മത്തായി 28
28
ഏസ്സ് ഉജുര്‌ളാഗ്‌ന്റാന്
1ഒയിവു നാള് കളിന്ത്, ബാരാത്ത്‌ല് ഒണ്ണാവാദ് നാള് ബെ്ഡ്യാകാല ജാമാത്ത്‌ല് താനെ മദ്ദള പട്ടണഗാറിസി മറിയാമ് ആക്കോവുത്തുമു ഓസേപ്‌ത്ത്‌മ് അവ്വേസി മറിയാമ് കല്ലളെന നോഡ്യ പോനാര്.
2അദുക്കുള സട്ടന ബൂമി ദൊഡ്ഡാദ്‌ക്ക് അദ്‌റ്‌ന്ത്‌ദ്. എന്ത്‌ക്കെന്റ് സൊന്ന, ആണ്ടവാന് ദൂദാന് മേലോഗാത്ത്‌ലിന്ത് ഇ്റാഗി ബന്ത് കല്ലളേക്ക് അഡേത്തിന്ത കല്ല്‌ന ഉറുട്ടി ജറേത്ത് അദ്‌കുദ്ദാക്ക് കുക്കാന്തിന്താന്. 3അയി ദൂദാന് മിച്ചാന പാസെ കത്തി കൊണ്ടിന്താന്. അയാള് ഇക്കിന്ത ഉഡുപ്പു മഞ്ച്‌ന പാസെ ബെ്ള്ളെബെ്ള്ള്യ ഇന്ത്‌ദ്. 4കാവ കാത്തിന്ത പട്ടളഗാറാര് ദൂദാന്‌ന കണ്ട് അഞ്ചിക്കെപട്ട് സദ്‌റബെ്ട്ടി മരതട്ടിതള്ള്‌നാര്.
5ദൂദാന് അയി പെ്ണ്ണ്‌മക്കാള്‌ക്ക്: <<അഞ്ചദേന്, കുരുസുക്കു സേത്തി ആണി അഡിത്ത് കൊന്റ ഏസ്സ്‌നത്തെ നിമ്മ പരാക്ക്‌ന്റ്‌റ് എന്റ് എനാക്ക് തെരിന്റ്. 6അയാള് ഇദ്‌ലില്ലെ. അയാള് സൊല്ലിന്താദ്‌ന പാസെ അയാള് ഉജുര്‌ളാഗ്‌നാന്. നിമ്മ ബന്ത് അയാള്‌ന ബെത്ത എ്ഡെന നോഡുനു. 7നിമ്മ സട്ടന പോയി അയാള് സൊല്ലുപഡി നഡാക്ക്‌ന്റവാര്‌ക്ക്: <അയാള് സത്തവാര്‌ലിന്ത് ഉജുര്‌ളാഗി നിമാക്ക് മുദാല് ഗലീലാക്ക് പോന്റാന്. അദ്‌ല് ബെത്ത് നിമ്മ അയാള്‌ന കാണുവുറു> എന്റ് നിമ്മ അവാര്‌ക്ക് സൊല്ലുനു. നാന് നിമാക്ക് സൊന്നാദ്‌ന നെനേത്തിര്‌ന്>> എന്റ് സൊന്നാന്.
8അദ്‌നാലെ അയി പെ്ണ്ണ്‌മക്കാള് അഞ്ചിക്കെപട്ട് കൊണ്ടുമു പിര്യപിര്യാത്തോഡാമ് സട്ടന കല്ലളേലിന്ത് ബ്‌ട്ട് സൊല്ലുപഡി നഡാക്ക്‌ന്റവാര്‌ക്ക് സൊല്ല്യ ഓഡി പോനാര്. 9അദുക്കുള ഏസ്സ് അവാര് മുന്നുക്കു ബന്ത് നിന്റ്: <<നിമ്മ നിമ്മ്‌ദ്യായി ഇര്‌ന്>> എന്റ് സൊന്നാന്. അവാര് അര്‌ഗെ പോയി ഏസ്സ് കാല്‌ന പ്‌ഡിത്ത് അയാള്‌ന കുമ്മുഡുനാര്. 10എന്റിന്ത് ഏസ്സ് അവാര്‌ക്ക്: <<അഞ്ചദേന്, നിമ്മ പോയി എന്ന് അണ്ണാര്‌തമ്പ്യാര്‌ന പാസെ ഇര്‌ക്ക്‌ന്റവാര്‌ന ഗലീലാക്ക് പോയ സൊല്ലുനു. അദ്‌ല് അവാര് എനാന കാണുവാര്>> എന്റ് സൊന്നാന്.
കാവ കാത്തിന്ത പട്ടളഗാറാര് സേദി ബ്‌ഡ്‌ന്റാര്
11അയി പെ്ണ്ണ്‌മക്കാള് പോവ ഗളിഗേല് കല്ലളേക്ക് കാവ ഇന്ത പട്ടളഗാറാര്‌ല് ലേസ പട്ടളഗാറാര് പട്ടണാക്ക് പോയി നഡാന്താദ്‌ന ഒട്ടുക്കു എഗുദാര് പൂസാരി തലെവാര്‌ഗാള്‌ക്ക് സൊന്നാര്. 12എഗുദാര് പൂസാരി തലെവാര്‌ഗാള് മൂപ്പനാമ്‌ഗാളോഡ ഒന്റായി കൂഡി പട്ടളഗാറാര്‌ക്ക് മൊത്തന പണ കൊഡുക്ക്യ ഓസണെ മാഡി അവാര്‌ക്ക്: 13<< <എമ്മ ഉറാങ്കിര്‌ക്കാട്ടി ഏസ്സ് സൊല്ലുപഡി നഡാക്ക്‌ന്റവാര് ജാമാത്ത്‌ല് ബന്ത് അയാള് സാവുന ത്‌റ്‌ഡി എ്ഡ്‌ത്ത് പോനാര്> എന്റ് സൊല്ലുനു. 14നാഡ് തലെവാന് ഇദ്‌ന കേ്ട്ടദാന എമ്മ അയാള്‌ന സമ്മദിക്ക്യ ബെത്ത് നിമാക്ക് ബുദ്ദിമുട്ടു മാഡാദെ ബെക്ക്‌ന്റേമ്>> എന്റ് സൊന്നാര്. 15അവാര് പണാന ബാങ്കി എഗുദാര് പൂസാരി തലെവാര്‌ഗാള് സൊന്ന പാസെ ഗേന്താര്. ഈ കദെ ഇന്റളാവുക്കു എഗുദാര് പട്ട്‌ല് സൊല്ലികൊണ്ടു ഇര്‌ന്റാര്.
ഏസ്സ് തന്ന് സൊല്ലുപഡി നഡാക്ക്‌ന്റവാര്‌ക്ക് കൊഡുക്കുവ പൊറുപ്പു
16ആന ഏസ്സ് സൊല്ലുപഡി നഡാക്കുവ പദ്‌നൊണ്ണാള്‌ഗാള് ഗലീല നാഡ്‌ല് ഏസ്സ് പോയ സൊല്ലിന്ത മലേക്ക് പോനാര്. 17അദ്‌ല് അവാര് ഏസ്സ്‌ന കണ്ട് കുമ്മുഡുനാര്. എന്റാല്‌മ് അവാര് കൂട്ടാത്ത്‌ല ലേസ ആള്‌ഗാള് ഇദ് ഏസ്സ്‌ത്തേഗൊ എന്റ് സൊല്ലി സന്തേഗപട്ടാര്. 18അദുക്കുള ഏസ്സ് അവാരര്‌ഗെ പോയി: <<മേലോഗനാമ് ബൂമിനാമ് ആള്‌വാദ്‌ക്കുള്ള എല്ലാ അദിഗരനാമ് എനാക്ക് തന്ത്‌റ്‌ക്ക്‌ന്റാന്. 19അദ്‌നാലെ നിമ്മ എല്ലാ സാരിമ് പോയി എല്ലാ ജാദിഗാള്‌നാമ് എന്ന് സൊല്ലുപഡി നഡാക്ക്‌ന്റവാര് മാഡ്‌ന്. അത്തെ അപ്പാന് പേര്‌നാമ്, മഗാന് പേര്‌നാമ്, സാമിനിഗാല് പേര്‌നാമ് സൊല്ലി അവാര്‌ന നീര്‌ക്ക് മുളുഗുസുനു. 20നാന് നിമാക്ക് സൊല്ലിര്‌ക്കുവ കാര്യഗാള്‌ക്ക് കെ്ട്ട്‌പട്ട് നഡാക്ക്യ അവാര്‌ക്ക് പഡ്‌സ്‌ന്. ഉലഗ കഡേസി മാട്ട്‌ക്ക് നാന് നിമ്മോഡൊപ്പ ഇര്‌ക്കുവെ>> എന്റ് സൊന്നാന്.
Currently Selected:
മത്തായി 28: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
