Luka 22

Ii wɛɛ yánva sii Ɛnza nán

Matiyu 26.1-5; Maki 14.1-2; Yaya 11.45-53

1 Búlufuunmɛɛ ó ɲánlagbɛ # 22.1 Búlufuunmɛɛ ó ɲánlagbɛ: O ɲánlagbɛ o lée Izalayɛlika olu bhɔ ó yɔɲan ó lɔ o ko bhyaa lá i kɔɔnnɔn. Í ɲángban kóyoo ŋó man íi búlufuunmɛɛ ó lɔɔ ŋó lé lɔ. Íi ó ɲánlagbɛ o kíila i kwɔ́ ko Hɔ́lɔɲanli o ɲánlagbɛ ó. ó, ó mín ndɔ́ɔ kó yɔɲan wɛɛ Hɔ́lɔɲanli o ɲánlagbɛ ó, o tɛ́ wɛ́ɛ súnɲan. 2Faanlɛɛɲansebhaa olu kúnndii ólu ní sɛliya kaamɔɔn ólu tɛ́ɛ ɲánɲiinnan Ɛnza nváa o man, wáa i tɛ́ɛ sháannan yaman ó ɲɛn.

Zudasi é Ɛnza yanvala

Matiyu 26.14-16; Maki 14.10-11

3O lɔ, Sɔtaannan é ló Zudasi lɔ, mín ŋé kíila i kwɔ́ kó Sikaliyɔti, Ɛnza ɲɛ́n kaamɔɔndhye ndá ni fyáa ó lɔ lé tɛ́ɛ o le. 4Zudasi é táa faanlɛɛɲansebhaa olu kúnndii ólu ní Ala bhatobhomba ó kunnansiibhaa ólu kúnndii ólu fɛ́ yé. A káa Ɛnza myaan kɛ a ló í bhóo ɲan mín mán, íi kóman kɛ bhyɛ ó lɔ́. 5Ó kóman óo i nisɔdhyaa. Ii bhyɛ a lɔ kó í yáa wɛ́ɛ dí a mán. 6Zudasi é sɔ́n. Aa a lamyaan kɛ ɲánɲiin ké aa Ɛnza nó í bhóolɔ ké yaman ó kɛ́nan kósɔɔ o lɔ.

Hɔ́lɔɲanli fɛ́ti ó lɔ́bhyɛ ŋó

Matiyu 26.17-25; Maki 14.12-21; Yaya 13.21-30

7 Búlufuunmɛɛ ó ɲánlagbɛ ló ŋó lá. I kákan kɛ Hɔ́lɔɲanli o ɲánlagbɛ fáanlɛɛ saa ó fáa o ló ŋó lé la. 8Ɛnza ŋé Piyɛli ni Yaya bhyáashaa kɛ fɔ i yɛ kó: «Áa táa Hɔ́lɔɲanli o ɲánlagbɛ ó sunman ŋó lɔ́bhyɛ án ɲɛ́n.»

9Ii a mánɲaankɛ kó: «Ii fɛ́ ké án ni a lɔ́bhyɛ ywáa mínnɛɛn lé lɔ́?»

10Ɛnza ŋé i yawi kó: «Ní a kɛ́ ló só ó kɔ́ɔnnɔn, a yáa bhyɛ cɛ lɔ́ le ké jílaa lɔ é a kúnman. Áa i bhyáa o kwɔ. A kaa ló lú mín ngɔ́ɔnnɔn áa ló yé. 11Áa fɔ lútii ó yɛ kó: Kaamɔɔn, Án ngáamɔɔn ó kó: kó Ale ní a yɛ kaamɔɔndhye ŋólu káa Hɔ́lɔɲanli o ɲánlagbɛ ó lɔ́min ó kɛ bhó mín ngɔ́ɔnnɔn, kó o bhó ŋóo mín? 12A yáa bhómba lɔ yáa a lá sangaso ó ka. Án manko káa sé fé mínnu mán, o bɛ́ é a kɔ́ɔnnɔn. Aa ɲánlagbɛ ó súnman ŋó lɔ́bhyɛ o kɔ́ɔnnɔn.»

13Piyɛli ni Yaya é táa, Ɛnza ŋé fɔ ɲán mín mán ii táa kó ó bɛ́ sɔɔ ó ɲán o le mán. Ii Hɔ́lɔɲanli o ɲánlagbɛ ó súnman ŋó lɔ́bhyɛ yénɔn.

Mantii ó yɛ tabɛli ó

Matiyu 26.26-30; Maki 14.22-26

14Lɔ́minkɛ wáati óo sé mínngɛ, Ɛnza ní a yɛ céladhye ndá ni fyáa óo í síi súnman ŋó mán. 15Aa fɔ i yɛ kó: «Né tɛ́ɛ fɛ́ cɛ́ɛne kɛ́ Hɔ́lɔɲanli o ɲánlagbɛ ó lɔ́min ó kɛ́ ní ale sannin ní tɔ́lɔ, 16kɛ mansɔɔ ní fɔ́la a yɛ ngó né táa Hɔ́lɔɲanli ó ɲánlagbɛ ó lɔ́min o gbɛ́ɛ kɛ́ ní ale bhée fɔ o a í lafa Ala yɛ́ Mansaya ó lɔ.» 17O wáati ó lɔ, aa lɛ́zɛn jífyɛ ó tá kɛ bálika bhɔ́ Ala yɛ kɛ fɔ kó: «Aa a myáan kɛ a lɔ́taa a cɛ, 18kɛ mansɔɔ ní fɔ́la a yɛ ngó: Ne táa lɛ́zɛnnji min mée fɔ́ Ala yɛ́ Mansaya ó kɛ́nan.»

19O kwɔ́, Ɛnza ŋé búlu ó tá, kɛ Ala bálika bhɔ́, kɛ a tɛ́ɛ tɛ́ɛ, kɛ o di í mán, tó kɛ fɔ i yɛ kó: «Nvásisoo ó lée nín [Mín ŋwɛ́ɛn dí álee kósɔn. Áa ó kɛ́ kɛ í míli né mán.» 20Lɔ́min ó kɛnin ŋó kwɔ́, aa lɛ́zɛnnjifyɛ ó tá kɛ Ala bálika bhɔ́ kɛ fɔ kó: «Míin née dhyáaɲɔɔnya kwáa ó jífyɛ óle, Ala é dhyáaɲɔɔnya kwáa mín nzíi né yée ó ka, ó mín ŋé bwɔ́ a kósɔn.]»

Ɛnza ŋé a yánvabhaa ó kó fɔ́la

Matiyu 26.20-25; Maki 14.17-21

21«Mɔɔn mín ngáa né yánva, o tíi ó lɔ́min kɛ́la ní né le. 22Mɔɔn Dhyénjɛ ó yáa sayakɛ óyoo a sɛ́wɛnin ŋé tɛ́nmɛn né. Wáa mɔɔn mín ngáamɔɔn Dhyénjɛ ó yánva, kunnangboya é o tíi ó yɛ.»

23 Kaamɔɔndhye ŋólu a lámyaan kɛ́ ɲɔ́ɔn mánɲaankɛ kó ó káa kɛ́ yɛ́ɛtii lé i cɛ́man.

Yɛ́ɛtii a bwó bɛ́ lé?

Matiyu 18.1; 20.25-28; Maki 9.34; 10.42-45

24Lalɔsɔɔn ŋé ló Kaamɔɔndhye ŋólu cɛ, kɛ mansɔɔ i tɛ́ɛfɛ kɛ a lɔ́ kó yɛ́ɛtii bɛ́ lɔ mɔɔnba ó lé i cɛ́man. 25Ɛnza ŋé fɔ i yɛ kó: «Yamaan gbɛ́ɛ ólu yɛ mansa ólu mansayafaan ó lála ólu ka, óni faan é mínnu bhóo, ólu fɛ ké yamaan ó dhyé ólu a i kíi kó kobhɛɛkɛbhaa ólu. 26Álee tá ó kákan kɛ kɛ́ céne. Wáa a cɛ́man mín ŋé mɔɔnba le, o tíi ó á kɛ́ óyoo a bɛ́ lɔ́ dhyémuu ó, mín ŋé ɲɛ́nmɔɔn lé, o tíi ó á kɛ́ óyoo bháalakɛdhye. 27Álee tá miliya o lɔ, yɛ́ɛtii mɔɔnba le? Mín nzíinin ŋé tabhali ó la, wáman míin díla a man? Mín nzíinin ŋé tabhali ó la o lé mán bwó ŋán? Tó né wɛ́, née a cɛ́man óyoo bháalakɛdhye.

28Álee kwɛ́nnin, a wɛ́ɛ i lɔ́ja kɛ tó ni né lé ɲɛ́n sɛɛ ó wáati o lɔ. 29O lé kósɔn, né Fá é Mansaya ó dí né mán ɲán mín mán, née sé a dila a léelu mán cé, 30ké aa lɔ́minkɛ óni kɛ mínnin kɛ́ ni né le ɲɛ́n Mansaya ó lɔ, óni kɛ́ í síi mansayagbaanin ŋó ka kɛ Izalayɛli síya tá ni fyáa ó yɛ́ kíti ó tɛ́ɛ.»

Ɛnza ŋé fɔ́la kó Piyɛli yáa fɔ ale mán kó a mán a lɔ

Matiyu 26.31-35; Maki 14.27-31; Yaya 13.36-38

31Ɛnza ŋé fɔ Simɔn yɛ kó: «Simɔn, Simɔn, Sɔtaannan tɛ́ɛ ɲiin kɛ́ i lɔ́swaan óyoo ii muu ó tɛ́nnɛnnan ɲán min mán. 32Wáa né wɛ́ɛ Ala dɛ́li i yɛ, ké í yɛ lánanya ó kɛ́nan cáan. Ní ile kɛ́ díminsa kɛ́nan né mán wáati mínnɔn, íi í bhádhye ŋólu yóso lágbɛya.»

33Piyɛli é fɔ a yɛ kó: «Mantii ó, né lɔ́bhyɛnin ŋé kɛ táa ní íle kaso ó lá, wáman kɛ sayakɛ ní íle.»

34Ɛnza ŋé a yawi kó: «Piyɛli, ní fɔ́la í yɛ ngó lónan ŋó táa kóman bí, ní íle mán fɔ né mán síɲan sawa kɛ́ bha kó i mán né lɔ.»

Ɛnza ngó a yɛ kaamɔɔndhye ŋólu á í lɔ́bhyɛ

35Ɛnza ŋé fɔ a yɛ́ kaamɔɔndhye ŋólu yɛ íkwɔ kó: «Ní a bhyaa céla ké wɛ́ɛ, óni bhɔɔ, óni sawaa tɛ́ a bhóo mínngɛ, fé mínnɛɛn é dɛ́sɛ á lɔ?»

Ii a yawi kó fósi. 36Ɛnza ŋé fɔ i yɛ íkwɔ kó: «Wáa sísan, ní wɛ́ɛ kɛ kɛ́ mín móo, o waa ó tá. O ɲán kée ŋó mán, ní bhɔɔ kɛ kɛ́ mín móo, o waa ó tá. Ní fá ndɛ́ mín móo, o tíi ó a yɛ deeke ó fele kɛ a lɔ sá. 37Kɛ mansɔɔ, ní fɔ́la a yɛ ngó, mín nzɛ́wɛnin ɲé né tá sháa ó fɛ, o kákan né kɛ kɛ dhyaalagboya la. A sɛ́wɛnin ɲé kó: ‹I wɛ́ɛ a yace kóyoongɛbhaa ólu lɔ́ le,› sísan, o wáati ó wɛ́ɛ súnɲan.»

38Kaamɔɔndhye ŋólu fɔ Ɛnza ɲɛ́n kó: «Mantii ó, fá nvyáa mánfɛɛ.»

Ɛnza ŋé i yawi kó: Á káɲin njé.

Ɛnza ŋé táala Olivyetii ó ka kɛ Ala dɛ́li

Matiyu 26.36-46; Maki 14.32-42

39Ɛnza ŋé bhɔ́ kɛ táa Olivyetii ó ka, óyoo a tɛ́ wɛ́ɛ lɛɛ a kɛ́la ɲán mín mán. A yɛ kaamɔɔndhye ŋólu i bhyáa a kwɔ́. 40Aa sé o ywáa ó lɔ mínngɛ, aa fɔ i yɛ kó: «Aa í sɛ́ɛ ké á kɛ́nan ló lɔ́swaannin ó lɔ.»

41O kwɔ́, aa bhɔ́ i tɔ́ɔfɛ kɛ́ i mángbaa ɲɛ́nnzhaa fɛ dɔ́ɔnin, kɛ i kúnmɛɛn nɔ́kɛɛ kɛ Ala dɛ́li kó: 42«Nvá, ní íi fɛ́, íi sé tɔ́lɔya míin njɛ́bhɔla né la, wáa né sao o kɛ́nan kɛ, fɔ́ íle sao ó.» 43[O wáati ó lɔ, malɛɛka lɔ é bhɔ́ sángboo ó lɔ kɛ́nan bháaka ló a lɔ. 44Ɛnza ní ó tɔ́lɔnin ndɛ́ɛ koyoongɛ. Áa a lɔ fala Ala dɛ́li ó ka fɔ́ kɛ tála bhɔ́ a lá. Fɔ́ tála jí óo kɛ́la óo yée, kɛ tɔ́ndɔ lúuman.]

45Aa wɛɛ Ala dɛ́li ó lá mínngɛ, aa i wíi kɛ́nan a yɛ kaamɔɔndhye ŋólu tɔ́ɔfɛ, aa táa ólu sɔ́ɔ ké íi súnnɔɔn lɔ nílafin ŋó bhóo. 46Aa fɔ i yɛ kó: «Mínnɛɛn kósɔn aa súnnɔɔn lɔ? Áa i wíi kɛ Ala dɛ́li, ké a kɛ́nan ló lɔ́swaannin kɛ́bhaa ó bhóo.»

Ɛnza myaanko ó

Matiyu 26.47-56; Maki 14.43-50; Yaya 18.3-11

47Kɛ Ɛnza ndó kóman ó la, yaman gbɔ́gbɔ é í kúnnan bhɔ́, Ɛnza ɲɛn kaamɔɔndhye ndá ni fyáa ó kée, mín ndɔ́ɔ kó Zudasi, ó tɛ́ɛ yaman ó ɲɛ́n. Aa í mangbaa Ɛnza nan kɛ í fínin á mán. 48Ɛnza ŋé fɔ a yɛ kó: «Zudasi, íi i fíninnan né mán kɛ o kɛ́ sɛ́ɛya lé kɛ mɔɔn Dhyénjɛ ó ló bhóolɔ kɛɛ?»

49Mínnu tɛ́ɛ ni Ɛnza né kó mín ngbáa kɛ ólu o yé mínngɛ, íi fɔ a yɛ kó: «Mantii ó, án ni i gbási ní fá ŋó le a?» 50O ywáaninngee ŋo lɔ, kée ŋé faanlɛɛɲansebhaa olu kúnndiiba ó yɛ bháalakɛdhye ŋó bhóobhɛɛ tóo ó tɛ́ɛ a mán.

51Wáa Ɛnza ŋé fɔ kó: «Á tó cé, o wɛ́ɛ soo» Aa í bhóo túu bháalakɛdhye ŋó tóo ó la kɛ a lákɛɛnya.

52O kwɔ́, Ɛnza ŋé fɔ faanlɛɛɲansebhaa olu kúnndii ólu yɛ, óni Ala bhatobhomba ó kunnansiibhaa ólu kúnndii ólu yɛ, óni cɛba mínnu tɛ́ wɛ́ɛ nan a kanman, a kó o: «Áa nánla ní fá ŋóni gbéle ólu lé né kanman, óyoo née kóyoongɛbhaa le lé. 53Né tɛ́ɛ ní ale Ala bhatobhomba ó kɔ́ɔnnɔn ló ŋóo ló, wáa a mán né myáan, a yɛ wáati óle wɛ́ɛ sé sísan, diwi ó tá wáati ó lée wé.»

Piyɛli kó ale mán Ɛnza nɔ́

Matiyu 26.57-58,69-75; Maki 14.53-54,66-72; Yaya 18.12-18,25-27

54Ii Ɛnza myáan kɛ táa ní ale faanlɛɛɲansebhaa olu kúnndiiba ó yɛ́ lú ó kɔ́ɔnnɔn. Piyɛli é í súuku táamankɛ, kɛ cɛ́ba tó í cɛ. 55I tɛ́ wɛ́ɛ tá lákin lúkɔɔn ó cɛ́man kɛ í síi o fɛ. Piyɛli é táa í síi i cɛ́man.

56Bháalakɛdhye musoman nɔ́ é Piyɛli síinin ɲé tá ó fɛ, aa i ɲán gbáan a lɔ, tó kɛ fɔ kó: «Cɛ míin ndɛ́ɛ ní Ɛnza né.» 57Piyɛli é i lámangbɛya kɛ fɔ kó: «Né mán a lɔ́.» 58Wáati dɔ́ɔnin ŋé tínmin, cɛ lɔ́ é a yé kɛ fɔ kó: «Ile tɛ́ɛ ni ale.» Wáa Piyɛli é fɔ kó: «Né tɛ́ i lɔ le lɛ́.» 59Lɛ́ɛlɛ kée ndinminnin ngwɔ́, cɛ lɔ é fɔ kɛ mangbɛya kó: «Síka tɛ́ lɔ, cɛ míin ndɛ́ɛ ní ale, kɛ mansɔɔ Galileka lée a le.» 60Wáa Piyɛli é a yawi kó: «Ii min nvɔla, né mán ó lɔ́ nɛ́.» Kɛ a tó o kóman ó la, o ywáaninngee ŋó lɔ́ lónan ŋóo kóman. 61Mantii ó í ɲán yɛ́ɛman kɛ Piyɛli mánfɛɛ. Mantii ó tɛ́ wɛ́ɛ kóman min nvɔ́ Piyɛli yɛ, Piyɛli hákii é bhyáa ó lɔ. Kó: «Sannin lónan ŋó á kóman bí, i yáa fɔ né mán síɲan sawa kɛ kó í mán né lɔ́.» 62Piyɛli é bhɔ́ kɛ́ɛnman, kɛ kásikɛ bhɛ́libhɛli.

63Ɛnza kunnansiibhaa ólu tɛ́ɛ a lákɔɔbhɔ la, kɛ tó a gbásila. 64Ii a ɲán ó sili, tó kɛ́ a mánɲaankɛla kó: «Célayakɛ yɛ́ɛtii i gbási, ó fɔ́ án ɲɛ́n?» 65Ii a nɛ́ɛn kɛ kómanyoo ngbɛ́ɛ lú fɔ a mán.

Ɛnza ŋé Yawudhyaa ólu yɛ kítitɛɛlaa ó lɔ

Matiyu 26.59,63-65; Maki 14.55,61-64; Yaya 18.19-24

66Kɛ́ɛn óo bhɔ́ mínngɛ, só o cɛba ólu, ní faanlɛɛɲansebhaa olu kúnndii ólu, ní sɛliya kaamɔɔn ólu ɲɔ́ɔn nadhyɛ. Ii táa ni Ɛnza né i yɛ kítitɛɛlaaba ó lɔ. 67Ii a mánɲaankɛ kó: «Ní íle lée Kílisi óle, ó fɔ án ɲɛ́n.» Ɛnza ŋé í yawi kó: «Ní né kɛ́ fɔ a yɛ, a táa lá ó la. 68Ní né kɛ́ álee mánɲaankɛ, a táa né yawi. 69Wáa kɛ tá bí mán, mɔɔn Dhyénjɛ ó yáa í síi Sétii Ala bhóobhɛɛ o kɔɔ.» 70I bɛ́ɛ fɔ kó: «O sán ó lɔ, íle lée Ala Dhyénjɛ ó lé a?» Aa i yawi kó: «A gbú lée lú wɛ́ɛ ó fɔ, kó né lée o le.» 71Ii fɔ kó: «Án manko tɛ́ sɛ́ɛya la bhée, á gbú lá ó wɛ́ɛ mín nvɔ́, án ŋwɛ́ɛn o kóman ó myɛ́n.»

Currently Selected:

Luka 22: MXX

Highlight

Copy