Matiyu 16

Falizɛn ŋolu ní Sadusi olu kó kɛ tɔɔmansii lɔ yáa i la

Maki 8.11-13; Luka 12.54-56

1 Falizɛn ŋolu ní Sadusi ólu í mángbaa Ɛnza nan a lɔswaan ndɔ́ɔ lɔ́: Tó íi fɔ a yɛ kó aa tɔɔmansii kée ngɛ́ i ɲánla, kɛ́ bhɔ́ sángboo o lɔ. 2Ɛnza ŋé i yawi kó: «Tee ó kɛ́ kɛ́ bénan wáati mínnɔn, áa fɔ́la kó: ‹Síin, tée ó táa í ɲánlasii, kɛ mansɔɔ sámanlaa ó mánywɛnin ɲe.› 3Tó a kɛ́ sámanlaa ó mánywɛnin ɲé sɔɔ mán, áa fɔ kó: ‹Sá ɲáa nan bí, fwɛ́ɛn ló ɲáan bhyáa, kɛ mansɔɔ sámanlaa óo táa í mánfin ne.› Áa sháa sámanlaa ó kó ólu ɲánfɔla, wáa tɔɔmansii mínnu é yáala wáati míin nú lɔ, a tɛ sháa olu ɲánfɔla! 4Án ɲɛ́n wáati miin mɔɔn mínnu manɲin. Ala kanmyaanbhɛɛ ó lée lúu tɔɔmansii ɲíinnan. Tɔɔmansii gbɛ́ɛ táa kɛ́ i yɛ́ bhée ní céla Zonasi yɛ́ tɔɔmansii o tɛ́.» Tó aa i lábhyaa, ii táa.

Kaamɔɔndhye ŋolu tɛ́ bhɔ́la Ɛnza ɲɛn kóman ó ɲánle

Maki 8.14-21

5 Kaamɔɔndhye ŋolu táatɔ ó lé bhá ó ɲán dɔ́ o mán íi ɲan kɛ́ búlu lú tá. 6Ɛnza ŋé fɔ i yɛ kó: «Áa a yáakii tó a yɛ́ɛ lɔ́ Falizɛn ŋólu ní Sadusi ólu yɛ́ lévu o mán!» 7Kaamɔɔndhye ŋolu fɔ ɲɔ́ɔnɲɛn kó: «Ɛnza ŋé o fɔ́la kɛ mansɔɔ án man búlu tá!» 8I tɛɛ kóman mínnan, Ɛnza ndɛ́ɛ o lɔ, aa i manɲaankɛ kó: «Áa fɔ́la ɲɔ́ɔnɲɛn kun mínnɛɛn lé la kó búlu tɛ́ a bhóo? A yɛ́ lánanya ó ló ŋan lɔ́ɔ! 9A mán hákii sɔ́ɔ bhá ŋan? Búlu lóo mín ŋé í lɔ́taa cɛ wáa lóo ólu la, o kó ó tɛ́ a ɲán lá bhée ŋan? Áa seenin ɲée lé lafa o búlu ólu tɔ́ ólu la? 10Tó búlu wóonvyaa mín ŋé í lɔ́taa cɛ wáa náannin ó la, óni áa nán seenin ná mín né o búlu ólu tɔ́ ólu la, o kó ó tɛ́ a ɲán lá bhée íkwɔ a? 11Aa kɛ́ díi tó a mán bhɔ́ ɲan le kó ngan ndɛ́ tɛ́ búlu mán? Wáa á i yáakii tó a yɛ́ɛ lɔ́ Falizɛn ŋolu ní Sadusi olu yɛ́ lévu o mán.» 12Oo kɛ́ mínngɛ, kaamɔɔndhye ŋolu bhɔ́ ɲan le kó Ɛnza mán kɛ́ fɔ́la kó ii í yáakii tó i yɛ́ɛ lɔ́ búlulafuunnzɛɛ o tá fa nvɛ́, wáa kó ii í yáakii tó i yɛ́ɛ lɔ́ Falizɛn ŋolu ní Sadusi olu yɛ́ kaa ŋo lé tá fa nvɛ́.

Piyɛli é lásela kó Ɛnza née Kísibhaa o le

Maki 8.27-30; Luka 9.18-21

13 Ɛnza ŋé táa Filipu Sezale mála o lɔ. Aa a yɛ kaamɔɔndhye ŋolu mánɲaankɛ kó: «Mɔɔn ólu tá fɔli o lɔ, mɔɔn Dhyénjɛ ó yɛ́ɛtii lé?» 14Ii a yawi kó: «Lɔ́lu kó íi Yaya Bátizelikɛbhaa le le, lɔ́gbɛɛ lu kó íi Eli le le, tó lɔ́gbɛɛ lu yɛ́ɛ kó íi Zelemi le le wáman kó Ala yɛ céla gbɛ́ɛ.» 15Ɛnza ŋé a yɛ kaamɔɔndhye ŋolu mánɲaankɛ íkwɔ kó: «Tó álee ɲánla, ní yɛ́ɛtii le?» 16Simɔn mín ndɔ́ɔ íkwɔ kó Piyɛli, oo fɔ kó: «Íle lée Kílisi o le, Ala ɲáanman ŋó Dhyénjɛ ó.» 17Oo kɛ́ mínngɛ Ɛnza ŋé fɔ a yɛ kó: «Nisɔdhyaa é í yɛ, Yaya dhyénjɛ Simɔn, kɛ mansɔɔ mɔɔn mán o tínɲankoman míin nábhɔ í ɲánla. Nvá mín ŋé sá ŋó lɔ, o lée a lábhɔ í ɲánla. 18Tó ní fɔ í yɛ́ ngó íle Piyɛli#16.18 Piyɛli tɔ́ɔ o kɔ́ɔ o tɔ́ɔko fáa o. i lée fáa gbɛ́yanin né le. Mɔɔn é bhó ŋo lɔ́la fáa man tɛ́nmɛn, ɲáan ɲɛ́n lánanbhaa olu kwɔ́sii íle lá o ɲán o mán. Háanin saya ó ɲán o táa lá o lánanbhaa olu mán. 19Ɲáan sángboo ó Mansaya ó lákeli ólu dí i mán. O ɲán o mán, íle kɛ́ fé ŋóo fé nzíli lúukolo ó ka, o sílinin ɲáan kɛ́ sá ŋó lɔ, í kɛ́ fé ŋóo fé nvwée lúukolo ó ka, o yáa fwée sá ŋó lɔ.» 20Ɛnza ŋé wɛɛ kɛ fɔ a yɛ kaamɔɔndhye ŋolu yɛ kɛ mangbɛya kó i kɛ́nan fɔ mɔɔn sí yɛ kó ale lée Kílisi o le.

Ɛnza ŋé a yɛ tɔ́lɔya óni a sayako o fɔ́la

Maki 8.31--9.1; Luka 9.22-27

21Kɛ ta o wáati o mán, Ɛnza ŋé fɔ ó lámyaan a yɛ kaamɔɔndhye ŋolu yɛ́ cɛ́ɛne kó: «Fɔ́ ndáa Yeluzalɛmu kɛ táa tɔ́lɔya myáan gbúnigbu kɛ́ cɛba ólu ní faanlɛɛɲansebhaa olu kúnndii ólu ní sɛliya kaamɔɔn ólu bhóo. I yáa kɛ ké ní saya mánsɔɔ, wáa tee sawaɲɔɔnlo ŋó ɲáan kúun kɛ bhɔ́ saya bhóo o mán.»

22Oo kɛ́ mínngɛ Piyɛli é Ɛnza ngíi í kéenan kɛ kóman a yɛ kɛ mangbɛya kó: «Fɛ́sɛ, Mantii o! O kó ólu táa í sɔ́ɔ tún!» 23Wáa Ɛnza ŋé í ɲán yɛ́ɛman Piyɛli lɔ́ ni fɔ lé a yɛ kó: «Táa kɛ bhɔ́ ngwɔ́, Sɔtaannan! Ílee né yɛ́ kó ólu cáannzhaa lé ɲíinnan, Kɛ mansɔɔ í tɛ́ i mílila óyoo Ala, wáa óyoo mɔɔn ólu.»

24O lɔ Ɛnza ŋé fɔ a yɛ kaamɔɔndhye ŋolu yɛ kó: «Ní mɔɔn mín ŋé fɛ́ kɛ́ í bhyáa ngwɔ́, fɔ́ o tíi o a í bá a yɛ́ɛ lɔ. Kɛ a yɛ́ɛ gbáanɲii o tá kɛ́ bhyáa né kwɔ́. 25Kɛ mansɔɔ mɔɔn oo mɔɔn é fɛ́ kɛ a ni o kísi, o tíi o yáa bɔɔn a ní o lɔ. Wáa mɔɔn óo mɔɔn kɛ bɔɔn a ní o lɔ́ né kósɔn, o tíi o yáa ɛliyanan o sɔ́ɔ. 26Oo mínnɛɛn le ɲánla mɔɔn mán kɛ́ dínɲanmanfe ŋó bɛ́ sɔ́ɔ tó kɛ táa bɔɔn í ní o lɔ́? Mɔɔn ó sé kɛ́ fé mínnɛɛn lé dí a ní o kunmanka lé? 27Mɔɔn Dhyénjɛ, óni a yɛ malɛɛka olu yáa nan a Fá Ala yɛ nɔ́lɔya ó lɔ, tó kɛ mɔɔn bɛ́ kée ngéenan saa o di kɛ kéeɲan ni i kɛ́ko olu le. 28Tó ní fɔ a yɛ́ tínɲan la ngó: Mɔɔn mín núu yánun nín, o lɔ́lu yɛ́ɛ táa sayakɛ sánnin mɔɔn Dhyénjɛ ó a nan a yɛ́ mansaya ó lɔ.»

Currently Selected:

Matiyu 16: MXX

Highlight

Copy

Want to have your highlights saved across all your devices? Sign up or sign in

Learn More About Mahou