isizwur 25

lmut n‑ibrahim ula timḍlt‑ns

1izayd ibrahim itahl yat‑tɛyyalt ism‑ns qaṭurah, 2taru‑as zimran d‑yaqšan d‑madan d‑midyan d‑išbaq d‑šuḥ. 3tarwa n‑yaqšan gan šaba d‑dadan. tarwa n‑dadan gan ayt‑aššur d‑ayt‑laṭuš d‑ayt‑lawmm. 4tarwa n‑midyan gan ɛayfa d‑ɛifr d‑ḥanuk d‑abidaɛ d‑aldaɛa. ġwid kullu gan tarwa n‑tarwa n‑qaṭurah. 5ifl ibrahim kullu ma‑iṭṭaf i‑isḥaq, 6imma tarwa n‑tsmgin lli‑itahl, ifka‑yasn tiwafkiw lliġ sul iddr, yazn‑tn s‑tsgiw n‑usġlay n‑tafukt issaggug‑tn‑in f‑yus isḥaq.

7ġunškad ad‑gan isggʷasn n‑tudrt n‑ibrahim, ikka miyya d‑ssa n‑id‑mraw d‑smmus (175) n‑usggʷas. 8immt tigira n‑uwssan ggutnin lli‑izzri ġ‑tudrt iġzzifn ifulkin. tfl‑t rruḥ‑ns lliġ imqqur bahra išbɛ ussan, ityattay s‑gr mddn‑ns lli‑zrinin. 9awin‑t tarwa‑ns isḥaq d‑ismaɛil mḍln‑t‑in ġ‑ifri n‑makfila lli‑illan ġ‑igr n‑ɛifrun yus n‑ṣuḥar gu‑ḥit. illa ġ‑tsga n‑mamra lli‑iwalan asġlay n‑tafukt. 10igr‑an, ikka‑ttin isġa‑t ibrahim ġ‑dar ayt‑ḥit, imḍl‑n gis tamġart‑ns sarah, ityawmḍal gis ula ntta. 11lliġ immut ibrahim, ibark rbbi ġ‑yus isḥaq. igawr isḥaq ġ‑tama n‑bir‑laḥay‑ruwi.

talalit n‑ɛisu d‑yaɛqub

19ġmkad a‑tga tasut n‑isḥaq lli‑igan yus n‑ibrahim. ibrahim iga babas n‑isḥaq. 20lliġ ikka isḥaq kkuẓ id‑mraw (40) n‑usggʷas, itahl rifqa illis n‑batwil gu‑aram lli‑izdġn ġ‑uzaġar n‑aram. rifqa tga ulltmas n‑laban gu‑aram. 21ar‑itẓalla isḥaq i‑sidi rbbi, ar‑as‑itḍalab f‑tmġart‑ns, ašku ur‑tẓḍar a‑trbbu. isfld sidi rbbi i‑tẓallit‑ns, tffuġ‑tmġart‑ns rifqa ar‑trbbu. 22walaynni ar‑tmmaġn tarwa i‑ngratsn ġ‑waḥlig‑ns aylliġ a‑ttini: «mah̬ a‑yyi‑ijra ġmka?» tddu ġakudan tsqsa sidi rbbi. 23yini‑as‑d sidi rbbi: «snat‑tasutin a‑illan ġ‑waḥlig‑nm. sin iqbiln a‑ra‑tarut. rad‑bḍun i‑ngratsn. ra‑itjhhd yan f‑wayya. ġwalli imqqurn a‑ra‑ig ah̬ddam i‑walli imẓẓin.»

24lliġ tkmml ussan‑ns, taru ikniwn. 25ġwalli‑d‑izwurn iga azggʷaġ, d‑ilm‑ns iga kullu ššɛr zund ahiḍur, gn‑as ġakudan ism ‹ɛisu›. 26iḍfur‑t‑id gʷmas, iġwi‑d ġ‑uwurz n‑ɛisu s‑ufus‑ns, gn‑as ism ‹yaɛqub› [tga lmɛna‑ns ‹iġwi›]. lliġ‑tn‑turu, illa dar isḥaq sḍis id‑mraw (60) n‑usggʷas.

27zaydn iḥšmiyn ar‑tmqqurn. ig ɛisu angmar iḥaršn, izri ussan‑ns ġ‑tagant. imma yaɛqub iga aɛyyal ihnnan ar‑itqama ġ‑gr ih̬iyyamn. 28isḥaq babatsn, iɛzza dars ɛisu bahra, ašku ar‑ištta zġ‑tfiyi n‑tgʷmrt‑ns. imma rifqa, iɛzza dars yaɛqub. 29yan‑wass ar‑issnwa yaɛqub kra n‑tlh̬ša, ikšm‑d ɛisu zġ‑tagant inġ‑t‑id laẓ bahra. 30yini ɛisu i‑yaɛqub: «ġir fk‑iyi ad‑ššġ zġ‑uzggʷaġ‑an, hati inġa‑yyi laẓ.» mayan a‑f‑as‑gan ism ‹adum› [tga lmɛna‑ns ‹azggʷaġ›]. 31imma yaɛqub irur‑as: «ssnfl‑iyi srs lḥqq n‑tfh̬ddit‑nk.» 32yini‑as ɛisu: «ha‑yyi ar‑tmmtatġ s‑laẓ, ma‑yyi‑akkʷ‑tga‑th̬fddit?» 33yini‑as yaɛqub: «ggall‑iyi zwar fllas.» iggall‑as fllas. ġmkan a‑s‑izznza tifh̬ddit‑ns i‑yaɛqub. 34ifk‑d ilmma yaɛqub i‑ɛisu aġrum d‑tlh̬ša n‑tniltit, išš isu inkr iddu. ɛisu ur‑igi tifh̬ddit‑ns d‑yat.

Currently Selected:

isizwur 25: SHILOT20

Highlight

Copy