Marcos 8
8
Nekꞌobigadꞌa cuatro mil
(Mateo 15:32-39)
1Maʉ̃ ewadera kꞌabanata kꞌãbãẽã nʉmʉta kꞌãrẽ kꞌodꞌai ne ẽãne Jesúsbara izha jʉrʉkuadꞌata trʉ̃pe mawũãsia: 2Mʉãrã zhãrã sozuburia kꞌobꞌʉa, mʉ bawara bꞌeta ewari ũbea babʉrʉta kꞌãrẽ kꞌodꞌaira ne ẽã. 3Nekꞌobiga ẽã dedꞌaa zokꞌakuara odꞌe nomadrʉdꞌaya, ãzhirãnebema ʉ̃kʉrʉ zesidꞌa wawarauba.
4Mawũãĩ izha jʉrʉkuadꞌabara panaʉ̃ mawũãsidꞌa: ¿Naʉ̃rãta nekꞌobigaira zhiko sãma ũduipe nama miõ ne ẽã maẽrã?
5Mawũãnaĩ Jesúsbara widꞌi mawũãsia: ¿Marãbara pan sõmbe erubꞌe?
Mawũãĩ ãzhara jarasidꞌa: Siete.
6Mobebʉrʉ kꞌabanata kꞌobꞌea jarasia jewedꞌa duanemarẽã egorodꞌe, mobe pan sieteta jiraedape Daizezea zhibia jipe bꞌʉekuape izha jʉrʉkuadꞌaa diasia jedꞌekadꞌamarẽã kꞌabanata kꞌobꞌea. 7Dewara bꞌeda zakerãta ʉ̃kʉrʉ erubꞌebari Daizezea zhibia jipe jarasia maʉ̃sidꞌa jedꞌekadꞌamarẽã. 8Jãwũã nekꞌosidꞌa, adꞌubadꞌapeadꞌa zhi bꞌʉgʉzoamata jʉrepesidꞌa jamara siete. 9Zhi nekꞌodꞌapeadꞌara nʉmasita bꞌʉa cuatro mil. Mobebʉrʉ Jesúsbara wãbigasia. 10Mobe izha jʉrʉkuadꞌa bawara jãbadꞌe bꞌaripe wãsia Dalmanuta druaedꞌa.
Jarasidꞌa ũdubimarẽã ũdudꞌakꞌata
(Mateo 16:1-4; Lucas 12:54-56)
11Fariseorãta zekuape Jesús bawara bedꞌeabʉdata jarasidꞌa Daizezedꞌeba nʉmʉbʉrʉ ũdubimarẽã ũdudꞌakꞌata, mawũãsidꞌa wãẽãbidꞌaita. 12Mawũẽ ĩñabape Jesúsbara mawũãsia: ¿Kꞌãrẽã ũdudꞌakꞌata ũdubimarẽã jara duanu marã bꞌebara? Mʉã wãrĩnu marãã jaraya, mʉãrã ũdudꞌakꞌara ũdubiga ẽã marã bꞌeara. 13Mawũãpe ãmaẽkuabʉrʉta wakusa jãbadꞌe bꞌaripe wãsia kĩrãrã.
Ne oreguea fariseorãne
(Mateo 16:5-12)
14Jesúsba jʉrʉkuadꞌabara kĩrãduasidꞌa pan ededꞌaira, pan abꞌabʉrʉ erupanasia jãbadꞌera. 15Maʉ̃ne Jesúsbara mawũãsia: Kĩrãkuita bꞌeaudua ne oregueata fariseorãne kꞌarea, ne oregueata rey Herode bꞌʉdꞌe kꞌarea.
16Mawũãĩ ãzhirãĩnu bedꞌeabʉdata mawũãsidꞌa: Maʉ̃ta jarabʉrʉa pan wedꞌa ẽbasi baera.
17Jesúsbara maʉ̃ta kꞌawuape mawũãsia: ¿Kꞌãrẽã jara kꞌobꞌe pan ne ẽãta? ¿Sãwũãta kꞌawuadꞌa ẽka? ¿Sãwũãta kꞌawuaira zareka marã sora? 18¿Dabʉ erubꞌeta ũdudꞌa ẽka, ne ũrĩ bꞌeta ũrĩna ẽka? ¿Bude badꞌa ẽka? 19Pan juesomata cinco mil audre nʉmʉã mʉã jedꞌekasidꞌera, ¿zhi bꞌʉgʉzoamata jamara sõmbe bira jʉrepesidꞌa?
Mawũãĩ ãzhara jarasidꞌa: Doce. 20Pan sieteta cuatro mil nʉmʉã mʉã jedꞌekasidꞌera, ¿zhi bꞌʉgʉzoamata jamara sõmbe bira jʉrepesidꞌa?
Mawũãĩ ãzhara jarasidꞌa: Siete.
21Mawũãnaĩ mawũãsia: ¿Mobe kꞌãrẽneba wadꞌi sãwũãta kꞌawuadꞌa ẽpe?
Daʉbꞌerrea bꞌʉta ne ũdubidꞌa
22Betsaida pʉwʉrʉedꞌa zebʉrʉdꞌera daʉbꞌerrea bꞌʉta izhima wedꞌape zuburia bedꞌeasidꞌa tõbꞌarimarẽã. 23Mawũãnaĩ Jesúsbara daʉbꞌerrea bꞌʉra juwuadꞌe jidape pʉwʉrʉdꞌebara ãĩ edesia. Mobe dabʉza idꞌope juwua ʉ̃rʉ̃ bꞌʉpe widꞌisia ne ũdu kꞌobꞌʉ kꞌawuaita. 24Mawũãĩ izhara akʉ mawũãsia: Mʉãrã zhãrãta ũdukua kꞌobꞌʉa bakuru kĩrãkꞌa, mawũãmina ũdu kꞌobꞌʉa wã chubꞌeta.
25Mawũãĩ wakusa juwuata dabʉza ʉ̃rʉ̃ bꞌʉbʉrʉba ne ũdubisia. Aramaʉ̃ne ne ũdu bꞌesia, mawũẽ wawarauba bi-ia ũdusia ne jõma. 26Mobebʉrʉ dedꞌaa zokꞌabʉrʉta mawũãsia: Pʉwʉrʉdꞌera edꞌa wãrãrũã, miõã jararãrũã pʉwʉrʉdꞌera.
Jesús zhãrã Ẽdrʉbita jaradꞌa Pedroba
(Mateo 16:13-20; Lucas 9:18-21)
27Jesús izha jʉrʉkuadꞌa bawara wãsidꞌa pʉwʉrʉ zake tabꞌeza Cesarea Filipo druadꞌe. Maʉ̃ne odꞌera izha jʉrʉkuadꞌaa widꞌi mawũãsia: ¿Zhãrãbara mʉrã kꞌaita jara panʉ?
28Mawũãĩ ãzhara panaʉ̃ mawũãsidꞌa: Ʉ̃kʉrʉbara jarabada bʉra Juan Burukꞌoemiãta, ʉ̃kʉrʉbara jarabada bʉra Elíata, ʉ̃kʉrʉbara jarabada bʉra Daizezeba bedꞌeata jarabibari bꞌeadꞌata iabꞌaʉta. 29Mawũãnaĩ izhara mawũãsia: ¿Kꞌõbe marãma mʉrã kꞌaipe?
Mawũãĩ Pedroba panaʉ̃ mawũãsia: Bʉra zhãrã Ẽdrʉbia.
30Mawũãĩ izhara jarasia maʉ̃ta izhidꞌebemata jaradꞌa ẽbamarẽã miõã.
Jesúsba jaradꞌa izhi beadꞌaita
(Mateo 16:21-28; Lucas 9:22-27)
31Jesúsbara jarakꞌasia izhi Beubari Bape bꞌʉra biodꞌe zuburiai barata, seribidꞌa ẽbaita nokꞌorãba, sacerdoterã nokꞌorãba, ũrãgꞌa Moisédꞌe jarabadaba. Jarasia aramaʉ̃ne beadꞌaita, maʉ̃ta piradrʉita ewari ũbeadꞌe. 32Maʉ̃ta jarabʉrʉra jipa jarasia. Mawũẽ Pedroba jãpe edepe kẽãsia. 33Mawũãmina izhira pʉrʉwape izha jʉrʉkuadꞌata akʉkua Pedrota kẽãbʉrʉ kĩrãkꞌa mawũãsia: ¡Ãĩ wãrũã mʉ kĩrãbitaubara ãtõmiã! Bʉra krĩcha ẽã Daizeze kĩrãkꞌara, awuarabʉrʉ krĩcha bꞌʉa beubari bꞌe kĩrãkꞌa.
34Mawũãpe zhãrãta izha jʉrʉkuadꞌa bawara trʉ̃pe mawũãsia: Iabꞌaʉba mʉta pẽwã krĩña bꞌʉbʉrʉ bʉzha krĩñata aribꞌaerãrũã, awuarabʉrʉ bebudꞌe basiidꞌu mʉrã pẽwãdua. 35Mʉ kꞌarea beu krĩña ẽãrã aduaya, mawũãmina mʉ kꞌarea bedꞌea biata mʉrẽ kꞌarea beubʉrʉra ẽdrʉya. 36¿Zhãrãĩtara kꞌãrẽ biata bꞌaipe ẽjũãne nʉmʉta jõma izhidꞌeta nʉmʉbʉrʉdꞌe izhi jawureta aduara? 37¿O zhãrãbara kꞌãrẽta dia bꞌeipe izhi jawureta ẽdrʉbiira?
38Iabꞌa mʉ kꞌarea mʉ bedꞌea kꞌarea pera bꞌʉta kꞌazhirua omiãrãta wawiaba mawũã bꞌaibʉrʉ, mʉ Beubari Bape bꞌadꞌabara maʉ̃ mʉrẽ ẽã aya mʉ zebʉrʉdꞌera mʉ Zeze zareaedꞌa izhi ángelerã bawara.
Currently Selected:
Marcos 8: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
Marcos 8
8
Nekꞌobigadꞌa cuatro mil
(Mateo 15:32-39)
1Maʉ̃ ewadera kꞌabanata kꞌãbãẽã nʉmʉta kꞌãrẽ kꞌodꞌai ne ẽãne Jesúsbara izha jʉrʉkuadꞌata trʉ̃pe mawũãsia: 2Mʉãrã zhãrã sozuburia kꞌobꞌʉa, mʉ bawara bꞌeta ewari ũbea babʉrʉta kꞌãrẽ kꞌodꞌaira ne ẽã. 3Nekꞌobiga ẽã dedꞌaa zokꞌakuara odꞌe nomadrʉdꞌaya, ãzhirãnebema ʉ̃kʉrʉ zesidꞌa wawarauba.
4Mawũãĩ izha jʉrʉkuadꞌabara panaʉ̃ mawũãsidꞌa: ¿Naʉ̃rãta nekꞌobigaira zhiko sãma ũduipe nama miõ ne ẽã maẽrã?
5Mawũãnaĩ Jesúsbara widꞌi mawũãsia: ¿Marãbara pan sõmbe erubꞌe?
Mawũãĩ ãzhara jarasidꞌa: Siete.
6Mobebʉrʉ kꞌabanata kꞌobꞌea jarasia jewedꞌa duanemarẽã egorodꞌe, mobe pan sieteta jiraedape Daizezea zhibia jipe bꞌʉekuape izha jʉrʉkuadꞌaa diasia jedꞌekadꞌamarẽã kꞌabanata kꞌobꞌea. 7Dewara bꞌeda zakerãta ʉ̃kʉrʉ erubꞌebari Daizezea zhibia jipe jarasia maʉ̃sidꞌa jedꞌekadꞌamarẽã. 8Jãwũã nekꞌosidꞌa, adꞌubadꞌapeadꞌa zhi bꞌʉgʉzoamata jʉrepesidꞌa jamara siete. 9Zhi nekꞌodꞌapeadꞌara nʉmasita bꞌʉa cuatro mil. Mobebʉrʉ Jesúsbara wãbigasia. 10Mobe izha jʉrʉkuadꞌa bawara jãbadꞌe bꞌaripe wãsia Dalmanuta druaedꞌa.
Jarasidꞌa ũdubimarẽã ũdudꞌakꞌata
(Mateo 16:1-4; Lucas 12:54-56)
11Fariseorãta zekuape Jesús bawara bedꞌeabʉdata jarasidꞌa Daizezedꞌeba nʉmʉbʉrʉ ũdubimarẽã ũdudꞌakꞌata, mawũãsidꞌa wãẽãbidꞌaita. 12Mawũẽ ĩñabape Jesúsbara mawũãsia: ¿Kꞌãrẽã ũdudꞌakꞌata ũdubimarẽã jara duanu marã bꞌebara? Mʉã wãrĩnu marãã jaraya, mʉãrã ũdudꞌakꞌara ũdubiga ẽã marã bꞌeara. 13Mawũãpe ãmaẽkuabʉrʉta wakusa jãbadꞌe bꞌaripe wãsia kĩrãrã.
Ne oreguea fariseorãne
(Mateo 16:5-12)
14Jesúsba jʉrʉkuadꞌabara kĩrãduasidꞌa pan ededꞌaira, pan abꞌabʉrʉ erupanasia jãbadꞌera. 15Maʉ̃ne Jesúsbara mawũãsia: Kĩrãkuita bꞌeaudua ne oregueata fariseorãne kꞌarea, ne oregueata rey Herode bꞌʉdꞌe kꞌarea.
16Mawũãĩ ãzhirãĩnu bedꞌeabʉdata mawũãsidꞌa: Maʉ̃ta jarabʉrʉa pan wedꞌa ẽbasi baera.
17Jesúsbara maʉ̃ta kꞌawuape mawũãsia: ¿Kꞌãrẽã jara kꞌobꞌe pan ne ẽãta? ¿Sãwũãta kꞌawuadꞌa ẽka? ¿Sãwũãta kꞌawuaira zareka marã sora? 18¿Dabʉ erubꞌeta ũdudꞌa ẽka, ne ũrĩ bꞌeta ũrĩna ẽka? ¿Bude badꞌa ẽka? 19Pan juesomata cinco mil audre nʉmʉã mʉã jedꞌekasidꞌera, ¿zhi bꞌʉgʉzoamata jamara sõmbe bira jʉrepesidꞌa?
Mawũãĩ ãzhara jarasidꞌa: Doce. 20Pan sieteta cuatro mil nʉmʉã mʉã jedꞌekasidꞌera, ¿zhi bꞌʉgʉzoamata jamara sõmbe bira jʉrepesidꞌa?
Mawũãĩ ãzhara jarasidꞌa: Siete.
21Mawũãnaĩ mawũãsia: ¿Mobe kꞌãrẽneba wadꞌi sãwũãta kꞌawuadꞌa ẽpe?
Daʉbꞌerrea bꞌʉta ne ũdubidꞌa
22Betsaida pʉwʉrʉedꞌa zebʉrʉdꞌera daʉbꞌerrea bꞌʉta izhima wedꞌape zuburia bedꞌeasidꞌa tõbꞌarimarẽã. 23Mawũãnaĩ Jesúsbara daʉbꞌerrea bꞌʉra juwuadꞌe jidape pʉwʉrʉdꞌebara ãĩ edesia. Mobe dabʉza idꞌope juwua ʉ̃rʉ̃ bꞌʉpe widꞌisia ne ũdu kꞌobꞌʉ kꞌawuaita. 24Mawũãĩ izhara akʉ mawũãsia: Mʉãrã zhãrãta ũdukua kꞌobꞌʉa bakuru kĩrãkꞌa, mawũãmina ũdu kꞌobꞌʉa wã chubꞌeta.
25Mawũãĩ wakusa juwuata dabʉza ʉ̃rʉ̃ bꞌʉbʉrʉba ne ũdubisia. Aramaʉ̃ne ne ũdu bꞌesia, mawũẽ wawarauba bi-ia ũdusia ne jõma. 26Mobebʉrʉ dedꞌaa zokꞌabʉrʉta mawũãsia: Pʉwʉrʉdꞌera edꞌa wãrãrũã, miõã jararãrũã pʉwʉrʉdꞌera.
Jesús zhãrã Ẽdrʉbita jaradꞌa Pedroba
(Mateo 16:13-20; Lucas 9:18-21)
27Jesús izha jʉrʉkuadꞌa bawara wãsidꞌa pʉwʉrʉ zake tabꞌeza Cesarea Filipo druadꞌe. Maʉ̃ne odꞌera izha jʉrʉkuadꞌaa widꞌi mawũãsia: ¿Zhãrãbara mʉrã kꞌaita jara panʉ?
28Mawũãĩ ãzhara panaʉ̃ mawũãsidꞌa: Ʉ̃kʉrʉbara jarabada bʉra Juan Burukꞌoemiãta, ʉ̃kʉrʉbara jarabada bʉra Elíata, ʉ̃kʉrʉbara jarabada bʉra Daizezeba bedꞌeata jarabibari bꞌeadꞌata iabꞌaʉta. 29Mawũãnaĩ izhara mawũãsia: ¿Kꞌõbe marãma mʉrã kꞌaipe?
Mawũãĩ Pedroba panaʉ̃ mawũãsia: Bʉra zhãrã Ẽdrʉbia.
30Mawũãĩ izhara jarasia maʉ̃ta izhidꞌebemata jaradꞌa ẽbamarẽã miõã.
Jesúsba jaradꞌa izhi beadꞌaita
(Mateo 16:21-28; Lucas 9:22-27)
31Jesúsbara jarakꞌasia izhi Beubari Bape bꞌʉra biodꞌe zuburiai barata, seribidꞌa ẽbaita nokꞌorãba, sacerdoterã nokꞌorãba, ũrãgꞌa Moisédꞌe jarabadaba. Jarasia aramaʉ̃ne beadꞌaita, maʉ̃ta piradrʉita ewari ũbeadꞌe. 32Maʉ̃ta jarabʉrʉra jipa jarasia. Mawũẽ Pedroba jãpe edepe kẽãsia. 33Mawũãmina izhira pʉrʉwape izha jʉrʉkuadꞌata akʉkua Pedrota kẽãbʉrʉ kĩrãkꞌa mawũãsia: ¡Ãĩ wãrũã mʉ kĩrãbitaubara ãtõmiã! Bʉra krĩcha ẽã Daizeze kĩrãkꞌara, awuarabʉrʉ krĩcha bꞌʉa beubari bꞌe kĩrãkꞌa.
34Mawũãpe zhãrãta izha jʉrʉkuadꞌa bawara trʉ̃pe mawũãsia: Iabꞌaʉba mʉta pẽwã krĩña bꞌʉbʉrʉ bʉzha krĩñata aribꞌaerãrũã, awuarabʉrʉ bebudꞌe basiidꞌu mʉrã pẽwãdua. 35Mʉ kꞌarea beu krĩña ẽãrã aduaya, mawũãmina mʉ kꞌarea bedꞌea biata mʉrẽ kꞌarea beubʉrʉra ẽdrʉya. 36¿Zhãrãĩtara kꞌãrẽ biata bꞌaipe ẽjũãne nʉmʉta jõma izhidꞌeta nʉmʉbʉrʉdꞌe izhi jawureta aduara? 37¿O zhãrãbara kꞌãrẽta dia bꞌeipe izhi jawureta ẽdrʉbiira?
38Iabꞌa mʉ kꞌarea mʉ bedꞌea kꞌarea pera bꞌʉta kꞌazhirua omiãrãta wawiaba mawũã bꞌaibʉrʉ, mʉ Beubari Bape bꞌadꞌabara maʉ̃ mʉrẽ ẽã aya mʉ zebʉrʉdꞌera mʉ Zeze zareaedꞌa izhi ángelerã bawara.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.