isizwur 29

yaɛqub itahl layah d‑raḥil

1izayd ilmma yaɛqub imun d‑uġaras‑ns aylliġ ilkm yat‑tmazirt ġ‑tsga n‑usġlay n‑tafukt. 2ar‑n‑itmnad s‑iẓra yan‑wanu ġ‑lh̬la. gnnt kraṭṭ‑tuwrutin n‑uwlli ġ‑tama‑ns, ašku anu‑an a‑zġ‑a‑ssant. yili f‑imi n‑wanu‑an yan‑ifir bahra imqqurn. 3ġakud nna‑d‑munnt‑kullu‑tuwrutin, ar‑dḥḥin imksawn ifir, ssittin‑t f‑imi n‑wanu ar‑sswan ulli‑nsn. tigira ar‑traran ifir f‑imi n‑wanu. 4yini yaɛqub i‑imksawn: «ayt‑mani a‑tgam ay‑aytma?» inin‑as‑d: «ayt‑ḥaran a‑nga.» 5isqsa‑tn: «is‑tssnm laban yus n‑naḥur?» inin‑as: «nssn‑t.» 6isqsa‑tn: «is‑ihnna?» inin‑as: «ihnna. ha illis raḥil, tmun‑d d‑uwlli‑ns.» 7izayd yaɛqub yini‑asn: «hay‑azal sul iġzzif. ur‑ta‑tlkim tizi a‑tssnsm lksibt. sswayt ulli‑nun ġilad, tawim‑tnt ad‑sul‑kksnt.» 8rarn‑as: «ur‑as‑nufi ard kullu munnt‑tuwrutin, nssitti ilmma ifir f‑imi n‑wanu nssu ulli.»

9sul a‑didsn‑isawal s‑di‑tlkm raḥil, tawi‑d ulli n‑babas, ašku nttat a‑tnt‑ikssan. 10yaɛqub, lliġ‑n‑iẓra raḥil illis n‑h̬alis laban, nttat d‑uwlli n‑laban, iddu issmatti ifir f‑imi n‑wanu, issu ulli n‑h̬alis. 11ġakudan issudn yaɛqub raḥil, yall awal‑ns s‑imṭṭawn n‑lfrḥ 12yini‑as: «giġ zġ‑tagʷmat n‑babam, gġ yus n‑rifqa.» tazzl raḥil ġakudan s‑dar babas tini‑as‑t. 13lliġ isfld laban i‑lah̬bar n‑yaɛqub lli‑igan yus n‑uwlltmas, yazzl a‑n‑dids‑imnaggar. iḥbbl‑t issudn‑t yawi‑t s‑tgmmi. iɛawd‑as yaɛqub f‑kullu ma‑ijran. 14yini‑as laban: «hati ih̬ṣ‑inu d‑idammn‑inu a‑zġ‑tgit.» iqama dars yaɛqub ayyur n‑waḍan.

15yini laban ilmma i‑yaɛqub: «izd ġ‑lliġ tgit zġ‑ayt‑dari, a‑ra‑dari‑tth̬damt bla yat? uhu, ml‑iyi ma‑igan tiġrad‑nk?» 16laban iṭṭaf snat istis. h̬talli imqqurn iga ism‑ns layah, h̬talli imẓẓin iga ism‑ns raḥil. 17layah šḥant‑as‑twallin, imma raḥil nttat tfulki bahra ġ‑tiddi‑ns ula ġ‑uwdm‑ns. 18iḥubbu yaɛqub raḥil, yini i‑laban: «ra‑dark‑h̬dmġ ssa n‑isggʷasn f‑ad‑iyi‑tfkt illik lli‑imẓẓin raḥil.» 19yini‑as laban: «yuf ad‑ak‑tt‑fkġ, ula fkiġ‑tt i‑kra n‑yan yaḍni. qama dari.» 20ġmkan a‑s‑dars‑ih̬dm yaɛqub ssa n‑isggʷasn f‑raḥil. zrin isggʷasn‑an zund kra n‑uwssan drusnin, ašku iḥubba‑tt bahra.

21yini ilmma yaɛqub i‑laban: «fk‑iyi taslit‑inu a‑fllas‑kšmġ, ašku kmmln‑uwssan n‑twuri‑nu.» 22iġr‑d laban i‑ayt‑ġin kullutn, iskr tamġra. 23ġ‑iḍ‑an yawi‑as‑d illis yaḍni layah, ikšm fllas. 24ifk laban tismgt‑ns zilfa i‑layah a‑stti‑ttqasa. 25zikk ṣbaḥ s‑tt‑iẓra tga layah. yini i‑laban: «ma‑iga ġayad‑iyi‑tskrt? is urd raḥil a‑f‑dark‑h̬dmġ? mah̬ aylliġ‑iyi‑tšmtt?» 26irar‑as laban: «ur‑darnġ‑tgi lɛada a‑nfk tad imẓẓin iġ‑ur‑ta‑nfki tifh̬ddit. 27kmml ssa n‑uwssan n‑h̬tad, nfk‑ak ilmma h̬tan yaḍni, th̬dmt daġ dari ssa n‑isggʷasn yaḍni.» 28iqbl yaɛqub, ikmml ssa n‑uwssan‑ns. ifk‑as ilmma laban illis raḥil a‑tg tamġart‑ns. 29ifk laban tismgt‑ns bilha i‑illis raḥil a‑stti‑ttqasa. 30ikšm yaɛqub f‑raḥil ula nttat, tɛzzu dars raḥil uggʷar n‑layah. izayd ih̬dm dar laban ssa n‑isggʷasn yaḍni. 31lliġ iẓra sidi rbbi is‑ur‑tɛzza layah, irẓm aḥlig‑ns, imma raḥil ur‑a‑ttaru.

tarwa n‑yaɛqub

32twrri layah ar‑trbbu, taru yan‑warraw, tg‑as ism ‹rawbin› [tga lmɛna‑ns ‹ẓr iwi›] ašku tnna: «iẓra‑d sidi rbbi tadallit‑nu. ġilad ra‑yyi‑iḥubbu‑urgaz‑inu.» 33ar‑daġ‑trbbu taru arraw yaḍni tini: «isfld sidi rbbi is‑ur‑ɛzzaġ, ifk‑iyi arraw‑ad ula nttan», tg‑as ism ‹šimɛun› [tga lmɛna‑ns ‹isfld›]. 34ar‑daġ‑trbbu taru arraw yaḍni tini: «tawala‑yad ra‑gigi‑yamẓ‑urgaz‑inu, ašku uruġ‑as kraḍ tarwa», tg‑as ism ‹lawi› [tga lmɛna‑ns ‹yumẓ›]. 35ar‑daġ‑trbbu taru arraw yaḍni tini: «tawala‑yad rad‑ttalġġ sidi rbbi», tg‑as ism ‹yahuda› [tga lmɛna‑ns ‹tulġa›]. tk ilmma kra, ur‑sul‑a‑trbbu.

Currently Selected:

isizwur 29: SHILOT20

Highlight

Copy