isizwur 41

tiwargiwin n‑firɛawn

1zrin ilmma sin isggʷasn s‑iwarga firɛawn. iẓr ġ‑twargit‑ns is‑ibidd ġ‑tama n‑wasif n‑nnil. 2ha ssa n‑tmugayin ifulkin jjint, ġlint‑d zġ‑nnil ffrdnt ġ‑tzgzut. 3s‑ha ilmma ssa n‑tmugayin yaḍni ihršn sdidnt, ggʷrant‑asnt‑d, ġlint‑d ula ntnti zġ‑nnil, biddnt ġ‑dar ṭiyyaḍ ġ‑tama n‑wasif. 4imil ššnt‑tmugayin lli‑ihršn sdidnt ssa n‑tmugayin lli‑ifulkin jjint. s‑d‑ifaq firɛawn ġakudan zġ‑iyṭs.

5yawi‑t‑in daġ iṭs s‑iwarga tis snat‑twal. iẓr ssa n‑tzlfin iɛmmrn fulkint, ffuġnt‑d ġ‑yan‑uġṣṣum. 6s‑ha ssa n‑tzlfin ih̬wan qqurnt s‑uẓawaḍ, mġint‑d tigira n‑ṭiyyaḍ. 7imil ṣrṭnt‑tzlfin lli‑ih̬wan ssa n‑tzlfin lli‑išwan ɛmmrnt. s‑d‑ifaq firɛawn ġakudan, yissan izd tawargit ayan. 8hati zikk ṣbaḥ‑an tġufa rruḥ‑ns bahra, yazn ma‑d‑yaqran i‑kullu isḥḥarn n‑miṣr ula kullu ayt‑tḥkimt s‑dars. isawl‑asn firɛawn f‑twargiwin‑ns, walaynni ur‑iẓḍar yan ad‑as‑iml lmɛna‑nsnt.

9ġakudan a‑d‑isawl‑umġar bu‑tissi i‑firɛawn yini‑as: «ġassad swangmġ‑d ddnub‑inu. 10ġakud lli‑ġ‑tqlaqlt a‑firɛawn f‑imqasan‑nk, tgt‑aġ‑n nkki d‑umġar bw‑uġrum ġ‑lḥbs ġ‑tgmmi n‑unmġur n‑waḍafn, 11hati yan‑iyḍ nwarga s‑sin, kud yan d‑lmɛna n‑twargit‑ns. 12yili didnġ yan‑uɛyyal gu‑ɛibr, ig ismg ġ‑dar‑unmġur n‑waḍafn. nini‑as f‑twargiwin‑nġ, iml‑aġ lmɛna‑nsnt. kud yan ginġ, iml‑as lmɛna n‑twargit‑ns. 13imikk s‑aġ‑ijra ġmklli‑aġ‑inna. nkki wrriġ s‑udġar‑inu, bw‑uġrum ityagal.»

14yazn firɛawn ma‑d‑yaqran i‑yusf s‑dars, ḥarrun a‑t‑id‑awin zġ‑lḥbs. lliġ ikks azzar issnfl timlsa‑ns, ikšm s‑dar firɛawn. 15yini‑as firɛawn: «wargaġ nkki yat‑twargit, walaynni ur‑illi mad‑iyi‑imalan lmɛna‑ns. sfldġ kiyi is‑tẓḍart a‑tmalat lmɛna n‑twargit‑nna mi‑tsfldt.» 16yini‑as yusf: «ur‑as‑ẓḍarġ nkki, walaynni rbbi a‑ra‑d‑issml i‑firɛawn awal ifulkin.»

17izayd firɛawn yini‑as: «ẓriġ ġ‑twargit is‑biddġ ġ‑tama n‑wasif n‑nnil. 18ġlint‑d ssa n‑tmugayin ijjin fulkint zġ‑nnil, ffrdnt ġ‑tzgzut. 19ġlint‑d tigira‑nsnt ssa n‑tmugayin yaḍni ihršn sdidnt ḍɛfnt bahra. ur‑jji‑ẓriġ wan timugayin‑an ġ‑wakal n‑miṣr. 20imikk ha timugayin lli‑isdidn hršnt ššant ssa n‑tmugayin ijjin lli‑tnt‑d‑izwurn. 21walaynni lliġ‑tnt‑ššant, ur‑iẓḍar yan a‑ifhm is‑tnt‑ššant, ašku qamant hršnt ġmklli gant ġ‑isizwur. s‑di‑ttfaqġ ġakudan. 22wargaġ daġ s‑ẓriġ ssa n‑tzlfin iɛmmrn fulkint, ffuġnt‑d ġ‑yan‑uġṣṣum. 23ẓrġ daġ ssa n‑tzlfin yaḍni ih̬wan qqurnt, krmnt bahra s‑uẓawaḍ, mġint‑d tigira n‑ṭiyyaḍ. 24imil ṣrṭnt‑tzlfin lli‑ih̬wan ssa n‑tzlfin lli‑ifulkin. hati nniġ i‑isḥḥarn tiwargiwin‑ad, walaynni ur‑iẓḍar yan ad‑iyi‑iml lmɛna‑nsnt.»

25isawl‑d yusf yini i‑firɛawn: «tiwargiwin n‑firɛawn yan ad‑gant. issbayyn‑d rbbi i‑firɛawn maylli ra‑iskr nttan. 26ssa n‑tmugayin ifulkin gant ssa n‑isggʷasn, ssa n‑tzlfin ifulkin gant ssa n‑isggʷasn. lmɛna‑nsnt yat a‑tga. 27ssa n‑tmugayin isdidn hršnt lli‑asnt‑d‑iggʷran gant ssa n‑isggʷasn, ġmkan ula tizlfin lli‑ih̬wan qqurnt s‑uẓawaḍ, gant ssa n‑isggʷasn n‑laẓ. 28ġmklli‑s‑nniġ i‑firɛawn, issbayyn‑d rbbi i‑firɛawn maylli ra‑iskr. 29ssa n‑isggʷasn‑ad‑d‑iftan rad‑fkn ṣṣabt bahra iggutn ġ‑wakal n‑miṣr kullut. 30walaynni rad‑asn‑d‑ggrun ssa n‑isggʷasn n‑laẓ, ard ttun mddn ṣṣabt lli‑sttin‑ikkan ġ‑wakal n‑miṣr, ašku aġʷni ra‑išš kullu ma‑illan ġ‑wakal. 31ur‑sul‑ra‑iqama yat ġ‑ṣṣabt lli‑sttin‑ikkan ġ‑wakal, ašku rad‑bahra‑yʷh̬šn‑uġʷni lli‑rad‑as‑d‑iggru. 32lliġ iwarga firɛawn tawargit‑an f‑snat‑twal, ibayyn is‑t‑id‑yura rbbi. hati ra‑t‑iskr rbbi ġ‑mayd yakmurn.

33«a‑isiggl firɛawn ġilad kra n‑urgaz dar tafhimt d‑tḥkimt, ig‑t f‑tmazirt n‑miṣr. 34izayd firɛawn iskr ingabaln f‑ikalln n‑miṣr ssa n‑isggʷasn‑ad n‑ṣṣabt iggutn, f‑ad‑ẓlayn yat ġ‑kraygatt smmust‑twal n‑ṣṣabt n‑wakal, 35ar‑d‑ssmunun mad‑šttan ġ‑isggʷasn‑ad n‑lh̬ir, ḥḍun imndi ġ‑kraygatt tamdint nna‑illan ġ‑ddu‑ufus n‑firɛawn. 36ra‑ig imndi‑an lh̬zin ma‑ġ‑a‑šttan mddn ġ‑ssa n‑isggʷasn n‑laẓ lli‑ra‑d‑iggru ġ‑wakal n‑miṣr, f‑ad‑ur‑tmmt‑tmazirt s‑laẓ.»

iwrri yusf iga lḥakm f‑miṣr

37irḍu firɛawn s‑wawal‑an ntta d‑imɛawann‑ns kullutn. 38yini ilmma firɛawn i‑imɛawann‑ns: «is‑ra‑naf kra n‑urgaz zund ġwad ġ‑illa rruḥ n‑rbbi?» 39yini firɛawn ġakudan i‑yusf: «lliġd kiyi a‑mi‑d‑issmla rbbi kullu mayad, ibayyn is‑ur‑illi yan dar taḥkimt ula tafhimt zund kiyi. 40ra‑tḥkamt f‑tgmmi‑nu, ar‑kullu‑skarn mddn‑inu s‑tnbaḍin‑nk. ra‑yili kulši ġ‑ddu‑ufus‑nk abla lɛrš‑inu nkki.» 41yini daġ firɛawn i‑yusf: «ha‑yyi ġilad giġ‑k d‑lḥakm f‑tmazirt n‑miṣr.» 42ikks‑d firɛawn tah̬urṣt n‑tmatart‑ns zġ‑ufus‑ns ig‑tt‑in ġ‑ufus n‑yusf, ils‑as timlsa n‑lkttan išwan, yagʷl‑as yat‑tzra n‑uwrġ ġ‑umggrḍ‑ns. 43ifk‑as a‑issidaw tis snat lkrarṣ n‑tgldit‑ns, ar‑as‑zggurun ibrraḥn ar‑ttinin: ‹balakat›. ġmkan a‑s‑t‑iga d‑lḥakm f‑tmazirt n‑miṣr. 44yini ilmma firɛawn i‑yusf: «nkki giġ firɛawn. nniġ‑ak ur‑ra‑yall yan afus‑ns ula aḍar‑ns ġ‑tmazirt n‑miṣr bla s‑wawal‑nk.»

45ig firɛawn i‑yusf ism ‹ṣafnat faɛniyaḥ› [tga lmɛna‑ns ‹isawl‑d rbbi s‑iddr›]. ifk‑as asnat illis n‑fuṭifaraɛ a‑tg tamġart‑ns. iga fuṭifaraɛ akahan n‑rbbi‑nsn ġ‑tmdint lli‑mi‑ttinin ‹un›. ġmkan a‑s‑iwrri yili yusf f‑kullu tamazirt n‑miṣr. 46kraḍ id‑mraw (30) n‑usggʷas ad‑dars‑illan ġakud lliġ igra a‑itqasa firɛawn agllid n‑miṣr, iffuġ ġakudan zġ‑dar firɛawn iddu ar‑itkka tamazirt n‑miṣr kullutt.

47ssa n‑isggʷasn n‑lh̬ir ar‑iskar‑wakal ṣṣabt iggutn. 48ar‑issmunu yusf imndi iggutn ġ‑tmazirt n‑miṣr ssa n‑isggʷasn‑an, iḥḍu‑t ġ‑tmdinin. kraygatt tamdint, iḥḍa gis maylli‑d‑yusi zġ‑igran lli‑as‑sutlnin. 49ar‑issmunu yusf tugtt n‑imndi zund amlal n‑tama n‑umda, aylliġ ur‑sul‑a‑itḥasab ašku mayan issurf lḥsab.

50ur‑ta‑lkimn isggʷasn n‑laẓ, laln ġ‑dar yusf sin tarwa, turu‑as‑tn asnat illis n‑fuṭifaraɛ lli‑igan akahan ġ‑tmdint lli‑mi‑ttinin ‹un›. 51ig yusf i‑ifh̬ddi‑ns ism ‹manaššah› [tga lmɛna‑ns ‹ssttu›], ašku inna «issttu‑yyi rbbi timmariw‑inu ula kullu tawjja n‑baba.» 52ig i‑wis sin ism ‹afraym› [tga lmɛna‑ns ‹ṣṣabt›], ašku inna «ifka‑yyi rbbi ṣṣabt ġ‑tmazirt lli‑ġ‑dulliġ.»

53lliġ zrin ssa n‑isggʷasn n‑ṣṣabt lli‑iggutn ġ‑wakal n‑miṣr, 54kšmn‑d ssa n‑isggʷasn n‑laẓ ġmklli‑s‑inna yusf. yili‑uġʷni ġ‑kullu timizar, walaynni ġ‑wakal n‑miṣr sul‑gis‑illa‑uġrum. 55lliġ illa laẓ ġ‑wakal n‑miṣr kullut, ar‑n‑ssġuyyun mddn s‑firɛawn ar‑dars‑siggiln mad‑šttan. isawl firɛawn ġakudan s‑kullu ayt‑miṣr yini‑asn: «zaydat s‑dar yusf. aynna‑s‑awn‑inna, tskrm‑t.» 56lliġ illa laẓ ġ‑kraygatt mani, irẓm yusf iḥuna kullutn ar‑izznza imndi i‑ayt‑miṣr, ašku išqa‑uġʷni lli‑illan ġ‑wakal n‑miṣr. 57ar‑di‑ttaškin ilmma ayt‑tmizar yaḍni s‑miṣr, irin a‑n‑kullu‑saġn imndi zġ‑dar yusf, ašku illa‑uġʷni išqan ġ‑ddunit kullutt.

Currently Selected:

isizwur 41: SHILOT20

Highlight

Copy