Kula ɗa Njeka̰ykulaje 5
5
Ananiyas je gə Sapira
1Ngaa dəw kara ri-a na Ananiyas je gə jene lə-a Sapira ꞌɗabə lo ndɔ lə-je ꞌndogo, 2ɗaa je gə jene lə-a d-um mə-je naa gə d-ɔr lar dɔ nangə le d-iya gə go ji-je ngaɓa d-ḭya̰ kɛs-ɛ d-aw ne no gɔl njeka̰ykulaje gə. 3Be ɓa Piyɛr pa ar Ananiyas na: Mba ɗi ɓa ꞌSu ta mə-i ar-i ꞌpa tar gə ɗəgərə ar Njil Njerɔsangə ngaɓa ɔr dəbə lar lo le iya gə go ji-i wa? 4Lo ndɔ le ḭya̰ ar-ɛ to lo kara kara to kar-i ja, ngaɓa uwa ꞌndogo kara lar-ɛ to mə ji-i gə ja. Mba ɗi ɓa ar kəji ɗa ne gə to gə be to mə-i gə wa? To gə dəwje ɓa ꞌpa tar gə ɗəgərə ar-je ang ngaa ꞌpa ar Luba. 5Logə Ananiyas o tarje gə nee le ɗaa ce oso ngaɓa kəm lə-a ɔr tɔ. Dəwje tɔ̰y gə d-ar lo-e gə le ɓəəl unda-je gangə-je. 6Be ɓa ngan basa̰je d-uba nangə d-ḭ ɗe ꞌkə nin-e gə kubu d-aw ꞌdubu.
7Logə gə kur-e əw asə ngira kar munda go-e gə ɗaa, jene lə-a Sapira ɗe andə kəy lal gərə ne gə nday le. 8Piyɛr un tar dəji-e na: ꞌPa ar m-o, lar lo gə ꞌɗabəje ꞌndogoje le to gə be ja wa? N-ila-a kəne na oyo, to gə be ja. 9Be ɓa Piyɛr təl pa ar-ɛ na: Ɗa to gə ban ja ɓa umje mə-si naa gə ꞌnaje ne Njil Mbayɓe wa? A o: Kɔr gɔl nje gə ꞌdubu ngab-ije aw ɓar ta kəy gə nee, d-a ɗe kun nin-i kaw dubu ja tɔ. 10Dɔ kar-ɛ gə əng ja Sapira ce oso uy. Logə ngan basa̰je le d-andə kəy ɗaa d-inga nin-e baa ngaa d-un d-aw ꞌdubu mbɔr ngab-ɛje gə. 11Be ɓa Mbo̰ naa lə njetakagəje tɔ̰y gə dəwje gə d-o tar neje gə nee le ɓəəl unda-je gangə-je.
Nemisije bula
12Neje dang-dang gə kəm dəw o ndɔ kara ang gə netɔjije bula ce ta kəm dəw mə ɓeje gə ɗəw gə lə njeka̰ykulaje. ꞌJejee tɔ̰y, ndu-je asə naa ɗaa d-ar lo gə ꞌɓar-ɛ ta kəy lə Salomo. 13Ngaa dəw gə ɗangə kara kara ɗe oso dɔ-je ang ngaa dəw mə ɓeje d-ɔsə gaji-je to ɓəəl. 14Jingawje gə jeneje bula gə takagə Mbayɓe le kɔr-je oso dɔ mar-ɛ gə kede-kede. 15Dəwje d-aw gə njerɔko̰je d-umje mə ndagəje gə gə mə tuwaje gə mbɔr ɗəw boo mba kar ɓo Piyɛr aw nday nama njil-e baa ja kara um dɔ dəw gə kara horo-je gə. 16Dəw bulaje d-ḭ mə ɓeboje gə to mbɔr Jerujalɛm gə, ꞌɗe gə njerɔko̰je ngaɓa dəwje gə njilje gə kṵra̰y ula kəm-je ndoo nəm ɗaa, tɔ̰y ja d-inga kaji.
D-aw gə njeka̰y kulaje no ngɔ gangə tar lə Jiibije to gə ɗangə ɓi
17Be ɓa buba njekapolo gə nje gə ꞌga̰ sə-a tɔ̰y gə to dəwje lə Sadusiyɛ̰je, d-uba nangə d-ḭ, ɗaa nər mə ɗusu mə-je 18ar ꞌtuwa njeka̰ykulaje nda̰-nda̰ ja d-umje kəy kula gə. 19Ngaa lo ndul ɗaa anji lə Mbayɓe ɗe tɔr ta kəyje gə kəy kula gə ar-je ꞌce ngaɓa pa ar-je na: 20Aw-je, aw ar-je mə kəy gə lə Luba, ꞌpaje tar təbə ar-je dəwje. 21Go tar gə d-o-je le ɗaa ꞌɗe gə ndɔɔ-sḭ baa ja d-andə mə kəy gə lə Luba, d-ar d-aw ꞌtɔji ne dəwje. Ɗaa buba njekapolo je gə nje gə ꞌga̰ sə-a le ꞌɗe, ɗaa ꞌɓar nje gə no ngɔ gangə tar gə lə Jiibije ngaɓa mbo̰ naa lə buba ɓeje lə ngan Ijirayɛlje ngaɓa d-ula ꞌɓar njeka̰ykulaje gə to kəy kula gə le.
22Njengəm loje ꞌɗe d-inga-je mə kəy kula gə ang ɗaa ꞌtəl d-aw ꞌpa d-ar nje gə no ngɔ gangə tar gə lə Jiibije le na: 23J-inga ta kəy kula le to gə lo kud-e gə maj-ɛ ja ngaɓa njengəm ta kəyje kara d-ar lo kar-je gə ja, ngaa logə ja tɔr ta kəyje ɗaa dəw kara kara godo mə kəy gə.
24Logə d-o tarje gə nee le ɗaa, njekɔr no nje ka dɔ kəy lə Lubaje gə buba njekapoloje d-əji pḭ ɗaa ꞌdəji rɔ-je tar na: A ɗi ngaa ja ɗa wa? 25Dɔ kar-ɛ gə nee ja dəw kara a̰y ɗe pa ar-je na: Oje, dəwje gə umje-je kəy kula gə le ja d-ar d-aw ꞌtɔji ne dəwje mə kəy gə lə Luba a d-ar.
26Be ɓa nje ka dɔ kəy lə Lubaje gə njekɔr no-je d-ɔdə ꞌɗe gə je mondong baa mba ꞌɓəəl dəw mə ɓeje gə d-a kḭ cila-je gə kɔr ərje. 27Logə ꞌɗe gə je ɗaa d-aw gə je no ngɔ gangə tar gə lə Jiibije. Buba njekapolo un tar dəji-je to gə be na: 28J-un ndu j-ɔgə-si ne mba kar ꞌtɔji-je ne dəwje gə ri dəw gə nee le ang wa? Ngaa ꞌtaje mə ɓe gə Jerujalɛm ya̰-ya̰ gə ne tɔji lə-si ngaɓa njigije mba ɗaje kar tar məsə dəw nee le uwa dɔ sijee.
29Piyɛr ila-je kəne ngaɓa njeka̰ykulaje kara nəm na: Kila kuji dɔ Luba gə may unda kila kuji dɔ dəwje gə. 30Luba lə ka-sijee ndol Jeju gə ꞌtɔl-ɛje, ꞌɓərə-eje kar kagə gə le. 31Luba unda-a dɔ ji kɔl-ɛ gə, gə Mbay ngaɓa gə Njekaji dəwje, mba kar Ijirayɛlje ꞌturu ne kəji lə-je ngaɓa gə mba kar tar neɗa gə kṵra̰y ɔr ne dɔ-je gə. 32J-a to njetar najije lə neje nee le, naa gə kara baa gə Njil Njerɔsangə gə Luba ar nje gə d-ila kuji dɔ-ɛ gə.
33Logə d-o tarje gə njeka̰ykulaje ꞌpa to gə be ɗaa mə-je o̰je ngaɓa ꞌsangəje ɗəw mba tɔl-je. 34Ngaa Parijiyɛ̰ kara ri-a na Gamaliyɛl, gə to baw negərə gə ɔji dɔ torondu ngaɓa dəw mə ɓeje tɔ̰y ꞌnjigi tar lə-a ya̰, uba nangə ḭ no ngɔ gangə tar gə lə Jiibije, un ɗəw mba kar dəwje nee le ꞌce ɗaga ɓəəl ɓa ꞌtəl ɓi. 35Cibi n-un tar n-pa na: Sisəy dəwje gə Ijirayɛl, ne gə mə-si uwa mba ɗa gə dəwje nee le oje gə maj-ɛ ɓa. 36Mba kur-e əw ang ja ɓi, dəw kara ri-a na Tədas, gə o rɔ-ɛ gə dəw gə to ɓəəl ya̰, ar dəwje asə tɔl-tɔl sɔɔ be d-um go-e gə ngaa ꞌtɔl-ɛ ɗaa njekum go-e gə je le ꞌja̰rɛ̰ naa tɔ̰y, dəw kara kara nay ang. 37Go-e gə ɗaa, Judas gə ngon njeɓe gə Galile, dɔ ndɔ tura dəwje gə, uba nangə ḭ um dəwje go-e gə, ngaa uba tuji ja tɔ ngaɓa dəwje tɔ̰y gə d-um go-e gə kara ꞌja̰rɛ̰ naa tɔ. 38Be ɓa ɓisine, m-pa m-ar-si, ɔrje rɔ-si gə gugu ɗaa ḭya̰je dəwje nee le ar-jeje d-aw. Kula gə d-aw ɗa nee le ɓo to kula gə ḭ mə kəji gə lə dəwje baa nama 39a tuji, ngaa to gə ɓo ḭ rɔ Luba gə nama a kasəje mba tujije ang. Oje gə maj-ɛ ɓa na a kḭ kila-je ɗɔ gə Luba.
40Be ɓa ꞌnjigi go tar gə lə-a. Ngaa ꞌɓarje njeka̰ykulaje le d-ar d-unda-je gə abəlay cibi d-un ndu d-ɔgə ne ɗəw mba kar ꞌpaje tar gə ri Jeju ang nəm, ngaɓa d-ḭya̰-je ɓi.
41Njeka̰ykulaje nee le d-ɔdə no ngɔ gangə tar gə lə Jiibije nee le gə rɔləl mba ko gə Luba oje to gə d-asə kar ꞌɗa-je məyɛr mba ri Mbayɓe. 42Ngaɓa gə ndɔ-ndɔ ja, mə kəy gə lə Luba ngaɓa mə kəyje gə d-əw rɔ-je tɔji ne gə kila mbərə Tar gə May gə ri Kirisi Jeju ang.
Currently Selected:
Kula ɗa Njeka̰ykulaje 5: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
