Marcos 16
16
Jesús beudꞌata piradrʉdꞌa
(Mateo 28:1-10; Lucas 24:1-12; Juan 20:1-10)
1Sábado ẽnaʉ̃bada ewarita berabꞌaribʉrʉdꞌera, María Magdalenaba, dewarabema María Jacobo papaba, dewara Saloméba kerata edasidꞌa wãnaĩta Jesús kꞌakuata tũã odꞌaita. 2Diapedꞌa semana ewarita nabemane domingodꞌe Jesús wuagꞌadꞌapeadꞌaidꞌu zesidꞌa ʉ̃madau ʉ̃tʉ zebʉrʉdꞌe. 3Maʉ̃nerã ãzhirãĩnu mawũãsidꞌa: ¿Mongꞌara kꞌaiba ãña ʉratʉ dedꞌekaipe peña zobꞌeadꞌe edꞌa wãbari maẽ kꞌobꞌʉra?
4Mawũãmina akʉbʉdadꞌera mongꞌara ãña ʉratʉ kꞌobꞌʉta ũdusidꞌa jipadꞌe zhi zromata. 5Mawũẽ peña zobꞌeadꞌe edꞌa wãbʉdadꞌera, juwua araare kũrãta jewedꞌa bꞌʉta ũdusidꞌa, wua torrota eidꞌu ãnabꞌari jʉ̃ bꞌasia. Wũẽrãrã perasidꞌa. 6Mawũẽ maʉ̃bara mawũãsia: Perarãũdua, marãbara jʉrʉ panʉã Jesús Nazaredꞌebema cruzdꞌe kꞌachidꞌapeadꞌata. Beudꞌata piradrʉsia, nama ne ẽã. Akaudua izhi tabꞌʉdꞌapeadꞌata. 7Wãũdua, mobe izha jʉrʉkuadꞌaa, Pedroa jaraudua izhira marã na Galileaedꞌa wãta. Maĩnu ũdudꞌaya izha marãã jaradꞌa kĩrãkꞌa.
8Peña zobꞌeata nʉmʉ maẽbara wũẽrãrã wãẽbasidꞌa ure perabʉdaba. Mawũẽ miõã miã kꞌãrẽta jaradꞌa ẽbasia peraba.
Jesús zhi ũdubidꞌa María Magdalenaa
(Juan 20:11-18)
9Jesús beudꞌata diapedꞌa piradrʉbʉrʉra semana ewarita nabemata domingodꞌera naara zhi ũdubisia María Magdalenaa, maʉ̃ wũẽrãnebara jʉrekua bazhia jai siete. 10Maʉ̃ wũẽrã wãpe maʉ̃ta jarasia Jesús bawara bꞌeadꞌaa, ãzhira sopua bꞌeba jẽga duanasia. 11Maʉ̃rãbara Jesús zokꞌai bꞌʉta ũrĩbʉdara, maʉ̃ wũẽrãba ũdudꞌara ĩjãna ẽbasia.
Jesús zhi ũdubidꞌa izha jʉrʉkuadꞌata ũmeã
(Lucas 24:13-35)
12Maʉ̃ tẽã Jesús zhi ũdubisia izha jʉrʉkuadꞌata ũmeã, maʉ̃rã odꞌe tebasidꞌa. 13Ãzhira wãnape dewaraurãã maʉ̃ta jarasidꞌa. Mawũãmina miã maʉ̃rãba jarabʉdasidꞌa ĩjãna ẽbasia.
Jesúsba jaradꞌa izha jʉrʉkuadꞌaba kꞌãrẽ odꞌaita
(Mateo 28:16-20; Lucas 24:36-44; Juan 20:19-23)
14Nʉmape izha jʉrʉkuadꞌata oncea Jesús zhi ũdubisia ãzhi jewedꞌa nekꞌo kꞌobꞌedꞌe. Mobe ĩjã ẽbaita sota zarea bꞌedꞌeba kẽãkuasia ĩjãna ẽãba zhi ũdudꞌapeadꞌaba jarabʉdata beudꞌata piradrʉdꞌata. 15Mobe mawũãsia: Ẽjũã jõmaʉ̃ maẽ wãũdua, aramaʉ̃ne bedꞌea biata mʉnebemata jõmaʉ̃ã jaraudua. 16Mʉnebemata ĩjãpe buru kꞌoebʉrʉra ẽdrʉya, mawũãmina zhi ĩjã ẽãrã aduaya. 17Mʉnebemata ĩjã bꞌebara ũdudꞌakꞌata bio odꞌaya: Mʉ trʉ̃neba jaita ãĩ jʉrekuadꞌaya, bedꞌeadꞌaya bedꞌeata zhiwidꞌita. 18Kꞌawua ẽãne dãmata tãbʉdasidꞌa, neãrãta dobibʉdasidꞌa maʉ̃bara nene ẽbaya. Kꞌayarã ʉ̃rʉ̃ juwuata bꞌʉbʉdadꞌera bꞌekuaya.
Jesús wãna ʉ̃taa
(Lucas 24:50-53)
19Nokꞌo Jesús ma bedꞌeabʉrʉdꞌera Daizezebara ʉ̃taa edesia, aramaʉ̃ne Nokꞌota bꞌaita jewedꞌasia Daizeze juwua araare. 20Izha jʉrʉkuadꞌara wãnape izhidꞌebemata jarasidꞌa baridu maẽ. Nokꞌo Jesúsbara ãzhira kꞌareba nʉmʉneba bedꞌeara wãrãta jara panʉta kꞌawuabiga nʉmasia ũdudꞌakꞌata obiga nʉmʉneba. Amén.
Currently Selected:
Marcos 16: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
