Kula ɗa Njeka̰ykulaje 4
4
1Logə Piyɛr je gə Ja̰ d-aw ꞌpa tar d-ar dəw mə ɓeje be ɗaa njekapoloje ꞌɗe, njekɔr no njeka dɔ kəy lə Lubaje gə Sadusiyɛ̰je kara nəm tɔ. 2Wungu to-je mba d-aw tɔji dəw mə ɓeje ne ngaɓa d-ila mbərə ce buwa yo gə lə nje gə d-uy to gə Jeju ce ne be. 3Be ɓa ꞌtuwa-je d-aw d-umje kəy kula gə saar lo ar mba to kar kumatagə ngaa. 4Be ɓa dəwje bula horo nje gə d-o tar le ꞌta kagə ɗaa kɔr-je asə tɔl-tɔl dɔg lo mi be.
Piyɛr je Ja̰ d-ar no ngɔ gangə tar gə lə Jiibije
5Lo kar-ɛ ɗaa mbayje lə-je, gə buba ɓeje, gə njekɔr gəl toronduje ꞌmbo̰ naa mə ɓe gə Jerujalɛm. 6Buba njekapolo gə ri-a na Ana, gə Kayip, gə Ja̰, gə Alɛgəjandərə ngaɓa njenujije lə buba njekapolo tɔ̰y kara ꞌga̰ kəne tɔ. 7D-ɔr Piyɛr je gə Ja̰ d-unda-je no-je gə ngaɓa ꞌdəji-je tar na: Gə singamongə gə ɗa ose gə ri na ɓa ꞌɗaje ne ne gə nee le wa?
8Be ɓa Njil Njerɔsangə ɗusu mə Piyɛr tubu ɗaa pa ar-je na: Mbayje gə dɔ dəw mə ɓeje gə, gə buba ɓeje mba ɓogəne, 9ꞌdəjije-si tar ɔji dɔ məmay gə ja ɗa gə dəw gə njerɔko̰ ngaɓa ɔji dɔ ɗəw gə n-aji ne. 10Sisəy tɔ̰y gə dəw mə ɓeje gə Ijirayɛl, ne kara gə kar-si ꞌgərəje ɓa nee: Gə ri Jeju Kirisi gə Najarɛd ja dəw gə ar no-si gə nee le aji ne. Jeju Kirisi gə ꞌɓərə-eje kagə dəsə gə ngaɓa Luba ndol-e ar-ɛ n-ce horo nje gə d-uy gə le. 11ꞌNe ja:
N-to kɔr ər gə sisəy nje kunda kəyje unje ilaje kɔrɔ,
Ngaa n-təl to gə ye gə kil kəy gə.
12Dəw gə ɗangə kara gə kaji a kḭ rɔ-ɛ gə le godo, mba horo dəwje gə dɔ nangə nee le ri dəw kara gə j-a kaji ne godo.
13Logə d-o-je to gə Piyɛr je gə Ja̰ ꞌɓəəl ang ɗaa dum dɔ-je, mba d-o Piyɛr je gə Ja̰ gə dəwje gə ꞌgərə ne ang nəm kəm-je unja ang, ngaa ꞌgərə-je to gə ꞌto njeba-ɛje lə Jeju. 14Ngaa, logə d-o dəw gə inga kaji le ar mbɔr-je gə ɗaa d-o tar kara gə d-a kila kəne ang. 15Be ɓa d-un ɗəw d-ar-je ꞌce no ngɔ gangə tar gə lə Jiibije ngaɓa ꞌtəl ꞌwɛdə tar horo naa gə na: Dəwje gə nee le ɗi ɓa j-a ɗa gə je wa? 16Mba dəw mə ɓeje gə Jerujalɛm tɔ̰y ja ꞌgərə ngadə to gə nemisi gə tɔgərɔ ja dəwje nee le ꞌɗa ɗaa j-asə mba ma̰y ang tɔ. 17Ngaa gə mba kar tar-ɛ aw gə kede-kede ang ɗaa, j-ɔgəje-je gə singa mba kar ꞌpa tar gə ri gə əng le d-ar dəw ang gə dɔbo̰ ja. 18Be ɓa ꞌtəl ꞌɓar Piyɛr je gə Ja̰ le, d-ɔgə-je na kar ꞌpa tar ang nəm gə tɔji ne gə ri Jeju ang ja gə dɔbo̰. 19Piyɛr je gə Ja̰ ꞌtəl d-ila kəne na: Gə gadə-gadə no-gɔl Luba gə ja le, kəm kila kuji dɔ sisəy gə ose dɔ Luba gə wa? Sisəy ja ɔr-je kəm-e, 20mba ne gə j-o gə mbi-si gə kəm-si le j-a pa gə ɗaga. 21ꞌTəl ꞌɗa singa dɔ-je gə to gə ɗangə ngaɓa d-ḭya̰-je mba d-inga ɗəw kila tar dɔ-je gə ang, mba dəw mə ɓeje nəm, ngaɓa tɔ̰y ja d-ɔsə gaji Luba mba ne gə ce dɔ njerɔko̰ gə nee le. 22Mba dəw gə inga kaji gə go ɗəw nemisi nee le ɓal-ɛ nday dɔg sɔɔ.
23Logə d-ḭya̰ Piyɛr je gə Ja̰ ɗaa, d-ɔdə d-aw d-inga ngan mar-jeje ngaɓa d-ɔr gəl tar gə buba njekapoloje gə buba ɓeje pa gə je d-ar d-o. 24Go tar gə d-o le ɗaa, d-um kəji lə-je gə mə-je naa gə kara baa ja d-ula nduje gə tar wəəl gə rɔ Luba gə na: ꞌƁəə neje, ꞌi gə ꞌɗa dara, ꞌɗa nangə, ꞌɗa babo kadə gə ne tɔ̰y gə to kəne, 25ꞌI ja ꞌpa gə ɗəw lə Njil Njerɔsangə, gə ndu ka-sijee, ngon njekula lə-i Dabidi na:
Mba ɗi ɓa Gəl kuji dəwje d-unda bangə wa?
Ngaɓa dəw mə ɓeje d-əji tar gə baa wa?
26Mbayje gə nangə nee d-um njuma mə naa gə
Ngaɓa mbayje mbo̰ naa
D-ila kagə no Mbayɓe gə gə no Kirisi gə lə-a.
27Tɔgərɔ ja mbay Erɔdə je gə Po̰s Pilad d-um njuma mə naa gə mə ɓe gə nee, gə gəl kujije ngaɓa gə dəw mə ɓeje gə Ijirayɛl d-ila kagə no Jeju gə, ngon njekula gə lə-i njerɔsangə gə um ubu dɔ-ɛ gə. 28Mba ɗa ne gə ji-i gə kəji lə-i tɔ kede nam. 29Be ɓa dɔ kar gə nee, Mbayɓe, o singa gə d-aw ɗa dɔ-si gə, ɓo ar njekulaje lə-i d-ila mbərə tar lə-i gə ɓəəl kara ang. 30Ula ji-i aji ne njerɔko̰je, gə ꞌɗa ne netɔjije gə neje dang-dang gə kəm dəw o ndɔ kara ang gə ri ngon njekula lə-i Jeju gə njerɔsangə.
31Logə ꞌdəji Luba to gə be ɗaa, lo gə d-ar kəne ye ɗig-ɗig ɗaa Njil Njerɔsangə ɗusu mə-je tɔ̰y ngaɓa d-ila mbərə tar lə Luba gə ɓəəl ang.
Mbo̰ naa lə njetakagəje
32Dəwje bula gə ꞌta kagə le, kəji lə-je gə mə-je to kara baa. Dəw kara kara ɔr kəm nekinga lə-a ɓədə ang nəm, ngaa neje to kara baa horo-je gə. 33Njeka̰ykulaje ꞌpa tar naji ce buwa yo gə lə Mbayɓe Jeju le gə singamongə gə boy. Ngaɓa Luba tɔr ndu-e dɔ-je gə gə mənuji gə boy tɔ. 34Mba horo-je gə le dəw kara gə ne lal-ɛ godo, nje gə lo ndɔ lə-je ose kəy lə-je ga̰ le, ꞌɗabə n-ndogo ngaɓa ꞌɗe gə lar-ɛ d-um dɔ naa gə 35no gɔl njeka̰ykulaje gə cibi ꞌtəl d-ar na-na kara gə go ne gə aw ndoo-e.
36Jəjəb gə njeka̰ykulaje d-unda ri-a na Barənabas gə kɔr m-e na dəw gə njekula jingaw mə dəwje gə, n-to gə gəl kuji Lebi gə, ɓe lə-a Sipərə, 37n-aw n-ɗabə lo ndɔ lə-a, n-ɗe gə lar-ɛ, n-ɗe n-um no gɔl njeka̰ykulaje gə.
Currently Selected:
Kula ɗa Njeka̰ykulaje 4: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
