ലൂക്കോസു 6
6
ഏസ്സ് എഗുദാര് ബെത്ത്‌റ്‌ക്കുവ ഒയിവു നാള്‌ക്ക് ആണ്ടവാന്
1ഒന്റു ഒയിവു നാള് ഏസ്സ് ബെ്ള്ളാമെ കാഡ്‌മേലെ നഡാന്ത് പോഗാട്ടി അയാള് സൊല്ലുപഡി നഡാക്ക്‌ന്റവാര് അന്ന കദ്‌റ്‌ന നുണ്ടി നെരിക്കി മൊക്ക്യ പ്‌ഡിത്താര്. 2അദുക്കുള പരിസാര്‌ഗാള്‌ല് ലേസ ആള്‌ഗാള്: <<ഒയിവു നാള് സട്ടപഡി ഗേഗാത്ത കാര്യ നിമ്മ ഗേവാദ് എന്ത്‌ക്ക്?>> എന്റ് അവാര്‌ന കേ്ട്ടാര്.
3ഏസ്സ് അദ്‌ക്ക് ബദ്‌ലായി: <<ദാവീദ്‌ക്ക്‌മ് അയാളൊപ്പ ഇന്തവാര്‌ക്ക്‌മ് പജിപ്‌ഡിക്കാട്ടി ദാവീദ് എന്ത് ഗേന്താനെന്റ് നിമ്മ പഡിത്ത് നോഡാലേഗ? 4അയാള് സാമിബീ്ഡ്‌ക്ക് പോയി പൂസാരിഗാള് അല്ലാദെ ബേ്റെ ആര്‌മ് തിന്ന്യ മുഡ്യാത്ത മേല്‌സ ബെത്തിന്ത അഡേന എ്ഡ്‌ത്ത് തിന്റ് ഒപ്പ ഇന്തവാര്‌ക്ക്‌മ് കൊഡുത്താനല്ല?>> എന്റ് സൊന്നാന്. 5<<ഒയിവു നാള്‌ന ആള്‌ന്റവാന്‌മ് മന്‌സാനായി പ്‌റാന്തവാന്‌ത്തെ>> എന്റ് ഏസ്സ് പിന്നേമ് സൊന്നാന്.
ബല കയി സപ്പെബ്‌ന്തിന്തവാന്‌ന തെ്ള്‌സ്‌ന്റാന്
6പിന്നെ ഒന്റു ഒയിവു നാള് ഏസ്സ് എഗുദാര് പരേസുവ ബീ്ഡ്‌ക്ക് പോയി പഡിസിന്താന്. ബല കയി സപ്പെബ്‌ന്തിന്ത ഒന്റൊരുത്താന് അദ്‌ലിന്താന്. 7ഏസ്സ്‌ന കുറ്റഗാറാന് മാഡ്യ ബേ്ണ്ടി അയാള് ഒയിവു നാള് ആരാറ്റ്‌ന തെ്ള്‌സ്‌ന്റാന ഇല്ലേഗ എന്റ് ബേദബാത്ത്യനാമ്‌ഗാള്‌മ് പരിസാര്‌ഗാള്‌മ് സൊക്കാന നോഡികൊണ്ടിന്താര്. 8ആന അവാര് മനേസ്സ്‌ല് നെനേക്കുവാദ്‌ന ഏസ്സ്‌ക്ക് തെരിന്ത്‌ദ്. അദ്‌നാലെ <<ഇ്ളാഗി ആള്‌ഗാള്‌ക്ക് മുന്നുക്കു നില്ല്>> എന്റ് ഏസ്സ് കയി സപ്പെബ്‌ന്തവാന്‌ക്ക് സൊന്നാന്. അദുക്കുള അയാള് ഇ്ളാഗി ആള്‌ഗാള് മുന്നുക്കു നിന്റാന്.
9ഏസ്സ് അവാര്‌ക്ക്: <<നാന് ഒന്റു കാര്യ നിമാന കേ്ള്‌ക്ക്‌ന്റെ. ഒയിവു നാള് നല്ലാദ് ഗേവാദൊ, കെ്ട്ടാദ് ഗേവാദൊ, ഒന്റു ഉജുരുന കാപാറ്റുവാദൊ, അളിക്കുവാദൊ ഏദ് സെരി?>> എന്റ് കേ്ട്ടാന്.
10അത്തെ ഏസ്സ് അവാര്‌നെല്ല സുറ്റീല് നോഡുന പ്‌റ അയി നോയിഗാറാന്‌ക്ക്: <<നിന്ന് കയിന നീ്ട്ട്>> എന്റ് സൊന്നാന്. അദുക്കുള അയാള് കയിന നീ്ട്ട്‌നാന്. അന്നാല് താനെ അയാള് കയിക്ക് സുഗ കെ്ഡേത്ത്‌ദ്. 11ആന പരിസാര്‌ഗാള്‌മ് ബേദബാത്ത്യനാമ്‌ഗാള്‌മ് മൊനേക്ക് തെ്ട്ടി പിരാന്ത്‌ക്കിക്കി കൊണ്ടു ഏസ്സ്‌ന എന്ത് ഗേഡൊ എന്നുവാദ്‌ന പറ്റി തമാക്ക് തമാക്ക് നായ നൊഡിന്താര്.
പന്നന്റ് അപ്പോസുത്തലനാമ്‌ന തെരിന്തെ്ഡ്‌ക്ക്‌ന്റാന്
12അത്തെ ഒന്റു നാള് ഏസ്സ് പരേസ്യ ബേ്ണ്ടി ഒന്റു ഗുഡ്ഡേക്ക് പോനാന്. അദ്‌ല് അയാള് ബെ്ഡ്യബെ്ഡ്യ സാമിന പരേസികൊണ്ടിന്താന്. 13ബെ്ഡിന്ത പ്‌റ തന്ന് സൊല്ലുപഡി നഡാക്ക്‌ന്റവാര്‌ന ബ്‌ളിത്ത് ബരിസ്സി, അവാര്‌ല് പന്നന്റാള്‌ഗാള്‌ന തെരിന്തെ്ഡ്‌ത്ത് അവാര്‌ക്ക് അപ്പോസുത്തലാര്#6:13 അപ്പോസുത്തലാര് ഇദ്‌ക്ക് അര്‌ത്ത തനിസ്യ ഒന്റു കാര്യാക്ക് ബേ്ണ്ടി സൊല്ലി ബ്‌ട്ടവാന്. എന്റ് പേര് ബെത്താന്. 14അവാര് ആരെല്ല എന്റ് സൊന്ന, സീമോനു (ഇയാള്‌ന പത്ത്‌റോസു എന്റ്‌മ് സൊല്ലിന്താര്), അയാള് തമ്പി അന്ത്‌റാസ്, ആക്കോവു, ഓഗന്നാന്, പീലിപോസു, ബറ്‌ത്തലോമായി, 15മത്തായി, തോമാസ്, അല്‌പായി മഗാന് ആക്കോവു, തന്ന് ജാദിക്ക് ബേ്ണ്ടി എന്ത് ഗേയാമ് ബെജെഗാറാന് ആയിര്‌ക്കുവ സീമോനു, 16ആക്കോവു മഗാന് ജൂദാന്, ഏസ്സ്‌ന പോട്ടിഗാറാര്‌ക്ക് കാട്ടി കൊഡുത്ത കര്യോത്തുഗാറാന് ജൂദാന് എന്റവാര്‌ത്തെ.
ഏസ്സ് പഡിസിമ് കൊഡുക്കുന്റാന് നോയിനാമ് തെ്ള്‌സ്‌ന്റാന്
17അത്തെ ഏസ്സ്‌മ് അപ്പോസുത്തലാര്‌മ് ഒന്റായി മലേലിന്ത് ഇ്റാഗി ഒന്റു പഡിഗെ പട്ട്‌ക്ക് ബന്താര്. അദുക്കുള തന്ന് സൊല്ലുപഡിക്ക് നഡാക്കുവ ദൊഡ്ഡ ഒന്റു കൂട്ട ആള്‌ഗാള് അദ്‌ലിന്താര്. അദല്ലാദെ താനെ എര്‌സലേമ്‌ലിന്ത്‌മ് എഗുദ നാഡ്‌ല് ബേ്റെ പല എ്ഡെഗാള്‌ലിന്ത്‌മ് കഡാലോരാത്ത്‌ല് ഇര്‌ക്കുവ സോരു, സീദോനു എന്നുവ എ്ഡെഗാള്‌ലിന്ത്‌മ് 18ഏസ്സ് സൊല്ലുവ നായഗാള്‌ന കേ്ള്‌ക്ക്യാമ് തമാക്കിര്‌ക്കുവ നോയി തീര്യാമ് ബേ്ണ്ടി ദൊഡ്ഡ ഒന്റു കൂട്ട ആള്‌ഗാള്‌മ് അദ്‌ക്ക് ബന്തിന്താര്. പിരാന്ത് ബ്‌ന്ത് കജട്ട പട്ടിന്തവാര് ഒട്ടുക്കുമു സൊക്കാനാനാര്. 19നോയിന തെ്ള്‌സുവാദ്‌ക്കുള്ള സക്‌തി ഏസ്സ്‌ലിന്ത് ബന്ത് എല്ലാ ആള്‌ഗാള്‌നാമ് തെ്ളിസി കൊണ്ടിന്ത്‌ദ്. അദ്‌നാലെ ആള്‌ഗാള് ഏസ്സ്‌ന അണ്ണുഡൊ എന്റ് ഓരാഡ്‌നാര്.
ബാഗ്യാമ് സാപ്പാമ്
20ഏസ്സ് തന്ന് സൊല്ലുപഡി നഡാക്ക്‌ന്റവാര്‌ന നോഡികൊണ്ടു ഇത്തെ സൊന്നാന്:
<<ഏ്ളെഗാളായിര്‌ക്കുവ നിമ്മ ബാഗ്യകേ്ട്ടവാര്. എന്ത്‌ക്കെന്റ് സൊന്ന നിമ്മ സാമി ആളുവാദ്‌ക്ക് പട്ടവാര് ആവുറു.
21ഇന്നാല് പജി ക്‌ഡാക്കുവ നിമ്മ ബാഗ്യകേ്ട്ടവാര്.
എന്ത്‌ക്കെന്റ് സൊന്ന ബേ്റ്‌പ്‌ഡിക്ക മാട്ട്‌ക്ക് നിമാക്ക് തിന്ന്യ കെ്ഡേക്ക്‌മ്. ഇന്നാല് കേ്യിവ നിമ്മ ബാഗ്യകേ്ട്ടവാര്. എന്ത്‌ക്കെന്റ് സൊന്ന നിമ്മ പിര്യപിര്യാത്ത് ഇര്‌ക്കുവുറു.
22മന്‌സാനായി പ്‌റാന്ത്‌റ്‌ക്കുവ എന്ന് സൊല്ലുപഡി നിമ്മ നഡാക്ക്‌ന്റവാര് ആയിര്‌ക്കുവാദ്‌നാലെ
ആള്‌ഗാള് നിമാന പഗേക്കാട്ടിമ്, നിമാന തമ്മ് കൂട്ടാക്ക് സേത്താദിര്‌ക്കാട്ടിമ്,
നിമാന നാണഗെ്ഡ്‌സ്‌ഗാട്ടിമ്, നിമാന കെ്ട്ടവാര് എന്റ് സൊല്ലുഗാട്ടിമ് നിമ്മ ബാഗ്യകേ്ട്ടവാര്.
23അയി നാള്‌ക്ക് നിമ്മ പിര്യപൊങ്കി ആട്ടാഡ്‌ന്. എന്ത്‌ക്കെന്റ് സൊന്ന മേലോഗാത്ത്‌ല് സാമി നിമാക്ക് മ്‌ഗ്‌ന്ത കൂലി തരുവാന്. അവാര് പാട്ടനാമ്‌മ് സാമിദാസ്‌ഗാള്‌ന അദേപാസെ ഗേന്ത്‌റ്‌ന്റാര്.
24ആന പണഗാറാര് ആയിര്‌ക്കുവ നിമാക്ക് കജട്ടാത്തെ.
എന്ത്‌ക്കെന്റ് സൊന്ന നിമ്മ ഇന്നാല് സമ്പോത്ത പെ്ളേക്ക്‌ന്റ്‌റ്.
25ഇന്നാല് ബേ്റ്‌പ്‌ഡിക്ക മാട്ട്‌ക്ക് തിന്നുവ
നിമാക്ക് കജട്ടാത്തെ.
എന്ത്‌ക്കെന്റ് സൊന്ന നിമാക്ക് പജി പ്‌ഡിത്ത് കൊണ്ടേ ഇര്‌ക്ക്‌മ്.
ഇന്നാല് പിര്യപിര്യാത്ത്‌റ്‌ക്കുവ നിമാക്ക് കജട്ടാത്തെ.
എന്ത്‌ക്കെന്റ് സൊന്ന നിമ്മ സുലാക്ക സൊല്ലി കേ്യിവുറു.
26നിമാന പറ്റി എല്ലാ ആള്‌ഗാള് പെരിമെനായ സൊല്ലുഗാട്ടി നിമാക്ക് കജട്ടാത്തെ. എന്ത്‌ക്കെന്റ് സൊന്ന
നിമ്മ് പാട്ടനാമ് ഉറുട്ടു സൊല്ലുവ സാമിദാസ്‌ഗാള്‌ന പറ്റി അദേപാസെത്തെ സൊല്ലിര്‌ക്ക്‌ന്റാര്.>>
പോട്ടിഗാറാരോഡ സീവാന്‌ബെത്ത് നഡാക്കുഡൊ
27<<എന്ന് നായന കേ്ള്‌ക്ക്‌ന്റവാര് ആയിര്‌ക്കുവ നിമാക്ക് നാന് സൊല്ലുവാദ് എന്തെന്റ് സൊന്ന, നിമ്മ് പോട്ടിഗാറാര്‌ന നിമ്മ സീവാന്‌ബെത്ത് നഡാന്. നിമാന പഗേക്ക്‌ന്റവാര്‌ക്ക് നിമ്മ നല്ലാദ് ഗേന്. 28നിമാന സാപ്പ ഇക്ക്‌ന്റവാര്‌ക്ക് നിമ്മ നലമായിര്‌ന് എന്റ് സൊല്ലുനു. നിമ്മോഡ കെ്ട്ട ദിന്‌സ്‌ല് നഡാന്ത്‌പ്‌ഡിത്ത് ഗേന്റവാര്‌ക്ക് ബേ്ണ്ടി നിമ്മ പരേസ്‌ന്. 29ഒരുത്താന് നിന്ന് പഗ്‌ഡ്‌ന അഡിക്കാട്ടി മറ് പഗ്‌ഡ്‌നാമ് കാട്ടി കൊഡുക്കുഡൊ. നിന്ന് പൊദേപ്പ്‌ന എ്ഡ്‌ക്ക്യ ബന്റവാന് നിന്ന് കമ്‌സ്‌ന എ്ഡ്‌ക്കാട്ടി ഗുഡി നീ തഡ്‌ക്കാദെ. 30നിനാന ഉദാവി കേ്ള്‌ക്കുവ ഏവാന്‌ക്ക്‌മ് കൊഡു. നിനാക്കിര്‌ക്കുവാദ് എന്തൊന്റുന ആരാറ്റ എ്ഡ്‌ത്ത് പോഗാട്ടി നീ അദ്‌ന തിരിക്കി കേ്ള്‌ക്കാദെ. 31ബേ്റെ ആള്‌ഗാള് നിമാക്ക് ബേ്ണ്ടി എന്ത് ഗേന്ത് തരുഡൊ എന്റ് നിമ്മ ആസെപഡ്‌ന്റ്‌റൊ അദ് നിമ്മ അവാര്‌ക്ക്‌മ് ഗേന്ത് കൊഡുക്കുഡൊ.
32നിമാന സീവാന്‌ബെത്ത് നഡാക്ക്‌ന്റവാരോഡ താനെ നിമ്മ സീവാന്‌ബെത്ത് നഡാന്തദാന നിമാക്ക് എന്ത് ഉവഗര? പാവ ഗേന്റവാര്‌മ് തമാന സീവാന്‌പഡ്‌ന്റവാര്‌ന സീവാന്‌പഡ്‌ന്റാരല്ല. 33നിമാക്ക് നല്ലാദ് ഗേന്റവാര്‌ക്ക് താനെ നിമ്മ നല്ലാദ് ഗേന്ത നിമാക്ക് എന്ത് ഉവഗര? പാവ ഗേന്റവാര്‌മ് അത്തേത്തെ ഗേന്റാരല്ല. 34കഡാന് കൊഡുത്ത തിരിക്കി കെ്ഡേക്ക്‌മ് എന്റ് ഒറേപ്പിര്‌ക്ക്‌ന്റവാര്‌ക്ക് കഡാന് കൊഡുത്തദാന നിമാക്ക് എന്ത് ഉവഗര? എന്ത്‌ക്കെന്റ് സൊന്ന പാവ ഗേന്റവാര്‌മ് പാവ ഗേന്റവാര്‌ല് കഡാന് കൊഡുത്തദാന തിരിക്കി കെ്ഡേക്ക്‌മെന്റ് ഒറേപ്പിര്‌ക്ക്‌ന്റവാര്‌ക്ക് കഡാന് കൊഡുക്കുന്റാരല്ല. 35ആന നിമ്മ് പോട്ടിഗാറാരോഡ നിമ്മ സീവാന്‌ബെത്ത് നഡാക്കുഡൊ. അവാര്‌ക്ക് നിമ്മ നല്ലാദ് ഗേന്ത് കൊഡുനു. തിരിക്കി കെ്ഡേക്ക്‌മ് എന്റ് നെഞ്ചഡെ ബെക്കാദെ നിമ്മ കഡാന് കൊഡുനു. അന്നാപ്പ് നിനാക്ക് കെ്ഡേക്കുവ കൂലി മൊത്തനാക്ക് ഇര്‌ക്ക്‌മ്. നിമ്മ എല്ലാദ്‌ക്ക്‌മ് ബ്‌ഡ ദൊഡ്ഡവാന് ആയിര്‌ക്കുവ സാമിപ്‌ള്ളെഗാള്‌മ് ആവുറു. എന്ത്‌ക്കെന്റ് സൊന്ന സാമി നണ്ണില്ലത്തവാരോഡാമ് കേ്ഡ്‌ഗെ്ട്ടവാരോഡാമ് ഗവ ബെത്ത്‌റ്‌ന്റാന്. 36നിമ്മ് അപ്പാന് സാമി ഗവപഡ്‌ന്റവാന് ആയിര്‌ക്കുവാദ്‌നാലെ നിമ്മാമ് ഗവപഡ്‌ന്റവാര് ആയിര്‌ന്.>>
ആര്‌നാമ് ബിദിക്കാദേന്
37<<നിമ്മ ആര്‌നാമ് കുറ്റ സൊല്ലി ബിദിക്കാദേന്. അന്നാപ്പ് സാമി നിമാനാമ് ബിദിക്കമാട്ടാന്. ആര്‌നാമ് ദെ്ണ്ടിക്കാദേന്, അന്നാപ്പ് സാമി നിമാനാമ് ദെ്ണ്ടിക്കമാട്ടാന്. അഡ്‌ത്തവാര് കുറ്റ ഗേഗാട്ടി നിമ്മ പൊറുത്തിര്‌ന്. അന്നാപ്പ് സാമിമ് നിമ്മ കുറ്റ ഗേഗാട്ടി പൊറുക്കുവാന്. 38നിമ്മ കൊഡുനു, അന്നാപ്പ് നിമാക്ക്‌മ് കെ്ഡേക്ക്‌മ്. അമിക്ക്യമിക്കി തുമ്പി സൂസി പോവ അളാവുക്കു അളാന്ത് മഡിസീലേക്ക് നിമാക്ക് കെ്ഡേക്ക്‌മ്. അഡ്‌ത്തവാര്‌ക്ക് നിമ്മ എഞ്ച്‌ക്ക് അളാന്ത് കൊഡുക്കുന്റുറൊ അഞ്ച്‌ക്ക് താനെത്തെ സാമി നിമാക്ക് തിരിക്കിമ് തരുവാന്.>>
39ഏസ്സ് അവാര്‌ക്ക് ഇത്തെ ഒന്റു കദെ ഗുഡി സൊന്നാന്: <<ഒന്റു കുറുഡാന്‌ക്ക് ബേ്റെ ഒന്റു കുറുഡാന്‌ക്ക് ബട്ടെ കാട്ട്യ മുഡിമ? റാഡാള്‌മ് കുയിക്ക് ബീ്വാരല്ല? 40പഡിക്ക്‌ന്റവാന് പഡുസുവ ബാത്ത്യാന്‌ന ബ്‌ഡ ദൊഡ്ഡവാനല്ല. ആന ബാത്ത്യാനോഡിന്ത് എല്ലാദ്‌നാമ് പഡിത്തവാര് അയി ബാത്ത്യാന്‌ന പാസെ ആവാര്.
41ആന നിന്ന് കണ്ണ്‌ല് മുട്ടിതോര ഇര്‌ക്കുവ സണ്ട്‌ന ബെത്ത് കൊണ്ടു അഡ്‌ത്തവാന് കണ്ണ്‌ല സ്‌ന്ന സണ്ട്‌ന നോഡുവാദ് എന്ത്‌ക്ക്? 42നിന്ന് കണ്ണ്‌ല് ഇര്‌ക്കുവ മുട്ടിതോര സണ്ട്‌ന കാണാദെ <മാ, നില്ല് നിന്ന് കണ്ണ്‌ല സണ്ട്‌ന എ്ഡ്‌ത്ത് തള്ള്‌ന്റെ> എന്റ് എത്തെ നിനാക്ക് അഡ്‌ത്തവാന്‌ക്ക് സൊല്ല്യ മുഡിമ്? ബക്‌തിഗാറാനായി നഡിക്ക്‌ന്റവാനെ, നീ മുദാല് നിന്ന് കണ്ണ്‌ല് മുട്ടിതോര ഇര്‌ക്കുവ സണ്ട്‌ന എ്ഡ്‌ത്ത് തള്ള്. അന്നാപ്പ്‌ത്തെ അഡ്‌ത്തവാന് കണ്ണ്‌ല സ്‌ന്ന സണ്ട്‌ന എ്ഡ്‌ത്ത് തള്ള്യ നിനാക്ക് സൊക്കാന കാട്ട്‌മ്.>>
മരാക്ക് തഗ്‌ന്ത കായി
43<<നല്ല മരാത്ത്‌ല് പ്‌ഡിക്കുവ കായിഗാള്‌ക്ക് കുറുഡിറ്‌ക്ക മാട്ട. സായി പ്‌ഡിത്ത മരാത്ത്‌ല് പ്‌ഡിക്കുവ കായിഗാള് കുറുഡുബ്‌ന്ത്‌റ്‌ക്ക്‌മ്. 44മുരുക്കു മരാത്ത്‌ലിന്ത് അത്തി പഗാമ് മുള്ളു സെ്ഡിലിന്ത് മുന്തിരി പഗാമ് കെ്ഡേക്കമാട്ട. ഏദ് മര എന്റ് അയി മര കായിത്ത്‌റ്‌ക്കുവ കായിന നോഡി നെപ്പ് കെ്ഡേസ്‌ല. 45നല്ല മന്‌സാന് തന്ന് മനേസ്സ്‌ല് തുമ്പിസി ബെത്ത്‌റ്‌ക്കുവ നല്ല എ്ണ്ണഗാള്‌ലിന്ത് നല്ല കാര്യഗാള് ഗേന്റാന്. കെ്ട്ട മന്‌സാന് തന്ന് മനേസ്സ്‌ല് തുമ്പിസി ബെത്ത്‌റ്‌ക്കുവ കെ്ട്ട എ്ണ്ണഗാള്‌ലിന്ത് കെ്ട്ട കാര്യഗാള്‌ന ഗേന്റാന്. നിന്ന് മനനേസ്സ്‌ല് തുമ്പിമഗിവാദ്‌ത്തെ നിന്ന് ബായിലിന്ത്‌മ് ബെ്ളിഗെ ബരുവാദ്.>>
ബുദ്ദിര്‌ക്ക്‌ന്റവാന് എ്ഡ്‌ക്കുവ ബീ്ഡ്‌മ് ബുദ്ദില്ലത്തവാന് എ്ഡ്‌ക്കുവ ബീ്ഡ്‌മ്
46<<നാന് സൊല്ലുവാദ്‌ന ഗേഗാദിന്ത് കൊണ്ടു നിമ്മ എനാന <ആണ്ടവാനെ, ആണ്ടവാനെ> എന്റ് ബ്‌ളിക്കുവാദ് എന്ത്‌ക്ക്? 47എന്ന് പട്ട്‌ക്ക് ബന്ത് നാന് സൊല്ലുവ നായഗാള്‌ന കേ്ട്ട് അദേപാസെ നഡാക്ക്‌ന്റവാന് എത്തവാളെന്റ് നാന് നിമാക്ക് സൊല്ലി തന്റെ. 48അയാള് ഇത്തെ ബീ്ഡ് എ്ഡ്‌ത്തവാന്‌ക്ക് സമാത്തെ. അയാള് ബീ്ഡ് എ്ഡ്‌ക്ക്യ ബെ്ട്ടുവ സാല്‌ഗാള്‌ന നല്ല താത്തി ബെ്ട്ടി അറെ കുദ്ദാക്ക് ബേസ്‌മട്ട കെ്ട്ടി ബീ്ഡ് എഡ്‌ക്ക്‌ന്റാന്. ദൊഡ്ഡ മഗേമ് അഡിത്ത് ദൊഡ്ഡ നീര്‌മ് ബന്ത് ബീ്ഡ്‌ക്ക് ഏ്റ്‌റ്റ്, എന്റിന്ത് ഗുഡി അയി ബീ്ഡ്‌ക്ക് ഒന്റുമു ആഗാലെ. എന്ത്‌ക്കെന്റ് സൊന്ന അയാള് അയി ബീ്ഡ്‌ന നല്ല ഒറേപ്പോഡ കെ്ട്ടിന്താന്. 49ആന എന്ന് നായഗാള്‌ന കേ്ട്ട് അദേപാസെ നഡാക്കാത്തവാന് ഇത്തെ ബീ്ഡ് എ്ഡ്‌ത്തവാന്‌ക്ക് സമാത്തെ. അയാള് ബീ്ഡ് എ്ഡ്‌ക്ക്യ ബെ്ട്ടുവ സാല് ബെ്ട്ടാദെ ബീ്ഡ് എ്ഡ്‌ത്താന്. അദ്‌നാലെ ദൊഡ്ഡ നീര് ബന്ത് അയി ബീ്ഡ് ബ്‌ന്ത് ഒന്റേപെ്ട്ട് പിരിങ്കി തള്ള്‌ട്ട്.>>
Currently Selected:
ലൂക്കോസു 6: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
