Roka 8
8
1Makobote Yeso hika mai 12 kana mai eyehe sidadi dami‑ya toke, mai tabori bide‑ya tokahari, Deoso ai nafi‑ka hidi kitabote tohawahebona tamine‑ya hiyarematane.
2Yeso‑ya mai fanawi sawemeteni. Hibati‑ya mai one‑ya Yeso nakitame, mai one‑ya madi towe mai foyamete, Yeso ati ene mai kananameteni. Hibati‑ya madi towe mai 7 kana i‑di Mariya Madarena‑ya mai foyamete, Yeso ati ene mai kananawahameteni.
3I‑di Sosana sawi, i‑di Kosa fadi i‑di Yo·ana sawi, mai fanawi one dama Yeso‑ya mai dabameteni. I‑di Kosa Erodi tabaro‑ya yama‑ya aninematane. Yeso‑ya mai da‑daba mai tafe‑bone‑ya mai fanawi kanikameteni, hini mai‑ka yinero‑ya.
Yamata noki‑ya werene
4Tabora dami‑ka mai kake, Yeso‑kaya mai yorotokana, Yeso mai‑ya hiyare, hini ati yokana‑ya kemone,
5“Ai owa yamata noki‑ya werene, hawi fowari‑ya noki one sona, mai taihinisa, bani bidi mai hikaba hina, yanarani.
6Yamata noki one yati iti‑kaya sona, yaniya, fahi wadara, wayatoneni.
7Atiwa mete‑ya yamata noki one sona, atiwa ene yamata yani amosarani.
8Bodo‑ya yamata noki one sona, yana, bona, ade ohare‑ka boni 100 tohawahani.” Yeso ati nematane.
“Owati dai mita, owati dai tokadabahi.” Ati ne,
yamata noki tamine‑ya Yeso hiyare, haa‑nima ati nematane.
9“Tiwati tikahema, tiwati oda watorini.” Yeso‑ya mai da‑daba mai ati nameteni.
10“Deoso ai nafi‑ka hidi kitabote tohawahebona tamine dai watowahaboneni. Mai one‑ya ohiyara, owati okahemobisateni. Deoso‑ka yama hani ati‑maro‑nima mai nawahani.
‘Owa ene‑ya mai awa, owa‑ya mai watorihi, owati‑ya mai mita, owati‑ya mai watorihi nani.’ Yama hani ati neni.
11Yamata noki tamine yokana dai mitahi. Yamata noki Deoso ati tamine amane.
12Fadara‑ka wami ai atibodi tamine amani. Hawi fowari‑ya yamata noki sona, Deoso ati‑ya mai mita, Diaboro ene Deoso ati‑ya mai ati kadamowama kanibote na, Deoso ati‑ya mai nofara, Deoso ai nafi‑ka hidi kitabote tohawahebona‑ya mai sawiteraboneni.
13Yati iti‑kaya noki one sona, Deoso ati‑ya mai mita, ati mai nofa, mai ya‑yaina, makobote mai mai weehiniya, mai maakana kanibote na, Deoso ati‑ya mai tokadabamarani.
14Atiwa mete‑ya yamata noki sona, Deoso ati‑ya mai mita, makobote yinero‑ya mai nokotonihi, yama bara‑ya mai nokotonihi, mai siwa, yamata bonora‑nima mai na, mai ihi amosa‑ba wadarani.
15Bodo‑ya yamata noki sona, Deoso ati‑ya mai mita, Deoso ati‑ya mai atibodi nofi kita, mai atibodi amosa, mai maakarani. Mai ihi amosani.
Nabarina tamine
16Nabarina ai botokana, nabarina wahi ai barikiterani. Nabarina ai kanawaarikosateni, mai kiiyomama yama‑ya mai awabonehe.
17Mai atibodi ati dai watora dai watowahaboneni. Mai ihi‑ya mai kema, mai ihi nafi dai watowahaboneni.
18Owati dai mita, owati dai nofahi. Deoso ati‑ya mai mita, ati mai hinofeya, Deoso ati‑ya mai wato ba‑basi naboneni. Deoso ati‑ya mai mita, ati mai hinofareya, yama‑ya mai watoteraboneni.” Yeso ati nematane.
Yeso madi kamake
19Yeso madi, Yeso sohori mai na, mai kamakemeteni, Yeso‑ya mai hiyarabonehe. Mai dama mai ihi Yeso‑ya mai tokomakirameteni.
20“Yeso, tika ami tika soho mai eyehe kobona, tiwa‑ya mai haana, mai nahani, yobe fowari‑ya.” Mai one ati nameteni.
21“Deoso ati‑ya mai mita, ati mai tokadaba, okomi mai toha, oka soho mai toha, mai nineni.” Yeso ati nematane.
Kanawa boki yanatona
22Mahi owa‑ya kanawa‑ya Yeso hika mai da‑daba mai eyehe foye,
“Hima, wara webote kowani‑kaya ai tokahi.” Yeso ati nematane.
Mai toka,
23mai yakakaniya, Yeso amonematane. Faha bai‑ya mai tohiya, boni yanana, faha rike nafe ihi kanawa boki yanatonameteni.
24Yeso‑ya mai mowakana,
“Ayo, Ayo, ai abi bonehe.” Mai ati nameteni.
Yeso dodafi, boni‑ya wee, faha rike‑ya wee ne, ati ene boni fawa, faha rike fawa nameteni.
25Mai‑ya hiyare,
“Hini yamata ihi dai kakomeheti? Osawe, owa‑ya dai awakarini?” Ati nematane.
Ene mai hiawe, mai habi siitona, mai ibi hiyara,
“Ebeni‑ke tohati? Ai‑nima Yeso ni awire, kitabotebisa amane. Yeso ati‑ya boni mita, fawa, faha rike fai ati‑ya mita, fawa nineni.” Mai ati nameteni.
Madi towe boroko mai‑ya mai foya
26Kerasa mai‑ka wami‑ya mai kobonameteni. Karireya kowani‑kaya Kerasa mai winateni.
27Yeso yoratomaroseya, tabora‑ke mai‑ka owa kobonematane. Madi towe fai‑ya mai foya, mai ihi bora‑ya sakonamarihi, yobe‑ya winamarihi, mai tame‑kaya winematane.
28-29Yeso‑ya awe, kaikane, Yeso noko‑ya home,
“Maki‑ya tisawimariyahi.” Yeso ati ne,
“Yeso, Deoso kitabote Bidi amatini. Owa arabatinahi. Owa bisitiriyahi.” Maki ati ne, ati kitematane.
Hibati‑ya koheti‑ya maki‑ya sodado mai sokini damameteni. Mai hiwakatome, madi towe ene maki kiti nafi, koheti‑ya betekasarimane, kabani‑kaya kanani tokawahematane. Haa‑nima maki ene ne, ene damematane, madi towe ene.
30“Tiwa oni eme titi?” Yeso ati ne,
“Ibowa ama·oni.” Maki ati ne, fara madi towe mai dama maki‑ya mai foyameteni.
31“Hodi yaba‑ya oda‑ya tiyoseriyahi.” Madi towe mai ati nameteni.
32Adami‑kaya boroko mai dama mai tafameteni.
“Boroko mai‑ya oda tiyosebisahi.” Madi towe mai ati na,
“Sibarini, boroko mai‑ya dai foyahi.” Yeso ati ne,
33boroko mai‑ya madi towe mai tokiyoma, boroko mai kanani tokofawaha, wami kote wadara‑ya mai nafi toka, mai boka, mai nafi abameteni.
34Boroko mai‑ya mai na‑nawada Yeso ene‑ya mai awa, mai kanana, sidadi toha, tabora bide toha na‑ya Yeso ene‑ya mai kaminameteni.
35Yeso ene‑ya mai awabone mai kamakemeteni. Hibati‑ya maki madi towe mai foyimaro‑ke maki hibayata bora‑ya weyenawahe, hibati‑ya ka‑kana nemari amosawame, itari‑ya mai awa, Yeso‑ya mai nayofinameteni.
36Yeso hinakitame‑ya mai awa Yeso ene tamine‑ya mai kaminameteni.
37Kerasa mai‑ka wami‑ya mai wi‑wina mai toha, Kerasa mai‑ka wami yakari‑ya mai wi‑wina mai toha, mai na, yama yofina ihi Yeso‑ya mai toyosemameteni, yama one‑kaya tokebonaha. Yeso hika mai eyehe kanawa‑ya foyame, mai winitokanamameteni.
38“Tiwa‑ya osaweboneni.” Madi towe mai foyimaro‑ke ati nematane.
39“Owa‑ya tisawiriyahi. Tiwa tabaro‑ya tikamabisahi. Deoso tiwa‑ya nakitame tamine tihiyariyahi.” Yeso ati nematane.
Tokome, hika tabora nafi‑kaya Yeso ene tamine‑ya kaminematane.
40Kowani‑kaya Yeso‑ya mai one dama nimana, Yeso kobokanamatase‑ya mai awa, mai ya‑yainameteni.
41 # 8:41 Hibati‑ya hidi webote‑ya mai koboniya, mai yobati‑kaya mai itametemoneni. Yeso hidi webote amane i‑di Yairo atibodi ati ne, yobati‑kaya itematamonane. Deoso‑ya mai hi‑hiyara‑ke yobe hidi i‑di Yairo tohematane. I‑di Yairo kaki, Yeso yowi‑ya yobati‑kaya ite, Yeso‑ya himanematane, hika yobe‑ya Yeso tokomakibonaha.
42Yairo bide atona ohare kiyani nafe, abi yanatonameteni. Mai dama mai teberi‑ya Yeso tokomakimatane.
43Mai dama mai‑ya fana sawe, hika ama fawani watora, faha fowe 12 kana‑ya hika ama fawani awirameteni. Mediko mai ihi hika yinero nafi tosiyo, hika ama fawarameteni.
44Yeso bari‑kaya kamake, Yeso‑ka bora ifi‑ya boyona, hika ama fawanawahameteni.
45“Ebeni‑ka tohiti, owa‑ya boyonaro?” Yeso ati ne,
“Tiwa oda boyorani.” Mai ati na,
“Ayo, mai dama hiniya tiwa‑ya mai boyona awineni.” Bedoro ati ne,
46“Owa‑ya boyonibisani. Owa ene kitabote owatoneni.” Yeso ati nematane.
47“Owa‑ya Yeso watone.” Fana atibodi ati na,
habi siitona, wawawakana, Yeso noko‑ya homa, mai dama mai noki‑ya hiyara,
“Faha fowe 12 kana‑ya oka ama fawani awirani.
‘Yeso‑ka bora ifi boyo·oniya, okitamaboneni.’ Owatibodi ati na,
oka, Yeso‑ka bora ifi boyo·ona, okitamani.” Fana ati nameteni.
48“Sima, sibarini.
‘Yeso‑ka bora boyo·oniya, oka ama fawanawahaboneni.’ Tiwatibodi ati na,
fara ihi tiwa onakitamineni. Tikamahi.” Yeso ati nematane.
49Yeso hiyareya, Yairo tabaro‑ke owa kamaki,
“Yairo, tikoto abani. Yeso hini tohaya.” Ati nematane.
50Ati Yeso himite, Yairo‑ya hiyare,
“Tiwa habo siitoriyahi. ‘Deoso kitatene.’ Tiwatibodi ati nibisahi. Owati tinofiya, tikoto kitamaboneni.” Ati nematane.
51Yairo tabaro‑ya mai kobona, Yeso ati ene mai one nahokosa, i‑di Bedoro, Yowaho, Tiyako, Yairo, Yairo fadi, mai na, mai tokiyomabisa, mai one nahokosameteni.
52Mai dama mai ohina, hini mai baki‑ya mai boonameteni.
“Dai ohiriyahi. Abi awirini. Hiniya amoneni.” Yeso ati nematane.
53Atona aba‑ya mai watobisa, Yeso‑ya mai hahakanameteni.
54Atona aboi yahi‑ya Yeso waratone,
“Tiwaamisamahi.” Ati nematane.
55Korimari foyama, kitama, waamisamameteni.
“Tikoto dai natafahi.” Yeso ati nematane.
56Yeso ene‑ya Yairo fadi eyehe awe,
“Ka! Yeso kitatene.” Mai atibodi ati nameteni.
“Tikoto onakitama tamine dai kaminariyahi.” Yeso ati nematane.
Currently Selected:
Roka 8: jaaNT
Highlight
Share
Copy
Want to have your highlights saved across all your devices? Sign up or sign in
