Yuhana 19

Mata 27:26-31; Markus 15:15-20

1Aɗaba taŋa, Pilatus a vəl vatwa aà magəsa Yesuw kuɗa, ta gə̀zl nda megwiymbiɗ. 2Gà sliwdze tə daha, tə sàs adak, tə slàslapa akaba, ti ndìwìɗer dər gər. Ti tike aaka andiw nduzzwa ŋana asa. Tə dùwaya dər ŋgat kamala Əbay a. 3Ti sìrìkeha a təv ŋgar, ta gwaɗar: «Kər Əbay gà Yahuda, Mbulum mà sə̀kàhak à mendze yak aà biybiy.» Dite wuŋ wuŋ tə lakayar kuɗa.

4I fataya ka, Pilatus a dara a bəra ya asa, a dara, a gwaɗa a gà Yahuda ana ɗa i bəra ya: «Tsarakum, araha, ti de a kurumara à wele aaha a bəra ya, dite kà sərum dər ka, Yàa le aà bakal ŋgar ana a ge ya tsidze, na iye ya.» 5Yesuw a dara a bəra ya nda gà mendìwìɗè gər adak ata ya, nda gà andiw nduzzwa ŋa aaha ika ba asa. Pilatus a gwaɗa a tar: «Araha, mburma kurum naha.» 6Ama gà Əbay gà ɓəzla mandəva kuɗa a Mbulum, nda gà ɓəzla makàslà ga Mbulum ata, ta ŋgatar tsara ka, ta wideye ŋgəlakəkka hinne, ta gwa: «Ndwandway ŋgat aà dizl magə̀làwà ŋa, say ndwandway ŋgat aà dizl magə̀làwà ŋa ata ndzer.» Pilatus a gwaɗa a tar: «Kurum ŋa dum dər, ka tə ndwandwayum ŋgat aà dizl ata nda ahər kurum ŋa, tsəka, iye ka, Yàa le aà bakal ana biy makə̀ɗà ahər ŋgat a tsa, na iye ya.» 7Gà Yahuda ata ta gwaɗar aaka: «Mər ka, kamala biy ana a sàs a məpala ahəm mər a ka, say makə̀ɗà ŋgat ilik pəra. Aɗaba a gwa ka, iye Kəla Mbulum.»

8Pilatus a tsaraka bazlam tar ata ka, a ge magəɗa hinne asa. 9A mbəɗ gər a ga, a daha, a gwaɗa a Yesuw: «Kà dara dze ana, i ŋga ya kaɗəŋ a?» Ama Yesuw a gəs mifèfiler aaka tsa. 10Pilatus a gwaɗar asa: «Kə̀ gəs mifèfiliŋ aaka tsəna, aàla? Kà sər tsiye, iye ka, ndzəɗa gà a riŋ, Yàa waya ka, i pìl a à kəriŋa, kige tsa, i ndwendwey a kər aà dizl ata ya?» 11Yesuw a gwaɗar aaka: «Ki sle aà mege aà iye duwa ilik tsidze, na Mbulum aka vəlak iye a ahər tsiye. Aɗaba taŋa na wele ana aka gə̀sak iye ya ka, bakal ŋgar a za biy yak fit a.» 12I dəba bazlam ata ya tsara ka, Pilatus a yaha vatwa, a waya məpəla à Yesuw hiywe. Ama gà Yahuda tə dza akaba bazlam ŋgəlakəkka nda Mewideye asa, ta gwa: «Na kàa pəl à wele aaha ka, kər ka, masla Əbay gà Ruma asa tsa. Aɗaba wele ana a ne à ba ŋgar batsah Əbay ya ka, taŋa ŋgat ka, mala mene are a batsah Əbay gà Ruma ata seyiŋ ivaɗ.»

13Pilatus a tsaraka bazlam ata ka, a dara à Yesuw a bəra ya asa. Ŋgat ŋa a daha, a ndza aka təv mendze ana a gewa ikəka seriye ya. Tə zal a təv ata ndaka ahəm gà Yahuda ka, Gabata, kamala megweɗe ya ka, dàmbàzlà ana tə zlàzl nda kur a. 14Pilatus a gwaɗa a gà Yahuda ata: «Batsah Əbay kurum naha.» Ta ge dukw ata ka, magər pat aka à mege, dite ndidwe ŋana ka, megirive Paska gà Yahuda. 15Ama tə tsaraka Pilatus ata a gwaɗa a tar ka, batsah Əbay kurum naha ya ka, tə dza ba aà Mewideye hinne. I huɗ Mewideye tar ata ya ka, ta gwa: «Gəs ŋgat, ka ndwandway ŋgat aà dizl magə̀làwà ŋa, say mekìɗe pəra.» Pilatus a gwaɗa a tar aaka: «Wànà iye i ndwendwey a batsah Əbay kurum aà dizl ata ya?» Gà Əbay gà ɓəzla mandəva kuɗa a Mbulum ta gwaɗar aakaha: «Batsah Əbay mər ŋgiɗ a riŋ tsa, say batsah Əbay gà Ruma pəra.» 16Aɗaba taŋa Pilatus ibam, a vəl Yesuw a ahər a gà sliwdze, dite ka, tə tə ndwandway ŋgat aà dizl magə̀làwà ŋa ata kuɗa.

Tə ndwandway Yesuw aà dizl magə̀làwà ŋa

Mata 27:32-44; Markus 15:21-32; Luka 23:26-43

I dəba ŋa ya, gà sliwdze ata ta mah ba nda gà Yesuw. 17Ti tiker dizl ata aà gər, dite ma zla. Tə da akabara i huɗ kwite ya, tsikw a tə̀vəməŋa a riŋ tə zalar ndaka ahəm gà Yahuda ka, Gwalgwata, kamala megweɗe ya ka, atasl gər. 18Ti ndze akabaha a fata ka, gà sliwdze ata tə daha, tə ndwandway Yesuw aà dizl ata. Tə ndwandway ahəraha gà mburma aà gà dizl ŋgiɗ a tsaka ŋgar a fata. Ilik ndaka tsèke ahər mezime, ilik ŋa aaha, aka tsèke ahər gùla. Yesuw ika magər tar.

19Pilatus a wetse bazlam ana ta kəɗ ahər ŋgat a, a ti tike dər aà dizl ata mbaŋa. Bazlam ana a wetse ya ka, a gwa: «Naha ka, Yesuw gà Nazaret, Əbay gà Yahuda.» 20A wetse taŋa ka, ndaka ahəm ŋgiɗ pampam makər. Gà ahəm ata ka, ahəm gà Yahuda, naha ahəm gà Ruma, dite biy ŋgiɗ aaha ka, ahəm gà Girek. Gà mburma ana i fataya hinne, ti dzeŋgewa mewetse dukw ata aà dizl a, aɗaba təv ata ka, bise nda huɗ kwite, mburma iɗəm hinne. 21Gà Əbay gà ɓəzla mandəva kuɗa a Mbulum ta ŋgatar, ti dzeŋge taŋa ka, tə da a təv Pilatus, tə daha, ta gwaɗar: «Kà wetse kataya ka, lele tsa, na kù gwa, ŋgat ka, Əbay gà Yahuda ya. Ki wetse a ka, ki gweɗe a, ŋgat a ne à ba ŋgar ka, a gwa iye ka, Əbay ga Yahuda ivaɗ.» 22Pilatus a gwaɗa a tar: «Dukw ana Yàa wetse kataya ka, a ndze a kamala taŋa ya hiywe.»

23I təv ana ndeɗiŋa gà sliwdze tə ndwandway aba Yesuw aà dizl a ka, tə dzaya iba gà petek ŋgar a təv pampam faɗ. Ku weke ma ŋgat ilik ilik aà tar aà tar. Tə zla andiw ŋgar ana maŋgara ŋa suɗùkw təv meɗìmìke ihər tsiye, 24ta gwaɗaba: «Naha ka, ka tayakwa ikaba ya tsa, ama ŋgulum ki gekwe aaka a tsetse ika magər kwa, ŋgada weke na a ŋget a ya?» Dukw ata a ge ba ka, kamala ana ta wetse i wakita Mbulum piŋŋe, ta gwa ka:

«Tàa dzaya ba gà petek gà ika magər tar,

dite tàa ge tsetse aka andiw gà.»*fa*

Kamala taŋa ya na gà sliwdze ata ta ge ya.

25Gà mburma ana mehìtsè ŋa bise nda dizl ata tə ndwandway ahər Yesuw a ka, gà mama ŋgar, nda damər mama ŋgar dəm ŋa, nda gà Mariya, məkəs Kulupas, nda gà Mariya ana a dara i Magədala ya. 26Yesuw a ŋgat a gà mama ŋgar nda mala mazazama ŋgat ana a waya ŋgat hinne ya, tar riŋ mehìtsè ŋa i təv ilik ŋa ya ka, a gwaɗa a mama ŋgar: «Naha ka, kəla yak, mama ga.» 27I dəba ŋa ya, a gwaɗa a mala mazazama ŋgat ata a waya hinne ya: «Naha ka, mama yak mbaŋa.» I fataya tsara ka, mala mazazama Yesuw ata a zla məkəs ata a ma ŋgar.

Məməta Yesuw

Mata 27:45-56; Markus 15:33-41; Luka 23:44-49

28I dəba ŋa ya, Yesuw a sər dukw ana Mbulum a slər aakara ŋgat a tserdze ka, aka ndəv na kinehe ya. A gwa: «Yam aka kəɗ iye.»*fb* A tsik kataya ka, kamala ana ta wetse akahər ata ya, dite ma ge ba kalkal kamala taŋa ya kaɗəŋ. 29Ama meɗwìtsè mawà dukw duwa a ndza ndùlàkə̀kka kamala mbəlar a, a riŋ maràhà ŋa i duwa i fata. Kamala taŋa ya, gà sliwdze tə daha, tə zlara dukw ana pàfpàfə̀ffa, yam a de aɗəm a hinne ya. Ti tsilwiɓ dər a dukw ata. Tə dzak a zùbəl tsalaka dizl dukw duwa tə zalar *izup. Tə dzakaraha a bazlam, dite ka, mà ɗìvìts ihər yam ŋa ya. 30Yesuw a ɗìvìts yam dukw ata tsara ka, a gwa: «Mege megemir gà tserdze ka, aka ndəv kuɗa.» I dəba ŋa ya, luz a kal à gər a bəɗ ka, a mət tsara.

Sliwdze duwa ilik a ge suwal a Yesuw aka wèlèɓè

31Ta kəɗ Yesuw ka, a pat ana dite pat mesìfìkà ba ndidwe ŋa ya. Aɗaba taŋa a sàs a gà bàba gà Yahuda tsa na məməta Yesuw a ndze a aà dizl magə̀làwà ŋa ata a pat mesìfìkà ba ya. Aɗaba ndeyndey ŋana ka, megirive a riŋ a pat ata ka, a ne aka tar ŋgwal ŋa, a za dər gà asiŋ gà pat ŋgiɗ ana dze ya. Agəra taŋa na tə da a təv Pilatus, tə daha, ta gwaɗar: «Kamkam, vəl a mər vatwa, gà sliwdze tə daha, ta haɓa à sik a gà mburma ata tə ndwandway tar aà dizl, na dite ta mete a bise, tì ndzikere a ihər tar a.» A gwaɗa a tar: «Haya.» 32Aləka gà sliwdze ata tə daha, tə lah mahaɓa à sik a gà mburma aaha tə ndwandway akaba tar nda gà Yesuw tserdze ya. 33Ti ndzeha a təv Yesuw, ta fə̀r ahər ka, aka mbər mimìte. Tə samata məməta ŋa ka, tàa haɓar à sik asa tsa. 34Ama kə̀la ka, sliwdze duwa ilik a daha, ə̀bukw a ger suwal aka wèlèɓè, gà məmbəz nda yam tə zlalarra i biye ŋa ya.

35Iye ana i ɗama gà bazlam ata ya ka, Yàa ŋgatar nda are gà, dite dukw ana i ɗama ya ka, ndzer kaɗəŋ. I sər, iye ka, i sese a pàrsa tsa, dite na kurum tekeɗe, ki giswim a nda gəzləŋ a. 36Gà dukw ata ta ge ba kataya ka, aɗaba bazlam ana ta wetse i wakita Mbulum akahər ata ya, ma ɗif aba, ta gwa ka: «Ti ta heɓer a à atasl ŋgar ilik tsidze» ya.*fc* 37Dite biy ana i wakita ŋgiɗ a, ma ɗif à ba asa, ta gwa ka: «Ti ta fir a à wele ana ta ger suwal a.»*fd*

Mazla məməta Yesuw a biye

Mata 27:57-61; Markus 15:42-47; Luka 23:50-56

38I dəba ŋa ya, wele duwa a riŋ, zləm ŋgar Yasufa. A dara ka, i Arimatiya ya. Ŋgat ka, mala mazazama Yesuw. Ama kə̀la ka, say nda akəl pəra na a zezem a ya, aɗaba ana a ge magəɗa a gà bàba gà Yahuda ya. A daha a təv Pilatus, a ger kamkam, dite mə vəlar vatwa aà mazlàra məməta Yesuw aà dizl a. Pilatus a gəs, a gwaɗar: «Haya.» I dəba ŋa ya, a daha, a zlara məməta ŋa ata aà dizl a kuɗa. 39Nikudimus, wele ana a da a təv Yesuw akahər ata ndaàvəɗ, a wiz ihər bazlam a,*fe* ŋgat tekeɗe, a daha a fata mbaŋa. A daha ka, nda gà wirdè gà dizl gà dukuməŋa a riŋ a ze hwaŋŋà lele, tə zalar *mira, biy ŋgiɗ ibam, *aluwa. Gà dukw ata ka, ti sle a agwada dzik makər. 40Tar ata sula ya, tə zla məməta Yesuw. Ta mbe ahər petek herrè ŋa. I təv ana ta mbe a ya ka, tə ndàyawa ahər dukw ata hwaŋŋà ya, kamala ana gà Yahuda ta gewa à məməta ya.

41I təv ata tə ndwandway ahər Yesuw a ka, dzèrnè duwa a riŋ i fata. Ama i dzèrnè ata ka, dive duwa a riŋ melè ŋa awiya ŋa, tə̀vəməŋa ka, gìrdzìdzìhhe i giseh a. Dive ata ka, tàa tike aɗəm wura ilik zukw tsa. 42Tə zla Yesuw, ti tike a dive ata bise ya tsara. Ti tike a fata ka, aɗaba mesìfìkà ba tar aka ndze aɗəm, ta ge a megemir tsa, dite ndidwe ŋana ti sifik a ba.

Currently Selected:

Yuhana 19: gnd

Highlight

Copy