isizwur 16
16
saray d‑hagar
1saray tamġart n‑abram ur‑jji‑as‑turu kra n‑warraw. tlla dars yat‑tsmgt ullt‑miṣr, ism‑ns hagar. 2tsawl saray s‑abram tini‑as: «sidi rbbi ur‑iyi‑yudji ad‑aruġ. zayd tkšmt f‑tsmgt‑inu a‑ur‑imil ṭṭafġ tarwa zġ‑gis.» isfld abram s‑wawal n‑tmġart‑ns saray. 3ġakud lli‑ġ‑ikka abram mraw isggʷasn ġ‑tmazirt n‑kanɛan a‑ġ‑as‑tfka saray tismgt‑ns hagar ullt‑miṣr ad‑as‑tg tamġart. 4ikšm fllas abram tffuġ ar‑trbbu. lliġ tẓra hagar ih̬f‑ns ar‑trbbu, twrri tḥgr lallas. 5tsawl saray ġakudan s‑abram tini‑as: «ad‑fllak‑yili lbaḍl‑ad dari illan. fkiġ‑ak tismgt‑inu ġ‑gr ifassn‑nk, imma ġilad ġ‑a‑trbbu, ur‑sul‑iyi‑tgi d‑yat. aḥḥ‑inu, a‑iḥkam sidi rbbi ġ‑griyi dik.» 6irar‑as abram: «han tismgt‑nm ġ‑ufus‑nm. skr‑as aynna ifulkin ġ‑iẓri‑nm.» tddu saray ġakudan ar‑ttšqu bahra d‑hagar aylliġ trwl nttat zġ‑dars.
7yaf‑tt‑in lmalak n‑sidi rbbi ġ‑dar yat talɛint ġ‑lh̬la, ġ‑tama n‑uġaras lli‑itawin s‑šur. 8yini‑as: «wa hagar tismgt n‑saray, mani‑di‑tkkit ula mani trit?» tini‑as: «rwlġ‑d zġ‑lalla saray.» 9yini‑as lmalak n‑sidi rbbi: «wrri s‑dar lallam, tknut ġ‑ddu‑ufus‑ns.» 10izayd lmalak n‑sidi rbbi ġakudan yini‑as: «rad‑ssigtġ amud‑nm uggʷar n‑ma‑mi‑iẓḍar bnadm a‑t‑iḥasb.» 11yini‑as daġ lmalak n‑sidi rbbi: «ha kmmi ar‑trbbut, ra‑tarut yan‑warraw, tgt‑as ism ismaɛil [tga lmɛna‑ns ‹rbbi isfld›], ašku isfld rbbi sidim i‑usmammi‑nm. 12ra‑ig yum wad itazzaln zund aġyul n‑lh̬la. ra‑ikkat kud yan d‑ra‑t‑ikkat kud yan. ra‑ingara d‑kullu aytmas yaggug fllasn.» 13tg ism ġakudan i‑sidi rbbi lli‑srs‑isawln, tini‑as ‹rbbi lli‑yyi‑iẓran›, ašku tnna d‑ih̬f‑ns: «hati ẓriġ ġid walli‑yyi‑igabln.» 14ar‑sul‑ttinin mddn i‑wanu‑an ‹bir‑laḥay‑ruwi› [tga lmɛna‑ns ‹anu n‑walli iddrn iẓr‑iyi›]. illa ġ‑gr qadaš d‑barad.
15taru hagar arraw i‑abram, ig‑as ism ismaɛil. 16abram illa dars tam id‑mraw d‑sḍis (86) n‑usggʷas lliġ‑as‑turu hagar ismaɛil.
Currently Selected:
isizwur 16: SHILOT20
Highlight
Share
Copy
Want to have your highlights saved across all your devices? Sign up or sign in
Selected Old Testament in Tashelhayt (Latin script) © United Bible Societies, 2020.
Robert Bernard Dann.
