लूका 10
10
सत्तर चेलों तैं भिजै जांण
1अर यूं बातों का बाद प्रभु यीशु ल अन्य चेला और मनिख चुणिनि अर जै-जै शहर अर जगह कु जख वेल जांणै की योजना बंणै छै उख ऊं तैं द्वी-द्वी कैरी कै अपड़ा अगनैं भेजि। 2अर यीशु ल ऊंमा बोलि, “फसह कु त्योहार कु पक्याँ पुंगड़ा त बिजां छिन पर मजदूर कम छिन” इलै पुंगड़ा का स्वामि परमेश्वर बट्टी प्रार्थना कैरी कि उ अपड़ा पुंगड़ा लवैइ कनु कु मजदूर भेजि द्यो। 3जावा देखा मि तुम तैं ढिबरों का समान भेड़ियों का बीच मा भिजणु छौं। 4इलै न पटुकूं, न झोला, न जुत्ता ल्या, अर न बट्टा मा कै तैं प्रणाम करयां।#10:4 मत्ती 10:9, 2 राजा. 4:29 5जैका भि घौर मा जैला त पैली बुल्यां कि यु घौर कु कल्याण हो। 6परमेश्वर का दगड़ी शान्ति चांण वला मनिख उखी रौंदु च त तुमारो कल्याण वे पर ठैरुलो नथिरी तुम मा वापिस ऐ जालो 7वे ही घौर मा रावा अर जु कुछ ऊं बट्टी मिलो उ ही खयां अर पियां किलैकि मजदूर तैं अपड़ी मजूरी मिलण चयणी च अर घौर-घौर नि फिरयां। 8अर जै शहर मा जैला, अर उख का लोग तुम तैं स्वीकार कैरा त जु कुछ तुमारा अगनैं रखै जौं उ ही खैयां। 9उख बीमारों तैं खूब करयां अर ऊंमा बुल्यां कि परमेश्वर कु राज्य नजदीक ऐ गै। 10पर जै शहर मा जैला अर उख लोग तुम तैं स्वीकार नि कैरो त वे शहर का लुखुं मा जै के बुल्यां। 11कि तुमारा शहर कि धूल भि जु हमारा खुट्टों मा लगिं च हम तुमारा संमणी झाड़ी दींदां तब भि यु जांणि जा कि परमेश्वर कु राज्य नजदीक ऐ गै। 12मि तुम मा बुल्णु छौं कि वे दिन वे शहर कि दशा से सदोम शहर कि दशा सौण जुगुत हवेलि।#10:12 उत्प. 19:24,25
मन न फिराण वलो पर हाय
(मत्ती 11:20-24)
13हाय खुराजीन शहर अर बैतसैदा नगर का लुखुं पर जु चमत्कार का काम तुम मा करे गैनी जु उ सूर अर सीदोन शहर मा करे जांदा त उ टाट ओड़िके अर छारा मा बैठी के भौत पैली बट्टी मन फिरै दींदां। 14पर न्याय का जांच का दिन तुम्हरी दशा से सूर अर सीदोन शहरों का लुखुं कि दशा सैंण जुगुत हवेलि।#10:14 योए. 3:4-8, जक. 9:2-4 15अर हे कफरनहूम शहर का लुखुं क्य तु स्वर्ग तक ऊंचो करे जैलि? तु त नरक तक मूड़ी जैलि। #10:15 यशा. 14:13,15 16जु तुम्हरी सुणदु उ मेरी सुणदु च अर जु तुम तैं तुच्छ जंणदु उ मि तैं तुच्छ जंणदु, उ मेरा भिजण वला तैं भि तुच्छ जंणदु।
सत्तर चेलों कु वापिस आंण
17उ सत्तर चेला खुशी से ऐ के बुल्ण लगि गैनी “हे प्रभु दुष्टात्माओं ल भि हमारी बात मांणी जब हम ल तेरा नौं से आज्ञा दींनि।” 18वेल ऊं बट्टी बोलि, जब दुष्टात्माओं ल तुम्हरी आज्ञा मांणी, त मिल शैतान तैं अचानक स्वर्ग बट्टी बिजली का जन गिरदा देखि।#10:18 प्रका. 12:7-9, यशा. 14:12 19मिल तुम तैं गुरो अर बिच्छुओं तैं रौंदुणो को, अर शैतान की सैरी सामर्थ पर अधिकार दियूं च अर कै भि चीज बट्टी तुम तैं कुई नुकसान नि होलो।#10:19 भज. 91:13 20पर आनन्द नि ह्वा किलैकि दुष्टात्माओं तुम्हरी आज्ञाओं तैं मणदी च पर यांसे खुश ह्वा कि तुमारा नौं स्वर्ग मा लिख्यां छिन।
नौंना बट्टी बुबा तैं प्रगट कन
(मत्ती 11:25-27; 13:16-17)
21वीं बगत यीशु पवित्र आत्मा मा हवे के खुशी से भरि गै अर बोलि, “हे पिता आसमान अर धरती का प्रभु मि तेरु धन्यवाद करदु कि तिल यूं बातों तैं ज्ञानियों अर समझदार बट्टी छिपै के रखि अर बालकों पर प्रगट कैरी हां, हे पिता किलैकि त्वे तैं यु ही अच्छो लगि।” 22मेरा पिता ल मि तैं सब कुछ सौंपेलि अर कुई नि जंणदु कि नौंनो कु च भस पिता अर पिता कु च यु भि कुई नि जंणदु भस नौंनो अर जै पर नौंनो वे तैं प्रगट कन चौ। 23तब यीशु ल चेलों कि तरपां फेरी के यखुली मा बोलि, धन्य छिन उ आंखा जु यूं बातों तैं दिखदा छिन। 24किलैकि मि तुम मा बुल्णु छौं की भौत सा परमेश्वर का तरपां बट्टी बुल्ण वलो ल अर राजाओं ल चै कि जु बात तुम दिख्दां ऊं तैं दिखुनु पर नि देखि अर जौं बातों तैं तुम सुणदा छा ऊं तैं सुणुनु पर नि सुणि।
एक अच्छी सामरी को मिसाल
25एक दिन जब यीशु लुखुं तैं शिक्षा दींणु छों त एक आदिम मूसा की व्यवस्था तैं सिखांण वलो उठि अर यु बोलि के यीशु की अजमैश कन लगि गै कि, “हे उत्तम गुरु जी अनन्त जीवन पर मेरू हक हो यांको मि तैं क्य कन चयणु च?” 26यीशु ल ऊंमा बोलि, कि “मूसा द्वारा लिखीं परमेश्वर की व्यवस्था मा क्य लिख्युं च? तु ऊं तैं कन कै समझदी छै?” 27वेल जवाब दींनि, कि तु अपड़ा प्रभु परमेश्वर तैं अपड़ा सैरा मन अर अपड़ी सैरा प्राण अर अपड़ी सैरी शक्ति अर अपड़ी सैरी बुद्धि का दगड़ी प्रेम रख अर अपड़ा पड़ोसी से अपड़ा समान प्रेम रख।#10:27 मत्ती 22:37-40, व्य. 6:5, व्य. 10:12, यहो. 22:5 28वेल वे बट्टी बोलि, तिल ठिक जवाब दींनि यु ही कैर त वे तैं सदनी को जीवन मिललो।#10:28 लैव्य. 18:5 29पर वेल यूं तथ्य तैं सही ठैरांणु कु की इच्छा बट्टी यीशु तैं पूछि, त मेरू पड़ोसी को च? 30यीशु ल एक मिसाल दे के जवाब दींनि, कि एक मनिख यरूशलेम शहर बट्टी यरीहो शहर कु जांणु छो कि इथग मा कि डाकुओं ल वे पर हमला कैरी के वेका कपड़ा अर हर चीज जु वेमा छा वे तैं लुछी दींनि अर मारि पीटि के वे तैं अध्मोरयूँ छोड़ी के चलि गै। 31अर इन हवे कि वे ही बट्टा बट्टी एक यहूदी याजक जांणु छो पर वे तैं देखि के बगैर वेकी मदद कैरी के चलि गै। 32उन ही एक लेवि जु यहूदी मंदिर मा काम करदो छो उ वे जगह मा ऐ उ भि वे तैं देखि के बगैर वेकी मदद कैरी के दुसरी तरपां बट्टी अगनैं चलि गै। 33पर एक सामरी जाति को एक आदिम जख घायल आदिम छो ऊख ऐ निकली, अर वे तैं देखि के तरस खै। 34अर वेका संमणी ऐ के अर वेका घावों पर जैतून को तेल अर दाखमधु डाली अर फिर वेका घावों पर पट्टी बंधि अर अपड़ी सवारी पर चड़ै के धर्मशाला मा लीगि अर वेकी सेवा टहल कैरी। 35दुसरा दिन वेल द्वी दीनार द्वी दिन की मजदूरी निकाली के भटियारा तैं दींनि अर बोलि, ये कि सेवा टहल कैरी अर जु कुछ तेरु और लगलो उ मि लौटण पर त्वे तैं दे दयुलु। 36अब यीशु ल वे तैं पूछि, तेरी समझ मा जै पर डाकुओं का द्वारा हमला किये गै छो यूं तिन्युं मा बट्टी वेको पड़ोसी कु ठैरी? 37वेल बोलि, उ ही जैल वे पर दया कैरी यीशु ल वेमा बोलि, “जा तू भि इन ही कैर।”
मार्था अर मरियम
38प्रभु यीशु अर वेका शिष्य एक दगड़ी यात्रा कन छा अर एक गाँव मा पौंछिनि जब उ उख पौंछिनि त मार्था नौं की एक जनन ल वेको घौर मा स्वागत कैरी। 39अर मार्था की बैंण मरियम प्रभु का खुट्टा का संमणी बैठी के वेका शिक्षाओं तैं सुंणदि छै। 40पर मार्था खांणु पकै-पकै के घबरै गै अर वेका संमणी ऐ के बुल्ण लगि गै “हे प्रभु क्य त्वे तैं कुछ भि चिंता नि च कि मेरी बैंण सभि काम कनु कु यखुली च? त वीं कु बोल कि मेरी मदद कैर।” 41प्रभु यीशु ल वीं तैं जवाब दींनि, मार्था हे मार्था तु भौत बातों की चिंता करदी अर घबरांदि छै। 42पर एक ही बात की चिंता कन जरूरी च मार्था की बैंण मरियम ल ईं बात तैं खोज्याली अर उ वे बट्टी दूर नि किये जालो।
Currently Selected:
लूका 10: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
