Ja̰ 7
7
Ngan ko̰ Jeju ꞌta kag-ɛ ang
Ja̰ 5.44; 15.18-19; Mat 10.16
1Go-e gə ɗaa Jeju nja dɔ nangə gə Galile; n-njigi mba nja dɔ nangə gə Jude gə ang, mba Jiibije ꞌsangə ɗəw gə mba tɔl-ɛ. 2Ndɔ ɗa nay Kəy kubu lə Jiibije le ɗaa nay dəb baa ngaa. 3Ngan ko̰-ɛ ꞌpa d-ar-ɛ na: Ɔdə lo gə nee gə ɗangə ɓo aw lo lə-i gə Jude gə mba kar ngan njenendoje lə-i kara d-o kulaje gə ꞌɗa. 4Mba, to gə ɓo dəw sangə mba tɔji rɔ-ɛ kar d-o-e gə kəm-je nda̰-nda̰ nama, ɗa ne lokiya gə ang; to gə ɓo ꞌɗa neje gə nee le nama, ꞌtɔji ne rɔ-i gə ɗaga ta kəm dəwje gə. 5Be ɓa ngan ko̰-ɛ ja kara ꞌta kag-ɛ ang nəm tɔ. 6Jeju pa ar-je na: Dɔ kar nəm asə ang ɓi; ngaa sisəy le ɗaa dɔ kar tɔ̰y to kar-si. 7Dəwje d-a kasə ndɔɔl-si ang; ngaa ꞌma ɗaa ꞌndɔɔl-m mba m-ɗa tar naji lə-je to gə kula ɗa-je kṵra̰y. 8Be ɗaa awje lo ɗa nay gə nee le. ꞌMa ɓa ye, m-a kaw kəne ang baa mba dɔ kar lə-m asə ang ɓi. 9Go tar gə n-pa nee ɗaa, ꞌne n-nay Galile gə gagə.
Jeju aw lo ɗa nay kəy kubu gə
10Ngaa logə ngan ko̰-ɛ d-aw lo ɗa nay gə ɗɔdə ɗaa, ꞌne kara n-ɔdə n-un ɗəw n-aw gə go ngə̰y n-ar d-o-e ang.
11Jiibije ꞌsang-ɛ ndɔ ɗa nay gə ɗaa ꞌdəji na: N-ga̰ ɗa ngaɓa nee wa? 12Dan bula dəwje gə le, ꞌma̰y naa tar ya̰ ɔji dɔ-ɛ; nje gə kɛm ꞌpa na: N-to gə dəw gə may. Ngaa nje gə ɗangə tɔ ɗaa ꞌpa ꞌcila ne kəm nje gə ɓe kara na: N-to nje kərə bula dəwje kar-je ꞌndəm. 13Be ja kara, dəw kara asə mba pa sə-a ɗaga təgəsə kəm dəwje ang mba ꞌɓəəl Jiibije.
14ꞌƊa nay ꞌce dana bab ɗɔdə ɗaa, Jeju ɔdə aw mə kəy gə lə Luba aw ndo dəwje ne. 15Lo tar igi Jiibije sɛl ɗaa ꞌpa na: ꞌNe gə dɔ-ɛ andə kəy nendo gə wɔr ang ja ngaa, n-ɗa na ban ɓa n-gərə Mbede to ɓəəl ya̰ be wa? 16Jeju ila-je kəne na: Netɔji lə-m ꞌma le ḭ rɔ-m ꞌma gə ang, ngaa ḭ rɔ dəw gə njekula-m gə. 17To gə ɓo dəw njigi mba ɗa mə njigi lə Luba nama, a gərə to gə netɔji gə nee le ḭ rɔ Luba gə ose, to ꞌma ɓa m-pa tar gə dɔ rɔ-m wa? 18Dəw gə pa tar ɔji go mə njigi lə-a ye nama sangə riɓar lə-a ye ja; ngaa dəw sangə riɓar lə dəw gə nje kula-a le, nj-ɛ nee ja kara baa to dəw gə tɔgərɔ, ngaɓa neɗa gə dɔ buguru ɓar ri-a ang tɔ. 19Moyiji ar-sisəy Torondu le ang baa cibi wa? Be ja kara dəw kara gə nje ɗa ne kula godo: Mba ɗi ɓa ꞌsangəje ɗəw mba tɔl-mje wa? 20Bula dəwje d-ila-a kəne na: Njil gə kṵra̰y ula gərəng mə-i gə. Na ɓa sangə ɗəw gə mba tɔl-i wa? 21Jeju təl ila-je kəne na: M-ɗa ne kara baa ja ɓi ɗaa, sisəy tɔ̰y ja lo tar igi si sɛl. 22Moyiji un ɗəw kunja bərə ar-si ngaɓa ka-sijee je ɓa d-unda gəl-e ɓo to Moyiji ang baa ɗaa sisəy unjaje dəwje bərə ndɔ kuwa kɔr gə. 23To gə ɓo dəw ar d-unja bər-e ndɔ kuwa kɔr gə nama, Torondu le Moyiji le ye al dɔ-ɛ ang, ngaa mba ɗi ɓa wungu lə-sisəy ḭ gə si pu-pu dɔ-m gə mba kaji gə m-aji dəw ndɔ kuwa kɔr gə m-ar rɔ-ɛ may pɛdə wa? 24ꞌGangəje tar mba kəm dəwje baa ang, ngaa ꞌgangəje tar gə go neɗa gə dana gadə ɓa.
25Nje gə kɛm horo dəw mə ɓeje gə Jerujalɛm ꞌpa na: Ne gə d-aw ꞌsang-ɛ gə mba tɔl-ɛ le ja ɓa n-ar nee ang wa? 26Oje, ꞌne le ja n-aw pa tar kəm dəwje gə ɗaga ja pay-pay a n-ar nee, ɗaa tar kara kara ꞌpa dɔ-ɛ gə ang. Njeko̰ɓeje lə-sijee le d-o ꞌgərə gə maj-ɛ to gə ꞌne le n-to Kirisi to gə tɔgərɔ ja wa? 27Ngaa, ꞌne gə nee le, j-a gərə lo gə n-ḭ kəne, ngaa lo gə Kirisi a ɗe ɗaa, dəw kara kara a gərə lo gə ye ḭ kəne ang. 28Be ɓa, Jeju gə aw ndo ne mə kəy gə lə Luba le, ila ndu-e nangə ɓolong pa na: ꞌGərə-mje ngaɓa ꞌgərəje lo m-ḭ kəne! Ngaa ꞌma ɓa m-ɗe gə dɔ rɔ-m ang. Njekula-m le to dəw gə dana gadə, ꞌne gə sisəy ꞌgər-eje ang le. 29ꞌMa le m-gər-e, mba m-ḭ rɔ-ɛ gə, ngaɓa ꞌne ja ɓa n-ula-m tɔ. 30Be ɓa ꞌsangə ɗəw mba kuwa-a, ngaa dəw kara kara asə kuwa-a ang, mba kar lə-a asə ang ɓi.
31Dəwje ya̰ dan bula dəwje gə ꞌta kag-ɛ ɗaa ꞌpa na: Logə Kirisi a ɗe le se, ye a ɗa netɔjije ya̰ kunda kar dəw gə nee ja cibi wa? 32Parijiyɛ̰je d-uru mbi-je d-o ne tar gə bula dəwje ꞌyṵrṵ ɔji dɔ Jeju, ɗaa buba njekapoloje gə Parijiyɛ̰je d-ula njengəm loje kar d-aw d-uwa-a.
33Jeju pa na: M-ga̰ gə si ɓəəl ɓi ɗaa, m-a təl kaw rɔ njekula-m gə. 34A sangə-mje ɗaa a kinga-mje ang; mba lo m-ga̰ kəne, le sisəy a kasəje mba kaw-je kəne ang. 35Lo-e gə əng ɗaa, Jiibije ꞌpa tar horo naa gə na: Logə ɗa ngaɓa n-a kaw gə kəne ɓa j-a kinga-a ang magə wa? N-a kaw kinga nje gə ꞌsɛ̰rɛ̰ naa horo Gərɛgəje gə mba tɔji Gərɛgəje ne wa? 36N-pa na: A sangə-mje ngaa a kinga-mje ang; lo gə m-ga̰ kəne le sisəy a kasə kawje kəne ang. Ɗaa tar gə nee gə n-pa le m-e na ɗi wa?
37Ɗudu ndɔ ɗa nay gə to ndɔ gə bɔy le, Jeju ar taar ɗaa ila ndu-e nangə ɓolong pa ne tar na: To gə ɓo dəw gə kunda tɔl-ɛ nama may kar-ɛ ɗe gə rɔ-m gə ɗe ta man ay. 38Dəw gə ta kagə-m to gə Mbede pa tar-ɛ nama, man babo təbə a kḭ m-e gə kula kəngəng-kəngəng gə man baa. 39N-pa tar nee n-ɔji dɔ Njil gə nje ta kag-eje d-a kinga: To to gə be mba d-ula rɔnduba dɔ Jeju gə ang baa ɓi ɗaa Njil godo ɓi tɔ.
40Dəwje gə kɛm horo bula dəwje gə d-o tar gə Jeju pa ɗaa, nje gə naaje ꞌpa na: Dəw gə nee le to pajambərə ja tɔgərɔ. 41Nje gə ɗangə ꞌpa na: ꞌNe to Kirisi. Ngaa nje gə ɗangə cibi ꞌpa na: Kirisi asə kḭ dɔ nangə gə Galile gə ja wa? 42Kirisi le a kḭ gəl Dabidi gə, ɗaa n-a kḭ Bɛdəlɛhɛm gə to ɓe lə Dabidi ɓa Mbede pa be ang wa? 43Be ɓa kay naa to horo bula dəwje gə mba tar lə-a. 44Nje gə naaje horo-je gə ꞌsangə ɗəw gə mba kuwa-a, ngaa dəw kara kara ula ji-a uwa-a ne ang.
45Be ɓa njengəm loje ꞌtəl ꞌɗe d-inga buba njekapoloje gə Parijiyɛ̰je gə ɗaa ꞌdəji-je na: Mba ɗi ɓa uwa-aje ꞌɗeje sə-a ang wa? 46Njengəm loje d-ila kəne na: Ndɔ kara ja dəw pa tar to gə ngon jingaw gə kən ang. 47Parijiyɛ̰je ꞌdəji-je na: Sisəy ja kara ar-je n-um-si wəl gə tɔ wa? 48Horo buba ɓeje gə ose horo Parijiyɛ̰je gə le, dəw kara baa be gə ta kag-ɛ ga̰ kəne əng ja wa? 49Ɓɛl bula dəwje gə ꞌgərə ne kara gə ɔji dɔ Torondu ang, ꞌto dəwje gə kugu uwa-je. 50Nikodɛm, gə to kara lə Parijiyɛ̰je gə dɔ ndɔ gə kede, ɗe cil gə inga Jeju le pa ar-je na: 51Torondu lə-sijee le ila tar dɔ dəw gə lal gə mba kar d-o tar gə t-ɛ gə nəm, gə lal ko kula ɗ-ɛ nəm tɔ wa? 52D-ila-a kəne na: ꞌI kara ꞌto gə dəw gə Galile gə ja tɔ ang wa? ꞌTən Torondu gə maj-ɛ o, ɗaa a gərə to gə pajambərə a kḭ Galile gə ang.
Jene gə nje ɓogo lo to
53Ɗaa na-na kara ɔdə aw ɓe lə-a ɓe lə-a.
Currently Selected:
Ja̰ 7: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
