Hechos 6
6
Siete jʉrʉdꞌapeadꞌa mebẽrã aribꞌaedꞌamarẽã
1Maʉ̃ ewadera Jesúsdꞌebema ĩjã bꞌera eaba wãsia, maʉ̃ne griego bedꞌeadꞌe bedꞌea bꞌeba jara jirpanesia hebreo bedꞌeadꞌe bedꞌea bꞌeta, jarasidꞌa pẽdrarã griegorãnebema bia aribꞌaedꞌa ẽãta kꞌarebata ewariza nʉmʉnerã. 2Mawũẽ doce Jesúsba zokꞌakuadꞌabara zhi ĩjã bꞌe kꞌabanata trʉ̃nape mawũãsidꞌa: Biga ẽã daiba Daizeze bedꞌea jara ẽã idaribidꞌaira zhãrã zhiko diaita. 3Maʉ̃ba mebẽrã marãnebemata ũmakĩrãrã siete jʉrʉ edaudua kĩrãẽpa bꞌeta, Jawurebiaba bira bꞌeta, krĩcha bara bꞌeta, maʉ̃rãta maʉ̃ kꞌaudꞌa bꞌeabidꞌaya. 4Waya daira zhiwidꞌi bꞌeaya, Daizeze bedꞌeata jara bꞌeaya.
5Mawũã jarabʉdara biga basia kꞌabanata jõmaʉ̃ma, mawũẽ Estebanta jʉrʉsidꞌa soidꞌu bꞌʉta Jawurebiaba bira bꞌʉta. Jʉrʉsidꞌa Felipeta, Prócorota, Nicanorta, Timónta, Parmenata. Jʉrʉsidꞌa Nicoláta griegota judío bape bꞌʉta Antioquía pʉwʉrʉdꞌebemata. 6Maʉ̃rãta edesidꞌa Jesúsba zokꞌakuadꞌa kĩrãbita, mawũẽ maʉ̃rãbara zhiwidꞌi ãzhi ʉ̃rʉ̃ juwua bꞌʉsidꞌa.
7Daizeze bedꞌeara wuaabʉrʉ jara wãsidꞌa, mawũẽ Jesúsdꞌebema ĩjã bꞌera kꞌãbãẽã eaba wãsia Jerusalénnerã. Sacerdoterãbidꞌa bioba ĩjã tupudꞌeasia.
Esteban jidadꞌapeadꞌa
8Esteban Daizezebara bia nʉmʉkꞌãrĩta zarea bara nʉmʉkꞌãrĩba ũdudꞌakꞌata okua nʉmasia zhãrãne edꞌa. 9Maʉ̃ne ʉ̃kʉrʉ bꞌeasia de zhi jʉrebada maẽbemata, maʉ̃ dera Nezokꞌarãta Ẽzoadꞌadꞌea abazhidꞌa, dewara bꞌeasia Cirene druadꞌebemata, Alejandría pʉwʉrʉdꞌebemata, Cilicia druadꞌebemata, Asia druadꞌebemata, maʉ̃rãta kꞌaikꞌaiasidꞌa Esteban bawara. 10Mawũãmina krĩchata poea bꞌedꞌa ẽbasia Jawurebiadꞌeba bedꞌea bꞌʉba. 11Mawũẽ ʉ̃kʉrʉa pagꞌasidꞌa sewa nebʉrʉ mawũãnamarẽã: Daibara ũrĩsidꞌa kꞌãʉ̃bara bĩ ẽã jarabʉrʉta Moiséta, Daizezeta. 12Aramaʉ̃ne kĩrũbisidꞌa zhãrãta, nokꞌorãta, Moisé ũrãgꞌa jarabadata. Mawũẽ jidadꞌape wesidꞌa nokꞌorã wagꞌaurãma. 13Maʉ̃nerã sewa nebʉrʉbibʉdabara mawũãsidꞌa: Naʉ̃bara bĩ ẽã jara tau ẽã naʉ̃ Daizeze deta, Moisé ũrãgꞌata. 14Daibara ũrĩsidꞌa izha jarabʉrʉta Jesús Nazaredꞌebemaba naʉ̃ Daizeze dera ãrĩĩta, aramaʉ̃ne awuara nʉmʉĩta Moiséba kꞌawabigadꞌata.
15Maʉ̃nerã nokꞌorã wagꞌaurã maẽ jewedꞌa kꞌobꞌebara jõmaʉ̃ba Esteban akʉbʉdadꞌera, izhi kĩrã ũdusidꞌa ángel kĩrã kĩrãkꞌa.
Currently Selected:
Hechos 6: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
Hechos 6
6
Siete jʉrʉdꞌapeadꞌa mebẽrã aribꞌaedꞌamarẽã
1Maʉ̃ ewadera Jesúsdꞌebema ĩjã bꞌera eaba wãsia, maʉ̃ne griego bedꞌeadꞌe bedꞌea bꞌeba jara jirpanesia hebreo bedꞌeadꞌe bedꞌea bꞌeta, jarasidꞌa pẽdrarã griegorãnebema bia aribꞌaedꞌa ẽãta kꞌarebata ewariza nʉmʉnerã. 2Mawũẽ doce Jesúsba zokꞌakuadꞌabara zhi ĩjã bꞌe kꞌabanata trʉ̃nape mawũãsidꞌa: Biga ẽã daiba Daizeze bedꞌea jara ẽã idaribidꞌaira zhãrã zhiko diaita. 3Maʉ̃ba mebẽrã marãnebemata ũmakĩrãrã siete jʉrʉ edaudua kĩrãẽpa bꞌeta, Jawurebiaba bira bꞌeta, krĩcha bara bꞌeta, maʉ̃rãta maʉ̃ kꞌaudꞌa bꞌeabidꞌaya. 4Waya daira zhiwidꞌi bꞌeaya, Daizeze bedꞌeata jara bꞌeaya.
5Mawũã jarabʉdara biga basia kꞌabanata jõmaʉ̃ma, mawũẽ Estebanta jʉrʉsidꞌa soidꞌu bꞌʉta Jawurebiaba bira bꞌʉta. Jʉrʉsidꞌa Felipeta, Prócorota, Nicanorta, Timónta, Parmenata. Jʉrʉsidꞌa Nicoláta griegota judío bape bꞌʉta Antioquía pʉwʉrʉdꞌebemata. 6Maʉ̃rãta edesidꞌa Jesúsba zokꞌakuadꞌa kĩrãbita, mawũẽ maʉ̃rãbara zhiwidꞌi ãzhi ʉ̃rʉ̃ juwua bꞌʉsidꞌa.
7Daizeze bedꞌeara wuaabʉrʉ jara wãsidꞌa, mawũẽ Jesúsdꞌebema ĩjã bꞌera kꞌãbãẽã eaba wãsia Jerusalénnerã. Sacerdoterãbidꞌa bioba ĩjã tupudꞌeasia.
Esteban jidadꞌapeadꞌa
8Esteban Daizezebara bia nʉmʉkꞌãrĩta zarea bara nʉmʉkꞌãrĩba ũdudꞌakꞌata okua nʉmasia zhãrãne edꞌa. 9Maʉ̃ne ʉ̃kʉrʉ bꞌeasia de zhi jʉrebada maẽbemata, maʉ̃ dera Nezokꞌarãta Ẽzoadꞌadꞌea abazhidꞌa, dewara bꞌeasia Cirene druadꞌebemata, Alejandría pʉwʉrʉdꞌebemata, Cilicia druadꞌebemata, Asia druadꞌebemata, maʉ̃rãta kꞌaikꞌaiasidꞌa Esteban bawara. 10Mawũãmina krĩchata poea bꞌedꞌa ẽbasia Jawurebiadꞌeba bedꞌea bꞌʉba. 11Mawũẽ ʉ̃kʉrʉa pagꞌasidꞌa sewa nebʉrʉ mawũãnamarẽã: Daibara ũrĩsidꞌa kꞌãʉ̃bara bĩ ẽã jarabʉrʉta Moiséta, Daizezeta. 12Aramaʉ̃ne kĩrũbisidꞌa zhãrãta, nokꞌorãta, Moisé ũrãgꞌa jarabadata. Mawũẽ jidadꞌape wesidꞌa nokꞌorã wagꞌaurãma. 13Maʉ̃nerã sewa nebʉrʉbibʉdabara mawũãsidꞌa: Naʉ̃bara bĩ ẽã jara tau ẽã naʉ̃ Daizeze deta, Moisé ũrãgꞌata. 14Daibara ũrĩsidꞌa izha jarabʉrʉta Jesús Nazaredꞌebemaba naʉ̃ Daizeze dera ãrĩĩta, aramaʉ̃ne awuara nʉmʉĩta Moiséba kꞌawabigadꞌata.
15Maʉ̃nerã nokꞌorã wagꞌaurã maẽ jewedꞌa kꞌobꞌebara jõmaʉ̃ba Esteban akʉbʉdadꞌera, izhi kĩrã ũdusidꞌa ángel kĩrã kĩrãkꞌa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.