isizwur 48

yaɛqub ibark tarwa n‑yusf

1izri ma‑izrin s‑isfld yusf i‑wawal: «han babak ihrš.» inkr yawi dids sin tarwa‑ns manaššah d‑afraym. 2lliġ isfld yaɛqub izd yus yusf ayd dars yuškan, ig‑n tiqqi‑ns a‑iskiws f‑tisi‑ns. 3isawl‑d yaɛqub lli‑igan israyil s‑yusf yini‑as: «rbbi da‑iẓḍarn i‑kulši, iban‑iyi‑d ġ‑tmdint n‑luz ġ‑tmazirt n‑kanɛan, ibark‑iyi 4yini‑yyi: ‹ha‑yyi rad‑ak‑ssigtġ tasut‑nk, fkġ‑ak tarwa ggutnin, ard twrrit tgt aqbil n‑tqbilin ggutnin. rad‑fkġ akal‑ad i‑wamud‑nk tigira‑nk, a‑ti‑ṭṭafn kullu mayd iftan.› 5imma ġilad sin tarwa‑nk lli‑dark‑iluln ġ‑tmazirt n‑miṣr, ġakud lliġ‑ur‑ta‑d‑dark‑uškiġ, ra‑tn‑gġ d‑winu. afraym d‑manaššah rad‑gn winu zund rawbin d‑šimɛun. 6walaynni tarwa nna‑ra‑dark‑ilal tigira‑nsn rad‑gn wink, kšmn ntni ġ‑lwrt n‑sin aytmatsn imzwura. 7ašku lliġ muddiġ zġ‑tmazirt n‑aram, taġ‑iyi‑tguḍi bahra, ašku tmmut‑iyi innak raḥil ġ‑uġaras ġ‑tmazirt n‑kanɛan, ur‑n‑bahra‑naggug zġ‑tmdint n‑afrat. mḍlġ‑tt‑in ġ‑tama n‑uġaras n‑afrat.» ar‑as‑ttinin ula ‹bitlaḥm›.

8iẓr israyil tarwa n‑yusf isqsa‑t: «mad‑gan ġwid?» 9yini yusf i‑babas: «tarwa‑nu ayad lli‑yyi‑ifka rbbi ġid.» yini‑as israyil: «ġir ssakmur‑iyi‑tn‑d a‑tn‑barkġ.» 10israyil rmint‑walln‑ns ašku yuwssr bahra, idrus iẓri‑ns. lliġ‑as‑tn‑in‑issakmur yusf, issudn‑tn iḥbbl‑tn. 11yini israyil ġakudan i‑yusf: «ur‑tamġ ad‑ẓrġ udm‑nk. hati ġilad ifka‑yyi rbbi ad‑ẓrġ ula tarwa‑nk.» 12yusf issmatti‑d tarwa zġ‑dar ifaddn n‑babas, issknu‑n ih̬f ar akal ġ‑lgddam‑ns. 13izayd yusf ġakudan issakmur‑tn‑in daġ s‑sin s‑dar babas, yamẓ afraym s‑ufasi‑ns issbidd‑t ġ‑uẓlmaḍ n‑israyil, yamẓ manaššah s‑uẓlmaḍ‑ns issbidd‑t ġ‑ufasi n‑israyil. 14imma israyil issnh̬alaf ifassn‑ns, imdi‑n afus‑ns afasi isrs‑t f‑ih̬f n‑afraym lli‑mẓẓin. isrs aẓlmaḍ‑ns f‑ih̬f n‑manaššah lli‑igan ifh̬ddi. 15ibark yusf ġakudan yini: «ḍalbġ rbbi lli‑d‑munn id‑baba ibrahim d‑isḥaq, ig rbbi lli‑yyi‑iksan kullu mad‑kkiġ sul s‑ġassad, 16ig lmalak lli‑yyi‑ifukkan zġ‑kullu ma‑yʷh̬šnn. ḍalbġ‑as a‑ibark tarwa‑yad, baš a‑fllasn‑yili ism‑inu d‑ism n‑id‑baba ibrahim d‑isḥaq. ad‑asn‑bahra‑ttigatn tarwa ġ‑wakal.»

17imma yusf ṭiyr‑as lliġ iẓra babas isrs‑n afus‑ns afasi f‑ih̬f n‑afraym. yamẓ‑d afus n‑babas a‑t‑issitti zġ‑ih̬f n‑afraym isrs‑t‑in f‑ih̬f n‑manaššah. 18yini yusf i‑babas: «urd ġmkan a‑baba, ašku ġwad yaḍni a‑igan ifh̬ddi. srs‑n fllas afus‑nk afasi.» 19walaynni babas yagʷi, irar‑as: «ssnġ a‑iwi, ssnġ. ula nttan ra‑iwrri ig taqbilt, ig wad imqqurn. walaynni gʷmas imẓẓin ra‑t‑yagʷr, iwrri‑wamud‑ns ig kigan d‑tqbilin.» 20ġmkan a‑s‑tn‑ibark israyil ġassan yini‑asn: «ismawn‑nun a‑s‑ra‑tdɛun ayt‑israyil s‑lbaraka ar‑ttinin: ‹a‑k‑ig rbbi d‑zund afraym ula zund manaššah.› » ġmkan a‑s‑iga afraym amzwaru f‑manaššah. 21yini israyil ġakudan i‑yusf: «han ġir imikk rad‑mmtġ, walaynni rbbi rad‑didun‑yili irar‑kʷn s‑wakal n‑id‑babatun. 22kiyi a‑mi‑rad‑zaydġ yat‑tġruṭṭ f‑tin aytmak, tga‑tt‑tġruṭṭ n‑udrar lli‑kkisġ i‑ayt‑amur s‑uwzzal d‑lqus.»

Currently Selected:

isizwur 48: SHILOT20

Highlight

Copy