Kula ɗa Njeka̰ykulaje 2
2
Nay Pa̰təkɔdə
1Logə ndɔ ɗa nay Pa̰təkɔdə asə ɗaa ꞌmbo̰ naa tɔ̰y lo kara baa. 2Gə tɔg-ɛ baa, kɔr ne ḭ dara ɓar to gə ləl gə ula gə singa be, uba-je nangə bus baa, ta mə kəy gə d-isi kəne le pɛ-pɛ. 3Go-e gə ɗaa d-o-je ne ce to to gə ndo̰ pər be, gangə mbidi-mbidi uwa dɔ-je kara kara tɔ̰y. 4Be ɓa Njil Njerɔsangə ɗe ɗusu mə-je tɔ̰y ar ꞌtəl ꞌpa ndo̰ tarje gə ɗangə dang-dang gə Njil le ar-je mba kar ꞌpa.
5Dɔ ndɔ-ɛ gə əng le Jiibije gə njekila kuji dɔ Luba gə je, mə gəl kuji dəwje gə tɔ̰y gə dɔ nangə nee ja ꞌɗe d-isi Jerujalɛm. 6Logə ꞌta ne kam ji naa gə pid-pid ɗaa bula dəwje d-a̰y ꞌɗe ngaa d-ar yəng baa mba na-na kara o ndu-je ꞌpa tar gə ndo̰ tar kuj-e kuj-e. 7Lo tar igi-je sɛl ngaɓa al dɔ-je ɗaa ꞌpa na: Dəwje gə d-ar d-aw ꞌpa tar nee le ꞌto ngan njeɓeje gə Galile ja tɔ̰y ang wa? 8Ngaa na ban ɓa na-na kara horo-si gə nee o ndu-je gə ndo̰ tar kuj-e kuj-e nee wa? 9Dəwje gə Parəd, gə Mɛd, gə nje gə Elamid ngaɓa gə nje gə d-isi dɔ nangə gə Mejopotami, gə Jude, gə Kapadosə, gə Po̰, gə Aji, 10Piriji, Paməpili, Ejipətə, gə dɔ nangə ɓe gə Libi gə to mbɔr ɓebo gə Sirɛn, gə nje gə d-ḭ mə ɓebo gə Rɔm, 11gə Jiibije ngaɓa njetəl Jiibije, gə ngan njeɓeje gə Kərɛd gə Arabəje, j-o ndu-je d-ɔsə gaji neɗa mayje lə Luba gə ndo̰ tar kuji-si. 12Dəwje nee tɔ̰y ja lo tar igi-je sɛl ngaɓa ꞌtəl ꞌdəji rɔ-je tar na: A gə nee ɗa, j-a kɔr gəl-e to gə ban ɓa nee. 13Ngaa nje gə kɛm ꞌtəl pa tar ꞌkogo neje na: Ndum kodo ja ɗusu mə-je a d-ar.
Piyɛr pa tar kaji ar bula dəwje
14Be ɓa Piyɛr uba nangə ḭ tar gə nje dɔg gə gir-je gə kara le ngaɓa ila ndu-e nangə wəəl na: Sisəy dəwje gə dɔ nangə gə Jude ngaɓa dəwje gə d-isi Jerujalɛm nee, ꞌtugaje mbi-si gə dɔ-m gə nee ɓo oje ne tar gə m-aw pa nee. 15To gə be ang, dəwje gə nee le, to kodo ɓa ɗa-je to to gə ꞌpaje le ang, mba j-ar gə ndɔɔ baa ɓi. 16Ngaa to tar gə pajambərə Joyɛl pa kede le:
17Luba pa na dɔ ndɔje gə gugu nama,
Dəw gə ɗa-ɗa kara Njil-m a kuru m-e gə,
Ngan-si gə jingaw gə ngan si jene d-a kila mbərə
M-a pa tar gə basa̰je d-a ko ne lo kiya gə
Ngaɓa ɓugaje kara m-a pa gə je tar gə ni tɔ.
18Oyo, njekulaje nəm gə jingaw gə nje gə jene kara
Dɔ ndɔ-ɛje gə əng le, m-a kar Njil-m uru mə-je gə
Ɗaa d-a kila mbərə
19M-a ɗa neje dang-dang gə kəm dəw o ndɔ kara ang mə dara gə taar
Ngaɓa netɔjije dɔ nangə gə nee,
Məsə, pər ngaɓa kundu sa;
20Kar a turu to cil ciməri
Ngaɓa nay a turu to məsə,
Kede nam ɓa kar ndɔ lə Mbayɓe a ɗe,
Ndɔ gə nee le to ndɔ gə bo ya̰ gə ndɔ rɔnduba.
21Be ɓa dəw gə ɗa-ɗa gə ila ndu-e nangə ɓar ne ri Mbayɓe nama a kinga kaji.
22Dəwje gə Ijirayɛl, oje tar gə nee: Jeju gə Najarɛd le to dəw gə Luba ɔr-ɛ, ngaɓa ɗa nemisi, gə neje dang-dang gə kəm dəw o ndɔ kara ang, gə netɔjije ɗəw gə lə-a horo-si gə ar ꞌgərəje. 23Dəw gə nee, gə Luba ila-a mə ji-si gə le, Luba gərə neje gə a ɗa-je sə-a kede nam ɓa ar-je dəwje gə ꞌɓəəl Luba ang ꞌɓər-e kagə dəsə gə d-ar-ɛ n-uy. 24N-uy ɓa Luba ndol-e ɔr-ɛ ne ji yo gə mba ɗəw gə yo a ko̰ ne ɓe dɔ-ɛ gə godo. 25Mba Dabidi pa tar ɔji dɔ-ɛ na:
ꞌMa m-o Mbayɓe ta kəm-m gə gə ndɔje tɔ̰y
Mba n-ga̰ dɔ ji kɔl-m gə, mba kar-m m-ɓəəl ang.
26Gəl-e gə nee ɓa dɔ ɓəngərə-m isi gə kogo ngaɓa tar rɔləl ce ta-m gə budu-budu ɗaga.
Ngaɓa darɔ-m kara a kar njang dɔ nekunda mə gə.
27Mba a kuba kəm nəm kḭya̰ jabaw ang baa,
Ngaɓa a kḭya̰ ngon njekula lə-i gə gadə-gadə kar-ɛ yɔlɛ mə buwa gə ang.
28ꞌTɔji-m ɗəw təbə ar-m nja kəne,
A kar rɔləl ɗusu mə-m no-i gə.
29Ngan ko̰-mje ɗəw to mba kar m-pa tar gə tɔgərɔ m-ar-si ɔji dɔ ka-sijee Dabidi le, Dabidi uy ar-je ꞌdub-e ngaɓa dɔbar-e to horo-si gə saar ce ɓogəne. 30Ngaa n-to pajambərə ɗaa Luba naji dɔ rɔ-ɛ gə to gə dəw kara gəl kuji gə lə-a a kisi dɔ ngəndəng mbay gə lə-a. 31Gə go tarje lə-a gə n-pa ja n-o ne kuy ɓa ndol lə Kirisi kede, Kirisi gə Luba uba ḭya̰ jabaw ang ngaɓa ḭya̰ darɔ-ɛ ar yɔlɛ ang. 32Jeju gə nee le uy ɓa Luba ar-ɛ ndol ɗaa sijee j-a to njetar naj-ɛje. 33Luba un-e unda-a dɔ ji kɔl-ɛ gə, ɗaa n-inga Njil Njerɔsangə gə Luba uwa dɔ gɔl-ɛ le ngaɓa n-ar-ɛ ɗe dɔ-si gə ɗaa oje gə kəm-si nəm gə mbi-si nəm tɔ. 34Mba Dabidi uba nangə ḭ aw dara ang, ngaa ye ja pa gə darɔ-ɛ na:
Mbayɓe pa ar Mbayɓe lə-m na:
ꞌƊe isi dɔ ji kɔl-m gə nee
35Saar gə mba kar-m m-turu njeba̰a̰je lə-i kar-i n-nja dɔ-je gə.
36May kar dəwje gə Ijirayɛl tɔ̰y ꞌgərə gə maj-ɛ to gə Jeju gə ꞌɓərə-eje kagə dəsə gə le, Luba unda-a gə Mbayɓe ngaɓa gə Kirisi tɔ.
Dɔngɔr mbo̰ naa lə njetakagəje
37Be ɓa tar gə Piyɛr pa le ɗa kula dɔ ɓəngərə-je gə ɗaa ꞌtəl ꞌpa d-ar-ɛ gə njeka̰ykulaje gə kɛm na: Ngan ko̰-sijee, ɗi ɓa ja ɗa wa?
38Piyɛr pa ar-je na: ꞌTuruje kəji lə-si, ngaɓa na-na ja kara ar ꞌɗ-ɛ batɛm gə ri Jeju Kirisi, mba kar tar neɗa gə kṵra̰y ɔr ne dɔ-ɛ gə, ɗaa a kingaje nenuji lə Njil Njerɔsangə. 39Mba Luba uwa dɔ gɔl-ɛ mba kar-sisəy, gə mba ngan-si, ngaɓa mba dəwje tɔ̰y gə d-isi əw, gə kɔr-je bula gə Mbayɓe Luba lə-si a ɓar-je. 40Ngaɓa n-pa tarje bula n-ula ne jingaw mə-je gə nəm ngaɓa n-pa ne tar naji na: Ar-je d-aji-si horo dəwje gə kṵra̰y gə ɓogəne.
41Nje gə takagə tar gə Piyɛr pa le ꞌɗa-je batɛm ngaɓa dɔ ndɔ-ɛ gə əng kɔr dəwje tɔl-tɔl dɔg lo munda oso dɔ-je gə.
42Be ɓa gə ndɔ-ndɔ ja ꞌɗe d-ar njeka̰ykulaje ꞌndo-je ne, gə ꞌɗa mə kara, ꞌcɛdə mbə naa gə nəm ngaɓa ꞌdəji Luba naa gə nəm tɔ. 43Na-na kara ɓəəl lə Luba ɗusu m-e ngaɓa Luba un njeka̰ykulaje ɗa neje dang-dang gə kəm dəw o ndɔ kara ang bula gə netɔjije. 44Dəwje tɔ̰y gə ꞌta kagə Kirisi le ꞌmbo̰ naa lo kara baa ngaɓa d-um nekingaje lə-je dɔ naa gə kara baa tɔ. 45ꞌƊabə nekingaje lə-je gə lo ndɔ lə-je ꞌndogo ngaɓa ꞌkay naa lar-ɛ gə go ne gə na-na kara aw ndoo-e. 46Gə ndɔ-ndɔ ja d-um mə-je naa gə d-isi mə kəy gə lə Luba, d-usa ne naa gə kara baa mə kəyje gə lə-je ngaɓa d-usa ne gə rɔləl nəm gə mənda nəm tɔ. 47D-ɔsə gaji Luba ngaɓa kula ɗa-je ləl dəw mə ɓeje tɔ̰y nəm tɔ. Be ɓa gə ndɔ-ndɔ ja Mbayɓe ila kɔr dəwje gə d-inga kaji dɔ-je gə taar-taar.
Currently Selected:
Kula ɗa Njeka̰ykulaje 2: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
