Marcos 13
13
Jesúsba jaradꞌa Daizeze de ãrĩnaĩta
(Mateo 10:16-25; 24:1-28; Lucas 17:22-24; 21:5-24)
1Daizeze dedꞌa ewara maẽba Jesús ãĩ zebʉrʉdꞌera izha jʉrʉkuadꞌabara abꞌaʉba mawũãsia: Miã Ũrãgꞌabari, akʉdua, mongꞌara bi-ia kedꞌea, dera bi-ia nʉmeã.
2Mawũãĩ Jesúsbara panaʉ̃ mawũãsia: ¿Bʉa akʉ kꞌobꞌʉra de zromata nʉme ẽka? Kꞌãwũã nʉmerã mongꞌara abꞌari mongꞌara ʉ̃rʉ̃bidꞌa kꞌobꞌa ẽbaya ãrĩbʉdaba.
Sãwũãĩnebema ẽjũã jõĩ nawedꞌa
(Mateo 24:3-28; Lucas 21:5-6)
3Olivo kꞌatumane Jesús jewedꞌasia Daizeze de kĩrãbita. Maʉ̃ne Pedroba, Jacoboba, Juanba, Andrésba dobꞌaʉa widꞌi mawũãsidꞌa: 4¿Daia jaradua, sõmbedꞌepe Daizeze deta mawũã ãrĩnaĩrã? ¿Sãwũãĩpe maʉ̃ta jõma arimaẽ berabꞌariira?
5Mawũãnaĩ Jesúsbara panaʉ̃ mawũãsia: Kĩrãkuita bꞌeaudua miõã zhi sewabidꞌa ẽbaita. 6Nʉmʉne bio sewata mʉneba zebʉdabara mawũãnaña: Mʉrã zhãrã Ẽdrʉbia. Aramaʉ̃ne bio sewadꞌaya. 7Marãbara zhõta ũrĩnaña namabidꞌa ãĩbidꞌa, maʉ̃nerã perarãũdua, mawũã berabꞌariibara, mawũãmina wadꞌi ẽbaya ewari nʉmʉta jõĩrã. 8Drua tabꞌeta drua awʉrʉta tabꞌe bawara zhõnaña, nokꞌorãta nokꞌorã awʉrʉ bawara zhõnaña. Baridu maẽ nʉmeña ẽjũã ureta, jarrabata. Maʉ̃ jõma puata jẽdeba nʉmeña.
9Mazhikusa kĩrãkuita bꞌeaudua, marã chãbꞌaridꞌaya nokꞌorã wagꞌaurãã, de zhi jʉrebada nʉme maẽ marã udꞌaya. Nokꞌorã kĩrãbita, reirã kĩrãbita marã ededꞌaya mʉ kꞌarea, aramaʉ̃ne marãbara mʉnebemata maʉ̃rãã jaradꞌaya. 10Bedꞌea biata mʉnebemata ewari nʉmʉ jõĩ nawedꞌa nokꞌorãã chãbꞌaridꞌaita edebʉdadꞌera jaradꞌaibara zhãrã jõmaʉ̃ã. 11Marãta sopuarãũdua kꞌãrẽta jaradꞌai kꞌareara, miã krĩcharãũdua, awuarabʉrʉ maʉ̃nerã Jawurebiaba jarabibʉrʉta jaraudua, aramaʉ̃nerã marãta bedꞌea ẽã, awuarabʉrʉ bedꞌeaya Jawurebiata. 12Mebeabara beadꞌamarẽã chãbꞌariya zhi mebeata, zezebara zhi warrata. Warrarã bĩ ẽãdꞌaya ari ãzhi zhibarirã bawara, aramaʉ̃ne beakuabidꞌaya. 13Jõmaʉ̃ba marã juradꞌaya mʉ kꞌarea, mawũãmina mʉta pẽwã zuburiata jõñiĩnu nʉmʉrã ẽdrʉya.
14Jaidꞌebema ne mitiata nʉmʉbʉdata marãba ũdubʉdadꞌera, Daizezeba bedꞌeata jarabibariba Danielba jaradꞌata ũdudꞌaya. Daizeze dedꞌa nʉma ẽbai bꞌʉta nʉmʉnaña. Mawũẽ zhi naʉ̃ lebʉrʉbara maʉ̃ sãwũãta kꞌawuarua. Mobebaira Judeadꞌe bꞌera merũ wãẽbaudua kꞌatumaẽna. 15De ʉ̃rʉ̃ kꞌobꞌʉra udꞌubꞌaepe edꞌa wãrãrũã kꞌãrẽ bʉzhi dedꞌabema jiraedaira. 16Meã kꞌobꞌʉra deidꞌu zerãrũã bʉzhi wua jiraedaira. 17Bꞌiogꞌoa bꞌera, wũãwũã judꞌebema erubꞌera zuburiadꞌaya maʉ̃ ewadera. 18Mawũẽ zhiwidꞌiudua marã mawũã merũbʉdadꞌera nʉma ẽbamarẽã kue ewarita. 19Maʉ̃ ewadera zuburiatrʉ nʉmaña, Daizezeba ẽjũã osidꞌebemata idꞌibasiidꞌu mawũãrã ne ẽãta nʉmaña, miã tẽãbidꞌa mawũãrã nʉma ẽbaya. 20Maʉ̃ ewarita Daizezeba kꞌakutua nʉmʉ ẽbʉrʉ miõta zokꞌai bꞌa ẽã. Mawũãmina izha zhi jʉrʉmata bꞌe kꞌarea kꞌakutua nʉmʉsia maʉ̃ ewarira.
21Mawũẽ iabꞌaʉba zhãrã Ẽdrʉbita za bꞌʉa abʉrʉdꞌera, o zawa bꞌʉa abʉrʉdꞌera ĩjãrãũdua. 22Nʉmʉne zhãrã sewata zhãrã ẽdrʉbita bꞌeaya, sewata Daizezeba bedꞌeata jarabibaridꞌe bꞌeaya, ũdudꞌakꞌata odꞌaya zhãrã sewadꞌaita, sewaita obꞌedꞌara sewadꞌaya Daizezeba zhi jʉrʉmata bꞌesidꞌa. 23Mawũẽ marã kĩrãkuita bꞌeaudua, mʉãrã maʉ̃ta jõma marãã jarabʉrʉa nawedꞌa.
Jesús zeidꞌebema
(Mateo 24:29-44; Lucas 21:25-36)
24Jari ewadera mawũã zuburia nʉmana tẽãne ʉ̃madaura pãrĩguya, jedꞌekꞌora ʉ̃na ẽbaya. 25Chĩdaura bãjãneba jurzoaya, ne zarea zromarãta bãjãnebema pʉrʉderreadꞌaya. 26Mobebʉrʉ mʉ Beubari Bape bꞌadꞌara jãrãrãne uruta ũdudꞌaya kꞌãbãẽã zarea bara kĩrãwãrẽã. 27Mobebʉrʉ mʉãrã ángelerã mʉrẽrãta zokꞌaya, aramaʉ̃ne ãba jʉredꞌaya mʉã zhi jʉrʉmata baridu maẽ bꞌeta wawara bꞌeta.
28Bakuru higueradꞌeba sãwũãta kꞌawuaudua: Zhi jĩwĩnita wikubʉrʉdꞌera marãbara kꞌawuabada poagꞌa kꞌaita bata. 29Aramaʉ̃ kĩrãkꞌa mʉã jara nʉmʉta arimaẽ berabꞌari bʉsadꞌewata marãba ũdubʉdadꞌera kꞌawuaudua mʉ zeira kꞌaita bata. 30Mʉã wãrĩnu marãã jaraya, zhãrã bꞌera neba ẽwedꞌa mʉã jara nʉmʉrã jõma arimaẽ berabꞌariya. 31Bãjã, drua nebaya, mawũãmina mʉ bedꞌeara bari neba ẽã.
32Mawũãmina kꞌãrẽ ewade kꞌãrẽ ʉ̃madaudꞌe mawũã berabꞌariira miõba kꞌawua ẽã, miã ángelerã ʉ̃tre bꞌebidꞌa kꞌawuadꞌa ẽã, miã mʉãbidꞌa kꞌawua ẽã, awuarabʉrʉ kꞌawua bꞌʉa mʉ Zezebʉrʉ. 33Maʉ̃ba dauba bꞌeaudua, zhiwidꞌi bꞌeaudua, marãbara kꞌawuadꞌa ẽbaera mʉrã kꞌãrẽ ewade zeita. 34Aramaʉ̃nerã ũmakĩrãta wawara wãna kĩrãkꞌa berabꞌariya, izhi dera ãmaẽbʉrʉta nezokꞌarã izhidꞌea chãbꞌarisia, abꞌa abꞌaʉa dedꞌekasia kꞌãrẽ oita, de akʉbaria jarasia dauba bꞌamarẽã. 35Marãsidꞌa dauba bꞌeaudua, kꞌawuadꞌa ẽbaera mʉ sõmbedꞌe zeira, baʉcha zeya keubʉrʉdꞌe, o ewari ẽsadra, o eterre berubʉrʉdꞌe, o diapedꞌa. 36Mobedꞌeba aritiaudꞌe zebʉrʉdꞌera ũdu ẽbaya marã kꞌãĩ nʉmeta. 37Mʉã marãã jaraira jõmaʉ̃ã jaraya: Dauba bꞌeaudua.
Currently Selected:
Marcos 13: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
