Mateo 28
28
Yeso kitame
1Sabado‑ya mai fanawi tokara, Domiko yama wahabisari‑ya Mariya Madarena, Mariya mai fama, Yeso temene‑ya mai towakamameteni.
2Mai yakakaniya, wami wawawakanamaroni. Deoso‑ka yo‑yose neme‑ya kise, yati webote‑ya karotowiti, yati mese‑ya itarimatane.
3Bahi yebekane wehene‑nima Deoso‑ka yo‑yose wehene ne, Deoso‑ka yo‑yose borone sa‑sawani kitematane.
4Deoso‑ka yo‑yose‑ya sekorasa mai awa, mai habi siitona, mai wawawakana, mai abakosameteni.
5Yeso temene‑ya mai fanawi kobokana, Deoso‑ka yo‑yose mai‑ya hiyare,
“Dai habo siitoriyahi. Yeso mai baahikane dai awebona dai ati na,
6haa‑ya awimare, kitame, abo fori‑ke yama dai awahi. Kitamebona ati ne, kitamawahane.
7Dai towakama kanibote nahi. Yeso‑ya mai da‑daba mai‑ya dai hiyariyahi.
‘Yeso kitame, Karireya‑kaya tokebona, dai tokomakihi, Yeso dai awabonehe.’ Dai ati niyahi.
Fara owati‑nima yama naboneni.” Ati nematane.
8Mai fanawi towaka kanibote na, mai habi siitona, mai ya‑yainaharemeteni. Mai kanani kamameteni, oda‑ya mai hiyarabonehe.
9Mai kanani kakama, Yeso mai‑ya kobone, mai‑ya hiyarematane. Yeso‑ya mai awa, Yeso teme‑ya mai damana, Yeso‑ya mai kahiyarameteni.
10 # 28:10 “Oka soho mai dai hiyariyahi.” Yeso ati ne, hika da‑daba mai‑ya sohonematamonane. “Dai habo siitoriyahi. Oka soho mai dai hiyariyahi. Karireya‑kaya mai tokiyahi. Karireya‑kaya owa‑ya mai awaboneni.” Yeso ati nematane.
Yerosare‑ya sekorasa mai toka
11Hawi‑ya mai fanawi yakana, Yerosare‑ya sekorasa mai one kobona, Deoso‑ka yama‑bone‑ya mai da‑daa mai‑ka hidi mai‑ya yama tamine‑ya mai kaminameteni.
12Sekorasa mai ati‑ya mai mita, Yodeo mai‑ka hidi mai bi‑bidi na mai‑ya mai daba, mai yorotokana, mai ibi hiyarameteni. Sekorasa‑ka yinero webote‑bona‑ya mai daanameteni, keyehe‑ya mai hirinabonehe.
13“‘Yama soki‑ya oda amoniya, Yeso abo‑ya hika mai da‑daba mai botenini.’ Dai ati nahi.
14Dai tamine Birato miteya, oda ati ene dai‑ya bisini awirebonane.” Mai ati nameteni.
15Yinero‑ya sekorasa mai kayafa, Deoso‑ka yama‑bone‑ya mai da‑daa mai‑ka hidi mai ati‑nima mai ati nawahamaroni. Mai ati‑ya Yodeo mai dami mita,
“Yeso abo‑ya hika mai da‑daba mai botenini.” Yodeo mai ati nasa nani.
Owa tamine dai hiyarahi
16Karireya‑ya oda 11 kana oda tokamaroni. Hibati‑ya adami webote Yeso yofihikana, fara‑ya oda tokamaroni.
17Yeso oda awa, oda ya‑yaina, oda kahiyaremarine.
“Yeso tohi awire.” Oda one atibodi ati namaroni.
18Makobote Yeso oda‑ya kobone, oda‑ya hiyare,
“Neme, Bofe na‑ka hidi ohawahineni.
19Mai tabori dami‑ya dai tokahi. Owa tamine dai hiyarahi. Mai‑ya dai habanirisahi. Okobi, Deoso Bidi, Deoso‑ka Doni ne oni‑ya mai weyenaboneni.
20Owati nafi‑ya dai kanawatohi, owati‑ya mai tokadababonehe. Dai tokiya, dai‑ya osawebone, dai honita tohateraboneni.” Yeso ati nemarine.
Currently Selected:
Mateo 28: jaaNT
Highlight
Share
Copy
Want to have your highlights saved across all your devices? Sign up or sign in
