Luka 12

Gbondo ó bɛ́ yáa bhɔ́ kɛ́ɛnman

Matiyu 10.26-27; 19.20

1O wáati ó lɔ, yamanba tɛ́wɛɛ i ládhyɛ, fɔ́ i tɛ́ɛ táamankɛla ɲɔ́ɔn nzé nga. Ɛnza ŋé lámyaan kɛ́ fɔ a yɛ kaamɔɔndhye ŋólu yɛ kó: «Áa a yáakii tó a yɛ́ɛ lɔ Falizɛn ŋólu yɛ́ lévu o mán ó míin fyaangafoya óle. 2Fénoonaankɛnin nzí tɛ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman, 3kɛ mansɔɔ a káa fé ŋóo fé nvɔ́ diwi ó lɔ, o yáa myɛ́n kɛ́ɛnman. A káa fé ŋóo fé nvɔ́ ɲɔ́ɔn ndóo lɔ bhó ŋó kɔɔnnɔn, o kóman ó yáa bhɔ́ bhó ŋó kúnnɔn kɛ́ɛnman.»

Án ngákan kɛ́ sháan Ala ɲɛ́n?

Matiyu 10.28-31

4«Álee mín núu né twáanva ólu le, ní fɔ́la a yɛ ngó: mɔɔn mín núu mɔɔn fási ólu fáala tó í tɛ́ sé kɛ kó gbɛ́ɛ kɛ o kwɔ́, a kɛ́nan sháan ŋólu ɲɛ́n. 5A kákan né kɛ sháan mín ɲɛ́n, né yáa o fɔ a yɛ. Sé é mín ɲɛn kɛ́ mɔɔn ní ó myáan, o kwɔ́, aa sé kɛ́ a ní o láfii yaananman o lɔ, aa sháan o lé ɲɛ́n.

6Mɔɔn tɛ́ kɔ́ɔn dhyénin nóo felela pɔpɔlɔ fyáa la a? O ló mbɛ́ kwɔ́ Ala tɛ́ ɲánla ólu sí kwɔ́. 7Yáanin a kúnzhe ó yɛ́ɛ o bɛ́ lá nɔn nin née Ala kwɔ́. Oo lɔ mínngɛ, a kɛ́nan sháan. Álee a físaa kɔ́ɔnnin ŋólu le.»

Kɛ́ sɔ́n bháa, bháa kɛ́ í bá

Matiyu 10.32-33; 12.32; 10.19-20

8«Ní fɔ́la a yɛ́ ngó, ní mɔɔn mínngɛ i lɔ́ a lá bɛ́ ɲánla kó álee né yɛ́ mɔɔn le lé, mɔɔn Dhyénjɛ ó yáa i lɔ a lá Ala yɛ́ malɛɛka ólu ɲánla kó ó tíi ó a tá le lé. 9Wáa ní mɔɔn mínngɛ í bá né lɔ mɔɔn ólu ɲánla, né yáa mbá o tíi ó lɔ Ala yɛ́ malɛɛka ólu ɲánla.

10Mɔɔn óo mɔɔn kɛ́ kóman yóo nvɔ́ mɔɔn Dhyénjɛ o mán, yafa é sé kɛ́la o tíi ó mán; wáa ní mɔɔn óo mɔɔn kɛ́ kóman yóo nvɔ́ Ní Sɛnnɛnyanin ŋó mán, yafa táa kɛ́ o tíi ó mán tún.

11Ní i kɛ á myáan kɛ táa ni ale sɛ́ɛbho ŋólu kɔɔnnɔn, wáman kítitɛɛbhaa ólu fɛ́ yé, wáman faanman ŋólu fé yé, a káa mín nvɔ́ kɛ jó sɔɔ, a kɛ́nan hánmin o lá. 12Kɛ mansɔɔ a káa kóman nvɔ́ Ní Sɛnnɛnyanin ŋó yáa ó ló a lálɔ o ywáanin ngée ŋó lɔ.»

Nanfootii nánloman ŋó yɛ́ saanan ó

13Cɛ lɔ é fɔ Ɛnza ɲɛ yaman ó cɛ́man kó: «Kaamɔɔn, a fɔ ngɔ́ɔcɛ yɛ kó aa án nvá cɛ́n ó lɔ́taa.»

14Wáa Ɛnza ŋé a yawi kó: «Cɛ, yɛ́ɛtii né síi kɛ né kɛ́ a yɛ́ kítitɛɛbhaa óle? Wáman kɛ́ né kɛ́ a yɛ́ cɛ́n lɔ́taamaa óle?» 15O kwɔ́, Ɛnza ŋé fɔ yaman ó yɛ́ kó: «Áa a yɛ́ɛ kɔ́ɔsi, áa a yɛ́ɛ myaan nanfoo ko ó dhyaaɲɛnkoyoo ŋó mán, kɛ mansɔɔ yáanin ní nanfoo ó kɛ́ sháaya mɔɔn bhóo ɲán óo ɲán mán, o tɛ́ sé kɛ́la ké aa ɲaanmanɲan ó sɔ́ɔ.»

16O lɔ, áa saanan lɔ fɔ i yɛ kó: «Nanfootii lɔ tɛ́ɛ yé, a yɛ́ sɛɛn ó ɲan gbútuukɛ. 17Aa fɔ a yɛ́ɛ kɔɔnnɔn kó: ‹Né yɛ́ sunman ŋó bhyáalaa tɛ́ móo. Né káa kɛ́ díi?› 18Aa fɔ kó: ‹Né káa min ngɛ́, ní o lɔ́. Ngáa ɲɛ́n mɔɔnnin ŋólu cé, kɛ́ belebeleba ólu lɔ. Né yáa ɲɛ́n béle óni móofe ŋólu bɛ́ ládhyɛ ólu kɔɔnnɔn. 19O kwɔ́ né yáa fɔ ngɔɔnnɔn ngó: Ndwáanva, sá dáman míin nɔ́n i wɛ́ɛ bhóofe nzhɛ́ɛman nzɔ́ɔ. I lɔ́nwɛɛn sísan, kɛ lɔ́min kɛ́, kɛ minin kɛ́, i nisɔdhyaa i yɛ ɲaanmanɲan o lɔ.› 20Wáa Ala é fɔ a yɛ kó: ‹I nánloman ŋó, bí sú míin ɲɛ́ɛ lɔ, ɲáan ɲɛ́n kɛɛfaman ó myáan i la. I wɛ́ɛ nanfoo mín nadhyɛ i yɛ́ɛ yɛ, o káa kɛ yɛ́ɛtii tá le?› »

21Ɛnza ŋé fɔ kó: «Mɔɔn mínngɛ nanfoo ládhyɛ a gbú yɛ kɛ́ Ala tó yé, o tíi ó kɛ́la céne.»

Án ni lá Ala la kɛ án yée síi a la

Matiyu 6.19-21,25-33

22O kwɔ́, Ɛnza ŋé fɔ a yɛ́ kaamɔɔndhye ŋólu yɛ́ kó: «O kósɔn, ní fɔ́la a yɛ ngó: A kɛ́nan hánmin a yɛ dínɲanlɔtɛɛ ó la, kó a káa mínnɛɛn lé lɔ́ɔ? A kɛ́nan hánmin a fásisoo ó tá sháa o fɛ́, kó a káa mínnɛɛn ló? 23Kɛ mansɔɔ a ní ó kúu a gbɛ́ɛ ní lɔ́min fé ŋó le, fási ó kúu a gbɛ́ɛ ní faani óle. 24Aa bwɔ́ ŋólu yace myaan kɛ́ a mánfɛɛ. I tɛ́ sɛɛn kɛ́la, i tɛ́ sunman ndɛ́ɛla. Mɔɔnnin ndɛ́ í bhóo. Wáa Ala é í bhálola. Álee mán nvísaa kɛ́ tínmin kɔ́ɔn ŋólu ka ŋán? 25Álee lɔ, yɛ́ɛtii é sé kɛ́ tee kée nvala a sí ó ka hánmin ŋó kósɔn? 26Sísan, o mín ŋé kofitiinin né, ní álee tɛ́ sé kɛ ó kɛ́, mínnɛɛn la aa hánminan kó tɔ ólu la? 27Aa bínnvee ólu cɛ́ɲan séɲan o mánfɛɛ. I tɛ́ bháala kɛ́la, i tɛ́ fwáani kɛ́la. Née fɔ́la a yɛ ngó mansacɛ Swɛmannan ní a yɛ faanmanɲan ó bɛ́ lɔ, a mán fáani sɔ́ɔ mín njɛ́ɲan é bínnvee ólu bhɔ́. 28Bín míin sɛɛn ó mán, ní tá yáa ó ɲɛɛn síin, ni Ala é i hákiitola o lɔ cé, a táa i hákiito álee lɔ́ kɛ tínmin olu ka ŋán? Yeenda ŋólu!

29A káa fé mín nɔ́ɔ, wáman a káa fé mín min, a hákii o kɛ́nan ɲáanmin ólu kósɔn. 30Alalɔmɛɛ mín núu dínɲan míin nɔn ólu o fé ólu bɛ́ ɲíinnan. Wáa a Fá ó á a mankoyafe ŋólu lɔ. 31Áa Ala yɛ́ Mansaya ó ɲíin ŋó tún, ni ó kɛ kɛ́, Ala yáa fé ó tɔ ólu di a mán.

32A kɛ́nan sháan né yɛ saawɛɛfitiinin ŋó, kɛ mansɔɔ a wɛ́ɛ dhyáa Fá Ala yɛ kɛ́ a yɛ́ Mansaya ó di a mán.

33Áa a bhóofe ŋólu fele kɛ a wɛ́ɛ ó lɔ́taa faannda ŋólu la. Nanfoo míin Ala fɛ sángboo ó lɔ, aa ó ɲíin. O nanfoo ó táa cáan yé, só ndɛ́ séla yé, bháabhaa tɛ́ séla yé. 34Kɛ mansɔɔ i yɛ́ nanfoo ó ywáa mínnɔn, i yóso óo o ywáa ó lé lɔ.»

A lɔ́bhyɛnin ŋán tó wáati o bɛ́

35«Áa i lɔ́bhyɛ, kɛ í cɛ́sii, a yɛ́ laman ŋó lamaannin ŋan kɛ́. 36Aa mánkɔɔnnin kɛ́ óyoo bháalakɛdhye nu, mín núu i kunndii ó kwɔ́sɛɛ ó mánkɔɔnnan kɛ́ bhɔ́ kwɛ́ɛnyako ywáa o lɔ. Ní a kɛ́ i kwɔ́sɛɛ wáati óo wáati lɔ kɛ lá ó mángbasi, ké ii lá ó láka a yɛ́. 37Ní bháalakɛdhye mínnu kunndii kɛ́nan i sɔ́ɔ a mánkɔɔnnan nisɔdhyaanin lé. Tínɲan in ne ní fɔ́la a yɛ ngó, a kunndii ó gbú yáa i cɛ́sii kɛ́ o bháalakɛdhye ŋo yɛ́ lɔ́min o dí a mán. 38Ní a kunndii o kɛ́ i kwɔ́sɛɛ sú ó cɛ́man, wáman lónan ngásiwaati ó lɔ kɛ́nan bháalakɛdhye ŋólu sɔɔ a mankɔɔnnan, o bháalakɛdhye ŋólu yáa i nisɔdhyaa. 39Aa lɔ kó ní bhóndii ó tɛ́ɛkɛ so ŋó nánwaati ó lɔnan, a tɛ táa tó yé ké so ŋó á ló a yɛ bhóo ŋó la. 40Álee lɔ́bhyɛnin ŋán kɛ́, kɛ mansɔɔ a tɛ́ i milila wáati mín mán, mɔɔn Dhyénjɛ ó káa nan ó wáati ó lé lɔ.»

Bháalakɛdhyemɛɛ ó yɛ́ɛtii le

Matiyu 24.43-51

41O wáati ó lɔ, Piyɛli é Ɛnza mánɲaankɛ kó: «Mantii ó, íi saanan míin lála án nee kaamɔɔndhye ŋó lée lú mán bháa, wáman mɔɔn bɛ́?»

42Mantii ó a yawi kó: «Bháalakɛdhye ndéenin hákiiman mínnɛɛn o le, ní a kunndii o wɛ́ɛ lá a lá kɛ a lásii a yɛ bháalakɛdhye ŋó tɔ ólu kunnan ké aa i yɛ sunman ó dí i mán a di wáati lɔ? 43Nisɔdhyaa yáa kɛ́ o bháalakɛdhye ŋó yɛ ní a kunndii o kɛ́nan a sɔɔ o bháala o kɛ́la. 44Tó ní fɔ a yɛ tínɲan in né ngó kunndii ó yáa o bháalakɛdhye ŋó lásii a bhóofe ŋó bɛ́ kunnan. 45Wáa ní ó bháalakɛdhye ŋó kɛ́ i mili kó: Ngunndii ó táa i kwɔ́sɛɛ jónan, tó kɛ kɛ́ a bháalakɛdhyeɲɔɔn cɛ́man ŋólu ní musoman ŋólu gbasi le, kɛ tó kɛ lɔ́minkɛ, óni kɛ́ gbɛ min kɛ i ɲan ó lamiin, 46o bháalakɛdhye ŋó tɛ́ i milila ló mín mán, óni wáati mín man, a kunndii ó káa nan o ló ŋó lé la. A yáa o bháalakɛdhye ŋó bhɔ́ yé kɛ a tɔ́lɔ mɔɔn téemɛɛ ólu sí le.

47Bháalakɛdhye mín ŋán a kunndii ó sao o lɔ́, ní a mán í lɔ́ja kɛ o kɛ́, a kunndii o yáa a gbasi koyoongɛ. 48Wáa bháalakɛdhye mín mán a kunndii ó sao o lɔ́, ní a kɛ kó kolo nɔ kɛ mín ŋé a gbasili kun ne, o bháalakɛdhye ŋó kunndii o yáa a gbasi dɔ́ɔnin. Kɛ mansɔɔ, shɛ́ɛman ŋwɛ́ɛn kɛ́ɛfa mɔɔn mín mán, shɛ́ɛman ɲáan ɲíin o tíi ó fɛ́. Shɛ́ɛman ŋwɛ́ɛn kɛ́ɛfa mín mán, shɛ́ɛman ɲáan i mánɲaankɛ o tíi ó lá.»

Mɔɔn ólu yáa í wíi ɲɔ́ɔn nganman

Matiyu 10.34-36

49«Née nan tá le kɛ lúukolo o ka. Ndɛ́ɛ fɛ ké o tá o lámaannin ndɛ́ɛ kɛ. 50Wáa tɔ́lɔyaba míin mankɔɔnnan, ngɔ́lɔtɔnin ɲé kɛ tínmin ó bátizeli ó lɔ.

51Aa álee kɔ́ɔnnɔn kó né nánin ɲé ni hɛ́lɛ le lé lúukolo ó ka ŋán? Ɔn-ɔn! Ní fɔ́la a yɛ ngó, née nan le kɛ bhyɛmɛɛya le ló mɔɔn ólu cɛ. 52Óo lɔ́ mínngɛ, kɛ tá kwáa le nin man, ní mɔɔn lóo kɛ kɛ́ bhó mín ngɔ́ɔnnɔn, ólu yáa í lɔ́taa. Mɔɔn sawa yáa í wíi mɔɔn fyáa o kanman. Mɔɔn fyáa yáa í wíi mɔɔn sawa ó kanman. 53Fá ó yáa í wíi a dhyénjɛ o kanman, dhyénjɛ o yáa í wíi a fá o kanman. Wóobhaa o yáa í wíi a dhyémuso o kanman, dhyémuso o yáa í wíi a wóobhaa o kanman. Manmuso o yáa í wíi a maanmuso o kanman, maanmuso o yáa í wíi a manmuso o kanman.»

Kɛ tɔɔmansii ólu kɔ́ɔ o lɔ́

Matiyu 16.2-3

54Ɛnza ŋé fɔ yaman o yɛ íkwɔ kó: «Ní a kɛ́ sánvin ŋó wiitɔ o yé kɔ́ɔ ŋó lɔ, áa a fɔ́la ko sá né káa nan. Tó aa kɛ cé. 55Ní fwɛ́ɛn o kɛ bhyáa kɛ bhɔ́ kíinmoo fán ŋó fɛ, áa fɔ́la kó táa ó yáa gbaan. Tó aa kɛ cé. 56Álee fyáangafo ólu! Áa sé kɛ lúukolo óni sángboo o mánfɛɛ kɛ bhɔ́ wáati o ɲánle. Mínnɛɛn le kósɔn ko mínnuu kɛ́la a cɛ́man wáati míin nɔn, a tɛ́ bhɔ́la ólu ɲánle?»

Bhyɛ ŋó ɲíin ní i kɛ́ɛkɛɲɔɔn o le

Matiyu 5.25-26

57«Mínnɛɛn le kósɔn kó mínnu téenin ɲé, a tɛ́ o yace myáanla a yɛ́ɛ fɛ kɛ o kɛ? 58Ní kó kɛ kɛ́ íle ní mɔɔn lɔ cɛ́, ni o tíi o fɛ kɛ táa ní íle faanman nzó, i lɔ́ja kɛ íle ní ale cɛ́ o bhyɛ ké a mán sé faanman ŋólu fɛ́ yénɔn bhá, ké a kɛ́nan táa í ló faanman ŋólu bhóo, ké ólu kɛ́nan i ló swáasi ólu bhóo, ké swáasi ólu kɛ́nan í bhyaa kaso o lá. 59Ní fɔ́la i yɛ ngó i táa bhɔ́ kaso o la ní i mán i yɛ yúu o bɛ́ sala.»

Currently Selected:

Luka 12: MXX

Highlight

Copy