മര്‌ക്കോസു 3
3
കയി സപ്പെബ്‌ന്ത നോയിഗാറാന്‌ന ഏസ്സ് തെ്ള്‌സ്‌ന്റാന്
1ഏസ്സ് പിന്നെ ഒന്റു നാള് എഗുദാര് പരേസുവ ബീ്ഡ്‌ക്ക് പോനാന്. അദുക്കുള അദ്‌ല് കയി സപ്പെബ്‌ന്ത ഒന്റൊരുത്താന് ഇന്താന്. 2അവാര് ഏസ്സ്‌ന കുറ്റഗാറാന് മാഡ്യ ബേ്ണ്ടി ഒയിവു നാള് അയാള് അയി നോയിഗാറാന്‌ന തെ്ള്‌സ്‌ന്റാനൊ എന്റ് ലേസ എഗുദാര് സൊക്കാന നോഡികൊണ്ടിന്താര്. 3<<ഇ്ളാഗി ആള്‌ഗാള്‌ക്ക് മുന്നുക്കു നില്ല്, ഇദ്‌ല് ഇര്‌ക്ക്‌ന്റവാരൊട്ടുക്കു നിനാന കാണുഡൊ>> എന്റ് ഏസ്സ് കയി സപ്പെബ്‌ന്ത്‌റ്‌ക്കുവ നോയിഗാറാന്‌ന നോഡി സൊന്നാന്.
4പ്‌റ ഏസ്സ് ആള്‌ഗാള്‌ന: <<ഒയിവു നാള് നല്ലാദ് ഗേവാദൊ, കെ്ട്ടാദ് ഗേവാദൊ, ഒന്റു ഉജുരുന കാപാറ്റുവാദൊ, അളിക്കുവാദൊ, ഏദ് സെരി?>> എന്റ് അവാര്‌ന കേ്ട്ടാന്. അദുക്കുള അവാര് ഒന്റുമു സൊല്ലാദെ സപ്പെന്റിന്താര്.
5അവാര്‌ക്ക് ഇര്‌ക്കുവ മരനെഞ്ച്‌ന നെനേത്ത് ഏസ്സ് ദുക്കപട്ട് പോനാന്. അയാള് മൊനേക്ക് തെ്ട്ടി കൊണ്ടു അവാര്‌ന സുറ്റീല്‌മ് നോഡുന പ്‌റ അയി നോയിഗാറാന്‌ക്ക്: <<നിന്ന് കയിന നീ്ട്ട്>> എന്റ് സൊന്നാന്. അയാള് കയി നീ്ട്ട്‌നാന്. അന്നാല് താനെ അയാള് കയിക്ക് സുഗ കെ്ഡേത്ത്‌ദ്. 6അന്നാല് താനെ പരിസാര് ബെ്ളിഗെ പോയി എരോദ്യരോഡ ഏസ്സ്‌ന എത്തെ കൊല്ലുഡൊ എന്നുവാദ്‌ന പറ്റി സട്ട കെ്ട്ട്‌നാര്.
എഞ്ചോ ആള്‌ഗാള് ഏസ്സ് പിന്ന്‌മേലെ പോന്റാര്
7ഏസ്സ് തന്ന് സൊല്ലുപഡി നഡാക്ക്‌ന്റവാരോഡ ഗലീല കഡാലോരാക്ക് പോനാന്. ഗലീലാലിന്ത് ദൊഡ്ഡ ഒന്റു കൂട്ട ആള്‌ഗാള് ഏസ്സ് പിന്ന്‌ക്ക് പോനാര്. 8എഗുദ, എര്‌സലേമ്, ഏദോമു, ഓറ്‌ദ്ദാന് ബാനിക്ക് അയ്യെ്ട്ടി ഇര്‌ക്കുവ ഊരുഗാള്‌മ്, സോരു ഊരുക്കുമു സീദോനു ഊരുക്കുമു സുറ്റീലിര്‌ക്കുവ ഊരുഗാള്‌ല്‌മ് ഇന്ത് ഏസ്സ് ഗേന്ത കാര്യഗാള്‌ന കേ്ട്ട് മൊത്തന ആള്‌ഗാള് ഏസ്സ് പട്ട്‌ക്ക് ബന്ത് തുമ്പുനാര്. 9-10എഞ്ചോ നോയിഗാറാര്‌ന ഏസ്സ് തെ്ളിസിന്താന്. അദ്‌നാലെ മൊത്തന നോയിഗാറാര് അയാള്‌ന അണ്ണുഡൊ എന്റ് നെനേത്ത് ഉന്തിതള്ളി മുന്നുക്കു ബന്താര്. ആള്‌ഗാള് തനാന നെ്ഗ്ഗ്‌സാദെ ഇര്‌ക്ക്യ തനാക്ക് താനെ ഒന്റു തോണിന എ്ഡ്‌ത്ത് ഒരിക്കി ബെക്ക്യ തന്ന് സൊല്ലുപഡി നഡാക്ക്‌ന്റവാര്‌ക്ക് സൊന്നാന്. 11തട്ടിര്‌ക്കുവ കെ്ട്ടജാദിഗാള് ഏസ്സ്‌ന കാണ്‌ഗാട്ടി അയാള് കാല്‌ക്ക് ബ്‌ന്ത്, <<നീ സാമിമഗാന്>> എന്റ് ദൊഡ്ഡാദ്‌ക്ക് അഗാറി സൊല്ലുറ്റു. 12തനാന പറ്റി സൊല്ലി പജാത്ത ബേ്ഡ എന്റ് തട്ടിര്‌ക്കുവ ജാദിഗാള്‌ക്ക് ഏസ്സ് കണ്ടിപ്പായി സൊന്നാന്.
ഏസ്സ് തന്ന് സൊല്ലുപഡി നഡാക്ക്യ പന്നന്റാള്‌ഗാള്‌ന തെരിന്തെ്ഡ്‌ക്ക്‌ന്റാന്
13ഏസ്സ് ഒന്റു ഗുഡ്ഡേക്ക് കുദ്ദാക്ക് ഏ്റി പോയി തനാക്ക് പ്‌ഡിത്തവാര്‌ന അര്‌ഗെ ബ്‌ളിത്താന്. അവാര് അര്‌ഗെ ബന്താര്. 14അയി പന്നന്റ് ആള്‌ഗാള്‌ന തെരിന്തെ്ഡ്‌ത്ത് അപ്പോസുത്തലാര്#3:14അപ്പോസുത്തലാര്ഈ ബാക്ക്‌ക്ക് അര്‌ത്ത സൊല്ലി ബ്‌ട്ടവാന് ഇല്ലപോന ഒന്റു അദിഗാരി തനാക്ക് ബദ്‌ല തന്ന് അദിഗരത്തോഡ സൊല്ലി ബ്‌ട്ടവാന് എന്റ്‌ത്തെ. ഏസ്സ് ഈ ബൂമില് തന്ന് ഗിലാസ ഗേയ തെരിന്തെ്ഡ്‌ത്ത് അദിഗരത്തോഡ സൊല്ലി ബ്‌ട്ട ആള്‌ഗാള്‌ത്തെ ഈ അപ്പോസുത്തലാര്. എന്റ് പേര് ബെത്താന്. <<എന്നോഡപ്പ ഇര്‌ക്ക്യാമ്, നല്ല സേദിന സൊല്ല്യ സൊല്ലി ബ്‌ഡ്യാമ് നാന് നിമാന തെരിന്തെ്ഡ്‌ത്തെ. 15തട്ടിര്‌ക്കുവ കെ്ട്ടജാദിഗാള്‌ന തട്ടിസിതള്ള്യ നിമാക്ക് അദിഗര കെ്ഡേക്കു>> എന്റ് ഏസ്സ് അവാര്‌ക്ക് സൊന്നാന്. 16സീമോനുക്കു (ഏസ്സ് പത്ത്‌റോസു എന്റ് പേര് ബെത്താന്.) 17സെവേദി മഗനച്ചനാര് ആക്കോവുക്കുമു അയാള് തമ്പി ഓഗന്നാന്‌ക്ക്‌മ് <<ഇ്ഡി ജദ്ദ മക്കാള്>> എന്റ് അര്‌ത്ത മാഡുവ <<ബൊവനേര്‌ഗസ്>> എന്റ് പേര് ബെത്താന്. 18അന്ത്‌റാസ്, പീലിപോസു, ബറ്‌ത്തലോമായി, മത്തായി, തോമാസ്, അല്‌പായി മഗാന് ആക്കോവു, തദ്ദായി, തന്ന് ജാദിക്ക് ബേ്ണ്ടി എന്ത് ഗേയാമ് ബെജെഗാറാന് ആയിര്‌ക്കുവ സീമോനു, 19ഏസ്സ്‌ന കാട്ടി കൊഡുത്ത കര്യോത്തുഗാറാന് ജൂദാന്; ഇവാര്‌ത്തെ ഏസ്സ് തെരിന്തെ്ഡ്‌ത്ത ആള്‌ഗാള്.
ഏസ്സ്‌മ് ബേല്‌സെവൂലുമു
20പ്‌റസാരി ഏസ്സ് ബീ്ഡ്‌ക്ക് പോയിര്‌ക്കാട്ടി പിന്നേമ് ആള്‌ഗാള് ബന്ത് തുമ്പുനാര്. ഏസ്സ്‌ക്ക്‌മ് സൊല്ലുപഡി നഡാക്ക്‌ന്റവാര്‌ക്ക്‌മ് തീനി തിന്ന്യ ഗുഡി മുഡ്യാത്ത പാസെ ആള്‌ഗാള് ബന്താര്. 21അയാള് ബീ്ഡ്‌ഗാറാര്‌ക്ക് ഇദ് തെരിന്ത്‌ദ്. ഏസ്സ്‌ക്ക് പിരാന്ത് ആയിര്‌ന്റ് എന്റ് സൊല്ലി ബീ്ഡ്‌ഗാറാര് അയാള്‌ന പ്‌ഡിത്ത് പോയ ബന്താര്.
22<<ഇയാളോഡ ബേല്‌സെവൂലു ഇര്‌ക്ക്‌ന്റ്. തട്ടിര്‌ക്കുവ ജാദിനെല്ല തട്ടിസിതള്ള്യ അദിഗര കൊഡുക്കുവാദ് കെ്ട്ടജാദിഗാള് തലെവാന് ഈ ബേല്‌സെവൂലുത്തെ>> എന്റ് എര്‌സലേമ്‌ലിന്ത് ബന്ത ബേദബാത്ത്യനാമ് സൊന്നാര്.
23ഏസ്സ് അവാര്‌ന ബ്‌ളിത്ത് ഒന്റു കദെ സൊല്ലി പഡ്‌സ്‌നാന്. <<സെയിത്താന് സെയിത്താന്‌ന താനെ എത്തെ മുഡിക്കി ബ്‌ഡ്‌വാന്? 24ഒന്റു നാഡ്‌ലവാര് ഒന്റൊന്റു കച്ചിഗാളായി ആങ്കീങ്ക് പോട്ടിക്ക് നിന്റദാന അയി നാഡ് നെലെനില്ലമാട്ട. 25ആളാന്‌പെ്ണ്ട് മല്ല്‌പ്‌ഡിക്കുവ ബീ്ഡ് കലേന്ത് പോമു. 26സെയിത്താന്‌ക്ക് അഡി ഇര്‌ക്കുവ കെ്ട്ടജാദിഗാള് റാഡായി പ്‌റ്‌ന്ത് തമാക്ക് തമാക്ക് താനെ പോട്ടിപ്‌ഡിത്തദാന അയാള് നാഡ് നെലെനില്ലമാട്ട. അദ്‌ക്ക് മുഡിവു ബന്ത്‌റ്‌ന്റ്. 27മുജുവുഗാറാന്‌ന പ്‌ഡിത്ത് കെ്ട്ടി ബെക്ക്യ മുഡ്യാദെ പോന അയാള് ബീ്ഡ്‌ക്ക് നൊഗേന്ത് അയാള്‌ക്കിര്‌ക്കുവ മുദാല്‌മുമ്പുന ത്‌റ്‌ഡി എ്ഡ്‌ക്ക്യ ആര്‌ക്ക്‌മ് മുഡ്യാമാട്ട. മുദാല് അയാള്‌ന പ്‌ഡിത്ത് കെ്ട്ടി ബെക്കുഡൊ. എന്റപ്‌റാത്തെ അയാള് മുദാല്‌മുമ്പുന ത്‌റ്‌ഡി എ്ഡ്‌ക്ക്യ മുഡിവു. 28അദ്‌നാലെ നാന് നിമാക്ക് ഒന്റു സത്ത്യ സൊന്റെ. മന്‌സാന് ഗേന്ത് കൂട്ടുവ പാവഗാള്‌ക്ക് പൂരാമ് പൊറിമെ കെ്ഡേക്കു. മന്‌സാന് സാമിന പറ്റി സൊല്ലുവ കുറ്റഗാള്‌ക്ക്‌മ് പൊറിമെ കെ്ഡേക്ക്‌മ്. 29ആന സാമിനിഗാല്‌ന കുറ്റ സൊല്ലുന്റവാര്‌ക്ക് പൊറിമെ കെ്ഡേക്കമാട്ട; അയാള്‌ക്ക് എന്നാല്‌ക്ക്‌മ് പൊറിമെ കെ്ഡേക്കമാട്ട.>>
30<<ഏസ്സ്‌ക്ക് ഒന്റു കെ്ട്ടജാദി തട്ടിര്‌ക്ക്‌ന്റ്>> എന്റ് അവാര് സൊല്ലിന്താര്. അദ്‌നാലെത്തെ ഏസ്സ് അത്തെ സൊന്നാദ്.
ഏസ്സ് സൊന്തഗാറാര് ആര്?
31അദ്‌ക്ക് പ്‌റ ഏസ്സ് അവ്വേസിമ് തമ്പ്യാമ്‌മ് ബെ്ളിഗെ ബന്ത് നിന്റ് ഏസ്സ്‌ന ബ്‌ളിത്ത് ബര്യ സൊല്ലി ബ്‌ട്ടാര്. 32എഞ്ചോ ജന ഏസ്സ്‌ക്ക് സുറ്റീല് കുക്കാന്തിന്താര്. <<നിന്ന് അവ്വേമ് തമ്പ്യാമ്‌മ് ബെ്ളിഗെ ബന്ത് നിന്റ് നിനാന കാത്ത്‌റ്‌ക്ക്‌ന്റാര്>> എന്റ് അവാര് സൊന്നാര്.
33<<എന്ന് അവ്വെ ആര്? എന്ന് തമ്പ്യാമ് ആര്?>> എന്റ് അയാള് അവാര്‌ന കേ്ട്ടാന്.
34പ്‌റ തനാക്ക് സുറ്റുമു ഇന്തവാര്‌ന നോഡി ഏസ്സ് ഇത്തെ സൊന്നാന്: <<ഈ കുക്കാന്ത് ഇര്‌ക്ക്‌ന്റവാര്‌ത്തെ എന്ന് അവ്വേമ് തമ്പ്യാമ്‌മ്; 35സാമി ആസെപഡുവാദ്‌ന ഗേന്റവാര്‌ത്തെ എന്ന് തമ്പ്യാമ്‌മ് തങ്ക്യാമ്‌മ് അവ്വേമ്.>>
Currently Selected:
മര്‌ക്കോസു 3: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
