanomo’ãi, oikoveva’erã tapia g̃uarã uvei. Ñande rukuéra katu omanomba ho’u ramo jepe pe mana.
59Ko’ã ñe’ẽ Hesu ombo’e Ñanderuete rógape Capernaúmpe.
Hesu ñe’ẽ ogueru tekove tapia g̃uarãva
60Heta hemimbo’ekuéra aty apytépe ohendúvo ko’ã ñe’ẽ Hesu jurúgui, he’i: Ipohýi ningo iñe’ẽ. Máva piko ikatu ohendu ha ojapo.
61Hesu oikuaávo hemimbo’eteekuéra jepe oñe’ẽngururuha iñe’ẽ rehe, oporandu ichupekuéra: Ko’ã che ñe’ẽ piko penemoñeko’õi avei.
62Mba’éiko oikova’erã pehecha ramo yvyarigua Ra’y ojupi jevýrõ oĩ haguépe.
63Pe Pytu Porãmbáva ningo oporomoingove, pe tete año ndovaléi mba’eve. Ko’ã ñe’ẽ Che ha’éva guive Ipytu Porãteéva ha ogueru pe tekove añeteguáva.
64Oĩ katu pende apytépe umi ojerovia’ỹva. Hesu oikuaa porã voi ñepyrũ guive umi ndojeroviapáiva hese ha pe oityka vaítava (otraicionátava) ichupe.
65Ha upévare Hesu he’i: Avavete ndaikatúi ou che rendápe Che Ruete ndoguerúi ramo ichupe.
66Upeguive heta hemimbo’ekuéra opoi ichugui, ha nomoirũvéi ichupe.
67Upémaramo Hesu oporandu avei umi 12 hemimbo’ekuérape: Pehosépa peẽ avei.
68Simon Pédro katu he’i ichupe: Ore Jára, máva rendápe piko rohóta. Ne ñe’ẽ ningo oporomoingovéva tapia g̃uarã,
69ha ore rojerovia ha roikuaa porã ningo Nde Ñanderuete Ra’yha, pe Crísto.
70Hesu he’i ichupekuéra: Ndapoiporavói piko ra’e 12-pe, ha peteĩva pende apytépe peteĩ mba’epochy.
71Hesu he’i péva Júdas, Simon Iscarióte ra’y rehe, ha’e ningo pe oityka vaítava Hesúpe. Ha’e ningo peteĩ Hesu remimbo’éva, umi 12 apytépe.
Currently Selected:
Juan 6: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
