Luka 19

Ɛnza ŋé táala Zashe yɛ lú ó man

1Ɛnza nónin ŋó kwɔ́ Zeliko só ó kɔɔnnɔn. A tɛ́ɛ só ó lɔ́tinminnan. 2Nísɔɔnmyaanbhaa ólu yɛ ɲɛ́nmɔɔn lɔ tɛ́ɛ yé, o tɔ́ɔ kó Zashe. Nanfoo shɛ́ɛman ndɛ́ɛ a bhóo. 3Zashe tɛ́ɛfɛ kɛ Ɛnza ɲé, wáa a tɛ́ tɛ sé kɛ a yé yaman ó kósɔn, kɛ mansɔɔ a tɛ́ɛ sún né. 4Aa bwée kɛ táa i yɛ́ɛ fígisun nɔ la ɲɛ́nnzhaafɛ ké aa Ɛnza ɲé, kɛ mansɔɔ Ɛnza ngákan kɛ tínmin yé. 5Ɛnza ŋé sé o ywáa ó lɔ mínngɛ, aa í ɲángbaan sáman kɛ fɔ kó: «Zashe, i láteeya kɛ i yíi jónan. Kɛ mansɔɔ né kákan kɛ ɲíi i bhóo lúman bí.»

6Zashe é i láteeya kɛ i yíi jónan, kɛ́ Ɛnza nɔ́bhyɛ ni nisɔdhyaa le. 7Mɔɔn ólu ó yé mínngɛ, í bɛ́ɛ Ɛnza mankomankoman kó: «Cɛ míin wɛɛ sɔ́n kɛ táa í yíi yúumutɔ ó fɛ yé.»

8Wáa Zashe lɔ́nin ŋé tó Mantii ó ɲánkɔɔ kɛ fɔ kó: «Mantii ó, né yáa mbóofe ŋó fán ngée ndí faannda ŋólu mán, ni kɛ kɛ́ ké né wɛ́ɛ mɔɔn lɔ tɔ́nɲɔɔn kɛ a bhóofe ŋó myáan a lá, né yáa o ɲɔ́ɔn náannin lákwɔsɛɛ o tíi ó mán.»

9Ɛnza ŋé fɔ i yɛ kó: «Kísili ó wɛ́ɛ sé bhó míin ngɔɔnnɔn bí, kɛ mansɔɔ cɛ míin ŋé Bulaaman dhyé ŋó lɔ le lé. 10Mɔɔn Dhyénjɛ ó wɛ́ɛ nan kɛ́ mɔɔn túunnin ŋólu ɲíin kɛ́ i kísi.»

Mansacɛ ó dhyénjɛ o yɛ́ saanan ó

Matiyu 25.14-30

11Mɔɔn mínnu tɛ́ɛ Ɛnza nɔ́myɛnnan, áa saanan lɔ lá i yɛ, kɛ mansɔɔ i tɛ́wɛɛ súnɲan Yeluzalɛmu la. Óni mɔɔn ólu tɛ́ɛ í mílila kó Ala yɛ́ Mansaya ó káa yáa o wáati ó lé lɔ. 12A kó: «Faanman nɔ dhyé ndɛ́ɛ táala yamaanja nɔ lɔ, ké íi a kɛ mansa lé o yamaan ó lɔ, kɛ í kwɔ́sɛɛ. 13Sánnin aa táa, aa a yɛ bháalakɛdhye ndá ngíi kɛ sɛ́ɛnnguu kée ngée ndí i bɛ́ kée ngée mán, kɛ fɔ i yɛ kó: Áa feekɛ ni o le sánnin ni ngwɔ́sɛɛ kɛ́nan. 14Wáa a kó ó tɛ́ mán ndí a yɛ yamaanlɔ mɔɔn ólu yɛ. Ólu mɔɔn bhyáa kɛ́ táa fɔ mansacɛba ó yɛ kó: i tɛ́fɛ ké cɛ míin ŋán i síi i kúnnan.

15A kɛnin ŋó kwɔ́ mansacɛ le, aa í kwɔ́sɛɛ a yɛ yamaan ó lɔ. A tɛ́wɛɛ wɛ́ɛ ó dí a yɛ bháalakɛdhye mínnu mán, áa ólu kíi kɛ́nan. Kó ii tɔɔn mín nzɔ́ɔ, ii nan ó yáa. 16Bháalakɛdhye njónan óo nan, óo fɔ kó: ‹Mantii o, ii sɛ́ɛnnguu mín ndí né mán, né wɛɛ ó si tá né sɔ́ɔ tɔɔn le.› 17Kunndii ó fɔ a yɛ kó: ‹Í wɛ́ɛ bháalabhɛɛ kɛ! Íi bháalakɛdhyemɛɛ lé le, í wɛ́ɛ kɛ́ mɔɔn téenin ne kó fítiinin nɔn, né yáa í síi só tá ngunnan.› 18Bháalakɛdhye nváaɲɔɔn óo í mángbaa, óo fɔ kó: ‹Mantii o, ii sɛ́ɛnnguu mín ndí né mán, né wɛ́ɛ ó si lóo sɔ́ɔ tɔɔn le.› 19A kunndii ó fɔ a yɛ kó: ‹Né yáa íle lásii só lóo kunnan.›

20Bháalakɛdhye gbɛ́ɛ é nan kɛ fɔ a kunndii ó yɛ kó: ‹Mantii ó, ii sɛ́ɛnnguu mín ndí né mán, né tɛ́wɛɛ a bhyáa faani lɔ́lɔ kɛ́ a mala a mánfɛɛ nin. 21Né tɛ́ɛ sháannan í ɲɛ́n kɛ mansɔɔ í yɛ kó ó a gbɛ́ɛ. I mán fé mín bhyáa, ii ó lé tála. I mán sɛɛn mín ngɛ́, ii o sunman ŋó le tɛ́ɛla.› 22A kunndii óo fɔ a yɛ kó: ‹Bháalakɛdhye ɲóo, né yáa kíti tɛ́ɛ í ka í gbú yɛ kóman ó kósɔn. I tɛ́ɛ lɔ́ ŋóo ɲɛ́n kó ó a gbɛ́ɛ. Mán fé mín bhyáa, ní óle tála. Mán sɛɛn mín ngɛ́, ní o sunman ŋó le tɛ́ɛla. 23Mínnɛɛn lé kósɔn i mán ɲɛ́n wɛ́ɛ ó ló wɛ́ɛlamalabhaa ólu bhóo, ké ndɛ́ɛ nan a tɔɔn ó sɔ́ɔ a ka.›

24O kwɔ, mɔɔn mínnu tɛ́ɛ yé, a kunndii ó fɔ ólu yɛ kó: Aa sɛ́ɛnnguu ó myáan a lá, kɛ a dí sɛ́ɛnnguu tá ndíi ó mán. 25Ii fɔ a yɛ kó: ‹Mantii ó, sɛ́ɛnnguu tá ŋé ale bhóo kɛ bhá!› 26‹I kunndii óo fɔ kó: lɔ́ é mɔɔn mín móo, lɔ yáa bhyáa o tíi ó tá ó ka; lɔ́ tɛ́ mín móo, yáanin fítiinin míin a bhóo, o yáa myáan a lá. 27Sísan, né yúu mínnu tɛ tɛ́ fɛ kéni kɛ í yɛ mansacɛ óle, aa i myaan kɛ́nan ní i bɛ́ le né ɲánkɔɔ kɛ í fáa né ɲanla.› »

28Ɛnza ŋé kóman ó fɔ kɛ́wɛɛ wáati mínnɔn, aa tínmin i ɲɛ́n, ii sháa ó myáan kɛ́ táa Yeluzalɛmu.

Ɛnza ŋé lónan Yeluzalɛmu

Matiyu 21.1-11,15-17; Maki 11.1-11; Yaya 12.12-16

29Ii gbaa Bɛtifaze ní Betani lá Olivyetii ó tɔ́ɔfɛ mínngɛ. Aa a yɛ kaamɔɔndhye ŋó fyáa bhyáashaa. 30Kɛ fɔ i yɛ kó: «Só míin an ɲɛ́nnzhaafɛ nín, áa táa o la. A kɛ ló ndɛ́nmɛn, a yáa sofɛɛnin dhyé nɔ́ gúunnin ɲé. Mɔɔn sí mán í síi o ka mbá. Áa a fwée kɛ́nan ale. 31Ní mɔɔn lɔ kɛ́ a mánɲaankɛ kó mínnɛɛn la aa a fwéenan, aa ó tíi ó yawi kó Mantii ó lé manko é a lá.»

32Céladhye nváa óo, Ɛnza ndɛ́wɛɛ fɔ i yɛ ɲán mín man, ii táa sofɛɛnin ngbee ŋó sɔ́ɔ cé. 33I tɛ́ɛ sofɛɛnin ngbee ŋó fwéenan mínngɛ, sofɛɛnin ndíi ó i mánɲaankɛ kó: «Mínnɛɛn la áa sofɛɛnin ngbee ŋó fwéenan?»

34Ii a yawi kó: «Mantii ó lé manko é a lá.» 35Ii táa sofɛɛnin ngbee ŋó le Ɛnza nzaala. Íi i yɛ faani nɔ́lu lá a kwɔ́lɔ, tó kɛ Ɛnza náyɛɛ a ka. 36Ɛnza ndáa tɔ ó, mɔɔn ólu tɛ́ɛ i yɛ faani ŋólu lɔ́woo lá sháa o ka.

37I tɛ́ɛ wɛɛ súnɲan Yeluzalɛmu lá mínngɛ, ké ii Olivyetiilayii ó la, ale ní a yɛ kaamɔɔndhye nzhɛ́ɛman ŋó, i bɛ́ tɛ́ɛ nisɔdhyaa o lɔ, íi lámyaan kɛ Ala tando í kánnanyɛɛnin né a yɛ káwako kɛ́nin ŋólu bɛ́ kósɔn. 38I tɛ́ɛ fɔ́la kó:

«Mansacɛ míin nánla Mantii ó tɔ́ɔla,

tando óo o yɛ.

Hɛ́lɛ ó waa kɛ́ sángboo ó lɔ,

nɔ́lɔ ó waa lá Ala tɔ́ɔ ó ka sámanlaa ó bɛ́ lɔ!»

39 Falizɛn nɔ́lu tó yaman ó cɛ́man kɛ fɔ Ɛnza ɲɛn kó: «Kaamɔɔn, a fɔ í yɛ kaamɔɔndhye ŋólu yɛ kó íi i lumandhye!»

40Ɛnza ŋé i yawi kó: «Ní í fɔ́la a yɛ ngó: Ní í kɛ í lumandhye, káwaguun ŋólu yáa gbáangɛ i lée ɲɔ́ɔn ná.»

Ɛnza ngó Yeluzalɛmu káa cé

41Ɛnza ŋé súnɲan Yeluzalɛmu lá mínngɛ, aa só ó yé mínngɛ, aa kásikɛ. 42A kó: «Ní ile tɛ́ɛ a lɔ bí, ko i káa hɛ́lɛ ó sɔɔ ɲan mín mán. Wáa sísan o wɛɛ i lóonaankɛ i man. 43Kɛ mansɔɔ Ló nɔ yáa sé, i yúu ólu yáa i lamiin ni kówi ólu lé, i yáa a lamiin kɛ a gbɛ́nnɛn fán ŋó bɛ́ fɛ. 44I yáa a yɛ só ó cé, kɛ ile ni í dhyé ŋólu bɛ́ hálaki, i yáa bhó ŋólu bɛ́ cé káwa ó sí táa tó ɲɔ́ɔnnga. Kɛ mansɔɔ Ala tɛ́ɛ fɛ́ kɛ a dhyɛman wáati mínnɔn, a mán sɔ́n ó man.»

Ɛnza ŋé Ala bhatobhomba ó sɛ́nnɛnyala

Matiyu 21.12-17; Maki 11.15-19; Yaya 2.13-22

45Ɛnza ŋé ló Ala bhatobhomba ó kɔ́ɔnnɔn, aa a lámyaan kɛ feekɛbhaa ólu gbɛ́. 46Aa fɔ i yɛ kó: A sɛwɛnin ɲé kó, ɲɛ́n bhó ŋó káa kɛ́ Ala yɛ sɛ́ɛbho ne le. Wáa álee wɛ́ɛ o kɛ so ŋólu lóonaankɛlaa lé!

47Ɛnza ndɛ́ɛ mɔɔn ólu kalanan Ala bhatobhomba ó kɔ́ɔnnɔn ló ŋóo ló. Faanlɛɛɲansebhaa olu kúnndii óni sɛliya kaamɔɔn ólu ní yaman ó ɲɛ́nmɔɔn ólu tɛ́ɛ Ɛnza nváa kó o ɲanɲiinan. 48Wáa i tɛ́ káa kɛ ɲán mín man, i tɛ́ mán ó lɔ, kɛ mansɔɔ mɔɔn ólu bɛ́ tɛ́ɛ a kómankan ŋó lɔ́myɛnnan.

Currently Selected:

Luka 19: MXX

Highlight

Copy