isizwur 33

imnaggar yaɛqub d‑ɛisu

1yall yaɛqub alln‑ns imnad‑n s‑han ɛisu ifta‑d, munn‑d dids kkuẓ id‑miyya (400) n‑urgaz. ibḍu yaɛqub tarwa i‑innatsn, layah d‑raḥil d‑snat‑tsmgin. 2izzwur snat‑tsmgin d‑tarwa‑nsnt lgddam, isstabɛa‑yasn layah d‑tarwa‑ns, issggru raḥil d‑yusf. 3izayd yaɛqub s‑lgddam izwur‑asn kullu, ar‑iknnu ar akal ssa n‑twal aylliġ‑n‑yakmur s‑gʷmas. 4imma ɛisu yuzzl‑d imnaggar‑t‑id, yamẓ‑t‑id iḥbbl‑t issudn‑t, ar‑allan s‑sin. 5yall ɛisu alln‑ns ar‑itmnad timġarin d‑tarwa, isqsa‑t: «mad‑gan ġwid dik illan?» yini‑as: «tarwa‑inu ayad a‑sidi, ifka‑yyi‑tn‑d rbbi s‑lḥnant‑ns.» 6mattint‑d snat‑tsmgin d‑tarwa‑nsnt knun ar akal. 7tmatti‑d layah ula nttat d‑tarwa‑ns knun ar akal. imatti‑d ilmma yusf d‑raḥil knun ar akal. 8isqsa‑t ɛisu: «ma‑tnuwwat ġ‑ukabar‑an n‑lksibt lli‑mnaggarġ?» yini‑as: «a‑flla‑trḍut a‑sidi.» 9irar‑as ɛisu: «yuwda‑yyi ma‑dari‑illan a‑gʷma. adj ma‑teṭṭaft kiyi i‑ih̬f‑nk.» 10yini‑as yaɛqub: «uhu, iġ‑flla‑trḍit, qbl zġ‑gigi tasmġurt‑ad. ašku s‑ṣṣaḥt lliġ ẓriġ udm‑nk, iga dari zund udm n‑rbbi. hati tskrt gigi afulki tssmrḥbat sri. 11ġir amẓ lbaraka‑yad lli‑ak‑d‑iwiġ, ašku inɛm flla rbbi, yuwda‑yyi mad‑dari‑illan.» izayd iḍalb‑t bahra aylliġ‑tt‑iqbl.

12yini‑as ilmma ɛisu: «rwaḥ a‑nmun d‑uġaras, rad‑ak‑zwurġ nkki.» 13imma yaɛqub inna‑yas: «tssnt a‑sidi is‑sul‑mẓẓin tarwa‑nu, ar‑ssngaynt‑ula‑uwlli d‑tmugayin. iġ‑fllasn‑nssigt tawada n‑yan‑wass, hati ra‑tmmt kullu lksibt. 14ġir zayd zwar a‑sidi. ha nkki ra‑n‑fttuġ ġir s‑imikk s‑unšk nna‑mi‑tẓḍar lksibt ġ‑lgddam‑inu, ula s‑unšk nna‑mi‑ẓḍarn tarwa, ard‑k‑in‑lkmġ a‑sidi s‑iwrar n‑saɛir.» 15yini‑as ɛisu: «hiya ad‑ak‑flġ kra zġ‑irgazn‑ad‑inu.» irar‑as: «ur‑illi f‑mi. ġir a‑flla‑trḍut a‑sidi.» 16iddu ɛisu ġassan, iwrri s‑saɛir. 17imma yaɛqub inkr imuddu s‑ṣukkut. ibnu gis yat‑tgmmi, iskr gis iḥšaš i‑lksibt‑ns. mayan a‑f‑a‑ttinin i‑udġar‑an ‹ṣukkut› [tga lmɛna‑ns ‹iḥšaš›].

18iddu ilmma yaɛqub s‑šakim ġ‑tmazirt n‑kanɛan, ilkm‑tt s‑sslamt. issbidd ih̬iyyamn‑ns ġ‑brra n‑tmdint. ġmkan a‑s‑ikmml amuddu‑ns zġ‑tmazirt n‑aram. 19isġ ilmma agzzum n‑wakal lli‑ġ‑issbidd ih̬iyyamn‑ns, s‑miyya n‑uqarid zġ‑ayt‑ḥamur lli‑igan babas n‑šakim. 20ibnu gis yan‑ukrkur n‑tġrṣi, ig‑as ism ‹il‑iluhi‑israyil› [tga lmɛna‑ns ‹rbbi lli‑igan rbbi n‑israyil›].

Currently Selected:

isizwur 33: SHILOT20

Highlight

Copy