മര്‌ക്കോസു 4
4
ബെദെ ബിത്ത്‌ന്റവാന് കദെ
1പിന്നേമ് ഒന്റു നാള് ഏസ്സ് ഗലീല കഡാലോരാത്ത്‌ല് ഇന്ത് ആള്‌ഗാള്‌ക്ക് ബുദ്ദിനായ സൊല്ല്യ പ്‌ഡിത്താന്. ജനകൂട്ട ദാസ്‌ത്തി ആയിന്താദ്‌നാലെ ഏസ്സ് കഡാല്‌ലിന്ത് ഒന്റു തോണിക്ക് ഏ്റി അദ്‌ല് കുക്കാന്തിന്താന്. ആള്‌ഗാളൊട്ടുക്കു കഡാലോരാത്ത്‌ല് ഇന്താര്. 2അയാള് പല കാര്യഗാള്‌നാമ് കദെ ദിന്‌സ്‌ല് സൊല്ലി കൊഡുത്തു പഡിസിന്താന്. പഡിസി കൊണ്ട്‌റ്‌ക്കാട്ടി ഇത്തെ സൊന്നാന്: 3<<ഈങ്ക് നോഡുനു, ഒന്റു കാഡ്‌ഗാറാന് ബെദെ എ്ഡ്‌ത്ത് ബിത്ത്യ പോനാന്. 4അയാള് ബിത്ത്‌ഗാട്ടി ലേസ ബെദെ ബട്ടേക്ക് ബ്‌ന്ത്‌ദ്. അദ്‌ന പക്കിഗാള് ബന്ത് കൊത്തി തിന്റ് തള്ള്‌ട്ട്. 5ബേ്റെ ലേസ ബെദെ അത്ത്‌റ മണ്ണില്ലാത്ത അറെ പട്ട്‌ക്ക് ബ്‌ന്ത്‌ദ്. അദ്‌ല് മണ്ണ് അദിഗ ഇല്ലത്താദ്‌നാലെ അയി ബെദെഗാള് സട്ടന മൊളേത്ത്‌ദ്. 6ആന ബേര് ഇ്റാഗ്യ മുഡ്യാത്തനാലെ നേര കഡാന്ത് ബെക്കെകാല് തട്ട്‌ഗാട്ട്യെല്ല അയി പയിര്‌ഗാള് ഉണാന്ത് തള്ള്‌ട്ട്. 7ലേസ ബെദെ മുള്ളു ഗുമ്പു പട്ട്‌ക്ക് ബ്‌ന്ത്‌ദ്. മുള്ളു സെ്ഡിഗാള് മൊളേത്ത് ബളാന്ത് നാറ്‌ന സപ്പ്‌സി തള്ള്‌ട്ട്. അദ്‌നാലെ അയി സെ്ഡിക്ക് കദ്‌റ് കഡാക്ക്യ മുഡ്യാലെ. 8ബേ്റെ പഗ്‌ദി ബെദെ നല്ല മണ്ണ്‌ക്ക് ബ്‌ന്ത്‌ദ്. അദ് മൊളേത്ത് ബളാന്ത് അന്ന ബെ്ളേന്ത്‌ദ്. ബിത്ത്‌ന ബെദേന ബ്‌ഡ മുപ്പാദ്, അറുവദ്, നൂറു സലാഗെ അന്ന കെ്ഡേത്ത്‌ദ്.>>
9<<നാന് സൊല്ലുവാദ്‌ന കേ്ള്‌ക്ക്യ മനേസ്സിര്‌ക്ക്‌ന്റവാന് കേ്ള്‌ക്കുഡൊ>> എന്റ്‌മ് ഏസ്സ് സൊന്നാന്.
കദെ അര്‌ത്ത
10ഏസ്സ് തനിഗെ ഇന്താന്. അയി സമ്യ ഏസ്സോഡൊപ്പ ഇന്തവാര്‌ല് പഗ്‌ദി ആള്‌ഗാള്, അയാള് സൊല്ലുപഡി നഡാക്കുവ പന്നന്റ് ആള്‌ഗാളോഡൊപ്പ ഏസ്സ് പട്ട്‌ക്ക് ബന്താര്. പ്‌റ ഏസ്സ് സൊന്ന കദെ അര്‌ത്ത എന്തെന്റ് ഏസ്സ്‌ന കേ്ട്ടാര്. 11ഏസ്സ് അവാര്‌ക്ക് ഇത്തെ സൊന്നാന്: <<സാമി ആളുവാദ്‌ന പറ്റി മറേന്ത്‌റ്‌ക്കുവ സത്ത്യ നിമാക്ക്‌ത്തെ കെ്ഡേത്ത്‌റ്‌ക്ക്‌ന്റ്. ആന സാമി ആളുവാദ്‌ക്ക് ബെ്ളിഗെ ഇര്‌ക്ക്‌ന്റവാര്‌ക്ക് ഇദ്‌ന പറ്റി നാന് കദേത്തെ സൊല്ലി കൊഡുക്കുന്റെ. 12അത്തെ,
<അവാര് എഞ്ച്‌ക്ക് സാമി സൊല്ലുന പഡിത്താല്‌മ് അവാര്‌ക്ക് അദ്‌ക്കിര്‌ക്കുവ അര്‌ത്ത തെര്യ മാട്ട.
അവാര് നാന് സൊല്ലുവാദ്‌ന കേ്ള്‌ക്കുവാര്; ആന അദ്‌ക്കിര്‌ക്കുവ അര്‌ത്ത നെപ്പ് കെ്ഡേക്കമാട്ട.
അദ്‌നാലെ അവാര് പാവ ഗേവാദ്‌ന തെ്റിന്ത് തള്ളാമ് മാട്ടാര്. സാമി അവാര് പാവാന പൊറുക്കാമ്‌മാട്ടാന്.>#ഏസ്സയ്യാവു 6:9 >>
13പ്‌റ ഏസ്സ് അവാര്‌ന കേ്ട്ടാന്: <<ഈ കദെ നിമാക്ക് നെപ്പ്‌കെ്ഡേക്കാലേഗ? എന്റ് പിന്നെ ബേ്റെ കദെഗാളെല്ല നിമാക്ക് എത്തെ നെപ്പ്‌കെ്ഡേക്കുവു? 14ബിത്ത്‌ന്റവാന് ബെദെ ബിത്തുവ പാസെത്തെ സാമി സൊല്ലുസുലാക്കന ഒന്റൊരുത്താന് ആള്‌ഗാള്‌ക്ക് സൊല്ലി കൊഡുക്കുവാദ്. 15ബട്ടേക്ക് ബ്‌ന്ത ബെദേന പാസെത്തെ പഗ്‌ദ്യാള്‌ഗാള് സാമി സൊല്ലുസുലാക്കന കേ്ള്‌ക്കുവാദ്. ഇവാര് കേ്ട്ട സാമി സൊല്ലുസുലാക്കന സെയിത്താന് ബന്ത് സട്ടന എ്ഡ്‌ത്ത് തള്ള്‌ന്റാന്. 16അറെ പട്ട്‌ക്ക് ബ്‌ന്ത ബെദേന പാസെത്തെ പഗ്‌ദ്യാള്‌ഗാള് സാമി സൊല്ലുസുലാക്കന കേ്ള്‌ക്കുവാദ്. ഈ ആള്‌ഗാള് സാമി സൊല്ലുസുലാക്കന പിര്യപിര്യത്തോഡ തങ്കാരിക്കുവാര്. 17എന്റാല്‌മ് ബേര് ഇല്ലത്താദ്‌നാലെ കേ്ട്ട സേദില് അവാര് അദിഗ കാല നെലെനില്ലമാട്ടാര്. അയി സേദിനാലെ കജട്ടാഗൊ കൊഡിമേഗൊ ബന്തദാന അവാര് സട്ടന പിന്ന്‌കാല് മെ്ട്ടുവാര്. 18മുള്ളു ഗുമ്പു പട്ട്‌ക്ക് അലേന്ത ബെദേന പാസെത്തെ പഗ്‌ദ്യാള്‌ഗാള് സാമി സൊല്ലുസുലാക്കന കേ്ള്‌ക്കുവാദ്. 19ഈ ഉലഗാത്ത്‌ല് ബരുവ കജട്ടനജട്ടഗാള്‌മ്, പണാസേമ്, ബേ്റെ പല കെ്ട്ട ആസെഗാള്‌മ് സാമി സൊല്ലുസുലാക്കന നെജിക്കി ഇല്ലാദെ മാഡ്‌ന്റ്. അവാര് ഒന്റുക്കുമു ഉവഗരപഡമാട്ടാര്. 20നല്ല മണ്ണ്‌ക്ക് അലേന്ത ബെദേന പാസെത്തെ ലേസ ആള്‌ഗാള് സാമി സൊല്ലുസുലാക്കന കേ്ള്‌ക്കുവാദ്. ഇവാര് സാമി സൊല്ലുസുലാക്കാന കേ്ട്ട് തങ്കാരിക്കുവാര്. അദ്‌നാലെ ഇവാര് തമാക്ക്‌മ് ബേ്റെ ആള്‌ഗാള്‌ക്ക്‌മ് ഉവഗരപഡുവാര്. പഗ്‌ദി ആള്‌ഗാള് ലേസ താനെ ഉവഗരപഡുവാര്; ബേ്റെ പഗ്‌ദി ആള്‌ഗാള് മൊത്തന ഉവഗരപഡുവാര്; ബേ്റെ പഗ്‌ദി ആള്‌ഗാള് ഇവാര്‌ന ബ്‌ഡ എത്ത്‌റാഗോ ഉവഗരപഡുവാര്.>>
ബ്‌ളാക്ക് മദ്‌ല് കുദ്ദാക്ക്
21പ്‌റ ഏസ്സ് അവാര്‌ക്ക് ഇത്തെ സൊല്ലി കൊഡുത്താന്: <<നിമ്മ ആരാറ്റ ബ്‌ളാക്ക്‌ന കത്തിസി തെക്ക്‌ന കവുസ്യൊ, പട്ടഡേക്കഡ്യൊ ബെക്ക്‌ന്റ്‌റ? ബ്‌ളാക്ക്‌ന കത്തിസി പഡികുദ്ദാക്ക്‌ത്തെ ബെക്കുവാദ്. 22എന്ത്‌നാത്തെ ഒളിസി ബെത്തിന്താല്‌മ് അദ് ബെ്ളിഗെ ബര്‌മ്, മൂഡി ബെത്താദ് ത്‌റാന്ത് ബെ്ളിഗെ കഡാക്കുവു. 23നാന് സൊല്ലുവാദ്‌ന കേ്ള്‌ക്ക്യ മനേസ്സ് ഇര്‌ക്ക്‌ന്റവാന് അത്തെ നഡാക്കുഡൊ.>>
24അവാര്‌ന നോഡി ഏസ്സ് പിന്നേമ് ഇത്തെ സൊന്നാന്, <<നിമ്മ കേ്ള്‌ക്കുവാദ്‌ന സൊക്കാന നെനേത്ത് നോഡുഡൊ. അഡ്‌ത്തവാര്‌ക്ക് നിമ്മ എഞ്ച്‌ക്ക് അളാന്ത് കൊഡുക്കുന്റുറൊ അഞ്ച്‌ക്ക് താനെത്തെ സാമി നിമാക്ക് തിരിക്കിമ് തരുവാന്. നിമ്മ കൊഡുത്താദ്‌ന ബ്‌ഡ സാമി ദാസ്‌ത്തി തരുവാന്. 25ഇര്‌ക്ക്‌ന്റവാന്‌ക്ക് ദാസ്‌ത്തി കെ്ഡേക്കുവു. ലേസ ഇര്‌ക്ക്‌ന്റവാന്‌ക്ക് അയി ഇര്‌ക്കുവാദ്‌ന ഗുഡി സാമി എ്ഡ്‌ത്ത് തള്ളുവാന്.>>
തെര്യാദെ കൊഡിക്കുവ ബെദെ
26ഏസ്സ് പിന്നേമ് ഒന്റു കദെന സൊല്ലി കൊഡുത്താന്: <<സാമി ആളുവ കാല എന്നുവാദ് ഇദ്‌ന പാസെത്തെ. ഒന്റൊരുത്താന് തന്ന് കാഡ്‌ക്ക് പേയി ബെദേന ബിത്ത്‌നാന്. 27അദ് മൊളേത്ത് ഇ്റ്‌ട്ട്‌പഗാല് ബളാന്ത് കൊണ്ടു ഇര്‌ക്ക്‌ന്റ്. ബിത്ത്‌നവാന് സന്തെറാവെ ഉറാങ്കിളാഗി നഡാക്കാട്ടി അയാള് തെര്യാദെ താനെ ബെദെ ബളാന്ത് കൊണ്ടു ഇര്‌ക്ക്‌ന്റ്. 28ബൂമി താനെ ആദ്യ പയിര്‌മ്, കദ്‌റ്‌മ്, പ്‌റ കദ്‌റ്‌ല് തുമ്പ ബെദേനാമ് ഉണ്ടാക്ക്‌ന്റ്. 29അത്തെ ബെ്ളേന്ത് അറിക്ക്യ ആഗാട്ടി അയാള് ആള്‌ന സൊല്ലി ബ്‌ട്ട് അറ്‌ക്ക്‌ന്റാന്.>>
കഡ്‌ഗ് ബെദെ കദെ
30ഏസ്സ് പിന്നേമ് സൊന്നാദ്: <<സാമി ആളുവാദ്‌ന ഏദ്‌ക്ക് എ്ണേത്ത് സൊല്ല്യ മുഡിവു? അദ്‌ന എത്തവ കദെന സൊല്ലി അര്‌ത്ത മാഡ്യ മുഡിവു? 31സാമി ആളുവാദ് ഒന്റു കഡ്‌ഗ് ബെദേക്ക് സമ. അദ് ബിത്ത്‌ഗാട്ടി ബൂമിലിര്‌ക്കുവ എല്ലാ ബെദേന ബ്‌ഡ സ്‌ന്നാദ്‌ത്തെ. 32എന്റാല്‌മ് അദ് മൊളേത്ത് ബളാന്ത് എല്ലാ സെ്ഡിഗാള്‌ന ബ്‌ഡ ദൊഡ്ഡാദാന്റ്. നല്ല ദൊഡ്ഡുദൊഡ്ഡ താറ്‌ഗാള്‌നാമ് അദ് ബ്‌ഡുവു. അയി താറ്‌ഗാള്‌ല് പക്കിഗാള്‌മ് ബന്ത് ഗൂഡു എ്ഡ്‌ക്ക്‌ന്റ്.>>
33ഇദേപാസെ ഏസ്സ് സാമി സൊല്ലുസുലാക്കന എഞ്ചോ കദെ ദിന്‌സ്‌ല് അവാര്‌ക്ക് തെരിവ പാസെ പഡിസിന്താന്. 34കദെ സൊല്ലാദെ അവാര്‌ക്ക് ഒന്റുനാമ് സൊല്ലി കൊഡുക്കാലെ. തന്ന് സൊല്ലുപഡി നഡാക്ക്‌ന്റവാര് തനിഗെ ഇര്‌ക്കാട്ടി കദെ അര്‌ത്തഗാള്‌ന ഏസ്സ് അവാര്‌ക്ക് സൊല്ലി കൊഡുത്താന്.
ഏസ്സ് കാറ്റ്‌നാമ് കഡാല് തെരെഗാള്‌നാമ് അഡാക്ക്‌ന്റാന്
35അന്റ് സന്ത്യോഡ <<നമ്മ അയ്യെ്ട്ടി പോഗാന്>> എന്റ് ഏസ്സ് തന്ന് സൊല്ലുപഡി നഡാക്ക്‌ന്റവാര്‌ക്ക് സൊന്നാന്. 36അവാര് ആള്‌ഗാള്‌ന സൊല്ലി ബ്‌ട്ട പ്‌റ ഏസ്സ് കുക്കാന്തിന്ത അയി തോണിക്ക് താനെ ഏ്റി അവാര് അയാള്‌ന കൂട്ടി പോനാര്. ബേ്റെ തോണിഗാള്‌മ് അവാരോഡ ഇന്ത്‌ദ്. 37അയി സമ്യ ദൊഡ്ഡ ഒന്റു സുളികാറ്റ് അഡിത്ത്‌ദ്. കഡാല് തെരെഗാള് പൊങ്കിമറ്‌ന്ത് ബന്താദ്‌നാലെ തോണി കുളാക്കെല്ല നീരേ്റി അദ് മുളുഗ്യ പക്കാറ്റ്. 38തോണിക്ക് പിന്ന് സാരി ഏസ്സ് ഒന്റു തലെങ്കണ്ണിന ബെത്ത് ഉറാങ്കികൊണ്ടിന്താന്. സൊല്ലുപഡി നഡാക്ക്‌ന്റവാര് ഏസ്സ്‌ന ബ്‌ളിത്ത് ഇ്ളാക്കി: <<ഗുരുവെ, എമ്മ സത്ത്‌തള്ളുവാദ്‌ന പറ്റി നീ നെനേക്കുവാലേഗ?>> എന്റ് സൊന്നാര്.
39ഏസ്സ് ഇ്ളാഗി നിന്റ്, <<കാറ്റേ നീ അഡാങ്ക്, കഡാലെ നീ സപ്പെന്റിര്>> എന്റ് മെ്റ്‌ട്ട്‌നാന്. അയി സമ്യ കാറ്റ് അഡാങ്കി, കഡാല് സപ്പാനാറ്റ്.
40<<നിമ്മ എന്ത്‌ക്ക് ഇത്ത്‌റ അഞ്ചിക്കെപഡുവാദ്? നിമാക്ക് ഇന്നാല്‌മ് നമ്പിക്കെ ഇല്ലേഗ?>> എന്റ് ഏസ്സ് കേ്ട്ടാന്.
41<<കാറ്റ്‌മ് കഡാല്‌മ് ഗുഡി ഇയാള് സൊല്ലുവാദ്‌ന കേ്ള്‌ക്ക്‌ന്റല്ല>> എന്റ് സൊല്ലി അവാര് അഞ്ച്‌നാര്. ഇയാള് എത്തവ ആള് എന്റ് തമാക്ക് തമാക്ക് നായ നൊഡിന്താര്.
Currently Selected:
മര്‌ക്കോസു 4: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
