Yuhana 20

Yesuw a mbəlara i məməta ya

Mata 28:1-8; Markus 16:1-8; Luka 24:1-12

1Aləka i dəba ŋa ya, a pat ladà i mèkwède hedwe, are aka da aaba ya zukw tsəka, Mariya ana a dara i Magədala ya, a wile aka dive Yesuw ata. A daha ka, a ŋgataha a beliŋ ata ta hə̀ndə̀k dər ahəraha ya, dzèŋŋe aà gùva ŋa, matapasla ŋara ihər a. 2A ŋgataraha kataya tsara ka, a val a təv gà Simun Piyer nda mala mazazama Yesuw ŋgiɗ ana Yesuw a waya ŋgat hinne ya, a daha, a gwaɗa a tar: «Tàa zlara məməta BATSAH kwa ŋa i biye ya, dite kwets mì sər təv ana ti tike aɗəm a tsa.»

3I fataya tsara ka, gà Piyer nda mala mazazama Yesuw ŋgiɗ ata, tə da aka dive ŋa mbaŋa. 4Ta val ka, tsàɓùr sula məma. Ama mala mazazama Yesuw ŋgiɗ ata a za wele aaha nda mivele, a lah aka dive. 5A daha, a kal à gər a bəɗ, a fə̀raha aɗəm ka, a ŋgataha a petek ana ta mbe ahər a ɓàvva i bəɗ. Ama aka pəts aɗəm tsa. 6Aləka Simun Piyer a daha i dəba ŋa ya ka, a pə̀tsaha aɗəm. A daha ka, a ŋgat a petek ata i bəɗ mbaŋa, 7dite a ŋgat a petek ana ti ndìwìɗ dər are Yesuw a mbaŋa asa. Petek ata ka, metìkè ŋa i təv gà asiŋ gà biy ŋgiɗ tsa, məpàɗà ŋa i təv ŋgiɗ pam. 8I dəba ŋa ya, mala mazazama Yesuw ata a lah aka dive ya, a pəts aɗəm mbaŋa. A daha, a samata kataya ka, a gəs, a sər dər ka, Yesuw aka mbəl i məməta ya ndzer kaɗəŋ. 9Aɗaba tàa tsaraka dukw ana wakita Mbulum a gwa akahər ata ka, Yesuw a ta mbilere a i məməta ya tsa, say pat ata kuɗa na tə sər dər a. 10I dəba ŋa ya, gà ɓəzla mazazama Yesuw ata sula ya, ta mbəɗ gər a ma.

Yesuw a pàt aba a Mariya ana a dara i Magədala ya

Mata 28:9-10; Markus 16:9-11

11I dəba ŋa ya, Mariya a mbəɗ gər aka dive asa, a daha, a dza ba aà tuwa. I təv ana a riŋ a tiwe a ya ka, a kal à gər a bəɗ, a fə̀r dər a dive ata. 12A fə̀raha aɗəm ka, a ŋgataha a gà gawla Mbulum sula, tar riŋ mandza ŋa i təv ana ti tike aɗəm məməta Yesuw a. Tar nda gà petek herrè ŋa. I ŋgiɗ i təv gər, i ŋgiɗ ibam, i təv sik. 13Gà gawla Mbulum ata ta gwaɗar: «Daala aaha, aàmala na ki tiwe a ya?» A gwaɗa a tar aakaha: «Tàa zla Batsah ga ŋa, dite i sər təv ana ti tike aɗəm a tsa asa.»

14A tsik aba bazlam ata ya ka, wudəgə̀r a mbəɗ aba, a ŋgat a Yesuw, a riŋ mehìtsè ŋa i fata, ama a sər naha Yesuw ka, a sər tsa. 15Yesuw a gwaɗar: «Daala aaha, aàmala na ki tiwe a ya? Ki yehe a ana, weke?» Məkəs ata a dzala i gər ŋgar ka, a gwa: «A ge a ka, mala məfə̀tà təv ata.» Aɗaba taŋa, a gwaɗar aakaha: «Kəla nè, na kər na kà zla ya ka, ɗifiŋ à təv ana kà tike aɗəm a te, i ti zle a dukw gà.» 16Yesuw a gwaɗar aakaha: «Mariya.» Məkəs aaha a tsaraka kataya ka, a mbəɗ ahəm a təv ŋgar, a gwaɗaraha ndaka ahəm tar gà Yahuda: «Rabuni,« kamala megweɗe ya ka, mala medzeŋge mər, a de a dər a təv ŋgar. 17Yesuw a gwaɗar: «Kə̀ gəs ba aà iye tsa, aɗaba Yàa tsəl a təv Tsir gà zukw tsa. Ama ka, ka ta gwaɗa a gà damər ga ka, i tsil a a təv Tsir gà ana Tsir kurum mbaŋa ya. Ŋgat na Mbulum gà ya, dite biy kurum mbaŋa asa ya.» 18I fataya ka, Mariya ata a dara i Magədala ya, a da a təv gà ɓəzla mazazama Yesuw. A daha, a gwaɗa a tar: «Yàa ŋgat a BATSAH kwa ŋa.» Dite a ɗama a tar dukw ana Yesuw a tsiker a tserdze mbaŋa.

Yesuw a pàt aba a gà ɓəzla mazazama ŋgat

Mata 28:16-20; Markus 16:14-18; Luka 24:36-49

19Aləka i hawa ŋana a pat ladà ata ka, gà ɓəzla mazazama Yesuw ti yahaba gər a ga duwa, ta hə̀ndə̀kaha aaba nda lèkilè, aɗaba ta ge magəɗa a gà bàba gà Yahuda, agəra ana ta kəɗ Batsah tar ŋa ya. I dəba ŋa ya, tə sər aaba ka, dzìŋgìrzlìk Yesuw a riŋ ika magər tar i ga ata. A gwaɗa a tar: «Mandza zayzay ma ge i təv kurum.» 20A tsik a tar aba ya kataya ka, a pàt a tar à gà girɗe ana aà ahər ŋgar a, ndəna aà wèlèɓè ya. Gà ɓəzla mazazama Yesuw ata ta ŋgatar ka, ta ŋgaya ba hinne, arəv a mà a taraha, aɗaba ana tàa ŋgat a Batsah tar ŋa ya. 21Yesuw a gwaɗa a tar asa: «Mandza zayzay ma ge i təv kurum. I slir a kurum aà mege megemir gà, kamala Tsir gà ana a slərra iye a təv kurum a mbaŋa.» 22I dəba bazlam ata ya ka, a vizl aà tar mesife ŋgar, dite a gwaɗa a tar: «Taŋa i vəl a kurum ka, Mezite Mesife Mbulum, gəsum. 23Na kàa pə̀lum à bakal a wura ka, Mbulum tekeɗe, à piler a dər mbaŋa. Ama na kàa pə̀lumar dər tsəka, ŋgat tekeɗe, à piler a dər ɓav tsa mbaŋa.»

Gà Yesuw nda Tumas

24Ama a pat ana Yesuw a daha a təv tar, a pat a tar aba ya ka, Tumas, wele ana ŋgat mawusa ya, a riŋ ika magər tar tsa. 25I dəba ŋa ya, gà asiŋ gà ɓəzla mazazama Yesuw ana tar riŋ i fataya, ta gwaɗa a Tumas: «Maa ŋgat a BATSAH kwa ŋa.» Ama Tumas a gwaɗa a tar aaka: «Na Yàa ŋgat a girɗe màsàmàsà ana i ahər ŋgar a, Yàa ləm ahər, nda gà Yàa ləm aà na ika wèlèɓè ya tsəka, i gis a bazlam kurum ata tsa.»

26A ndza kwaskwa ilik ka, gà ɓəzla mazazama Yesuw ti yahaba gər a ga ata asa, dite pat ata ka, Tumas a riŋ i təv tar kuɗa. Tàa hə̀ndə̀k a ga ata kamala ana ndeɗiŋa ya asa, ama tə sər aaba ka, Yesuw a riŋ ika magər tar i ga ata asa. A gwaɗa a tar: «Mandza zayzay ma ge i təv kurum.» 27I dəba ŋa ya, a gwaɗa a Tumas: «Dzakara ahər yak a faha ya, kà fə̀r ahər, kà ləm aà girɗe ana i ahər gà ya, dite kà ləm aà na ika wèlèɓè ga ya mbaŋa kwaŋ. Miyak à mimbètsè ahəm, dite kə̀ gəs kuɗa.» 28Tumas a gwaɗar aaka: «Tsaka kər kaɗəŋ Batsah ga ŋa, kər ka, Mbulum ana i gewar meslire ya.» 29Yesuw a gwaɗar: «Kə̀ gəs ka, aɗaba ana kàa ŋgetiŋ kuɗa ya. Ama kə̀la ka, maŋgayaba ika gər gà na ta gəs iye nda gəzləŋ ka, tàa ŋgetiŋ tsiye.»

Gà dukw ana mewetse ŋa i wakita ya

30Akahər ata ka, Yesuw aka ge gà asiŋ gà dukw mene aà mburma ŋgiɗ pampam hinne ika miɗ gà ɓəzla mazazama ŋgat. Ama gà dukw ata ka, mewetse ŋa a riŋ i wakita aaha tsa. 31Ama gà dukw ana mewetse ŋa i faha ya ka, gà dukw ana, dite ki sirwim a dər, Yesuw ka, Kəla Mbulum ndzer. Ŋgat ka, mala məmbàlà à mburma ana Mbulum a gwa, i ti slir a kurumehe a ya. Ta wetse ka, dite ki ŋgetwim a mesife i təv ŋgar a, agəra ana kàa gəsum ŋgat nda gəzləŋ a.

Currently Selected:

Yuhana 20: gnd

Highlight

Copy