Maroko 5
5
Madi towe boroko mai‑ya mai sawe
1Wara webote kowani‑ka Kerasa mai‑ka wami‑ya mai kobona,
2Yeso yoratomaroseya, maki kobonematane. Madi towe maki‑ya foye, mai tame‑kaya winematane.
3Maki kiti nafi ene koheti‑ya mai sokihinamarematane.
4Hibati‑ya koheti‑ya maki mai sokihini dame, koheti‑ya betekasarimane, mai nafi kiti bi‑bidi na, maki‑ya mai watamarameteni.
5Maki ai temene‑ya kaikana, adami tati‑kaya kaikana, yama tehe‑ya kaikana, yama soki‑ya kaikana nematane. Kaikane, yati‑ya hini‑ya wisinematane.
6Yama yaki‑ya maki Yeso‑ya awe, kanani kaki, Yeso noko‑kaya home,
7-9Madi towe‑ya Yeso hiyare,
“Maki‑ya tisawimariyahi.” Yeso ati nematane.
“Yeso, Deoso kitabote Bidi amatini. Owa arabatinahi. Owa bisitiriyahi.” Madi towe ati ne, ati kitematane.
“Tiwa oni eme titi?” Yeso ati ne,
“Ibowa ama·oni, oda damaro.” Ati nematane.
10“Aka‑ya oda‑ya tiyoseriyahi.” Madi towe mai ati nameteni.
11Adami‑ya boroko mai dama mai tafameteni.
12“Boroko mai‑ya oda‑ya tiyosebisahi.” Madi towe mai ati na,
13“Sibarini, boroko mai‑ya dai foyahi.” Yeso ati ne,
boroko mai‑ya madi towe mai tokiyoma, boroko mai kanani tokofawaha, mai 2.000 kana wami kote wadara‑ya mai nafi toka, mai boka, mai nafi abameteni.
14Boroko mai‑ya mai na‑nawada mai kanana, sidadi toha, tabora bide toha na‑ya Yeso ene‑ya mai kamina, mai ati‑ya mai dama mai mita, faha widi‑ya mai kamakemeteni, Yeso ene‑ya mai awabonehe.
15Yeso‑ya mai kobona, maki‑ya mai awameteni. Hibati‑ya maki madi towe mai dama mai foyimaro‑ke, maki hibayata bora‑ya weyenawahe, hibati‑ya ka‑kana nemari, amosawame, itari‑ya mai awa, Yeso‑ya mai nayofinameteni.
16Yeso ene‑ya mai awa Yeso tamine‑ya mai hiyara, maki tamine toha, boroko mai tamine toha na, mai tamine‑ya mai hiyarameteni.
17Yeso ene tamine‑ya mai mita, mai kakomehe, Yeso‑ya mai yosemeteni, yama one‑kaya tokebonaha.
18Kanawa‑ya Yeso mai eyehe foyamematane, mai berekawahabonehe. Hibati‑ya maki‑ya madi towe mai sawimaro‑ke Yeso‑ya haane,
“Tiwa‑ya osaweboneni.” Maki ati nematane.
19“Owa‑ya tisawiriyahi. Tiwa tabaro‑ya tikamabisahi. Deoso tiwa‑ya kasome tamine tihiyarahi, tika mai‑ya. Deoso tiwa‑ya nakitame tamine tihiyariyahi.” Yeso ati nematane.
20Yeso ati‑ya mite, Dikabori‑kaya tokome, Yeso ene tamine‑ya kaminematane. Ati mai himite, mai atibodi yama‑ya kadika,
“Ka! Yeso kitatene.” Mai atibodi ati nameteni.
Yairo‑ka yobe‑ya Yeso toke
21Faha kowani‑kaya Yeso koboname, faha widi‑ya Yeso waasa ne‑ya mai dama mai yorotokanamaroni.
22 # 5:22 Hibati‑ya hidi webote‑ya mai kobona, mai yobati‑ya mai itameteni. Yeso hidi webote amane i‑di Yairo atibodi ati ne, yobati‑kaya itematane. Deoso‑ya mai hi‑hiyara‑ke yobe hidi i‑di Yairo tohe, i‑di Yairo kaki, Yeso‑ya himanebona Yeso yowi‑ya yobati‑kaya itemarine.
23I‑di Yairo Yeso‑ya hiyare,
“Yeso, okoto atona abi yanatonani. Ai towakamahi, oka yobe‑ya. Tiwa yehe‑ya okoto boyotiniya, okoto kitamabone onani, okoto abarabonehe.” I‑di Yairo ohini yanatone ati nemarine.
24Yeso i‑di Yairo eyehe mai dama mai bai‑ya tokomemarine.
25Mai dama mai‑ya fana sawe, hika ama fawani watora, faha fowe 12 kana‑ya hika ama fawani awiramaroni.
26Fana‑ka ama tahi‑bone mediko mai dama mai daahina, mai hikasomi hiwatorameteni. Mediko mai‑ka hemedi manakone fota‑ya fana nika, hika ama fawara, hiniya hika ama tonafe, hika yinero nafi tosiyomatane.
27Yeso tamine‑ya fana mita, mai dama mai teberi‑ya tokomake, Yeso bari‑kaya kamake, Yeso‑ka bora‑ya boyonamaroni.
28“Yeso borone‑ya boyo·oniya, okitamaboneni.” Fana atibodi ati na,
29Yeso‑ka bora‑ya boyona, kitamawaha, kome fawa, hika ama fawanawaha namaroni.
30Yeso hini ene kite‑ya wato, kiinawame,
“Ebeni‑ka tohiti, oka bora‑ya boyonaro?” Yeso ati nemarine.
31Yeso‑ya mai da‑daba mai ati yanana,
“Ai dama, ai‑ya tiawara?
‘Ebeni‑ka tohiti, owa‑ya boyonaro?’ Tina,
fara oda dama tiwa oda boyona awini.” Mai ati namaroni.
32Yeso mai‑ya kiinemarine, fana‑ya awebonaha.
33Fana habi siitona, wawawakana, Yeso noko‑ya homa, hini ihi tamine‑ya kaminamaroni.
34Fana‑ya Yeso hiyare,
“Sima, sibarini.
‘Yeso‑ka bora boyo·oniya, oka ama fawanawahaboneni.’ Tiwatibodi ati na,
fara ihi tiwa onakitamineni. Tikamahi. Tiwa kitami hawa tohini.” Yeso ati nemarine.
35Yeso hiyareya, Yairo‑ka mai one kamake,
“Yairo, tikoto abani. Yeso hini tohaya.” Mai ati namaroni.
36Mai ati‑ya Yeso mite, Yairo‑ya hiyare,
“Tiwa habo siitoriyahi.
‘Deoso kitatene.’ Tiwatibodi ati nibisahi.” Yeso ati nemarine.
37Mai dama Yeso ati ene mai one nahomake, i‑di Bedoro, i‑di Tiyako, sohori i‑di Yowaho, mai na, Yeso‑ya mai dababisamaroni.
38Yairo‑ka yobe‑ya mai kobona, Yairo‑ka yobe‑ya mai naha, mai ohini kitameteni.
39 # 5:39 Atona abineni. Yeso hiwata, hiniya atona‑ya nakitamebona ihi ai amona‑nima teni. Kitama kanibote naboneni. Yairo‑ka yobe‑ya Yeso tokiyome, ati yananane,
“Hini yamata ihi dai ohini kita? Atona abi awirini, hiniya amoneni.” Yeso ati nematane.
40Yeso ati‑ya mai mita, mai hahanameteni. Makobote Yeso mai‑ya yose,
“Dai nafi tokomahi.” Yeso ati ne,
atona badi, madi, Yeso‑ka mai toha na, Yeso mai‑ya himane, atona fori‑kaya mai tokiyamakemeteni.
41Atona aboi yahi‑ya waratone,
“Tarita komi” Yeso ati ne, ai ati‑ya,
“Atona, tiwaamisamahi.” Ati nematane.
42Atona kitama, waamisama, yakana‑ya mai awa, mai atibodi yama‑ya kadika,
“Ka! Yeso kitatene.” Mai atibodi ati nameteni.
Atona‑ka ano 12 kanameteni.
43Yeso ati yananamatase,
“Tikoto aba, kitama tamine dai kaminariyahi. Tikoto tinatafiyahi.” Ati nematane.
Currently Selected:
Maroko 5: jaaNT
Highlight
Share
Copy
Want to have your highlights saved across all your devices? Sign up or sign in
