Marəke 4
4
Gusutar gə ɔji dɔ dəw gə njendɔ
Mat 13.1-23; Lug 8.1-15
1Jeju un kudu tɔji ne to gə ɗangə mbɔr babo gə. Bula bo dəwje ꞌɗe mbo̰ naa mbɔr-ɛ gə ar n-al n-isi mə to gə dan babo gə. Ɗaa bula bo dəwje tɔ̰y d-ar nangə ta man gə. 2N-tɔji-je ne kur-e əw ya̰ gə gusutarje ngaɓa n-pa n-ar-je mə netɔji gə na: 3Oje: Dəw gə njendɔ ce aw mba kaw kila kər. 4Logə n-aw n-ila kər le ɗaa kand-e gə kɛm um mbɔr ɗəw boo njal-njal, əlje ꞌɗe d-o̰. 5Kandə kər gə kɛm um dɔ ranga gə nangə ndər kəne ang ɗaa ce gə tɔg-ɛ baa ngira inga lo kandə nangə ya̰ ang baa, 6ngaa logə kar ɔsə ngaɓa tunga ɗaa ɗa kər gə ce le ar-ɛ tudu mba ngira-a andə nangə ang. 7Kandə kər gə kɛm um horo kunje gə: logə kunje ḭ ɗaa udu dɔ-ɛ ar andə ang magə. 8Kɛs-ɛ gə ɗangə um dɔ nangə gə may gə; ɗaa unda baa mbənji-mbənji gə kede-kede. Kand-ɛ kara nama unda dɔg munda, ye gə nee unda dɔg misa̰ ngaɓa ye gə kən unda tɔl. 9Cibi, Jeju pa na: Dəw gə mbi-a gə mbi ko tar ɗaa o.
10Logə d-isije gə Jeju gə kar-je baa, nje gə d-isi sə-a gə ndɔ-ndɔ ngaɓa ngan njekulaje lə-a dɔg gə gir-je gə joo nəm tɔ ɗaa, ꞌtəl ꞌdəji-e tar dɔ gusutar gə le. 11Jeju ila-je kəne na: Sisəy le ɓa d-ar-si ne gə to lokiya gə ɔji dɔ ɓeko̰ lə Luba, ngaa kar dəwje gə ɗaga ɗaa d-o gə gusutar baa, 12mba kar
D-a ne nda̰a̰ ja kara d-o ang,
D-o tar ja kara, ꞌgərə m-e ang,
Na d-a kḭ mbəl kəji lə-je kar d-ḭ d-ɔr tar dɔ-je gə.
13N-təl n-pa ar-je ja cibi na: Gusutar gə nee ɓa ꞌgərə-je m-e ang; ngaa a gərə-je mə gusutarje gə kɛm to gə ban wa?
14Njekila kər le ila mbərə tar lə Luba. 15Kandə kər gə um mbɔr ɗəw boo njal-njal le, ꞌto dəwje gə d-o tar be ja ɗaa, ꞌSu ɗe ɔr tar gə oso mə-je lə ɗɔdə. 16Ɗəw kara baa to gə ꞌye gə um dɔ ranga gə le, to dəwje gə d-o tar, ɗaa ꞌta gə tɔg-ɛ ɓa gə rɔləl, 17ngaa tar le ula ngira-a mə-je ang; ꞌto dəwje gə gə ꞌngom tar waga baa; ngaɓa logə nekəmandoo ose kula kəm naa ndoo gə ɔji dɔ tar lə Luba ce dɔ-je gə nama, təl to ɗəw koso lə-je. 18Kandə kər gə um mə kunje gə le nay ɗəw kara baa gə dəwje gə ꞌtuga mbi-je d-o ne tar lə Luba, 19ngaa no rɔ gə ɔji dɔ ne gə nangə nee, gə ɓo nekingaje gə dɔ nangə nee, kəm kə̰y neje dang-dang ɗe udu dɔ tar lə Luba gə d-o le ngaɓa ɗa ar kand-e godo. 20Kandə kər gə um dɔ nangə gə may gə le to dəwje gə ꞌtuga mbi-je d-o ne tar le ngaɓa njigi go-e gə. Ɗaa kand-e gə kara andə dɔg munda, ye gə ɗangə dɔg misa̰, ngaɓa ye gə ɗangə andə tɔl.
Gusutar gə ɔji dɔ lambe
Lug 8.16-18
21Jeju pa ar-je ja cibi: Dəw a kunda pər lambe gə mba kun ne dəbə ne ose mba təl kiya gəl cira gə ang. N-a kunda lo kunda gə taar ɓa. 22Be ɓa ne kara gə iya rɔ-ɛ gə d-a kila gə ɗaga ang le godo, ngaɓa ne kara gə ꞌdəbə dɔ-ɛ gə d-a kḭya̰ dɔ-ɛ ngaw kar gadə gə ang le godo. 23To gə ɓo dəw gə mbi-a to mbi ko tar nama o. 24Jeju təl pa ar-je ja cibi na: Tar gə oje le, ꞌɗa-je gə ne ndam ang. Ngo gə ɔji-je ne ne ja tɔ ɓa d-a kɔji ne ne kar-sisəy ngaɓa d-a kila mar-ɛ dɔ-ɛ gə kar-si. 25Mba dəw gə ne ga̰ ji-a gə ɓa d-a kar-ɛ mar-ɛ kəne, ngaa dəw gə ne godo ji-a gə le, ye gə ga̰ ji-a gə njɛ̰ ja kara d-a ta ɗɔdə.
Tar gə ɔji dɔ ko ne
Mat 13.31,32; Lug 13.18,19
26Jeju pa to gə ɗangə ar-je na: Ɓeko̰ lə Luba le to to gə gə kandə ko gə dəw ila nangə be; 27n-tiɓi ose n-isi kəm, cil gə kar, gə kandə ko le ce ngaɓa tɔgə lal kar n-gərə se ɗa to gə ban ɓa be wa? 28Dɔngɔr le waa ja ce nangə gə dɔ rɔ-ɛ baa, ɗaa kar-ɛ mongə, cibi ɓa ɔr dɔ, ɗaa dɔ-ɛ le unda; 29ngaa ɓo dɔ ko le tudu nam ɗaa d-ila marəm kəne mba nay kunja ne asə ngaa.
30Jeju pa cibi na: Ɗi ja ɓa j-a kuwa kɔji ne ɓeko̰ lə Luba le wa, ose gusutar gə ban ɓa j-a kuwa pa ne tar-ɛ wa? 31Ɓeko̰ lə Luba ta naa gə kandə kam nay gə ri-a na mutarədə, gə ɓo, logə ꞌdubu nangə nama to kandə ko gə mbadə ya̰ horo koje tɔ̰y gə ꞌdubu nangə gə, 32ngaa logə ꞌdubu ɓa ɓo ce nama, ḭ təl tɔyi dɔ kam nayje tɔ̰y gə mə ndɔ gə ngaɓa bar kəm-ɛje ꞌtɔ asə kar əlje gə dara ꞌɗe ɗa kəy njil-e gə.
33Ɗəw gə lə gusutarje gə to gə be bula ɓa Jeju tɔji neje ne, gə go ye gə d-asə mba gərə. 34N-pa gə je tar lal gusutar ang, ngaa n-aw n-ɔr gəl-e tɔ̰y gə go ngə̰y n-ar ngan njenendoje lə-a.
Jeju uwa ta ləl bo
Mat 8.18-27; Lug 8.22-25
35Ndɔ-ɛ gə əng ja, kar kumatagə, Jeju pa ar-je na: J-aw-je tura man gə ər kara gə. 36Logə d-ɔdə d-ḭya̰ bula dəwje nam ɗaa, ꞌɗe d-inga Jeju mə to gə isi kəne kede le, ngaɓa toje gə kɛm kara ga̰ mbɔr-ɛ gə tɔ. 37Waga ɗaa, ləl bo ula gə singa ar ꞌpagəm tuga ar man um mə to gə ar-ɛ aw ɗusu ngaa. 38Ngaa Jeju to aw cibi ɓong to gədə dɔ ne gədə dɔ gə. Ɗaa ꞌndol-e ngaɓa ꞌpa d-ar-ɛ na: Njenetɔji, ja kaw kinga tuji nee le ɔs-i kəne ang wa? 39Be ɓa Jeju ndol ɗaa, ndangə ləl ngaɓa pa ar babo na: Əw rɔ-i! Ləl gangə njɛd ar mbi lo pa kəng. 40Cibi, n-təl n-pa n-ar-je na: Mba ɗi ɓa ꞌɓəəl-je ya̰ be wa? ꞌTa-je kagə ang ja ɓi wa? 41Ɓəəl unda-je badə gangə-je ar ꞌpa tar horo naa gə na: Dəw gə nee to na ja wa? Ləl je gə babo ja kara d-o tar t-ɛ gə səmə!
Currently Selected:
Marəke 4: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
