ലൂക്കോസു 3
3
നീര്‌ക്ക് മുളുഗുസുവ ഓഗന്നാന് സൊന്ന സേദി
1തിവര്യോസു മഗരാജാവായി ആണ്ടിന്ത പദിനിഞ്ചാവാദ് ബര്‌സ്സാത്ത്‌ല്: പൊന്തിയോസു പീലത്തോസു എഗുദ നാഡ്‌ക്ക് തലെവാന്‌മ് എരോദ ഗലീല നാഡ്‌നാമ് അയാള് തമ്പി പീലിപോസ് ഇത്തൂര്യ, തറക്കോനിറ്റി നാഡ്‌ഗാള്‌നാമ്, ലൂസാന്യാസ് അവിലേന നാഡ്‌നാമ് ആണ്ടിന്താന്. 2അന്നാസ്‌മ് കയ്യപ്പാവുമു എഗുദാര് ദൊഡ്ഡ പൂസാരിഗാള്‌മ് ആയിന്താര്. അയി ഗളിഗേല് ബെ്ട്ടെകാഡ്‌ല് ബെത്ത് സെക്കെര്യാവു മഗാന് ഓഗന്നാനോഡ സാമി നായ നൊഡിന്താന്. 3അത്തെ ഓഗന്നാന് ഓറ്‌ദ്ദാന് ബാന്യര്‌ഗെ ഇര്‌ക്കുവ എല്ലാ നാഡ്‌ഗാള്‌ക്ക്‌മ് പോയി: <<നിമ്മ പാവ ഗേവാദ്‌ന തള്ളി നീര്‌ക്ക് മുളിഗി ഇ്ളാഗുഡൊ. അന്നാപ്പ് സാമി നിമ്മ് പാവാന പൊറുക്കുവാന്>> എന്റ് ആലാത്താലാത്ത് സൊന്നാന്.
4ഏസ്സയ്യ സാമിദാസ് ബൊക്കുലു എ്ള്‌ദിര്‌ക്കുവ പാസെ ഇത്തെ നഡാന്ത്‌ദ്:
<<ബെ്ട്ടെകാഡ്‌ലിന്ത് ഒന്റൊരുത്താന് ഇത്തെ ആലാത്ത് സൊന്റാന്:
<ആണ്ടവാന്‌ക്ക് ബട്ടെ മാഡ്‌ന്.
ബട്ടെന അയാള്‌ക്ക് ബേ്ണ്ടി നേരെ മാഡ്‌ന്.
5എല്ലാ അഡിവാരഗാള്‌നാമ് ഒന്റേ സമ മാഡുഡൊ.
എല്ലാ മലെഗാള്‌നാമ് ഗുഡ്ഡെഗാള്‌നാമ് ഒന്റേ ഒപ്പ മാഡുഡൊ.
അദേപാസെ ബളേന്ത്‌റ്‌ക്കുവ എല്ലാ റോട്ടുഗാള്‌നാമ് നേരെ മാഡുഡൊ.
കുണ്ടുകുയിഗാള്‌മ് ഇര്‌ക്കുവ റോട്ടുഗാള്‌ന മിന്‌സമാഡുഡൊ.
6സാമി ആള്‌ഗാള്‌ന കാപാറ്റുവാദ് എത്തെന്റ് എല്ലാ എ്ഡേലിര്‌ക്കുവ എല്ലാ ആള്‌ഗാള്‌മ് കാണുവാര്.> >>#ഏസ്സയ്യാവു 40:3–5
7ഓഗന്നാന് പട്ട്‌ക്ക് മുളുഗ്യ ബന്ത മൊത്തന ആള്‌ഗാള്‌ക്ക് അയാള് ഇത്തെ സൊന്നാന്: <<പാമ്പ്‌ന പാസെ സദിക്ക്‌ന്റവാരെ, നിമാക്ക് സാമി തരുവ ദെ്ണ്ടണേലിന്ത് ഓഡി തപ്പിസി കഡാക്ക്യ നിമാക്ക് ആര് മുദാല് അറുവു തന്താദ്? 8നിമ്മ പാവ ഗേവാദ്‌ന തള്ള്‌നേമ് എന്റ് കാട്ടുവാദ്‌ക്കുള്ള കാര്യഗാള് ഗേന്. <അവുറഗാമ്‌ത്തെ എമ്മ് പാട്ടാന്> എന്റ് നിമ്മ നിമ്മ് മനേസ്സ്‌കുളാക്ക് താനെ സൊല്ലാദേന്. എന്ത്‌ക്കെന്റ് സൊന്ന ഈ കല്ല്‌ഗാള്‌ലിന്ത് അവുറഗാമ്‌ക്ക് മക്കാള്‌ഗാള്‌ന ഉണ്ടാക്കി കൊഡുക്ക്യ സാമിക്ക് മുഡിമ് എന്റ് നാന് നിമാക്ക് സൊന്റെ. 9ഇന്നാല് താനെ ബെ്ട്ട്യ ബേ്ണ്ടി മര മ്‌ണ്ടേക്ക് കോഡാലി ബെത്ത് മുഡിന്ത്‌ദ്. മൊഡ്ഡുകായി കായിക്കുവ മരഗാള്‌നെല്ല ബെ്ട്ടി തീക്ക് ഇക്കുവാന്.>>
10അദുക്കുള ആള്‌ഗാള് അയാള്‌ന: <<എമ്മ എന്ത് ഗേയ?>> എന്റ് കേ്ട്ടാര്.
11അദുക്കുള ഓഗന്നാന് സൊന്നാന്: <<റാഡ് സീലെ ഇര്‌ന്റവാന് ഇല്ലത്തവാന്‌ക്ക് ഒന്റുന കൊഡുക്കുഡൊ. അദേപാസെ തീനിമ് ഇന്തദാന തീനി കെ്ഡേക്കത്തവാന്‌ക്ക് കൊഡുക്കുഡൊ.>>
12കന്ത്യ കെ്ട്ടുവ കാസ് പിരിക്ക്‌ന്റവാര്‌ല് ലേസ ആള്‌ഗാള് നീര്‌ക്ക് മുളുഗ്യ ബന്ത്: <<ഗുരുവെ എമ്മ എന്ത് ഗേയ>> എന്റ് ഓഗന്നാന്‌ന കേ്ട്ടാര്.
13അദുക്കുള ഓഗന്നാന് അവാര്‌ക്ക്: <<സട്ടപഡി പിരിക്ക്യ സൊല്ലിര്‌ക്കുവാദ്‌ക്ക് ബ്‌ഡ അദിഗ ആരോഡിന്ത്‌മ് നിമ്മ പിരിക്കാദേന്>> എന്റ് സൊന്നാന്.
14അദുക്കുള ലേസ പട്ടളഗാറാര്‌മ്: <<എമ്മ എന്ത് ഗേയ?>> എന്റ് ഓഗന്നാന്‌ന കേ്ട്ടാര്.
അയാള് അവാര്‌ക്ക്: <<മെ്റ്‌ട്ടിപ്‌ഡിത്തൊ, ദെ്ണ്ടാക്കെല്ല കുറ്റഗാറാന് മാഡ്യൊ ആരോഡിന്ത്‌മ് പണ ബാങ്കാദെ നിമാക്ക് കെ്ഡേക്കുവ കൂലി മദി എന്റ് പെ്ളേത്ത് നഡാന്>> എന്റ് സൊന്നാന്.
15തമാന കാപാറ്റ്യ ക്‌റ്‌സ്‌ത്ത് ബരുവാനെന്റ് ആള്‌ഗാള് കാത്തിന്താര്. അദ്‌നാലെ ഓഗന്നാന്‌ത്തേഗ ക്‌റ്‌സ്‌ത്ത് എന്റ് ആള്‌ഗാള് മനേസ്സ്‌ല് നെനേത്താര്. 16അദുക്കുള ഓഗന്നാന് അവാര്‌ക്ക് ഇത്തെ സൊന്നാന്: <<നാന് നിമാന നീര്‌ക്ക് മുളുഗുസ്‌ന്റെ. ആന എനാന ബ്‌ഡ അദിഗര ഇര്‌ക്ക്‌ന്റവാന് ബരുവാന്. അയാള് ഇക്കിര്‌ക്കുവ സെര്‌പ്പ് കണ്ണിന ഉക്ക്യ ഗുഡി എനാക്ക് തഗ്‌ദില്ലെ. അയാള് നിമാന സാമിനിഗാല്‌ല്‌മ് തീയില്‌മ് മുളുഗുസുവാന്. 17അന്ന കളാത്ത്‌ല അന്നാന തൂറ്റി പാളേന ബേ്റെ മണിന ബേ്റെ മാഡുവ ബീസ് ഗൂഡുമു അയാള് കയില് ഇര്‌ക്ക്‌ന്റ്. അയാള് അന്നാന ബല്ലാക്ക് അട്ടി ബെത്ത് പാളേന കെ്ഡാത്ത തീക്കിക്കി സുട്ടു തള്ളുവാന്.>> 18ഇദേപാസെ ഓഗന്നാന് അവാര് ഗേവ തപ്പ്‌ന തള്ള്യ ബേ്ണ്ടി ഒറേസി കൊണ്ടു അവാര്‌ക്ക് നല്ല സേദിന സൊന്നാന്.
19തലെവാനയിര്‌ക്കുവ എരോദ തന്ന് അണ്ണാന് പെ്ണ്ട് ഏരോദ്യന എ്ഡ്‌ത്ത് ബെത്ത് ബേ്റെ പല കെ്ട്ട കാര്യഗാള്‌മ് ഗേന്തിന്താന്. അദ്‌നാലെ ഓഗന്നാന് അയാള്‌ന നൊഡിന്താന്. 20അദുക്കുള എരോദ ഓഗന്നാന്‌ന പ്‌ഡിത്ത് ജെയില്‌ക്ക് അഡേത്താന്. ഇത്തെ താന് ഗേന്ത കെ്ട്ട കാര്യഗാള്‌ക്ക് സേത്തി ഈ ഒന്റു കെ്ട്ട കാര്യാമ് ഗേന്താന്.
ഏസ്സ് മുളുക്ക
21ആള്‌ഗാള്‌നെല്ല ഓഗന്നാന് നീര്‌ക്ക് മുളിഗിസി കൊണ്ട്‌റ്‌ക്കാട്ടി ഏസ്സ്‌നാമ് നീര്‌ക്ക് മുളുഗുസ്‌നാന്. അദ്‌ക്ക് പ്‌റ അയാള് പരേസികൊണ്ടു ഇര്‌ക്കാട്ടി സാമി ബാന്‌ന ത്‌റാന്താന്. 22അദുക്കുള സാമിനിഗാല് സോറെ പക്കി ഉരുവാത്ത്‌ല് അയാള് ഉരുവുക്കു ഇ്റാഗി ബന്ത്‌ദ്. <<നീ എന്ന് മഗാന്‌ത്തെ, നാന് നിനാന സീവാന്‌പഡ്‌ന്റെ. നിന്ന്‌നാലെ എന്ന് മനേസ്സ് തെ്ളിന്ത്‌ദ്>> എന്റ് മേലോഗാത്ത്‌ലിന്ത് ഒന്റു ജദ്ദാമ് കേ്ട്ട്‌ദ്.
ഏസ്സ് പാട്ടനാമ്
23ഏസ്സ് തന്ന് ഗിലാസ ഗേയ പ്‌ഡിക്കാട്ടി അയാള്‌ക്ക് ഒപ്പതപ്പ മുപ്പാദ് ബയിസ്സ് ആയിന്ത്‌ദ്. ഏസ്സ്‌ന ഓസേപ് മഗാന് എന്റ്‌ത്തെ ജനഗാള് നെനേത്തിന്താദ്.
ഓസേപ് ഏലിത്ത് മഗാന്. 24ഏലി മത്താത്ത് മഗാന്.
മത്താത്ത് ലേവി മഗാന്. ലേവി മെലിക്കി മഗാന്.
മെലിക്കി അന്നായി മഗാന്. അന്നായി ഓസേപ് മഗാന്.
25ഓസേപ് മത്തത്ത്യോസു മഗാന് മത്തത്ത്യോസു ആമോസു മഗാന്.
ആമോസു നഗൂമു മഗാന്. നഗൂമു എസ്‌ലി മഗാന്
എസ്‌ലാന് നഗ്ഗാന് മഗാന്. 26നഗ്ഗാന് മയാത്ത് മഗാന്.
മയാത്ത് മത്തത്ത്യോസു മഗാന്. മത്തത്ത്യോസു സെമായി മഗാന്.
സെമായി ജോസെ മഗാന്. ജോസെ ഓദാന് മഗാന്.
27ഓദാന് ഓനാന് മഗാന്. ഓനാന് രേസാന് മഗാന്.
രേസാന് സെര്‌വാവേല് മഗാന്. സെര്‌വാവേല് സെയില്‌തേല് മഗാന്.
സെയില്‌തേല് നേരാന് മഗാന്. 28നേരാന് മെലൂക്കാന് മഗാന്.
മെലൂക്കാന് അദ്ദി മഗാന്. അദ്ദി കോസാമ് മഗാന്.
കോസാമ് എല്‌മാദാമ് മഗാന്. എല്‌മാദാമ് ഏരാന് മഗാന്.
29ഏരാന് ഓസ്സു മഗാന്. ഓസ്സു എല്യാസാര് മഗാന്.
എലിയെസാര് ഓരിമ് മഗാന്. ഓരിമ് മത്താത്ത് മഗാന്.
മത്താത്ത് ലേവി മഗാന്. 30ലേവി സിമ്മ്യോനു മഗാന്.
സിമ്മ്യോനു എഗുദ മഗാന്. ജൂദാന് ഓസേപ് മഗാന്.
ഓസേപ് ഓനാമ് മഗാന്. ഓനാമ് എല്യാക്കീമ് മഗാന്.
31എല്യാക്കീമ് മെല്യാവു മഗാന്. മെല്യാവു മെന്ന മഗാന്.
മെന്ന മത്തദ മഗാന്. മത്തദ നാദാന് മഗാന്.
നാദാന് ദാവീദ് മഗാന്. 32ദാവീദ് ഇസ്സായി മഗാന്.
ഇസ്സായി ഓവേദ് മഗാന്. ഓവേദ് ബോവാസ് മഗാന്.
ബോവാസ് സല്‌മോനു മഗാന്. സല്‌മോനു നഗസോനു മഗാന്.
33നഗസോനു അമിനദാവു മഗാന്. അമിനദാവു അഡ്‌മിന് മഗാന്.
അഡ്‌മിന് ആരാമ് മഗാന്. ആരാമ് ഗെസ്‌റോനു മഗാന്.
ഗെസ്‌റോനു പാരേസ് മഗാന്. പാരേസ് എഗുദ മഗാന്.
34എഗുദ ആക്കോവു മഗാന്. ആക്കോവു ഇസഗാക്ക് മഗാന്.
ഇസഗാക്ക് അവുറഗാമ് മഗാന്. അവുറഗാമ് തേരാഗ് മഗാന്.
തേരാഗ് നാഗോറു മഗാന്. 35നാഗോറു സെരൂഗു മഗാന്.
സെരൂഗു റെഗു മഗാന്. റെഗു പാലേഗ് മഗാന്.
പാലേഗ് ഏവേരി മഗാന്. ഏവേരി സലാമ് മഗാന്.
36സലാമ് കയിനാന് മഗാന്. കയിനാന് അറ്‌പക്‌സാദ് മഗാന്.
അറ്‌പക്‌സാദ് സേമ് മഗാന്. സേമ് നോഗെ മഗാന്.
നോഗെ ലാമേക്ക് മഗാന്. 37ലാമേക്ക് മെദുസാലെ മഗാന്.
മെദുസാലെ ആനോക്കു മഗാന്. ആനോക്കു ആരേദ് മഗാന്.
ആരേദ് മലെല്യാല് മഗാന്. മലെല്യാല് കയിനാന് മഗാന്.
38കയിനാന് ഏനോസു മഗാന്. ഏനോസു സേത്ത് മഗാന്.
സേത്ത് ആദാമ് മഗാന് ആദാമ് സാമിമഗാന്.
Currently Selected:
ലൂക്കോസു 3: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
