Matiyu 14

Yaya Bátizelikɛbhaa yɛ saya ó

Maki 6.14-29; Luka 9.7-9

1O wáati o lɔ, cɛ mín ndɛ́ɛ fáan lá Galile mála ó lɔ tó ale cɛ ó tɔ́ɔ tɛɛ kó Elɔdi, aa Ɛnza ngodhyaa ŋó myɛ́n. 2Aa fɔ a yɛ bháalakɛdhye ŋolu yɛ kó: «Yaya Bátizelikɛbhaa lée wé, a wɛɛ kúun kɛ bhɔ́ su ólu cɛ́man! O lé kósɔn káwananngo lú kɛ́ ó sé é a yɛ.»

3Wáa Elɔdi tɛ́wɛɛ fɔ kó kɛ Yaya lálɔ kɛ a sili tó kɛ a bhyáa kaso la. A tɛ wɛɛ o fɔ kɛ a kun ngɛ́ a bhádhyemannjɛ Filipu muso Elodiyadi ta ko o lé lɔ. 4Kɛ mansɔɔ, Yaya tɛ́wɛɛ fɔ Elɔdi yɛ kó a mánngan kɛ Elodiyadi tá a muso le. 5Elɔdi tɛ́ɛ fɛ́ kɛ Yaya fáa, wáa a tɛɛ sháannan yaman o ɲɛn, kɛ mansɔɔ yaman o tɛ́ɛ Yaya yacela céla lé le. 6Wáa Elɔdi wóolo ŋo sámyɛ ŋo la, mɔɔn mínnu kíinin ndɛ́ɛ súnmannɔɔ ndɔ́ɔ o lɔ, Elodiyadi dhyémuso é lɔ ngɛ́ olu kɛ́ɛnnan. A ko é dhyáa Elɔdi yɛ. 7Kó ólu kɛ́ɲan man cé, aa láheli ta o síngbiinin ŋo yɛ kó o kɛ́ fé ŋóo fé ngófɔ a yɛ, kó a yáa o kɛ́ a yɛ. 8A lɔsunin ngwɔ a mán bhóo, Elɔdi dhyémuso é fɔ kó: Yaya Bátizelikɛbhaa kún ŋó bhyáa tása lɔ kɛ́nan a di mán yánun. 9O kóman óo mansacɛ o ɲánlasii. Wáa a yɛ láheli ta ni ŋólu ni a latuunnan ólu kósɔn, aa fɔ kó kɛ Yaya kún ŋo dí dhyé ŋó mán. 10Aa mɔɔn bhyáa kɛ táa Yaya kún ndɛ́ɛ kasobho ŋo la. 11Ii a kún ŋo bhyáa tása lɔ kɛ́nan a lo síngbiinin ŋo bhóo, tó síngbiinin óo Yaya kún ŋó ló a wóobhaa bhóo. 12Yaya yɛ́ kaamɔɔndhye ŋolu nan Yaya fée ó tá kɛ a sutaa, tó kɛ táa saan o láce Ɛnza nan.

Ɛnza ŋé lɔ́min dila cɛ wáa lóo mán

Maki 6.30-44; Luka 9.10-17; Yaya 6.1-14

13 Ɛnza ŋé Yaya sáyako o myɛ́n mínngɛ, aa í bhyáa kúun nɔn kɛ bhɔ́ yénɔn kɛ táa í kéenan ywáa cɛ́bhɔnin nɔ lɔ. Mɔɔn ólu a táako o myɛ́n, tó yamandhye ŋé bhɔ́ só ólu lá kɛ bhyáa Ɛnza nɔn fɛ́ i sénan. 14Ɛnza ŋé bhɔ́ Kúun ŋó lɔ́ mínngɛ, aa yamanba ó yé, i mánɲwaan é lo a lɔ tó aa i yɛ yaangalotɔ ólu lákɛɛnya. 15Ywáala é sé mínngɛ, a yɛ kaamɔɔndhye ŋolu í mángbaa a lá kɛ fɔ a yɛ kó: «Ya ŋó cɛ́bhɔnin ɲé, wáati o ló ŋwɛ́ɛn yánva. Yaman ó lábhyaa ké ii táa sunman nzá an ndɔ́ɔfɛ só ólu la» 16Waa Ɛnza ŋé fɔ i yɛ kó: «I mánngan kɛ táa, ále gbúlu a sunman ndí i man!» 17Ii fɔ Ɛnza ɲɛn kó: «Búlu lóo ní yɔ́ɔ dhyé nvyáa gbóto lée án móo yánun.» 18Ɛnza ngó i yɛ kó: «Áa nan olu lé ɲɛ́n.» 19Ɛnza ŋé fɔ kó yaman o a í síi lúu man bín ŋó ka. Oo kɛ́ mínngɛ Ɛnza búlu lóo ólu ní yɔ́ɔ dhyé nvyáa ó tá, kɛ í ɲán layɛɛ sángboo o mánshaa fɛ́ kɛ Ala bálika bhɔ́, tó kɛ búlu ólu kúunndɛɛtɛɛ kɛ i lo ló a yɛ kaamɔɔndhye ŋolu bhóo. Ólu búluguun ŋólu lɔ́taandaa yaman o la. 20Mɔɔn ólu bɛ́ é lɔ́minkɛ kɛ fá. Tó ii nán seenin ndá ni fyáa láfanin né sunman ndɔto ó la. 21Mɔɔn mínnu tɛ́ɛ lɔ́minkɛsɛɛ o lɔ ólu tɛ́ɛ cɛ wáa lóo lú siya bhɔ́la ó tɛ́ muso ólu ní dhyémuu ólu la.

Ɛnza ŋé táaman kɛ́la bhá ó ka

Maki 6.45-52; Yaya 6.15-21

22O kó óo bhɔ́ í lá tɛ́nmɛn, Ɛnza ŋé fɔ a yɛ kaamɔɔndhye ŋólu yɛ kó ii í bhyáa Kúun ŋó lɔ kɛ bhá ó tɛ́ɛ a ɲɛn kɛ táa a ɲan dɔ́ o mán sánnin ale a yaman ólu lábhyaa. 23Aa yaman ólu lábhyaa mínngɛ, aa í yɛ́ɛ í kéenan tii ó ka kɛ í sɛ́ɛ. Ywáa ó sé ké aa yénɔn bhée. 24Kúun ŋó wɛ́ɛ í ywáa yáɲan bhákaan ŋo la. Wáa fwɛ́ɛn ó bhyáa kóɲan o mán, jífwɛɛn o tɛ́ɛ Kúun ŋó láfinzanvinzanan kɛ mansɔɔ fwɛ́ɛn ó tɛ wɛɛ gbíiya i ka. 25Fáyi o mán, Ɛnza ŋé táaman kɛ́ bhá ó ka kɛ táa a yɛ kaamɔɔndhye ŋólu saala. 26Kaamɔɔndhye ŋólu a yé táaman kɛ́la bhá ó ka mínngɛ, ii sháan koyoongɛ fɔ́ ii fɔ́la kó: «Mɔɔn lɔ́ lé sáula káa kɛ́ wé!» Ii gbáa ngbáa sháanɲan bhóo. 27Ɛnza ŋé fɔ i yɛ o ywáaninngee ŋo lɔ kó: «Áa í lɔ́ja! Né lée wé, a kɛ́nan sháan!» 28Oo kɛ́ mínngɛ, Piyɛli é kóman ó tá kɛ fɔ kó: «Mantii o, ni íle lée wé, a fɔ kó ní táaman kɛ́ jí ó ka kɛ táa í saala.» 29Ɛnza ngó a yɛ kó: «Nan!» Piyɛli é bhɔ́ Kúun ŋó lɔ tó kɛ táaman kɛ́ lámyaan jí ó ka kɛ táa Ɛnza manshaafɛ.

30Wáa Piyɛli é yé mínngɛ óo fwɛ́ɛn ó wɛ́ɛ bwóɲan, aa sháan. O kɛ́ɲan o mán, aa táa yíi lé jí ó kɔɔ. Aa gbáa ndéeman kó: «Mantii o, ngála!» 31Íkɔlɔ téeman, Ɛnza ŋé í bhóo lábhɔ kɛ a myaan tó kɛ fɔ a yɛ kó: «Í ló yɛ lánanya ó lo ŋa lɔ́ɔ! Íi síkala mínnɛɛn le la?»

32I bɛ́ é í yɛ́ɛ Kúun ŋó lɔ, fwɛ́ɛn óo í mánla. 33Kó ólu kɛ́ɲan man cé, kaamɔɔndhye mínnu tɛ́ɛ Kúun ŋó lɔ, ólu í kúnmɛɛn nɔ́kɛɛ Ɛnza ɲɛn ni fɔ lé a yɛ kó: «Kɛ fɔ tínɲan in ne, íle lée Ala dhyénjɛ óle!»

Ɛnza ŋé Zenezalɛti lánga ŋo yaangalotɔ ólu lákɛɛnyala

Maki 6.53-56

34Ii wɛɛ bhá ó tɛ́ɛla kɛ sé Zenezalɛti mála o lɔ. 35O ywáa ó mɔɔn ólu Ɛnza manlɔ, ii táa o kóman ó láse o mála ywáa bɛ́ lɔ, tó mɔɔn olu nan yaangalotɔ ó bɛ́ lé Ɛnza ɲɛn, 36Tó kɛ a dɛ́li kó aa dyɛn ké yaangalotɔ ólu a í bhóo túu a yɛ deekeba ó lágboo o lá. I súu súu é í bhóo túu a lá, o mɔɔn ó bɛ́ é kɛ́ɛnya.

Currently Selected:

Matiyu 14: MXX

Highlight

Copy