Roka 9

Mai 12 kana mai‑ya yose

1Yeso ati ene hika mai da‑daba mai 12 kana mai yorotokana, ati ene mai ihi kitawaha, mai ihi madi towe mai kana, mai ihi mai kiyana mai kitamawaha nameteni.

2Deoso ai nafi‑ka hidi kitabote tohawahebona tamine‑ya mai hiyarabone, mai kiyana mai‑ya mai nakitamabone, mai‑ya yosematane.

3“Dai tokiya, dai‑ka yama‑bone‑ya dai weyeriyahi. Dai dabakiba‑ka awa, yamasi, iyawa, yinero, bora na, dai weyekariyahi.

4Mai tabori‑ya dai koboniya, yobe ohari‑ya dai winiyahi. Aka‑ya dai toki awisari‑ya yobe owa‑ya dai winariyahi.

5Mai tabori‑ya dai toka, dai ati‑ya mai nofara, dai yananamiya, mai noki‑ya dai teme hibakori dai nanahabiyahi, mai atibodi yama‑ya kadikabonehe.

‘Mai ati oda nofara mai tokineni. Oda ene amani.’ Mai atibodi ati naboneni.” Yeso ati nematane.

6Fa‑fai‑ya mai yanana, mai toka, mai tabori dami‑ya Deoso ati amosabote tamine‑ya mai kamina, mai kiyana mai‑ya mai nakitama nameteni.

Yeso tamine‑ya Erodi atibodi kadikane

7Yeso tamine‑ya mai‑ka hidi i‑di Erodi mite, atibodi yama‑ya kadiki kitematane. Yeso tamine‑ya mai hiyara,

“Yowaho Batita abe, kitamemonane.” Mai one ati nihi.

8“I‑di Eriya kobonamatase awane.” Mai one ati nihi.

“Deoso ati‑ya mi‑mita‑mata abemata, kitame awane.” Mai one ati nihi nameteni.

9“Owati ihi Yowaho Batita namidi mai tiihinakosemari, ebeni‑ke tohamata, ene kitemonaha? Yeso oawaboneni.” Erodi atibodi ati nematane.

Mai dami‑ya natafe

10Yeso‑ka yo‑yose mai kobonama, mai ihi tamine‑ya mai kaminameteni, Yeso‑ya. Yeso hika mai eyehe Besaida‑kaya mai tokameteni, mai one awiri‑kaya mai hasinabonehe.

11Yeso hika mai eyehe toke tamine‑ya mai one mita, mai tokomakemeteni. Mai‑ya Yeso awe, mai‑ya nofe, Deoso ai nafi‑ka hidi kitabote tohawahebona tamine‑ya kamine, mai kiyana mai‑ya nakitamematane.

12Mahi toke‑ya mai 12 kana Yeso‑ya mai hiyara,

“Yeso, yobe wadare‑ya ai nahoneni. Mai tiyosehi, mai tabori‑ya mai tokiya, mai tafe‑bone‑ya mai kanikabone, mai amoni‑bone‑ka mai‑ka yobe‑ba mai wasebonehe.” Mai ati nameteni.

13“Mai dai natafabisahi.” Yeso ati nematane.

“Oda tefe wadarani. Baho 5 kana, aba mai fama, eya oda tefe nani. Mai tafe‑bone oda kanikaba awineni.” Mai ati nameteni.

14Mai dama maki mai 5.000 mai kana mai nahameteni. Yeso hika mai da‑daba mai‑ya hiyare,

“Mai nahorisahi. Haa‑ya 50 mai kana mai nahorisa, haa‑ya 50 mai kana mai nahorisa, 50 mai kana mai hinama mai tohahi.” Yeso ati nematane.

15Mai 12 kana mai ati ihi mai nafi nahorisameteni.

16Baho 5 kana, aba mai fama na, mai‑ya Yeso damakane, neme‑ya tonokomise, Deoso‑ya hiyarematane. Baho‑ya kebi, mai 12 kana mai‑ya daanematane, mai dami‑ya mai daahinabonehe.

17Mai nafi tafa, mai korimanama, kote hasina, mai teehina, hisiri 12 kana kibameteni.

“Deoso‑ka Ka‑kadika amatini.” Bedoro ati ne

18Kabani‑kaya Deoso‑ya Yeso hiyarematane, hika mai da‑daba mai eyehe. Hiyari hawa toheya, hika mai da‑daba mai‑ya hiyaramaki,

“Owa tamine‑ya mai hiyara, eme mai ati niti?” Yeso ati ne,

19“‘Yowaho Batita amane.’ Mai one ati nihi,

‘I‑di Eriya amane.’ Mai one ati nihi,

‘Deoso ati‑ya mi‑mita‑mata abemata, kitame, fare amane.’ Mai one ati nihi teni.” Yeso‑ya mai da‑daba mai ati nameteni.

20Mai‑ya hiyare,

“Dai‑ta eme dai ati niti?” Yeso ati ne,

“Deoso‑ka Ka‑kadika amatini.” Bedoro ati ne,

21“Hehe, fara ama·oni. Hiniya, owa tamine dai hiyarariyahi.” Yeso ati nematane.

“O·ababone, okitamaboneni.” Yeso ati ne

22“Yodeo mai‑ka hidi mai bi‑bidi na mai toha, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, dai‑ka Ayo neme‑ke ati‑ya mai nofarabone, mai weeni hikitebona, mai hinahabeya, mahi 3 tohe‑ya okitamaboneni.” Yeso ati nematane.

23Mai nafi‑ya hiyare,

“Owa‑ya dai ati daba, dai‑ka yama dai nokotoniriyahi. Owa‑ya dai dabiya, owa‑ya mai nanahababone‑nima dai‑ya mai nanahabahareba awineni.

24 # 9:24 Tamine yokana amani haro; Yeso‑ya dai nofa dai‑ya mai nanahaba, Deoso tabaro‑ya dai ya‑yainaboneni. Oda abariyahi dai ati niya, Yeso ati‑ya dai tokadabara, dai ohinaboneni. Owa‑ya dai nofa dai‑ya mai nanahabiya, dai abaraboneni. Oda abariyahi dai ati niya, owati‑ya dai tokadabara, dai ababoneni.

25Yama dama‑ya mai kihamaro mai abiya, mai‑ka yama mai‑ya kasomateraboneni. Owati‑ya mai nofara yama hirini‑kaya mai sawiwahaboneni.

26Deoso‑ya mai nofara dai‑ya mai weeni awirabone dai ati na, owa‑ya dai nofarihi, owati‑ya dai nofarihi dai ni‑ya, okomatasiya, dai‑ya onofahariraboneni. Okomatasiya, Owa wehene wadabone, Okobi wehene owa‑ya sawibona, Okobi‑ka yo‑yose amosabote mai wahi owa‑ya sawi naboneni.

27 # 9:27 Mai amoni 8 kanamaki‑ya adami tati‑ya Yeso wehene wadawahe, fara tamine‑ya Yeso hiyarematamonane. Owati dai mitahi. Dai abi awisari‑ya Deoso ai nafi‑ka hidi kitabote tohawahebona dai one awawahaboneni.” Yeso ati nematane.

Yeso wehene wadane

28Mai amoni 8 kani‑ya Bedoro, Yowaho, Tiyako, mai na, mai‑ya Yeso himanematane. Adami webote‑ya Yeso mai eyehe tokomorosematane, Deoso‑ya hiyarebonaha.

29Deoso‑ya Yeso hiyareya, noko bare tohawahe, borone sawa yokana tohawahe, wehene wadawahematane.

30I‑di Mose i‑di Eriya mai fama Yeso‑ya mai hiyarameteni.

31I‑di Mose i‑di Eriya mai fama mai wahi wadameteni. Yerosare‑ya Yeso abebona tamine‑ya mai hiyarameteni.

32Bedoro mai‑ya nokobisa nafe ihi mai amona, mai dodafiya, Yeso wehene‑ya mai awa, Mose‑ya mai awa, Eriya‑ya mai awa nameteni.

33I‑di Mose, i‑di Eriya, mai yanakanamiya, Bedoro ati yanane,

“Ayo, tiwa‑ya oda sawe, yama sibarini. Dai‑ka wa‑wasa‑ba oda wamanaboneni. Tika ohari, Mose‑ka ohari, Eriya‑ka ohari nebonane.” Bedoro ati ne,

hiniya ati yananematane, yama‑ya atibodi watoreri.

34Bedoro hiyareya, neme sabi mai‑ya barikawama, mai habi siitonameteni.

35Neme sabi‑ya ati kaki,

“Oka Dao amane. Oka Ka‑kadika amane. Ati dai tokadabahi.” Ati nematane.

36Ati fawaneya, Yeso ohari waimatane. Mai amoni dami‑ya yama mai hiawa tamine‑ya mai one‑ya mai kaminarameteni.

Madi towe kanare

37Adami webote‑ya mai amoni ohare, mai tokofawama, bofe‑ya mai dama mai nahameteni.

38Maki sawi, Yeso‑ya haane,

“Ayo, oka dao tiawamatahi. Oka dao ohari amane.

39Madi towe oka dao‑ya waratorimane ene oka dao e‑erine, hini‑ya were, iridi sabone toka nofene. Madi towe toka kanibote re, tokeya, oka dao‑ya bisitene.

40Tiwa‑ya mai da‑daba mai haa·ona, madi towe‑ya mai kananihebone, mai ati‑ya madi towe nofare, tokarene.” Ati nematane.

41“Ka! Owati dai nofara, dai narabo hawirani. Owati dai wato kanibote nahi. Dai‑ya owa sawi nafimaraboneni. Tika dao tiwakamahi!” Yeso ati nematane.

42Bidi‑ya kakameya, madi towe yetene‑ya fatatowitimatane. Yetene wami‑ya sone, hini‑ya werenematane. Madi towe‑ya Yeso weene, yetene‑ya nakitame, yetene‑ya badi‑ya daatonamematane.

43Yeso ene‑ya mai awa, mai atibodi yama‑ya kadika,

“Deoso ene kitabote amane.” Mai atibodi ati nameteni.

Mai dama mai atibodi yama‑ya kadikiya, hika mai da‑daba mai‑ya hiyare,

44“Owati dai mitahi. Dai‑ka Ayo neme‑ke‑ya ai owa daanebonane.” Yeso ati nematane.

45Deoso ati ene Yeso ati‑ya mai watora, Yeso‑ya mai nayofina, mai ati yanarameteni.

Ebeni‑ke ba‑basi nati?

46Yeso‑ya mai da‑daba mai ibi kadika,

“Ebeni‑ke kiti ba‑basi nabati?” Mai ati na,

mai ati fara hinama tohara, mai ibi ati waranameteni.

47Mai atibodi ati‑ya Yeso wato, ewe‑ya nawaawamematane, hini yowi‑ya.

48Mai‑ya hiyare,

“‘Owa ene Yeso ya‑yainebonane.’ Dai atibodi ati na,

ewe dai kasomiya, owa‑ya dai kasomahari, Okobi‑ya dai kasomahari neni. Bi‑bidi ne‑mona ati ne, fare ba‑basi nibisane.” Yeso ati nematane.

Dai ati hamariyahi

49“Ayo, tiwa oni‑ya ai owa hirine, madi towe mai‑ya kananihi. Ai‑ya dabare, oda ati barihinene.” Yowaho ati ne,

50“Maki‑ya dai ati baririyahi. Dai‑ya mai kakora, dai‑ya mai kasomabisateni.” Yeso ati nematane.

51 # 9:51 Yeso tokomisebona ati ne, awa‑ya Yeso mai nawaanabone tamine toha, Deoso tabaro‑ya Yeso tokebona tamine toha nane. Yeso tokomisebona hika mahi koboni yanatone, Yerosare‑ya nokotoniwahematane, tokomebonaha.

52Hika mai one‑ya yose, mai dai tohameteni, mai amoni‑bone‑ka mai‑ka yobe‑bona‑ya mai wasebonehe. Samaritano mai tabori one‑kaya hika yo‑yose mai koboniya,

53Samariya‑ya mai wi‑wina mai ati a‑arira, Yerosare‑ya mai tokabone mai‑ya mai kasomi nofarameteni.

54Mai ati‑ya i‑di Tiyako, i‑di Yowaho mai mita, mai ati yanana,

“Ayo, Deoso oda haaniya, yifo hirini kisaboneni, mai‑ya sarikanabonehe. Tiwati sibakarini?” Mai ati nameteni.

55Yeso mai‑ya ati barine, mai‑ya weene,

“Haa‑nima oterani. Owati somabisateni.

56Mai‑ya okasomabone okemaro, mai nanahabi onofarani.” Yeso ati nematane.

Tabora one‑kaya mai tokawahameteni.

57Mai tokiya, ai owa kamaki,

“Yeso, tikami‑ya tiwa‑ya osaweboneni.” Ati ne,

58“Bani mai one tabori hodi‑ya toha, bani mai afe wada mai bori tohateni. Owa‑ta owa tabaro wadarani.” Yeso ati nematane.

59Maki bare‑ya hiyaratase,

“Owa‑ya tisawihi.” Yeso ati ne,

“Ayo, okobi abeya, hika yama kote okayafiya, tiwa‑ya osawiwahaboneni.” Ati nematane.

60“Abi‑ka yama hini tohiya, abi abeya, owati‑ya mai nofara abi‑ka yama‑ya mai kayafabisiya, yama sibaraboneni. Tiwa‑ta tikamiya, Deoso ai nafi‑ka hidi kitabote tohawahebona tamine‑ya tihiyarabisiyahi.” Yeso ati nematane.

61“Ayo, tiwa‑ya osaweboneni. Oka mai haa·oniya, okomakeboneni.” Ai owa ati nematane.

62Yeso ati yanane,

“Deoso‑ka yama‑ya mai nokotonihebone mai ati na, makobote yama bara‑ya mai nokotonibisa, Deoso ai nafi‑ka hidi kitabote tohawahebona‑ya mai sawiraboneni.” Yeso ati nematane.

Currently Selected:

Roka 9: jaaNT

Highlight

Copy