Matiyu 10

Ɛnza ŋé a yɛ kaamɔɔndhye ndá ni fyáa ó bhyáashaala

Maki 3.13-19; Luka 6.12-16

1Ɛnza ŋé a yɛ kaamɔɔndhye ndá ni fyáa ólu kíi tó kɛ lámansa yóo ŋólu gbɛ́ ŋó sébhaaya o dí i man, kɛ yangalo óni shaaya bɛ́suu lákɛɛnya sé dí i man. 2Aa céladhye ndá ni fyáa mín myáashaa, olu tɔ́ɔ ó lée lúu nín: Jónan ó tɔ́ɔ tɛɛ kó Simɔn, o mín ŋe kíila kó Piyɛli, o lɔ́ɔcɛ Andele; Zebede dhyénjɛ fyáa ólu: Zaki ní Yaya; 3Filipu ní Batelemi, Tomasi ní Matiyu, nísɔɔnmyaanbhaacɛ o; Alife dhyénjɛ Zaki, óni Tade; 4Simɔn Zelɔti#10.4 Zelɔti tɔ́ɔ o kɔ́ɔ yáa nan kɛ́ lé kó a wɛɛ í wíi Lomɛn olu kanman. ní Zudasi Sikaliyɔti mín ngáa Ɛnza ɲanva.

Ɛnza ŋé a yɛ kaamɔɔndhye ŋolu bhyáashaa cé mínnan

Maki 6.7-13; Luka 9.1-6

5 Ɛnza ŋé a yɛ kaamɔɔndhye ndá ni fyáa ólu bhyáashaa cé mínnan o lée nín: A kɛ́nan sé káafii olu yɛ só ólu la, a kɛ́nan sé Samali só ó sí la. 6Áa táa Izalayɛlika o léelu fɛ́ yé, o mínnu e óo saa túunnin nú lé. 7A kɛ́ kɛ́ táala, áa táa lakawanin kɛ́ le kó: «Ala yɛ́ Mansaya ó lágɛɛnman wáati o wɛ́ɛ bhyáa sé le! 8Áa yaangalotɔ ólu lákɛɛnya, áa su ólu lákuun, áa kwáantɔ ólu lákɛɛnya, áa lámansa yóo ŋólu gbɛ́. Ŋwɛ́ɛn o kó ólu kɛ́ ó sé dí a man gbɛ́ɛgbɛɛ, oo lɔ mínngɛ, áa o kó ólu kɛ́ gbɛ́ɛgbɛɛ. 9Á kɛ́nan sɛ́ɛn, wáman wɛ́ɛ, wáman shaanɛɛn wɛ́ɛ bhyáa a jífa lɔ. 10Á kɛ́nan bhɔɔ, wáman deeke fyáa, wáman sawaa lú, wáman gbéle ta. Kɛ mansɔɔ bháalakɛdhye ó kákan kɛ a yɛ́ sunman ŋo sɔɔ.

11A kɛ́ lo só óo só la, áa ɲaanli kɛ kó yɛ́nee e sé kɛ́la a yɛ́tii lé yénɔn. Áa tó o yɛ́tiiya ó la fɔ kɛ táa sé a táasan o mán. 12A kɛ́ fáa lo bhó nɔ́ la, áa fóli kɛ. 13Ni o bhónanbhaa olu kɛ́ í bhóo síi a kɔ́ɔ, i yáa o hɛ́lɛ o sɔ́ɔ, wáa ni i man í bhóo síi a kɔ́ɔ, i táa a yɛ́ fóli o hɛ́lɛ o sɔ́ɔ. 14Ni i man í ɲán sii a kɔ́ɔ, wáman kɛ í tóo sii a kómankan kɔ́ɔ bhó mín ní só súusuu la, áa táa kɛ bhɔ́ o ywáa ó lɔ. A táatɔ ó, áa sé mangbasi kɛ a sénan gbánbga ŋo tó yé.#10.14 A sénan gbánbga ŋo tó yénɔn: Oo Yawudhyaa olu yɛ́ kókɛse né le; o kɔɔ o tɔ́ɔ lé kó kaamɔɔndhye ŋolu ni o sómɔɔn ólu mán bhyɛ né wé. Ko mín ngɛ́ táa i sɔɔ i gbu lu bhyaa fɔ née wé. 15Tó ní fɔ a yɛ́ tínɲan in ne ngó, kítitɛɛ ló ŋo la, bhóo yáa gban o sómɔɔn olu lá kɛ tínmin Sodɔmu yamaan ólu ní Gomɔɔ yamaan ó ka.»

Lɔbhawili mínnu káa kɛ́ kwɔ́la

Maki 13.9-13; Luka 21.12-17

16«Áa í tóomanlɔ! Ní a bhyáashaala óyoo saa lú kɛ táa kóngowuu olu cɛ́man. Oo lɔ mínngɛ, áa i yáakii tó a yɛ́ɛ lɔ óyoo san olu, a yɛ́ kó ó ló mbɛ́ a gbɛ́ óyoo biininngbɛ o. 17Áa í yáakii tó a yɛ́ɛ lɔ, kɛ mansɔɔ mɔɔn ólu yáa á ló kítitɛɛbhaa ólu bhóo, óni kɛ a gbási gbɛ́nɲɛn lá i yɛ sɛ́ɛbho ŋolu la. 18I yáa táa ni ále yámaantii ólu ní mansa ólu kɛ́ɛnnan né kósɔn. O kó ó yáa kɛ́ sɛ́ɛyaman lé ilee ní káafii olu yɛ́. 19Wáa í kɛ a ló mɔɔn ólu bhóo, a kɛ́nan hánmin a fɔ́dhyaa ŋólu ní a kómanseɲan o tá fa nvɛ́. A káa dhyaa mínnu fɔ, olu yáa yíi a mán o wáati o lɔ, 20kɛ mansɔɔ a káa dhyaa mínnu fɔ, olu táa kɛ́ ále gbúlu fɔ́dhyaa ne. A Fá Ní Sɛnnɛnyanin ŋo lé káa o kóman ólu ló a lálɔ.

21Bhádhyeman ŋólu yáa kɛ́ ɲɔ́ɔn yɛ saya ó sɔ́ɔbu le. Fa ólu yáa o sí kɛ́ i dhyé ŋólu la. Dhyé ŋólu yáa í ɲányɛɛman í fa ólu mán kɛ i fáa. 22Bɛ́ yáa a mánbhɔ né tɔ́ɔ ó kósɔn. Wáa mɔɔn mín ngɛ í lɔ́ja kɛ táa sé a la ŋó mán, o yáa kísi. 23I kɛ a tɔ́lɔ só lɔ́la, áa bwée kɛ táa a lɔ gbɛ́ɛ la. Tó ní fɔ a yɛ́ tínɲan in ne ngó, a táa wɛɛ Izalayɛli só ó bɛ́ lɔyaalala sánnin mɔɔn Dhyénjɛ ó nán ó cɛ.

24 Kaamɔɔndhye ŋo sí mán nvísaa a kaamɔɔn o le, bháalakɛdhye nzí mán nvísaa a kunndii o le. 25Kaamɔɔndhye mín ndá tɔ́lɔya mán tínmin a kaamɔɔn o tá o ka, o kaamɔɔndhye ŋo kákan né kɛ í ɲáanli, tó bháalakɛdhye mín ndá tɔ́lɔya mán tínmin a kunndii o tá o ka, o kákan né kɛ í ɲáanli. Fɔ́ kɛ́ kɛ́ lútii gbú o mán kó Bɛlizebuli, lúmanbhaa olu tá o mánfaa yóoɲan kɛ tínmin o ka ŋan!

Luka 12.2-7

26A kɛ́nan sháan mɔɔn sí ɲɛn. Kɛ mansɔɔ fénoonaankɛnin nzí tɛ́ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman. 27Ngɛ́ fé ŋóo fé nvɔ a yɛ́ diwi o lɔ, áa o lábhɔ tée lɔ. Kóman mín ngɛ fɔ́ a tóo lɔ, o kóman ó yáa lá bhó ŋó kúnnɔn. 28Mɔɔn mín núu mɔɔn fáala tó í tɛ́ sé kɛ a ni o fáa! A kɛ́nan sháan ólu ɲɛ́n. Áa sháan Ala le ɲɛn, Ala lée sé kɛ mɔɔn fásisoo óni í ní o fyáa bɛ́ láfii yaananman o lɔ kɛ i lahalaki yé. 29Mɔɔn tɛ́ kɔ́ɔn dhyénin nvyáa felela dáasi kéembe la a? O ló mbɛ́ kwɔ, kɔɔnnin ŋo sí tɛ́ í bénan lúuman ni á Fá Ala mán dyɛn o man. 30Sáanko ále a! Háanin a kúnzhe ó yɛ́ɛ, Ala á ó bɛ́ lá nɔ. 31Oo lɔ mínngɛ, a kɛ́nan sháan. Álee a físaa kɔ́ɔn dhyénin ŋólu lé.»

Ɛnza ngó kɛ í lɔ́la bɛ́ ɲánla kó íi a yɛ kaamɔɔndhye ne

Luka 12.8-9

32«Mɔɔn mín ngɛ í lɔ́ a lá bɛ́ ɲánla kó álee né yɛ́ kaamɔɔndhye ne, né yáa nɔ́ la Nvá ɲánla o míin sá ŋó lɔ ngó o tíi óo ndá le. 33Wáa ni mɔɔn mínngɛ í bá né lɔ mɔɔn ólu ɲánla, né yáa bá o tíi ó lɔ Nvá míin sá ŋó lɔ o ɲánla.»

Ɛnza mán nan láha lálo ndɔ́ɔ lɔ, a nánnin ŋé kɛɛ lé lálo ndɔ́ɔ lɔ

Luka 12.51-53; 14.26-27

34«A kɛ́nan kɛ́ a kɔ́ɔnnɔn kó nánnin ɲé hɛ́lɛ o lé lálo ndɔ́ɔ lɔ́ lúukolo ó ka, nánnin ndɛ́ hɛ́lɛ lalo ndɔ́ɔ lɔ. Nánnin ŋé kɛɛ lé lálo ndɔ́ɔ lɔ. 35Kɛ mansɔɔ nánnin ɲe lé kɛ cɛ lo dhyénjɛ óni a fa cɛ, dhyémuso óni a man cɛ, muso óni a manmuso cɛ. 36Mɔɔn yɛ́ɛla bhónanbhaa o léelu káa kɛ́ í yúu le. 37Mɔɔn mín nva wáman a man kɛ́ dhyáa a yɛ kɛ tínmin né ka, o tíi ó mánngan kɛ kɛ́ né yɛ́ kaamɔɔndhye ne, mɔɔn mín dhyénjɛ wáman a dhyémuso kɛ́ dhyáa a yɛ kɛ tínmin né ka, o tíi ó mánngan kɛ kɛ́ né yɛ́ kaamɔɔndhye ne. 38Mɔɔn mín man a gbáanɲii o tá kɛ bhyáa né kwɔ́ kɛ mansɔɔ a tɛ fɛ́ ké ii ale fáa né kósɔn, o tíi ó mánngan kɛ kɛ́ né yɛ́ kaamɔɔndhye ne. 39Mɔɔn mín ŋé fɛ́ kɛ a ni o lámala, o tíi ó yáa bɔɔn a ní o lɔ, waa mɔɔn mín ngɛ bɔɔn a ni o lɔ́ né kósɔn, o tíi ó yáa ɛliyanan o sɔ́ɔ.»

Bhaaye é kóbhɛɛkɛ ó la

Maki 9.41

40«Mɔɔn mín ngɛ í ɲán sii a kɔ́ɔ, oo í ɲán siila né lé kɔ́ɔ wé. Mɔɔn mín ngɛ í ɲán sii né kɔɔ, oo í ɲán siila né bhyáashaabhaa o lé kɔ́ɔ wé. 41Mɔɔn mín ngɛ í ɲán sii Ala yɛ céla ó kɔ́ɔ o yɛ́ célaya ó kósɔn, o tíi o yáa o céla o yɛ́ bhaaye o ɲɔ́ɔn nzɔ́ɔ, mɔɔn mín no ngɛ́ í ɲán sii Alamɔɔn o kɔ́ɔ o yɛ́ Alamɔɔnya ó kósɔn, o tíi ó yáa bhaaye sɔɔ Alamɔɔn o la. 42Tó ní fɔ a yɛ́ tínɲan in né ngó, mɔɔn óo mɔɔn kɛ́ jíswaan ó jífyɛ ɲan kée dí ɲɛ́n kaamɔɔndhye ŋo bɛ́ lɔ fítiinin ŋo mán kó kɛ mansɔɔ aa né yɛ́ kaamɔɔndhye ne, o tíi o táa bɔɔn a saa o lɔ.»

Currently Selected:

Matiyu 10: MXX

Highlight

Copy