Maroko 6
6
Nasare‑ya Yeso tokome
1Yeso hini yana‑mata‑kaya hika mai da‑daba mai eyehe tokomemarine.
2Sabado‑ya Deoso‑ya mai hi‑hiyara‑ke yobe‑ya Yeso tokiyome, mai dama mai sawe mai‑ya kanawatomarine. Yeso ati‑ya mai mita, mai ibi hiyara,
“Ka! Yeso yama‑ya wato, ene kite, ebeni‑ke ene Yeso yama‑ya wato, ebeni‑ke ene Yeso ene kitanati?
3Fare ai‑ka owa amane. Hibati‑ya awa‑ya wa‑wama tohemari, hika ami i‑di Mariya toha, sohori i‑di Tiyako, i‑di Yose, i‑di Yoda, i‑di Simaho, mai na, mai ai wata, hika asima ai‑ya mai sawinineni.” Mai ibi hiyara mai ati na,
Yeso‑ya mai nofaramaroni.
4Yeso ati yanane,
“Tabora bara‑ya Deoso ati‑ya mai mi‑mita mai one nafi‑ya mai nofateni. Hini mai tabori‑ka mai toha, mai one toha, mai na, mai‑ya mai nofaterani. Fara‑nima oka dai toha owa‑ya dai nofi awirani.” Yeso ati nemarine.
5Tabora‑ka mai kiyana, mai dama Yeso‑ya mai haaramaroni. Mai one‑ta fa‑famaraba na Yeso‑ya mai haana, mai‑ya Yeso nakitamemarine.
6Mai ihi‑ya Yeso awe, atibodi yama‑ya kadike,
“Ka! Owati‑ya mai nofi awirini.” Yeso atibodi ati nemarine.
Tabora bide dama‑ya Yeso tokemarine, mai‑ya kanawatobonaha.
Mai 12 kana mai‑ya Yeso yose
7Yeso hika mai da‑daba mai 12 kana mai‑ya haane, ati ene mai ihi kitawahamaroni, madi towe mai‑ya mai kananihebonehe. Mai‑ya Yeso hiyare,
“Hawi dami‑ya dai fa‑fama dai tokaboneni.
8Dai tokiya, dai dabakiba‑ka awa dai aka, sibarini, dai‑ka yama one dai weyekarihi. Iyawa, yamasi, yinero ne dai towakariyahi.
9Sanidariya‑ta dai sakonahi. Bora fama dai weyeriyahi.
10Mai tabori‑ya dai koboniya, yobe ohari‑ya dai winiyahi. Aka‑ya dai toki awisari‑ya yobe owa‑ya dai winariyahi.
11Mai tabori‑ya dai koboni‑ka dai ati‑ya mai nofara, dai yananamiya, mai noki‑ya dai teme hibakori dai nanahabiyahi, mai atibodi yama‑ya kadikabonehe.
‘Mai ati oda nofara mai tokineni. Oda ene amani.’ Mai atibodi ati naboneni.”
Yeso ati nematane.
12Mai 12 kana mai tokamaroni, mai dami‑ya mai hiyarabonehe.
“Dai ene towe‑ya dai nofamariyahi.” Mai ati namaroni.
13Mai ati ihi madi towe mai kananamaroni. Mai kiyana mai tati‑ya oyo‑ya mai sorokare, mai‑ya mai nakitamamaroni.
Erodi tamine
14Yeso‑ka mai ihi tamine‑ya mai nafi hiyara, mai ati‑ya i‑di Erodi mite,
“Yowaho tohe awane. Yowaho Batita abe, kitame ene kite toha ne awane.” Mai one ati nihi,
15“I‑di Eriya kamatase awane.” Mai one ati nihi,
“Deoso ati‑ya mai mi‑mita‑mete mai‑nima ne awane.” Mai one ati nihi namaroni.
16Mai ati‑ya i‑di Erodi mite,
“Owati ihi Yowaho Batita namidi mai tiihinakosemari, kitame awane.” Ati nemarine.
17-18Yowaho Batita namidi‑ya i‑di Erodi ati ene mai tiinakosamaro, tamine okaminebonane. I‑di Erodi anidi i‑di Firibi tohe, i‑di Firibi fadi i‑di Erodiasi toha, i‑di Erodi anidi fadi‑ya famawahe, fare ene i‑di Yowaho Batita ati yanane,
“Erodi, ayo fadi arabatinahi.” Ati ne, ati damemarine.
I‑di Erodiasi ati ihi Yowaho mano‑ya Erodi sokikase, kadeya‑ya Yowaho‑ya nafoyemarine.
19Yowaho Batita‑ya i‑di Erodiasi kako kita, i‑di Yowaho Batita‑ya ati naboha, i‑di Erodi ati barihinamaroni.
20I‑di Erodi habo siitone,
“Yowaho Batita ene amose, Deoso‑ya na‑narifa amane.” I‑di Erodi atibodi ati ne,
fai‑ya nayofine, fai‑ya kasomematane. I‑di Yowaho ati miti‑ya i‑di Erodi nofe, fai ati‑ya tokadabare, ati hiwatoremarine.
21I‑di Erodiasi yawi fawara, i‑di Erodi‑ka ano kobona, mai yorotokana, i‑di Erodi‑ka yo‑yose hidi mai toha, sodado mai‑ka hidi mai toha, Karireya‑ka hidi mai bi‑bidi na mai toha, mai na, mai yorotokanamaroni, mai marinabonehe.
22Makobote mai ya‑yainabone i‑di Erodiasi bide atona kama, mai noki‑ya siwana, atona ihi i‑di Erodi mai one eyehe ya‑yaine, atona‑ya hiyare,
“Hini yamata‑ya tiwati koboniti? Tiwa‑ya yama daa·onaboneni.
23Yama tinofa daa·onaboneni. Keyehe hiri·oterani. Oka yama beheri‑ya tiwati koboniya, daa·onaboneni. Hini tiwati kobohina daa·onaboneni.” I‑di Erodi ati nematane.
24Atona tokoma, madi‑ya hiyara,
“Ami, hini yamata haa·obati?” Ati na,
“I‑di Yowaho Batita tati haatiyahi.” Madi ati nameteni.
25Atona hidi webote‑ya tokoma kanibote na, ati yanana,
“Barato‑ya Yowaho Batita tati foye, hibayata owa‑ya daatinahi.” Ati nameteni.
26Atona ati‑ya i‑di Erodi mite, atibodi a‑arire,
“Yowaho Batita nanahabi onofarini. Hini owati tohani.
‘Yama tinofa daa·onabone’ ona,
owati‑ya mai nafi mita, owati‑nima oriya, owa‑ya mai hahakariyahi.” Hidi webote atibodi ati nematane.
27Sodado‑ya i‑di Erodi yose, Sodado toke, kadeya dori‑ya Yowaho Batita namidi‑ya tiinakosematane.
28Yowaho Batita tati barato‑ya foye‑ya sodado kakame, atona‑ya daahine, madi‑ya daahinamematane.
29Yowaho Batita tamine‑ya hika mai da‑daba mai mita, mai kamake, abo mai hiwakame, yati hodi‑ya mai barihikanemarine.
Mai dami‑ya Yeso natafe
30Yeso‑ka yo‑yose mai kobonama, mai ihi tamine‑ya mai kaminamaroni, Yeso‑ya.
31Mai dama mai sawe, mai ihi mai tafaramaroni.
“Hima, mai awiri‑kaya ai tokomahi, ai hasinabonehe.” Yeso ati nemarine.
32Kanawa dori‑ya mai foyamamaroni, mai awiri‑kaya mai tokomabonehe.
33Yeso mai eyehe toke‑ya mai dama mai awa, tabora dami‑ka mai tokomake, faha widi‑ya mai kanani tokobasamake, mai koboni dai tohamaroni.
34Yeso mai eyehe kobone, tokomorose, mai dama mai‑ya awe, atibodi yama‑ya kadike,
“Kaneiro mai‑ka hidi wadamare mai‑nima mai na, mai okasomaboneni.” Yeso atibodi ati ne,
mai dama mai‑ya hiyare, Deoso tamine‑ya kamine, hiyari damemarine.
35Mahi toke‑ya Yeso‑ya mai da‑daba mai ati yanana,
“Yeso, mahi toke, yobe wadare‑ya ai nahoneni.
36Mai tiyosehi, mai tabori‑ya mai tokiya, mai tafe‑bone‑ya mai kanikabonehe.” Yeso‑ya mai da‑daba mai ati namaroni.
37“Mai dai natafabisahi.” Yeso ati ne,
“Mai dama mai‑ka baho‑ba ai kanikiya, manakone nafeba awini. Yama‑ya ai a‑ani ai‑ka yama anini manakone 200 kana manakone‑nima mai dama mai tafe manakone na‑ba awini.” Yeso‑ya mai da‑daba mai ati namaroni.
38Yeso mai‑ya yose,
“Ai‑ka baho dai kadikahi.” Ati ne,
Baho‑ya mai kadiki hawa toha, mai ati yanana,
“Ai‑ka baho 5 kana, ai‑ka aba mai fama mai nani.” Mai ati namaroni.
39Yeso ati ene kabihi mese‑ya mai dama mai nahowamamaroni.
40Haa‑kaya mai one 50 kana naho, haa‑kaya mai one 100 kana naho, ahini‑kaya mai one 50 kana naho na, fara hinama mai yorotokana, mai nahamaroni.
41Baho 5 kana, aba mai fama na, mai‑ya Yeso damakane, neme‑ya tonokomise, Deoso‑ya hiyaremarine. Baho‑ya kebi, aba mai‑ya dobikana ne, mai 12 kana mai‑ya daanemarine, mai dami‑ya mai daahinabonehe.
42Mai nafi tafa, mai korimanama,
43baho kote hasi, aba mai kote hasina, kote mai teehina, hisiri 12 kana kibamaroni.
44Maki 5.000 mai kanamaroni.
Faha baki‑ya Yeso yakane
45Hisiri‑ya mai teeni hawa toha, Yeso‑ya mai da‑daba mai‑ya Yeso yose, kanawa‑ya mai foyamamaroni, Besaida‑ya mai beretokawami dai tohabonehe. Mai dama hini mai tabori‑kaya mai‑ya yosemarine.
46Yeso mai‑ya hiyari hawa toheya, adami webote‑ya tokomorosematane, Deoso‑ya hiyarebonaha.
47Yama soki yanatoni‑ya kanawa‑ya mai foya, faha bai‑ya mai tohiya, Yeso ohari towaakosematane.
48Faha bai‑ya Yeso noko toke, hika mai da‑daba mai‑ya awe, yama hakikini kita ihi kanawa‑ya mai orini kita, 4 ora‑ke, yama wahi yanatoniya, Yeso tokomaki, faha baki‑ya yakanematane, mai‑ya fiyakanebonaha.
49Yeso‑ya mai awa,
“Ai korimari toha awini.” Mai atibodi ati na,
Mai e‑erinameteni.
50Yeso‑ka fara hinama, fai‑ya mai awa, mai kakomehe, mai‑ya Yeso hiyare,
“Dai habo kitahi. Fara ama·oni. Dai kakomeheriyahi.” Ati nematane.
51Kanawa dori‑ya Yeso foyamakiya, yama hakikini fawanawahameteni. Yeso ene kitabote‑ya mai awa, mai atibodi yama‑ya kadikameteni.
52Yeso ene kite‑ya mai awi baha, baho dodama‑ya mai awa, Yeso‑ya mai watomi awirameteni, mai habi kitaro.
Kenesare‑kaya Yeso mai‑ya hiyare
53Kenesare‑kaya mai kobona, kanawa‑ya mai yaditona,
54mai tokomorosa, mai‑ya mai awa,
“Yeso tohene.” Mai ati nameteni.
55Tabora nafi‑ya mai one kanani tokomameteni, Yeso tamine‑ya mai kaminabonehe. Mai ati‑ya mai mita, mai kiyana mai‑ya mai kakamameteni. Awa‑ya bora dasikana‑ya mai kiyana mai fo‑fore mai‑ya mai diwarikana, Yeso sawi‑kaya mai‑ya mai towakameteni.
56Tabora bide dama, sidadi dama na‑ya Yeso toke, koboneya, mai kiyana mai‑ya mai kakamamaroni. Tabora bai‑ya mai‑ya mai kakamamaroni. Yeso‑ya mai haana,
“Yeso, tika bora ifi oda boyonaboneni.” Mai ati na,
Yeso borone‑ya mai boyoniya, mai kitamamaroni.
Currently Selected:
Maroko 6: jaaNT
Highlight
Share
Copy
Want to have your highlights saved across all your devices? Sign up or sign in
