मरकुस 15
15
पिलातुस का संमणी यीशु
(मत्ती 27:1-2,11-14; लूका 23:1-5; यूहन्ना 18:28-38)
1अर सुबेर लै के प्रधान याजकों ल दाना-सयाणों अर मूसा की व्यवस्था तैं सिखांण वलो ल बल्कि सैरी महासभा का लुखुं ल योजना की चर्चा कैरी के यीशु तैं बन्धवै दींनि अर न्याय कनु कु यहूदिया जिला का रोमी गवर्नर मा लिजै कै पिलातुस मा सौंपी दींनि। 2पिलातुस ल यीशु तैं पूछि, “क्य तु यहूदियों कु राजा छै?” यीशु ल पिलातुस तैं जवाब दींनि, “तु अफी बुल्णी छै मि उ ही छो।” 3प्रधान याजक यीशु पर भौत बातों कु भंगार लगांणा छा। 4पिलातुस ल वेमा फिर पूछि, तु कुछ जवाब किलै नि दींणि छै देख यु लोग त्वे पर कथग बातों कु भंगार लगांणा छिन? 5यीशु शांत छो इख तक कि वेल कुछ नि बोलि पिलातुस भैचक रै गै।
यीशु तैं मौत की आज्ञा
(मत्ती 27:15-26; लूका 23:13-25; यूहन्ना 18:39; 19:16)
6हर साल पिलातुस फसह का त्योहार मा कै एक कैदी तैं जै तैं भि लोग चांदा छा ऊंकी खातिर छोड़ी दींदु छो। 7वीं बगत बरअब्बा नौं कु एक मनिख छो जु झगड़ा कनवलों दगड़ा कैद मा छो जौन रोमी सरकार का खिलाफ विरोध मा कुछ सिपैयूं की हत्या कैरी छै। 8अर भीड़ पिलातुस मा ऐ अर बिनती कन लगि गै कि जन तु हम कु करदी औंणि छै उन ही कैर अर वेमा बोलि, हम कु एक कैदी तैं मुक्त कैर दे। 9पिलातुस ल ऊं बट्टी पूछि, “क्य तुम चदयां कि मि तुम कु यहूदियों का राजा तैं छोड़ी द्यों” 10किलैकि उ जंणदु छो कि प्रधान याजक ल यीशु तैं जलन खोरि मा पकड़वे छो। 11पर प्रधान याजक ल लुखुं की भीड़ तैं उगसै कि उ पिलातुस बट्टी यीशु तैं छुड़णा का बदला बरअब्बा तैं ऊंकी खातिर छोड़ी द्यो। 12यु सूंणि के पिलातुस ल ऊंमा फिर पूछि, “जैकु तुम यहूदियों कु राजा बुल्णा छा वेको मिल क्य कन?” 13भीड़ फिर चिल्लै कि, “वे तैं सूली पर मारि द्या” 14पिलातुस ल पूछि, “किलै येल क्य बुरै कैरी”पर भीड़ और जोर से चिल्लै “यु तैं सूली पर चढ़ै द्या” 15तब पिलातुस ल भीड़ तैं खुश कने मनसा से बरअब्बा तैं ऊंकी खातिर छोड़ी दींनि अर यीशु तैं कोड़ा मरवै कै रोमी सैनिको तैं सौंपी दींनि कि उ सूली पर चढ़ै जौ।
सिपैयूं को यीशु की मजाक उड़ाण
(मत्ती 27:27-30; यूहन्ना 19:2-3)
16सिपै यीशु तैं किला का भितर का चौक मा ली गैनी जैकु प्रीटोरियुम बुल्दा छा अर सैरी पलटण तैं बुलै दींनि जु एक सैनिको को भौत बड़ो झुण्ड छो। 17तब ऊंल यीशु तैं बैंगनी जु शाही कपड़ा छा पैरेनि जन राजा पैरदो छो अर वेको ठट्टा कैरी अर कांडों कु मुगट बणै कै वेका मुंड मा रखि 18अर इन बोलि के यीशु तैं प्रणाम कन लगि गैनी, “हे यहूदियों का राजा प्रणाम” 19उ बार-बार वेका मुंड मा सरकंडा ल मरणा छा अर वेको अपमान कन कु वे पर कई बार थुकणा छा अर घुंडा टेकि के वे तैं प्रणाम कनु कु नाटक करणा रैनी। 20जब ऊंल यीशु को मखोल कैरेली छो त वे पर बट्टी बैंगनी कपड़ा उतारी दींनि अर वेका कपड़ा पैरे दींनि अर तब वे तैं सूली पर चढ़ाणु कु शहर बट्टी भैर ली गैनी। 21जब उ शहर बट्टी भैर जांणा छा, तब शमौन नौं कु एक कुरेनि जु कै गौं बट्टी यरूशलेम शहर मा औंणु छो, सिकन्दर अर रुफुस कु बुबा छो अर उख बट्टी जांणु छो सैनिको ल वे तैं सूली उठै के वीं जगह पर लिजांणु कु जख यीशु तैं सूली पर चड़ौण छो लिजांण की आज्ञा दींनि।
यीशु तैं सूली पर चढ़ांण
(मत्ती 27:31-44; लूका 23:44-49; यूहन्ना 19:28-30)
22सैनिको ल यीशु तैं पकड़ी के गुलगुता नौं कि जगा पर ली गैनी ज्यांकु नौं कु मतलब खोपड़ी छो। 23तब सैनिको ल यीशु तैं मुर मिल्युं दाखमधु दींनि जु दर्द तैं मैसूस नि हूंण मा मदद करदु छो पर यीशु ल नि लींनि। 24तब ऊंल यीशु तैं सूली पर कीलों ल ठोकी के चढ़ै दींनि अर वेका कपड़ोंं तैं बंटणु कु पर्ची बणै कि जै तैं जु भि मिललो वे तैं आपस मा बांटि द्याला। 25अर सुबेर का नौं बजी का बगत जब ऊंल यीशु तैं सूली पर चढ़ै। 26अर ऊंल यीशु को भंगार की एक तख्ती लिखीं के वेकी सूली का मथि ठोकी दींनि कि “यहूदियों कु राजा” 27ऊंल यीशु का दगड़ा अलग अलग सूली पर द्वी डाकूओं तैं एक वेकी दैंणि तरपां अर हैंका तैं वेकी बैं तरपां सूली पर चढ़ै दींनि। 28अर इन कै तब पवित्र शास्त्र कु उ वचन जु मसीह का बार च पूरो हवे कि उ परायूं का दगड़ा गणे गै। 29अर आंण-जांण वला भि मुंड हलै-हलै कै इन बोलि के वेकी बुरै कना छावा मन्दिर तैं ढुलण वला अर तीन दिनों मा बनांण वला 30सूली पर बट्टी उतरी के अफ तैं बचौ। 31ई रीत से प्रधान याजक, मूसा की व्यवस्था तैं सिखांण वलो का समेत आपस मा मजाक उड़ाणा छा “येल औरों तैं बचै पर अफ तैं नि बचै सकदु।” 32यु आदिम जु मसीह हूंणो कु दावा कनु छो, “हे इस्राएल का लुखुं का राजा मसीह सूली बट्टी उतरी के औ” हम भि त्वे तैं देखि कै विश्वास करुला जु द्वी मनिख यीशु का दगड़ा सूली पर चढैयां छा उ भि यीशु कि बुरै कना छा।
यीशु कु प्राण छुड़ण
(मत्ती 27:45-56; लूका 23:44-49; यूहन्ना 19:28-30)
33दोपहरा बारा बजि का लगभग बट्टी तीन बजि का लगभग तक, सैरा मुल्क मा अंधेरो छै गै। 34अर तीन बजि का लगभग यीशु ल जोर से धै लगै के बोलि, “इलोई-इलोई लमा शबक्तनी ज्यांकु मतलब च मेरा परमेश्वर-मेरा परमेश्वर तिल मि तैं किलै छोडे़ले” 35अर कुछ लोग जु उख नजीक खड़ा छा ऊंमा बट्टी कुछों ल सूंणि पर नि समझिनि अर एक दुसरा मा बोलि, “सूंणा यु एलिय्याह तैं अपड़ी मदद कु बुलांणु च।” 36अर ऊंमा बट्टी एक सिपै भागि के एक स्पंज तैं सिरका मा डुबै के एक सरकंडा पर रखि के यीशु तैं चुसै अर बोलि, “ठैरा अभि कुछ नि कैरा दिखदां, एलिय्याह वे तैं भुयां उतनु कु औंदु च कि नि औंदु।” 37तब यीशु बड़ा शब्द से चिल्लै कै मोर गै। 38अर यरूशलेम शहर का मन्दिर मा लटकयूँ मोटू परदा जु परमेश्वर की उपस्थित मा जांण से रुकदो छो मथि बट्टी मूड़ि तक फटी के द्वी टुकड़ा हवे गै। 39अर जु सुबदार यीशु का संमणी खड़ो छो जब वेल यीशु तैं जोर से चिल्लै कै मुरण देखि त वेल बोलि, “सचमुच यु मनिख परमेश्वर कु नौंनो छो” 40कथग ही जनन भि दूर बट्टी दिखणी छै: ऊंमा मरियम जु मगदल गौं की छै अर याकूब अर योसेस कि ब्वे मरियम अर सलोमी छै। 41जब यीशु गलील जिला बट्टी हवे के जांणु छो त यु तीन जननों ल चेलों का रूप मा वचन सुनांणु कु वेका पिछनै चलदी छै अर वेकी सेवा भक्ति करदी छै अर और भि भौत जनन छै जु यीशु का दगड़ा यरूशलेम शहर बट्टी अयीं छै।
यीशु तैं गड़ै जांण
(मत्ती 27:57-61; लूका 23:50-56; यूहन्ना 19:38-42)
42जै दिन यीशु तैं सूली पर चड़ै रुमुक हवे गै अर यु दिन यहूदियों का विश्राम कु दिन जु परमेश्वर को पवित्र दिन से पैली कु दिन छो जैकु तैयारी कु दिन बुल्दा छा#15:42 अर यहूदी रिवाज का अनुसार वीं शाम कु उ काम नि करदा छा, इलै ऊंल यहूदियों का विश्राम का दिन जु परमेश्वर को पवित्र दिन च, यीशु का देह तैं नि हिलै 43अरिमतियाह शहर कु रांण वलो एक आदिम जैकु नौं यूसुफ छो यु उखै कि महासभा कु सम्मनित सदस्य छो अर यु भि ऊंमा बट्टी एक छो जु चांदा छा की जल्द ही परमेश्वर कु राज्य औ, उ बगैर कि डौर से पिलातुस मा गै अर यीशु का देह तैं सूली बट्टी मुड़ी निकलणु कु अर खडयोण की अनुमति मांगि। 44पिलातुस ल विश्वास नि कैरी की यीशु इथग जल्दी मोरि गै अर वेल सुबदार तैं बुलै कै पूछि, “क्य यु सच च की वे तैं मुरयां इथग देर हवे गै” 45जब पिलातुस ल सुबदार बट्टी हाल चाल जांणि लींनि तब वेल यीशु कि लांश यूसुफ तैं दे दींनिणे की अनुमति द्ये दींनि। 46तब यूसुफ ल यीशु कि लांश तैं सूली बट्टी उतारी अर एक चदरा लै के वेमा लपेटी के एक पोड़ पर खुदीं कब्र मा छै रखि दींनि अर कब्र का द्वार पर एक गोल ढुंगों लगै दींनि। 47मरियम जु मगदल गौं की छै अर याकूब अर योसेस कि ब्वे मरियम दिखणी छै कि यीशु तैं ऊंल कख रखि।
Currently Selected:
मरकुस 15: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.