Roka 12

1Mai dama mai yorotokana, 1.000 dame‑nima mai na, mai dama mai ihi mai ibi tame tainameteni. Yeso hika mai da‑daba mai‑ya hiyare,

“Fariseo mai‑ka femeto‑ya dai arabanahi. Fara mai ihi tamine amani. Mai ati amosa, mai ihi ati kasirobisa, mai‑nima dai riyahi.

2Yama tamine‑ya mai kema, mai dama mai hiwatowahaboneni.

3Mai noki awiri‑ya dai hiyara, dai ati‑ya mai nafi mitawahaboneni. Dai ati bo‑boyinamaro, dai ati‑ya mai nafi mitawahaboneni.

4Dai‑ya mai ati naboha mai‑ya dai nayofinariyahi. Dai‑ya mai nanahabiya, dai‑ya mai kobonamateraboneni.

5Deoso dai nayofinabisahi. Deoso mai one‑ya nanahabeya, yama hirini‑kaya mai one‑ya korotonamakibonane. Fare dai nayofinabisahi.

6Bani bidi mai 5 kana mai da‑daa, yinero bidi fame‑ta mai manakone tohateni. Bani bidi mai‑ya Deoso nofe, bani bidi ohari‑ya Deoso ati kadamowamaterene.

7Deoso ai tati kone nafi‑ya wato, ai tati kone nafi‑ya kadikemarine. Dai habo siitoriyahi. Bani bidi mai dama mai manakone bi‑bidi teni. Dai‑ta dai manakone nafibisateni.

8Mai‑ya dai hiyariya,

‘Yeso‑ka ama·oni.’ Dai ati niya,

‘Oka mai amani.’ Onahareboneni, Deoso‑ka yo‑yose mai‑ya.

9‘Yeso‑ka ohi awirini.’ Mai ati niya,

‘Oka mai tohi awirini.’ Obisaboneni, Deoso‑ka yo‑yose mai‑ya.

10Owa‑ya mai weena, makobote owa‑ya mai nofawahiya, mai ihi manakone wadamaraboneni. Deoso‑ka Doni‑ya mai weeniya, mai ihi manakone fawateraboneni.

11Yama one‑ya dai‑ya mai wataboneni, dai ene‑ya mai kadikabonehe. Deoso‑ya mai hi‑hiyara‑ke yobe hidi‑ya dai‑ya mai towakama, dai‑ka hidi owa‑ya dai‑ya mai towakama na, dai ati‑ya mai mitabone, dai atibodi yama‑ya kadikariyahi.

12Dai hiyariya, Deoso‑ka Doni dai‑ya kanawatobonane, ati dai kaminebonaha.” Yeso ati nematane.

Yama dai kayawariyahi

13Mai dama mai‑ka owa ati yanane,

“Yeso, okobi abe, tiwati ihi okobi yehe honene one‑ya okoyo owa‑ya daanaho.” Ati nematane.

14“Ayo haa·oraboneni. Kofeno‑ka yo‑yose ohi awirini.” Yeso ati nematane.

15Mai nafi‑ya hiyare,

“Dai noko wadahi. Bofe‑ka yama dai nokotoniriyahi. Mai‑ka yama dama toha, mai‑ka yama dama mai‑ya kasomi nafira, mai one ohi, mai one aba nineni.” Yeso ati nematane.

16Yeso mai‑ya kanawatobona mai‑ya hiyare,

“Ai owa‑ka yamata yani amosa, hika yamata dodamineni.

17Atibodi yama‑ya kadike,

‘Oka yamata wa‑wada‑ke oka yobe kibane.

18Yobe onahabiya, yobe webote‑ta wama·oniya, Yobe nafi‑ya oka yamata wadabisaboneni.

19Oka yamata teeni hawa ohiya, owatibodi yama‑ya kadikamatasiya, —Oka yamata dama tosiyo kanibote raboneni. Yama ani·onamarabone, hiniya otafabone, fino‑ya ofebone, ya‑yai·onaboneni.— Haa‑nima onaboneni.’ Atibodi ati nemarine.

20‘Yama‑ya tiwato awirini. Hibayata ti·ababone, tika yamata‑ya mai one kayafawahaboneni.’ Deoso ati nemarine.

21Yama dama‑ya mai nokotonihe, Deoso‑ya mai nokotonira, mai abiya, mai‑ka yama mai‑ya kasomateraboneni.” Yeso ati nematane.

Dai habo siitoriyahi

22Yeso hika mai da‑daba mai‑ya hiyare,

“Yama kaba wadarihi, dai‑ka bora one wadarihi niya, dai habo siitoriyahi.

23Mai tafe toha, mai‑ka bora toha na mai‑ya kasomi nafira, mai one ohi, mai one aba nineni.

24Bani bidi mai tamine dai mitahi. Bani bidi mai‑ka yamata‑bone‑ya mai kamaterani. Fadara‑ya mai kiharihi, mai tafe‑ka yobe wadarihi, tene. Bani bidi mai tafe‑bone‑ya Deoso daanibisatene. Bani bidi mai‑ya Deoso nofi bi‑bidi ne, ai‑ya nofi nafibisane.

25Dai habo siitoniya, dai‑ya dai kasomarani.

26Dai hasini‑ya dai watora, hini yamata ihi yama dama‑ya dai nokotonihi?

27Awa mowe dai awahi. Awa mowe bora‑ya wamaterani. I‑di Saromaho‑ka bora amosa damamete, awa mowe amosabisa, Saromaho‑ka bora amosi bi‑bidi nametemoneni.

28Deoso ati ene awa mowe amosani. Makobote awa mowe aba kanibote na, ai sarikiteni. Awa mowe‑ya Deoso nokotoni nafire, ai‑ya nokotoni nafibisatene. Deoso ati ene ai‑ka bora tohaboneni. Deoso ati dai nofi nafira, ati dai nofi nafihi.

29Dai kakomeheriyahi. Deoso ai tefe‑bone‑ya daa, ai‑ka fa‑fawa‑bone‑ya daa nebonane.

30Deoso ati‑ya mai watora yama dama‑ya mai nokotonihe, mai‑nima dai riyahi. Ai‑ka Abi dai‑ya watotene.

31Deoso ai nafi‑ka hidi kitabote tohawahebona dai nokotoniya, dai‑ka yama‑bone‑ya Deoso daanebonane.

Neme‑ka yama dai nokotonibisahi

32Oka dai amani. Dai habo siitoriyahi. Ai‑ka Abi dai‑ya nofe, dai nafi‑ka hidi kitabote tohawahebona‑ya dai saweboneni.

33Dai yehe honene dai daanahi. Yinero dai waratokaniya, mai‑ka yama wadara mai‑ya yinero dai daanahi. Haa‑nima dai niya, neme‑ya dai manakone wadaboneni. Neme‑ya dai‑ka yama manakone tosiyoteraboneni. Neme‑ya yama‑ya mai botirihi, yama aboni yama‑ya mai kabarihi, teni.

34Bofe‑ya dai yehe honene dama wadiya, bofe‑ka yama dai nokotoniheboneni. Neme‑ya dai‑ka yama dama tohabisiya, neme‑ka yama dai nokotonibisaboneni. Ai‑ka yama dama wadi tohi‑kaya yama ai nokotoniteni.

Yeso kamatasebona, dai noko wadahi

35Okomatasabone, dai‑ya dai hawa tohiyahi. Owa dai nimaniyahi.

36Hidi‑ka yo‑yose mai‑nima dai nahi. Hidi marina‑ya toke, hika yo‑yose mai nimahine, kobonamataseya, nokobi‑ya mai seekana kanibote nabonehe.

37Mai‑ka hidi kamebona‑ya hini mai‑ya mai hawa tonihe, mai ya‑yainaboneni. Hidi kameya, ati ene mai nahaboneni, mai‑ya natafebonaha.

38 # 12:37-38 Yeso hini tamine‑ya hiyare, kamataseya, ai hawa toha, ai ya‑yainaboneni. Yama soki nafi‑ya mai nimana, yama soki bai‑ya mai‑ka hidi kama, yama sibarini, yama wahabisari‑ya mai‑ka hidi kamabiseya, yama sibarini, mai ya‑yainaboneni. Fara mai‑nima owa dai nimaniyahi.

39Ai‑ka yama‑ya botibona‑ka ora tamine‑ya ai mita, ai noko wadaboneni, ai‑ka yama‑ya botirebonaha.

40Dai noko wadahi. Dai‑ka Ayo neme‑ke kobonebona, dai one nimahinamareya kobonebonane.” Yeso ati nematane.

41“Ayo, oda tikanawata, mai nafi tikanawatohareba awineni.” Bedoro ati nematane.

42“Owati dai mitahi. Hidi‑ka yo‑yose mai dama, hika yo‑yose ohari yama‑ya watone, hidi ati‑ya tokadabi amose, hidi ati ene mai one‑ka hidi tohawahebonane, mai‑ya natafebonaha.

43Hidi koboneya, hidi ati‑nima ene ne, ya‑yainebonane.

44Owati amosa dai mitahi. Yama dama‑ya hidi daanebonane, hinawadabonehe.

45Hidi‑ya nimani nafiya,

‘Oka hidi kama kanibote re, kama kanibote ni awirebonane.’ Hika yo‑yose atibodi ati neya,

mai makidi, mai fanawi mai na, mai‑ya bisi, kawi‑ya fawa neya,

46hidi kama kanibote nebonane. Hika mahi, hika ora ne‑ya hika yo‑yose wato awirebonane. Hidi kobonameya, hika yo‑yose towe‑ya bisini kitebonane. Deoso ati‑ya mai nofara mai sawi‑kaya hinawaibonane.

47Dai‑ka hidi ati dai mita, dai‑ka hidi ati‑nima dai ni awiriya, dai‑ka hidi dai‑ya kosini kitebonane.

48 # 12:48 Deoso‑ka yama hani ati dai wato, ati dai tokadabara, Deoso yawi kitebonane. Deoso‑ka yama hani ati mai mitara, ati mai tokadabara, Deoso yawi bi‑bidi nebonane. Dai‑ka hidi ati dai watore ihi dai ene ati kasira, dai‑ya kosini bi‑bidi nebonane. Yama ai anini kitabone yinero nafi‑ya ai‑ya mai daateni. Mai‑ka yama dama ai nawada, ai ene towe‑ya mai awiya, mai yawa kanibote teni.

49Bofe‑ya kobo·onamaroni, yama‑ya hiri·onihebonehe. Yanani hawa toha‑mani, ya‑yai·ona neni.

50 # 12:50 “Owa‑ya mai habanirisabone” Yeso ati ne, mai hinahabebona tamine amane. Owa‑ya mai habanirisabone, owa habanisi hawa tohara ihi oyawineni.

51‘I‑di Yeso ati ene mai nafi ati somaboneni.’ Dai ati na awineni.

Owa ene mai ibi weenibisaboneni.

52Yobe ohari‑ya mai wina mai 3 kana mai‑ya mai fama mai nofaraboneni. Mai fama mai‑ya mai 3 kana mai nofahariraboneni.

53 # 12:53 Yeso ati mai one nofa, Yeso ati‑ya mai one nofarihi na, mai tamine amani. Badi bidi‑ya nofarebona, bidi badi‑ya nofaharirebonane. Madi bide‑ya nofarabone, bide madi‑ya nofahariraboneni. Mai ibi komana mai ibi nofaraboneni.” Yeso ati nematane.

54Mai dami‑ya hiyare,

“Mahi to‑toka‑kaya neme sabi dai awa, faha kaki bonehe dai ati na, fara dai ati‑nima faha kakiteni.

55Bato‑kaya yama hakikini kake dai awa,

‘Yama hiwe kobonaboneni.’ Dai ati teni.

Fara dai ati‑nima yama hiwe koboteni.

56Towe dai amani. Bofe‑ka yama kiini dai wato, neme‑ka yama kiini dai wato na, Deoso ene‑ya dai awa, yama‑ya dai watorani.

57Deoso yama hinofa dai sibara, dai sibanahi.

58Kofeno‑ya tiwa ene towe‑ya ai owa kaminebona, dai kobokani awisari‑ya tiwati somawama kanibote nahi. Tiwati somawami awiriya, boriso tiwa‑ya mai waratoniya, kadeya‑ya tiwa‑ya mai nafoyaba awineni.

59 # 12:58-59 Yeso‑ya mai nofara mai ihi Deoso yawane. Deoso ati‑ya mai tokadaba kanibote na, mai sibaraboneni. Deoso ati mai tokadaba kanibote ra, Deoso mai‑ya weenebona, hika we‑wee tosiyo kanibote raboneni. Yama manakone nafi abi awisariya, tiwa‑ya mai seekani awiraboneni.” Yeso ati nematane.

Currently Selected:

Roka 12: jaaNT

Highlight

Copy